Qhuas Vajtswv thiab pehawm Vajtswv yog yam uas peb yeej ua tau nyob rau txhua qhov, txawm yog tab tom nyob tom tej hav nyom ntsuab xiab lossis nyob hauv tiaj nrag kev tuag, nyob rau hnub zoo siab lossis hnub nyuaj siab, Vajtswv yeej nyob ntawd thiab coj kev txhawb zog los rau peb hauv tej lub sijhawm ntawd dhau ntawm kev qhuas Vajtswv thiab nrhiav Vajtswv lub ntsej muag.

Hnub no, yog hnub 09/11/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Merle Mills dhau ntawm Zaj kawm LUB SIAB QHUAS VAJTSWV

“Nej ib tug yuav tsum qhia ib tug raws li tej lus uas nyob hauv Daviv phau nkauj , tej zaj nkauj qhuas Vajtswv thiab tej zaj nkauj uas cov ntseeg hu ua Vajtswv tsaug. Thaum nej hu tej zaj nkauj ntawd, nej yuav tsum hu ntawm lub siab xyivfab hlo” (Efexaus 5:19).

Kuv twb mus hauv tsev kho mob kuaj tus kheej raws li lub caijnyoog tau teem tseg: Thaij duab X-quang thiab thaij CT. Lub sijhawm uas kuaj ntshav ntawd thaum twg twb ua rau kuv ntshai. Ntawm qhov chaw tos mus txog rau siv tej cuab yeej los kuaj, tag nrho puav leej ua rau kuv ntshai txias zias. Nyob rau lub sijhawm tos kws tshuaj tuaj kuaj, kuv ntshai ib ce tshee nyho ua rau kuv lub plawv dhia ceev heev.

Kuv yeej tsis paub tias muaj neeg nyob ntawm chav sab tod txog thaum uas kuv hnov ib tug pojniam lub suab hais lus nrov tuaj, ua rau voob nkaus tas nrho chav tsev txias zias ntawd. Zaj nkauj ntawd muaj npe tias “Nkag los rau hauv chav dawbhuv” tau Geron Davis sau. Ntawm no yog txoj nkauj uas tej Pawg Ntseeg ib txwm hu. Cov ntsiab lus ntawm zaj nkauj ntawd ntuas kuv txog Vajtswv txoj kev tshwm ntsej muag. Txawm yog tab tom nyob qhov twg los, qhov ntawd kuj yog Vajtswv txoj kev tshwm ntsej muag. Kuv lub siab rov qab sov so los ntawm tej ntsiab nkauj nthuav tawm lub siab npaj txhij rau kev qhuas Vajtswv, pab kom kuv tshem tawm tej kev txhawj, ntshai thiab muab fij rau kuv Leej Txiv nyob saum ntuj.

Thaum tau Vajtswv cawm thiab tso peb dim ntawm cov neeg Iziv, Milias thiab tag nrho tej pojniam uas nrog pog ua ke tau hu zaj nkauj muaj yeej tawm hauv lawv lub siab tuaj. Yav dhau los, cov pejxeem lawv tseg lawv lub siab los ua qhev nyhav nrog tej kev iab siab uas lawv nris (Khiavidm 1:14). Tiamsis thaum no, lawv tig lawv lub ntsej muag mus rau ntawm Vajtswv lub hwjchim:

“Milias hu nkauj rau lawv mloog hais tias: “Hu nkauj ua Vajtswv tsaug, rau qhov nws tau kovyeej yeebncuab: nws tau muab cov nees thiab cov neeg caij nees pov tas rau hauv qab thu hiavtxwv” (Khiavdim 15:21).

Vajluskub kuj qhia rau peb paub tias txawm yog Paulus thiab Xilas nkawd nyob rau hauv tsev rau txim, raug ntaus, raug ntes mus kaw, los thaum txog ib tag hmo, nkawd tau thov Vajtswv thiab qhuas Vajtswv, tag nrho puav leej pib hauv lub siab. Kev qhuas Vajtswv tsis yog tsuas ua rau tej qhov rooj qhib, tiamsis ua rau tej saw hlau khi lwm tus kuj tu tas; tus tub rog zov tsev rau txim pom Vajtswv lub hwjchim tom qab ntawd nws tsev neeg tau txais yuav Vajtswv thaum hnov Txojmoo Zoo (Tes Haujlwm 16:25-34).

Vajtswv txojlus txhawb kom peb cia li hu qhuas Vajtswv los ntawm lub siab qhuas Vajtswv:

“Cia li hu ib zaj nkauj tshiab qhuas tus Tswv. Neeg thoob ntiajteb cia li hu nkauj qhuas tus Tswv! (Ntawv Nkauj 96:1)

“Nej ib tug yuav tsum qhia ib tug raws li tej lus uas nyob hauv Daviv phau nkauj , tej zaj nkauj qhuas Vajtswv thiab tej zaj nkauj uas cov ntseeg hu ua Vajtswv tsaug. Thaum nej hu tej zaj nkauj ntawd, nej yuav tsum hu ntawm lub siab xyivfab hlo” (Efexaus 5:19).

Vajntxwv Daviv saib txoj kev qhuas Vajtswv zoo li ib feem nyob hauv yus lub neej, zoo li ib txoj kev cog lus mus ib txhis:

“Kuv yuav hu nkauj qhuas tus Tswv tas kuv simneej; kuv yuav hu nkauj ua kuv tus Vajtswv tsaug mus txog hnub kuv tuag (Ntawv Nkauj 104:33).

Txawm yog txoj kev thaij X-quang thiab thaij CT yuav zoo li cas los puav leej muaj qee lub cim yus paub tias tsis zoo, tiamsis kuv nco Vajtswv tshav ntuj vim tag nrho puav leej tau kuaj thiab kho. Kuv ntseeg tias Vajtswv tau siv tej lus qhuas Vajtswv nyob rau ntawm lub chav sab tod los ntuas kuv kom kuv paub txog Vajtswv kev tshwm ntsej muag, ua rau kuv lub siab tau txhawb zog thiab tau so thiab nrhiav tau kev kaj siab nyob hauv kuv txoj kev tsis kaj siab. Txawm yog tsuas yog tej txoj nkauj tsis muaj dabtsi, tsis npaj, los tawm hauv lub siab tuaj, pab rau kuv tig mus rau ntawm tus muaj hwjchim, tus muaj kev hlub suav tsis tas, thiab lub zog ua rau txoj kev ntshai yaj mus, kho zoo thiab ntxiv zog rau kuv.

Tej zaug kuv tsis muaj hnub paub tus pojniam uas tau qhuas Vajtswv ntawd lub npe hnub ntawd. Thiab tej zaug nws kuj tsis muaj ib zaum twg paub lossis xav tias nws txoj kev qhuas Vajtswv ntawd tau txhawb ib lub siab tab tom ntshai li cas.

Leej Txiv saum ntuj tab tom tso ib zaj nkauj hauv koj lub siab? Zaj nkauj ntawd txawm yog yooj yim xwb los nws kuj txhawb koj, lossis ib tug twg ntawd ze ze, ua kom puv npo lub siab tsis muaj dabtsi, thiab coj txhua txoj kev txhawj kev ntshai ntawd ploj ntawm Vajtswv kev tshwm ntsej muag mus.

Thov caw nrog kuv peb thov Vajtswv ua ke:
Tus Tswv, thov qhia kom kuv paub nrhiav Vajtswv hauv kuv tej kev txhawj los ntawm lub siab qhuas Vajtswv. Thov kom peb lub neej yuav yog lub neej pehawm Vajtswv, coj txoj kev zoo siab kev txhawb zog mus rau tej neeg ib ncig. Kuv thov hauv Tswv Yexus Khetos lub npe. Amees.

Cov kwv tij, tej kev txhawj thiab kev ntshai tej zaug yuav tsis yog dabtsi thaum uas koj paub hwm thiab mus rau ntawm Vajtswv kev tshwm ntsej muag. Txawm yog hnub zoo siab thiab nyuaj siab los, kuj zoo li Vajtswv tus ntsujplig thiaj ua rau koj lub siab tshiab, dhau ntawd koj thiaj mus cuag tau Vajtswv nyob hauv koj lub siab los ntawm txoj kev qhuas thiab pehawm Vajtswv tag siab!

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.