Nôel ling lang đei ăn truh bơyan rơ nŭk păng hiôk chơt, mă lei buŏl hăm đei lai yơ tơchĕng bơyan Nôel kŭm đei tơ’bưh hăm tơdrong hli ư? Hăm lơ bơngai lăm tơdrong hơ’mon Nôel blŭng a, ‘noh ưh kơ sĭ lăp jơ hiôk chơt mă lei kŭm đei kơplah tơ’bơ̆p hăm lơ tơdrong tơchĕng tơtăm, dôm tơdrong tim mă băt, dôm tơdrong jang nhen ưh kơ gơh. Nhen thoi ‘bok Yôsep păng lu bơngai wei triu, trŏ kơplah jơ ei, lu bơ̆n kŭm đei chă ‘bôh tơdrong lui ngeh păng nuih pơ̆n wă năm hlôi kơ tơdrong hli lăm chăl arih ‘bĕnh tơdrong hiơ̆k bơngơ̆t.

Năr ‘nâu, năr 13/12/2024, tơdrong tơdă Amăn Jơ Krao Khan Rim Năr hơpơi đĭ đăng bơngai mơ̆ng hơdai tơchĕng nơ̆r Kră Yang hăm bơngai chih Wally Odum hăm kơ̆l ‘bai NÔEl PĂNG TƠDRONG HLI ĐƠ̆NG LU BƠ̆N

“Linh jang ‘lơ̆ng khan kơ lu sư: “Iĕm ‘nĕ kơ hli, yua kơ inh wă roi kơ iĕm tơdrong ‘lơ̆ng, tơdrong mă đĭ-đăng kon bơngai ‘nă hal.” (Luka 2:10)

Bơngai lui C.S. Lewis chih roi kơ hơ’mon mă sư đei kơ tơ̆ng kơ minh ‘nu bơngai duch ei lăm bơyan Nôel. ‘Bôh rup Kră Yang Yêsu pơm hăm ‘long ming ‘bơ̆t cham hnam hơkŭm ‘bơ̆t bơyan Nôel, sư đei tơhôih: “Ơ yang, trŏ lu sư đei iŏk tơdrong lui mơ̆t lăm dôm tơdrong! ‘Nhŏ kơ Nôel kŭm ưh kơ hơchăng!”

Tơdrong hơ’mon tơchĕng đei ‘maih hiĕk kŭm ưh kơ trŏ, yua kơ Nôel trŏ kơ bơyan ‘blŏk kơ tơdrong Kră Yang Yêsu jur lah!

Dôm tơdrong lăm bơyan Nôel inh đei hiôk hơiă hloh, ‘noh hơbŏ ‘bai hơri bơih tơdrong hlĭch chrơp tơpă. Mơn đei hiôk lăm jơhngơ̆m kơplah mơ̆t tơ hơnih răt tơmam, kơtơ̆ng đei ‘bai hơri “Hiôk Kră Yang Jur”. ‘Bai hơri ‘lơ̆ng rơgoh inh đei hiôk hơiă hloh ‘noh “Ơ! ‘Bêtlêhem Pơlei iĕ”, păng nơ̆r hơri inh ‘blŏk ling lang ‘noh: “‘Noh tơdrong chang gô ih oei hơ-taih, păng ‘nâu Sư jur bơih.” Tơchĕng pơwao dơ̆ng, Nôel hơbŏ kŭm trŏ kơ lu bơ̆n đei tơ’bơ̆p hăm dôm tơdrong hli kơdih.

Nôel ‘blŭng a ‘noh jơnăr ‘Bok Kei-Dei tơ’bôh Kon Sư kơ teh đak. Lăm tơdrong ‘noh, lu bơngai tang măt kơ đĭ đăng tơdrong hơmĕng păng dôm tơdrong hli tơrơ đơ̆ng kon bơngai đei pơpôi băl. Lăm pơlei iĕ ‘Betlehem, dôm tơdrong hơmĕng păng hiơ̆k bơngơ̆t kơ lơ jơhnơr đêl đei tơ’bơ̆p băl lăm rup minh ‘nu kon nge ‘bich lăm bơng ‘nhĕt.

Hơdrol ki, inh tim mă đei tơchĕng Nôel kŭm gơh tơ’bưh hăm tơdrong hli tơrơ, mă lei, blŭng a đei tơ’bơ̆p Kră Yang, bu mă ưh kơ đei tŏ sĕt tơtăm dah hiơ̆k bơngơ̆t- minh tơdrong hli kơplah tơ’bơ̆p tơdrong ‘nao hlĭch, tim mă đei băt. Yôsep sơkơ̆t hăm Mari, đei tơ’bơ̆p trŏ thoi tơdrong ‘nei. Minh ‘nu linh jang đei roi kơplah sư apo, chĕp ba tơdrong tơ’bôh gĭt kăl. Hla ar Mathiơ đei chih roi kơ tơdrong tơ’bơ̆p thoi âu:

“Klo sư Yôsep bơngai ‘lơ̆ng tơpăt, sư ưh kơ pơjăm Mari ngôi kư̆ kă hăm đe wă kơ sư mơlâu kơ đe ôh. Sư tơchĕng wă achăng Mari ră, mă-lei sư ưh kơ đei roi kơ đe ôh. 20Kơplah sư oei tơchĕng tơdrong ‘noh, na măng noh sư apo ‘bôh linh jang ‘lơ̆ng ‘Bok Kei-Dei jur khan kơ sư thoi âu: “Ơ Yôsep, kon sâu Đawit, ih ‘nĕ kơ hli iŏk Mari pơm akăn ih, mă sư oei anăp dang ei noh đơ̆ng Yang Bơhngol ‘Lơ̆ng ăn kơ sư.” (Mathiơ 1:19-20)

Nơ̆r linh jang ‘lơ̆ng đei pơma: “ih ‘nĕ kơ hli iŏk Mari pơm akăn ih”, trŏ kơ kăl tơpă. ‘Bôh hơđăl kơ Yôsep đei mơn ‘bôh hli tơchĕng kơ đĭ đăng dôm tơdrong đei bơih, tơdrong kŭm ‘bônh kơ hlôh. ‘Nâu bơih tơdrong tim mă lai yơ đei: Pơyô sư đei hơnăp mă lei khan ưh kơ đei ngôi kư̆ kă hăm đe nai. Kơplah linh jang ‘lơ̆ng pơma: “‘nĕ kơ hli”, nơ̆r ‘noh đei ‘bơm trŏ kơ tơdrong hli tơchĕng sư. Kŭm thoi lu bơ̆n, Yôsep đei hli tơchĕng kơ lu tơdrong sư kơdih ưh kơ hlôh. Kơplah Kră Yang đei pơm tơ’bôh hloh kơ tơdrong hlôh băt lu bơ̆n, trŏ kơ đei mơn hli tơtăm, ưh kơ hơđơ̆ng.

Linh jang ‘lơ̆ng đei pơma hăm Yôsep: “‘nĕ kơ hli”. ‘Nĕ kơ tơtăm kơ tơdrong pơư anăn kơdih, kŭm ưh kơ hli dôm tơdrong mă bơ̆n tim mă hlôh băt, yua kơ ‘Bok Kei-Dei oei bơ̆ jang lăm tôm tơdrong! Kơplah băt kơ Kră Yang oei bơ̆jang, lu bơ̆n đei hlôi đơ̆ng tơdrong hli tơrơ.

‘Noh ưh kơ minh tơdrong hli dêh lăm măng Nôel tơ ‘Betlehem. Lu bơ̆n kŭm ‘bôh hloi tơdrong hli hlĭch hlăch kơplah kon bơngai tơ’bơ̆p Kră Yang ‘Bok Kei-Dei.
“Jê̆ pơlei noh đei lu bơngai wei triu kral kơmăng wei-lăng triu sư tơ bri. Minh ‘nu linh jang ‘lơ̆ng Kră Yang năm tơ’bôh kơ lu sư. Tơdrong mơsêh mơyang pơchrang hơdah tăp dăr kơ lu sư. Lu sư hli tơtey. (Luka 2:8-9)

Trơdrong tơ’bôh Nôel kŭm oei lơ lăi, mă hăm Yôsep, lu bơngai wei triu, dah lu bơ̆n dang ei: ‘Nĕ kơ hli! Nôel bơih jơ Kră Yang mơ̆t lăm chăl arih lu bơ̆n wă ba ăn tơdrong hiôk chơt, ưh kơ trŏ tơdrong tơtăm. Kon nge ‘Betlehem oei đei pơm jing nơ̆r ră roi linh jang.

“Măng ‘nâu tơ pơlei Đawit, đe tơpŭ kơ minh ‘nu ‘Bok Dŏng Pơklaih, ‘Bok Kră Yang, Krist.” (Luka 2:11)

Dôm tơdrong hli tơrơ lu bơ̆n đei pơlung lăm măng ei, păng lu bơ̆n gơh hiôk ‘nă hal ôr re: “Bơnê kơ Kră Yang!”

Apinh đĭ đăng krao khan hơdai:
Kơkuh kơ Ih KrăYang, kon bơnê kơ Ih yua kơ tơdrong ‘mêm tih păng tơdrong hiôk hian Ih đei ăn kơ kon hăm lăm tơdrong Nôel. Apĭnh tơgŭm kon nuih kơtang hlôi kơ tơdrong tơtăm, hli tơrơ wă pơih jơhngơ̆m sơng iŏk tơdrong hiôk chơt đơ̆ng Ih. Pinh jơhngơ̆m kon ‘bĕnh blai tơdrong hiôk hian păng đon lui, wă kơ gơh chĕp ba tơdrong ‘mêm mơnat păng hơmĕng kơ lu bơngai jum dăr, thoi ŭnh hơdah Nôel pơchrang lăm măng mu. Kon kơkuh krao khan lăm Anăn Kră Yang Yêsu Krist, A-men.

Ơ lu bơngai mơ̆ng, bơyan Nôel ‘nâu, pĭnh lu bơ̆n đei tơ’blŏk kơdih: mă oei lăm kơplah jơnăr hiơ̆k bơngơ̆t ưh kơ hơđơ̆ng, Kră Yang ling lang oei hơdai ăn tơdrong hiôk hian păng hiôk chơt. Thoi nơ̆r linh jang ‘lơ̆ng sơ̆, tơ’bôh oei kơ tơ̆ng truh dang ei: “‘nĕ kơ hli!” Hơpơi, kơplah lăm tơdrong hơrih hiơ̆k bơngơ̆t, hrăt hrot, lu bơ̆n kŭm gô đei sơng iŏk tơdrong hiôk hian mă Kră Yang đei pơkă, wă kơ Nôel ling lang kơ bơyan ‘mêm mơnat păng hiôk hian kơ đĭ đăng bơngai.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buŏl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Giêsu ‘mêm kơ buŏl. Tơdrong tơdă hơmĕng kơ gơh tơ ‘bưh hăm buŏl.