Nyob ntawm ntau tus, hnub nyoog yog ib yam uas txaus ntshai, thaum pom yus lub ntsej muag yim hnub yim caws thiab lub dag zog los tsis zoo li thaum hluas. Tiamsis nyob hauv Vajtswv, no yog lub neej tau nrog tus Tswv mus uake, thiab ib hnub peb nrhiav pom ib yam tshiab nyob hauv lub neej. Peb cia li tso tej kev txhawj xeeb tseg thiab txais yuav tej hnub tshiab uas tus Tswv pub rau peb, thiab ua ntxiv Vajtswv tes haujlwm twb muab cob rau peb los ntawm kev zoo siab xyivfab lug.

Hnub no, yog hnub 10/11/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Linda Gilden dhau ntawm Zaj kawm KUV LAUS HEEV LAWM!

“Ua neej nyob ntev yog nqi zog ntawm txojkev ncaj ncees. Ua neej laus plaubhau dawb yog lub mom yeebkoob” (Pajlug 16:31).

Kuv tus tub xeeb uas muaj plaub xyoos nws cev tes xuas kuv lub nplhu, rub kuv los ze ze thiab hais tias: “Pog, koj laus heev lawm os pog!”

Kuv ua ntsej muag luag ntxhi rau tus me xeeb cov lus hais uas kuv twb tsis tau xav txog ntawd. Tseeb tiag, ntshe metub xeeb yeej tsis xav paub txog kuv lub siab xav txog lub neej laus li!

Thaum nws txav ti zog kuv lub ntsej muag, wb ob lub txiv ntswg sib tiv ua ke. Nws lub qhov muag cuag li tab tom zais ib yam dabtsi, nws ntxhi ntxhi rau kuv: “Tiamsis txhob txhawj, kuv yuav tsis hais qhov no qhia rau ib tug twg os pog!”

Kuv yeej ib txwm tsis quav ntsej txog lub caijnyoog, yog li kuv kuj tsis suav tias tseem ceeb yog tias muaj ib tug twg paub tias “kuv laus heev lawm” tiamsis nyob ntawm ntau tug, qhov uas lub hnub nyoog dhau mus yog ib yam uas tseem ceeb heev.

Kuv tej phooj ywg lawv ib txwm npaj tej pluas noj pluas haus loj nco txog hnub nyoog, lossis kev mus saib tej yam tshiab mus ncig ua si thoob ntiajteb. Kuv ho tsis yog tus neeg nyiam tej rooj noj rooj haus lossis tej kev ua si, yog li kuv pheej ua dabtsi zoo siab rau txhua zaug uas kuv muaj ib xyoos ntxiv?

Nyob ntawm kuv, hnub nyoog tsis yog tsuas yog ib tug lej xwb. Txawm yog tus nplaim teeb cig ntawm lub ncuav yim hnub yim ntxiv ntau los, kuv xaiv txais ib xyoos ntxiv los ntawm txoj kev txaus siab thiab suav tias ntawm no yog ib qhov khoom plig muaj nqis hauv lub neej, pauv qhov uas cia tej kev txhawj tswj yus lub neej.

Ib yam zoo uas muaj hnub nyoog lawm ces yog yim hnub yim yuav ntseeg siab rau yus tus kheej. Muaj ib lub sijhawm kuv pom tias Vajtswv tau tsim kuv los muaj ib lub homphiaj zoo nyob hauv Vajtswv txhais tes – yog ib qhov chaw uas tsis muaj dua lwm tus yuav hloov pauv tau. Yog li kuv thiaj tsis hnov nyav siab ua neej, thiab tamsim no, kuv tuaj yeem txais yuav txhua lub sijhawm zoo nrog kuv tej phoojywg thiab tsev neeg thiab tsis txhawj txog tej yam uas kuv yuav tau ua. Kuv qhov chaw twb tau Vajtswv teem tseg, thiab tsis muaj leej twg yuav txeeb tau. Tso siab kawg!

“Peb yog cov uas Vajtswv txhais tes puab. Vajtswv tsim peb los nrog Yexus Khetos koom ib txojsia kom peb ua tau tej haujlwm zoo uas Vajtswv twb xub npaj tseg cm rau peb ua lawm.” (Efexaus 2:10).

Qhov uas kuv paub no tau pab kuv txiav txim siab txhua yam nyob hauv lub neej. Thaum kuv nqis tes sau ib phau ntawv, kuv tsis muaj ib zaum twg yuav quav ntsej tias lwm tus kuj yuav sau ib phau zoo ib yam li ntawd, lossis txhawj tias lawv yuav xaiv lwm tus phau. Kuv phau ntawv yog ib phau zoo. Thiab hauv txoj kev uas muab kuv phau ntawv faib kom yog kev, kuv muaj sijhawm ntsib ntau tus neeg zoo, cov neeg uas zoo siab hlo cia kuv nthuav tawm kuv tus kheej!

Thaum uas muaj kev ntseeg siab lawm kuv yuav tsis quav ntsej lwm tus xav li cas rau kuv. Thiab kuv yeej xav kom ua tau ib qhov zoo, vim kuv yog tus sawv cev rau Leej Txiv nyob hauv lub ntiajteb no. Tiamsis thaum no, qhov tseem ceeb yog cia Vajtswv zoo siab rau tej haujlwm uas kuv ua.

Tej zaug qhov khoom plig loj tshaj thaum uas kuv dhau los ua ib tug neeg “laus laus lawm” ces yog sab ntsujplig loj hlob uas kuv tau muaj. Kuv cia siab rau tej yam uas tab tom tos kuv nyob tom hauv ntej. Ib nplooj hauv Vajluskub nws dhau los muaj sia rau kuv, thiab txais yuav Vajtswv tej lus uas Vajtswv qhia los ntawm lub siab kub lug. Thaum kuv pehawm Vajtswv, ces txoj kev sib raug zoo ua ke nrog Vajtswv yim ntau, zoo li ib txoj hlua qhov muag ntsia tsis pom cab kuv los nyob ze Vajtswv. Txoj kev sib ntsib nrog lwm tus uas koom kev ntseeg tsis yog tsuas txhawb zog xwb tiamsis tseem yug kuv sab ntsujplig thiab.

Tsis yog xwb tim txhua taig kis sawv ntxov kuv sawv, kuv txawm cia li nkag siab tag nrho tej no. Vajtswv twb qhia kuv tau yuav luag ib tiam dhau los. Muaj tej zaj kawm uas kuv kawm tau sai, tiamsis kuj muaj tej yam uas kuv ib txwm kawm los mus kawm los yeej tsis nkag siab. Ntau zaug, Vajtswv coj kuv mus kawm tau tej zaj kawm nyuaj, yuam kom kuv yuav tau zaum ntawm Vajtswv txhais taw thiab cia Vajtswv qhia kuv. Dhau los ntawm tej uas kuv ntsib dhau, Vajtswv maj mam hloov pauv thiab tu kuv kom kuv dhau los ua ib tug neeg uas Vajtswv xav.

Puas yog kuv tab tom zaum ntawm no, tes tuav rawv tej cuab yeej uas twb npaj tseg, tos lub tsheb uas los saum ntuj ceebtsheej yuav tos kuv? Kuv lub neej yeej tseem puv ntoob thiab puv npo tej yam zoo, txhua hnub puav leej coj tej yam zoo rau kuv.

Tsis paub, kuv puas yuav xav li cas thaum uas kuv tus tub xeeb hais rau kuv tias, kuv laus heev lawm?
“Ua neej nyob ntev yog nqi zog ntawm txojkev ncaj ncees. Ua neej laus plaubhau dawb yog lub mom yeebkoob” (Pajlug 16:31).

Kuv twb ua ib lub neej hluas puv npo kev zoo siab thiab kev hlub, thiab thaum no, kuv rov qab nrhiav pom ib yam tshiab tseem zoo dua ntxiv, thaum “kuv twb laus laus heev lawm!”

Thov caw nrog kuv peb thov Vajtswv ua ke:
Ua Vajtswv tsaug vim Vajtswv niaj hnub tiv thaiv thaum peb ua neej nyob rau hauv lub ntiajteb. Ua Vajtswv tsaug rau txhua lub sijhawm dhau, tej uas kuv ntsib Vajtswv tau muab pub rau kuv nyob hauv lub neej. Thov pab kom kuv nco ntsoov txog tej yam muaj nqis thiab yam tseem ceeb nyob hauv Vajtswv lub homphija, txawm yuav nyob ntu twg hauv lub neej. Thov kom zaj xwm txheej hauv peb lub neej yuav dhau los ua txoj kev txhawb zog thiab yog lub zog rau tej neeg ib ncig, kom txhua hnub peb tau ua neej nyob rau hauv ntiajteb yog ib ncua kev ua rau Vajtswv tau koob meej. Kuv thov hauv Tswv Yexus Khetos lub npe. Amees.

Cov kwv tij txhua tus, thaum lub sijhawm dhau los, tsis tas yuav quav ntseg txog qhov uas koj muaj pes tsawg qhov caws ciav ntawm koj lub ntsej muag. Pauv rau tej ntawd, yuav tau ceev faj txog qhov uas peb khaws tau pes tsawg yam muaj nqis nyob hauv txoj kev nrog tus Tswv mus. Txais txhua hnub zoo li ib qhov khoom plig muaj nqis uas Vajtswv muab pub rau peb, ua lub neej kom tsimnyog rau yus thiab koom tsim muaj tej yam txaus nco rau ntawm tej phooj ywg thiab tsev neeg. Thaum saib hauv tsom iav, cia siab tias peb yuav ntsia pom yus lub cim qhia paub yus lub caijnyoog, tiamsis yog ib feem hauv lub neej puv ntoob thiab puv npo lub ntsiab uas Vajtswv tseg rau peb nyob tom ntej.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.