Tom rài kis, ò gơs cau lơi rơp pleh klàs bơh ală bơta gơlòng bŏl glăr mơ kalke. Ală jơnau blac pơrlồm, bơta ò bơtào tơngguh, hala njơ̆-njŭ rài do òs jòi kai nàng lơh lơnggơr bơta dòn bŏl he di. Tŭ bŏl he lòi ală jơnau kơlôi sơnơng iơh tơmut tom bồ dơngoh, bŏl he rhòi rhòi tơnrọh bơta àng gơn kơnòm di. Ală bơta kơlôi sơnơng yoam, pin wil wơl, mơ rngòt rngơt rơp mhăr tơrgòm jơh hwing nùs, lơh he ĭn gơlơh lơbơn lơño, mơ ò tơl pràn tai. Do la bơta ñchi bơh tai Yang hòi jà bŏl he at bồ bồ dơngoh he mơ sơmbat prap jơnau sŏng Kơnrẵn di.

Ngai do, ngai 11/11/2024 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Jessica Teed dê bơh Tơnggume KUP JƠH ALĂ BƠTA KƠLÔI SƠNƠNG NÀNG DÒN BƠR YANG

“Kup jơh ală bơta kơlôi sơnơng nàng dòn bơr Bơtau Krist.” (II Kôrintô 10:5)

Blau klau ăñ gơs dô bơta chài rgơi krơi is: kung be la khai òs sum git tŭ lơi ăñ găm gơs bơta kơlôi sơnơng tìs bơh să tom ăñ. Kòp dơ̆ ăñ lòi ală phăn tom hiu bềp hala nisơna lơh bơcah phăn lơi, gen tŭ hơ̆ la ală bơta kơlôi sơnơng iơh gơs tus wơl. Bơh đah tiah lơi tom hiu, bau klau ăñ rơp đơs dờng jơnau: “Ơ mò, băñ sơntom gơs bơta kơlôi sơnơng iơh bơh să tom ai yơ!” gơlơh be Yang Hwing Gọh neh ai pà bau klau ăñ ĭn bơta git mhăr, tài bơh hơ̆ gen khai sum òs dòp git kòp tŭ ăñ sền sơwì is krañ-ci is să tom ăñ.

“Lồi tơnơ̆, ơ oh mi, dilah bơta lơi song ngan, bơta lơi màng ryŭ; bơta lơi song ring, bơta lơi sàng goh, bơta lơi pal kòñ gơboh, bơta lơi gơs pơnro niam, dilah gơs bơta kơ̆ dơn lơi, dilah gơs bơta lơi pal jòng ro, gen oh mi pal kơlôi sơnơng tĕ di ală bơta hơ̆.” (Philip 4:8)

Yang sum òs kah kơlôi tus bồ dơngoh bŏl he, tài bơh bơta kơlôi sơnơng rơp lơh ò niam tus jơnau đơs, broă lơh mơ bơta dòn tai. Dilah ò geh at bồ, ală bơta kơlôi sơnơng iơh rơp lăm bŏl he tus gơrwác rọh bơta gơn kơnòm ò tŭ lơi lồi. Gen do là ñchi bơh tai nàng Sră Goh tơngkah bŏl he păl: “kup jơh ală bơta kơlôi sơnơng” mơ ò lòi bŏl gơ at bồ khat gơboh hơđăng rài kis he.

“Bơh bol hi bulah kis tòm dunnia, mơya ò di tòmlơh jat dunnia. Bơh ală phan tòmlơh bol hi ngui ò di bal mơ dunnia, mơya la gơnap gơnoar Yàng Tom Trồ dê nàng sòr tơrlah ală theng kơ̆ cê, bol hi sòr tơrlah ală bơta bơyai tìs nrah, Bal mơ jơh ală bơta geh yò tơngguh sòdră mơ bơta dòp git Yàng Tom Trồ, mơ kup jơh ală bơta kơlôi sơnơng nàng dòn bơr Bơtau Krist.” (II Kôrintô 10:3-5)

Ală phăn añ tòm lơh Yang ai bŏl he ĭn ò gơri ho dunnia do, hơ̆ la phăn añ tòmlơh gơs gơnoăr pràn đah hwing nang loh rọh ală thèng kơ̆ ci, lơh tơnrọh ală jơnau mablác, mơ tơnrọh ală bơta lơi găm lòt rlau gơnap gơnoăr Yang di hơđăng rài kis bŏl he di.

Digơlan do la bơta ñchi bơh tai cau Gơnoăr Bơtô Pol tơngkah bŏl he tom Rô ma 12:2, lah băñ lòi he gơkòl đòm jat dunnia do. Chàn ala wơl, lời tĕ bồ dơngoh tòmgơl mơ gơlik pa wơl. Broă bŏl he dòp git să tom he, bơta lơh lòt kòp ngai, ală cau gut dăr, mơ ală bơta kơlôi sơnơng bŏl he di bơh să tom Yang rơp lơh rnoas ală gùng dà rài kis bŏl he di.

Tŭ bŏl he lời Yang tòmgơl bồ dơngoh he, Kơnrẵn rơp rcang bŏl he ĭn pràn kơldăng tom bơta tòmlơh sòdră wơl ală jơnau mablác mơ kai gơrmơ̆i cau sò tom di. Bèp bơ đơs blac rơp ngùi ală jơnau kơlôi sơnơng iơh nàng lơh iơh bŏl he. Gen behơ̆, bŏl he păl mhăr dòp git mơ đơp chơt bơh sơntom ală jơnau kơlôi sơnơng tìs lài mơ tŭ bŏl gơ gơs tŭ lơmpah lơh wơl tus rài kis he.

Jơnau Yang la phăn añ tomlơh pràn kơldăng dŏng bŏl he git lọh jơnau sŏng bơh Kơnrẵn, kŭng be gut dăr he, mơ bơh să tom he. Bơh hơ̆ bŏl he rơp dòp git să tom he jat bơta Yang đơs bơtô, mơ át bồ ală bơta kơlôi sơnơng iơh bơh jơnau sŏng tus bơh Yang.

Sră Goh bơtô tơngkah lah kòp ală phăn añ tòm lơh Yang ai pà rơp kwơ màng ngăn. Bŏl he ò tŭ lơi tom lơh is bơh ală jơnau mablác mơ kai gơrmơ̆i cau sò tom di, ngăn la tom tŭ siơ̆u wơl bơta sền gar Yang di mơ jơnau sŏng bơh Sră Goh. Gen phăn tòm lơh Yang ai pà ò gơri ho dunnia do, mơya gơs gơnap gơnoăr đah hwing pràn kơldăng ngăn. Jơnau Yang la dô pơnah tom phăn tom lơh hơ̆. Sac rơwah tĕ he ĭn jơnau sŏng tom Jơnau Yang nàng rơp ntào kơ̆ diđap kai gơrmơ̆icau sò tom di, mơ sọh tĕ he in jơh ală phăn añ tom lơh Yang Tom Trồ di.

“Lồi tơnơ̆ wơl, oh mi gơs tĕ pràn kơldang tòm Yàng, mơ tòm gơnap gơnoar pràn kơldang Kơnràñ dê. Mă àñ tĕ jơh ală phan tòmlơh Yàng Tom Trồ dê, tồ oh mi in rgơi ntào jai nàng tòmdră mơ ală kai gơrmơ̆i cà ràk dê. Bơh bol he ò di tòmlơh mơ poac mơ mhàm ò, mơya tòmlơh mơ ală gơnoar at bồ, mơ ală gơnoar, mơ ală bơtau at bồ rài klam jơngo do, mơ mpồl cà jàñ bơsak ơm tòm pah gòi. Gen tàng ai tĕ jơh ală phan tòmlơh Yàng Tom Trồ dê, tồ tòm ngai rung rài oh mi rgơi tòmdră jai, mơ tơnơ̆ mơ tŭ neh lơh sir jơh ală bơta gen gam ntào kơ̆ sơl.” (Ephesô 6:10)

Dan jà bol he dô nùs bal tòm bơta hòi dan:
Ơ Yang, tom tŭ kọn tìp ală jơnau đơs blac mơ bơta iơh tom bồ dơngoh, dăn Kơnrẵn dŏng kọn ntào kơ̆ mơ ò lòi bơta hơ̆ lơh lơnggơr bơta dòn kọn di. Dăn Kơnrẵn sọl pơnđăng hơđăng bồ dơngoh kọn, dŏng kọn klọ săng ală bơta kơlôi sơnơng iơh mơ at kơ̆ jơnau sŏng bơh Jơnau Kơnrẵn. Gơwèt mơ ală phăn añ tomlơh đah hwing Kơnrẵn di, kơp kỡn kọn sum òs ntào kơ̆ diđap ală bơta ơñiai mơ kalke. Kọn jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, tŭ cau sò tom rsih ală jơnau mablác tom bồ dơngoh, kah tĕ lah bŏl he ò di càng tomlơh dô nă ò. Yang neh ai pà bŏl he ĭn phăn añ tomlơh pràn kơldăng rlau jơh nàng sòdră ală bơta ơñiai-hơ̆ la Jơnau Yang mơ bơta ê gar Kơnrẵn di. Tŭ he sọh phăn añ tomlơh Yang di, bŏl he rơp khin cha ntào kơ̆ mơ lòt găn ală bơta tomlơh tòm rài kis do.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.