Geh tŭ bol he ò ơn lài tŭ jơ bơ srăm Sră Goh hala gơlơh bol glăr tòm gùng dà jat Yàng. Kung geh tŭ nol he kung ò git wă bơh Yàng dồ bă jrô dơp. Bơta he git bè Kơnràñ bè lă bă lơ yă mờ mhăr lòt găn ngăn. Mơya, gen tờm rơ yásh jơh tơl bơta hơ̆ là hwềng nùs bol he neh lơh roh bơta koñ gơboh gơwèt mờ Yàng mờ kơp koñ git Kơnràñ oă rlau tai. Bulah bè hơ̆, tòm Bơtau Krist, bol he sùm geh tŭ nàng rê wơl mờ Kơnràñ.

Ngai do, ngai 01/02/2026, Bơta Hòi Dan Kòp Ngai dan jà ồng mò oh mi bơtê bal Jơnau Yàng bơh kơnòm dê bơta dong kòl Paul Dailey bơh tơnggume DÒP GIT BƠTAU KRIST LÀ DỜNG MÀNG RLAU JƠH.

“Ngan behơ̆, añ sền jơh ală bơta kung be bơta roh lơm, bơh bơta dòp git Yàng Jesu Krist, Yàng añ jê, la dờng màng rlau jơh; bơh Kơnràñ mơ añ neh sang lòi jơh ală cồng nha hơ̆. Añ sền ală bơta hơ̆ kung be thul ơmul tồ añ in dòp geh Bơtau Krist,” (‭‭Philip‬ ‭3‬:‭8‬)

“Ngan behơ̆, añ sền jơh ală bơta kung be bơta roh lơm, bơh bơta dòp git Yàng Jesu Krist, Yàng añ jê, la dờng màng rlau jơh; bơh Kơnràñ mơ añ neh sang lòi jơh ală cồng nha hơ̆. Añ sền ală bơta hơ̆ kung be thul ơmul tồ añ in dòp geh Bơtau Krist, Ơ oh mi, añ ò kòp añ neh sơmbat geh rau, mơya añ kư̆ lơh dô bơta: Lòi hŭi ală bơta bơh ngkòi, mơ ntoat jat ală bơta hơđap; Behơ̆ añ ntoat song hơ tơnggu tồ sơmbat geh phan ƀàn bơh bơta hòi sac hơđang trồ Yàng Tom Trồ dê tòm Yàng Krist Jesu.” (Philip‬ ‭3‬:‭8‬, ‭13‬-‭14)

Là dồ nă cau dòn Yàng, gen bol he kung neh đọk tus sèng Sră Goh do. Mờ dilah bol he là dồ nă cau koñ gơboh Yàng Je-su gen ala jơnau do ngăn rơp cèng tús tòm hwềng nùs bol he dồ bơta. Añ ò git bol he là cau lơi, tòm Hìu Jum Goh lơi, mơya tŭ đọk sèng do, bol he rơp đơs mờ Yàng lah: “Ơ Yàng, hơ̆ là bơta kòn kơp koñ.”

Mơya bơh tòm tŭ sơ tờm đọk ala sèng Sră Goh tus dê tòm ngai do, gớs bơta tòm gơl gơlik gớs sơl? Gen bol he ngăn sền “Bơta dòp git Bơtau Krist là dòng màng rlau jơh” bè cau bơta Pol neh đơs sơl? Gen lùp ís să tòm he bè do: Ñchi bơh tài rùp Yàng Je-su tòm rài kís bol he kòp ngai lòt găn gơlik gớs lu li lơm taih? gen ngăn, jrô dơp tòm dơr lăm, bol he rơp gớs jơnau hơ wơl.

Nàng dòp git Yàng mờ kís Kơnràñ, cau bơto Pol đớs: “Añ mìng lơh dồ bơta…” gơtha là ồng sền song dê Yàng, ò lời dồ bơta lơi lơh gơ kwă Mơya, tòm rài kís ngăn ò là bè hơ̆. Dunnia mờ Satan sùm jòi tơl gùng nàng lơh he in ò sền “ dồ bơta” dờng màng jơh. Kòp ngai lòt găn, bol he gơ tơmut tòm kơp bơta kơlôi rcăng. Nùs ngac ngăr mờ bol he ơn Yàng in bơh tŭ sơnròp dòn dòp Kơnrañ gơlik gớs ngềt ngài. Bol he mìng găm rài kís bol glăr, ò gơs cồng nha. Gen bol he đăl git lah bol he neh lòi wơl bơta kwơ màng ngăn mờ Yàng ai he in mờ kư̆ ntoat jat ala bơta ò gớs kwơ mờ lu li jat rài kís yau dê.

Mơya, bơta hơ̆ ò di là bol he neh jơh bơta gơn kơnờm. Yàng Jê-su là Bơtau lơh gớs rùp rài kís bol he dê, mờ Kơnràñ kung là Bơtau rơp pơn jat lơh sir rùp hơ̆, lơh gơlik gơs dồ rùp ñiam hàng ngăn jat bè nùs koñ Kơnràñ dê. Gơ wèt mờ kòn mơnus bơta hơ̆ là rgơi gơlik gơs, mơya gơwèt mờ Yàng Tòm Trồ jơh tơl bơta là chài rgơi gơlik gơs. Kơnràñ rơ gùm ala pơnah bơcah tòm rài kís bol he mờ ngui gơ nàng lơh gơlik àng sơnđăn Kơnràñ.

Kung bè bol he, añ kung kung găm cơnđoà hơđang gùng do. Neh geh tŭ añ añ đăl sền să tòm neh lơh roh bơta koñ gơboh sơnrờp mờ Yàng Jê-su dê, lơh roh bơta kơp koñ git Yàng dồ bă jrô dơp. Mờ nàng geh pha bơta hơ̆ gen ngăn là ò đwơn soh. Mơya kòp ngai, tŭ añ pìn pơndêt să nàng jòi jat Yàng, bơta koñ gơboh Kơnràñ dê geh tuk mờ hơng wơl tòm hwềng nùs añ dê. Hơ̆ ngăn là bơta tòm lơh tòm bồ dơng ngoh mờ hwềng soàn, mìng nàng sền song “dồ bơta” dờng mang ngăn. Mơya Yàng Tòm Trồ là song ring. Kờp tŭ añ sang sơ bì bơta lơi mờ añ sền là gơklŏ, gen añ gŏ să tòm añ dòp git Yàng rlau tai. Bơh bơta nđàc Yàng dê, rùp rài kis añ dê kòp ngai geh Yàng tòm gơl mờ lơh gơs dồ phăn lơh niam tòm măt Kơnràñ dê.

Añ koñ bơt bơtào tơng guh băl mờ bol he tòm ngai do. Bulah bol he tìp bơta lơi, hala tŭ đọk sèng cih tòm sră Phi líp do, hwềng nùs he găm sùm đớs lah: “Ơ Yàng, ngăn hơ̆ là bơta kòn kơp koñ”, gen bơta hơ̆ gơtha là bol he găm geh tŭ nàng Yàng tòm gơl pa. Tŭs té dê đap măt Yàng, cùn gơl tang, mờ rac dăn mờ Kơnràñ lơh pah wơl hwềng nùs bol he geh chuh hơng Kơnràñ in. Rac dăn té mờ Kơnràñ tup dê rài kís he mờ sơ tờm lơh dồ bơta pa tòm gùng dà bol he dê. Kờp ngai, kòp tŭ, tús dê tŭ Bơtau Krist gớs gŏ tòm rài kís bol he dê.

Dan jà bol he dô nùs bal tòm bơta hòi dan: Khoai Yàng koñ gơboh kòn dê! Tòm tŭ kòn gớs bơta lơbơn lơño mờ ngài ngềt mờ Kơnràñ, dăn Yàng tề lăm mờ dong kòn geh pha, nàng hwềng nùs gớs bơta hơng wơl ồs Kơnràñ in. Dăn dong kòn ò sền phăn mơna tòm dunnia do là dờng màng rlau jơh mờ ya jơh rài kís kòn sùm kơp koñ dòp git Kơnràñ mờ kís tòm Kơnràñ kòp ngai. Kòn jơh nùs hòi dăn tòm sơnđan Yàng Je-su Krist, A-men.

Ơ ồng mọ, oh mi koñ gơboh, dòp git Bơtau Krist hơ̆ là bơta dờng màng rlau jơh gơwèt mờ bol he tòm ngai do ờ ơ? Hala găm gớs bơta lơi ndai ò di là dờp git Yàng găm ơm sùm tòm bồ tơngoh, hwềng soàn, là bơta sùm ơn lài tòm rài kís bol he sơl? Gớs bơta lơi găm lơh bol he in lơh roh bơta koñ kís Yàng in mờ dòp git Kơnràñ dồ bă jrô dơp ngăn sơl? Hơ̆ ò di là tồi glài, bơta gê ga hala bòl glăr rài kís mờng òs bol he sơl ơ? Gen jơh nùs tus dê hơđap măt Yàng mờ đơs mờ Kơnràñ ala bơta găm lơh hwềng nùs bol he gơlik gớs mrềt, mờ dan Kơnràñ chu wơl ồs koñ gơboh Kơnràñ tòm kòp nă bol tòm ngai do kung bè ala ngai tơnơ̆ găm tai tòm gùng dà rài kís bol he dê tus dê tŭ ngai bol he geh tìp wơl măt Bơtau Dong Klàs Yàng Je-su koñ gơboh he dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.