Nyob hauv kev ua neej, muaj ntau zaug peb yuav pom tias yus zoo tsis txaus, tsis tsimnyog cia rau Vajtswv siv. Tej kev txhaum ua yav dhau los, lossis tej kev qaug zog tamsim ua rau peb cim civ tsim ib tug nrim rau yus tus kheej, peb xav tias yus tsis muaj txaus peev xwm los ua tiav Vajtswv lub homphiaj loj. Tiamsis Vajtswv tus zoo tsis tos kom peb zoo txaus mam siv peb. Vajtswv tab tom nrhiav tus uas muaj lub siab xav hloov pauv thiab cia Vajtswv txoj kev hlub ua tus coj kev.

Hnub no, yog hnub 06/11/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Marissa Nordlum dhau ntawm Zaj kawm CIA VAJTSWV SIV KOJ.

“Kuv yog tus uas muaj hwjchim yau dua Vajtswv haivneeg txhua tus huv tibsi los Vajtswv tseem muab Txojmoo Zoo uas hais txog Yexus Khetos txoj koob hmoov uas tsimtxiaj kawg nkaus rau kuv coj mus qhia lwm haivneeg.” (Efexaus 3:8)

Kuv yeej tseem nco ntsoov txog hnub ntawd, thaum zaum pe hawm hauv tuam tsev. Lub sijhawm ntawd, kuv yeej tseem yog ib tug menyuam kawm ntawv, tab tom zaum mloog lus qhuab qhia txog txoj kev sib tham hluas nkauj hluas nraug raws li Vajtswv lub siab nyiam thiab ua ib lub neej kom dawbhuv. Hnub ntawd, kuv yog tus coj kev pehawm rau pab tub ntxhais hluas, tiamsis thaum zaum mloog qhuab qhia, muaj ib txoj kev xav nws tshwm hauv kuv lub hlwb: Tej zaug Vajtswv muaj tus neeg tsimnyog dua kuv los ua qhov haujlwm no. Kuv pom kuv tus kheej zoo tsis txaus. Txawm yog twb siv zog kom hloov pauv ua lub neej dawbhuv los yeej txiav txim siab yuam kev uas kuv tau ua thaum tseem kawm ntawv. Hauv kuv lub hlwb pheej muaj ib lub suab xav tias lub neej yav dhau los nyhav dhau, yuav yuam kev heev rau Vajtswv yog tias Vajtswv siv kuv rau Vajtswv lub tebchaws. Kuv pom cuag li yus raug muab tshwj tawm, vim kuv tsis muaj txaus peev xwm thiab tsis tsimnyog tau Vajtswv siv.

Tom qab no kuv pom tias tej yam uas Vajtswv tabncuab txog tsis yog tej kev txhaum uas kuv tau ua. Vajtswv tabncuab txog kuv lub siab ntau dua. Vajtswv xav kho kom zoo, rov qab rub kuv tes thiab dhau ntawm kuv tej kev qaug zog ntawd, Vajtswv yuav nthuav Vajtswv lub tshwj chim tawm. Vajtswv muaj ib txoj kev tshwj xeeb los hloov pauv tej yam uas cuag li twb pob puas lawm lossis tsis tsimnyog dhau los ua tej cuab yeej siv rau Vajtswv lub tebchaws. Puag thaum ub los txog tamsim no, Vajtswv yeej xaiv cov neeg uas cuag li tsis tsimnyog los ua Vajtswv lub homphiaj loj, thiab qhov ntawd tau ua pov thawj meej meej dhau ntawm txhua nplooj ntawv hauv Vajluskub.

Tshaj txhua tus, Paulus paub zoo qhov uas nws tsis tsimnyog. Yawg ib txwm lees tias yawg yog “tus neeg thawj thawj hauv cov neeg txhaum” (I Timautes 1:15). Ua ntej uas dhau los ua Paulus, yog Vajtswv tus timthawj qhia Txojmoo Zoo rau lwm haiv neeg ces yawg yog Xau-lus, nto npe txog kev tsimtxom thiab muab cov ntseeg Yexus tua pov tseg. Tiamsis tomqab ntsib Vajtswv, yawg lub npe thiaj hloov ua Paulus, thiab txais ib teg dej num tshiab. Vajtswv tau xaiv Paulus los qhia Txojmoo Zoo rau lwm haiv neeg thiab coj ntau tus los cuag Yexus Khetos, txawm yog nws lub neej yav dhau los yuav puv npo kev txhaum.

Timthawj Paulus hais nyob hauv Efexaus 3:8-9
“Kuv yog tus uas muaj hwjchim yau dua Vajtswv haivneeg txhua tus huv tibsi los Vajtswv tseem muab Txojmoo Zoo uas hais txog Yexus Khetos txoj koob hmoov uas tsimtxiaj kawg nkaus rau kuv coj mus qhia lwm haivneeg. Thiab qhia rau sawvdaws paub hais tias Vajtswv ua li cas ua tau raws li tej uas Vajtswv muab zais cia lawm. Vajtswv tus uas tsim ib puas tsav yam huv tibsi twb muab zaj ntawd zais cia thaum tsim lub ntuj thiab lub ntiajteb lawm”.

Paulus yeej tsis txaj muag lees hais tias nws yog ib tug neeg muaj ntau qhov yuam kev. Yawg nkag siab zoo yawg lub neej yav dhau los puv npo kev txhaum, tiamsis yawg yeej muaj lub siab tawv qhia txog Vajtswv txoj kev hlub uas zoo kawg nkaus. Yawg kuj tsis txaj muag thaum hais txog yawg tej kev mob nkeeg, rau qhov yawg paub tias los ntawm tej ntawd, Yexus Khetos lub zog yuav tau nthuav tawm meej meej (2 Kauleethaus 12:9). Txawm yog ua txhaum ntau los, Vajtswv yeej siv Paulus los ntawm ib txoj kev uas puv npo lub hwjchim los txhim tsa Pawg Ntseeg xub thawj. Yawg sau 13 tsab ntawv nyob hauv 27 phau hauv Vajluskub Tshiab. Zoo kawg nkaus li, Vajtswv hloov pauv ib lub neej puas ntsoog dhau los ua ib qhov cuab yeej nthuav dav Vajtswv lub tebchaws!

Kuv thiaj cim civ nug tias twb muaj ntau zaug yus cim civ muab yus “cais tawm” hauv Vajtswv lub homphiaj, vim xav tias yus tsis tsimnyog. Thaum tig rov qab mus saib lub sijhawm uas kuv kawm ntawv, kuv pom tias twb yog Vajtswv txoj kev hlub nrhiav tau kuv nyob hauv qhov chaw kev txhaum thiab nqua hu kom kuv tig rov qab los lees txim. Txawm yog peb yuav ua txhaum txoj kev txhaum twg los, lossis hnov tias yus twb yuam kev deb heev rau lub neej yav dhau los, Vajtswv yeej muaj ib txoj hau kev los siv kom tej ntawd dhau los muaj nqis rau peb. Vajtswv xav kho zoo koj lub siab, thiab dhau ntawd, Vajtswv yuav siv peb ua rau kom Vajtswv lub npe tau koob meej.

Hnub no, yog tias koj hnov tias yus tsis tsimnyog tau Vajtswv siv, cia li xav txog Paulus. Txawm yog peb pom tias yus “yog ib tug tsis tsimnyog” los Vajtswv txoj kev hlub dhau ntawm Tswv Yexus ua pov thawj qhia tias txaus. Vajtswv xav siv koj lub sijhawm no los nthuav dav Vajtswv lub tebchaws nyob hauv ntiajteb no. Vajtswv xav nrog koj mus ua ke, coj txhua tus mus rau hauv Vajtswv txoj kev hlub zoo kawg nkaus. Koj puas zoo siab hlo teb Vajtswv lub suab hu, ib yam li Paulus tau ua, los qhuas Vajtswv lub npe?

Thov caw nrog kuv peb thov Vajtswv ua ke:
Ua Vajtswv tsaug txawm yog kuv qaug zog thiab muaj kev txhaum los koj yeej muaj koj txoj hau kev los siv kuv rau koj tej haujlwm zoo. Thov pub lub zog loj rau kuv thiab pub kom kuv muaj siab tawv tso tseg kuv tej kev txaj muag, thiab txais koj lub suab hu. Thov kom kuv dhau los ua ib qhov khoom muaj nqis nyob hauv koj txhais tes, qhia koj txoj kev hlub thiab kev cawmdim rau tej neeg ib ncig. Kuv thov hauv Tswv Yexus Khetos lub npe. Amees.

Cov kwv tij txhua tus, yog koj tab tom hnov nyhav siab rau tej kev txhaum lossis kev qaug zog ntawm tus kheej, nco ntsoov tias Vajtswv ntsia pom yam zoo nyob hauv koj, Vajtswv xav kho kom koj zoo, rub koj tes thiab siv koj los nthuav tawm nws txoj kev hlub. Txhob cim civ muab yus tshwj tawm, tiamsis mus raws li Vajtswv lub suab hu, ntseeg tias koj yuav dhau los ua ib qhov cuab yeej muaj nqis coj Vajtswv txoj kev hlub mus rau lub ntiajteb no.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.