“Nkees, tsis muaj zog, tsis xav ua, cheem tsum tau kho zoo…” Yog tej yam uas pntau tus tau ntsib nyob rau hauv lub ntiajteb no. Yog li qhov twg thiaj yog txoj kev pab daws tej ntawd? Vajluskub qhia rau peb paub tias Vajtswv yuav pub lub zog tshiab rau tus uas vam khom rau Vajtswv thiab muab nws txhua tes haujlwm tso rau tus Tswv.

Hnub no, yog hnub 15/11/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Mikayla Barnedhau ntawm Zaj kawm LUB ZOG TSHIAB RAU TUS UAS CIA SIAB

“Tiamsis cov neeg uas cia siab ntsoov rau tus Tswv yuav muaj zog,lawv yuav nthuav tis ya ib yam li tus dav. Thaum lawv khiav lawv yuav tsis qaug zog, thaum lawv mus kev lawv yuav tsis tsaug leeg.” (Yaxayas 40:31)

Tsis ntev los no Vajtswv qhia kuv ntau heev txog txoj kev uas nrog tus Tswv mus, tias kuv qhov haujlwm tsuas yog mloog Vajtswv lus xwb. Paub tias peb yeej ntsib ntau yam kev tab kaum. Tej zaug ntawd yuav yog kev ntxeev ntxias los sab nraud los, lossis tej zaug tshwm hauv peb tus cwjpwm sab nqaij tawv tuaj. Nyob ntawm tej ntawd, tsis paub peb puas yuav pom peb txoj kev qaug zog thiab hloov pauv yus txoj kev? Kuv tau ceeb toom tias pauv qhov uas kuv pheej yws tias “yuav ua li cas thiaj yuav khiav tawm taus lub sijhawm muaj kev txomnyem no?” Kuv yuav tau vam khom Vajtswv thiab hais rau Vajtswv tias: “Tus Tswv, kuv tsuas paub muab tej no fij rau koj xwb. Thov koj pab kuv.” Thaum peb hloov pauv peb lub hlwb, ces peb yuav tsis cim civ ua txhua yam raws li yus lub zog lawm, tiamsis yuav vam khom Vajtswv thiab mloog Vajtswv lus. Dhau ntawd, peb yuav tau kev muaj yeej nyob rau hauv ntau ntsus kev tsov rog.

“Tus Tswv tos ntev loo yuav foom koob hmoov rau nej; yog li ntawd, nws thiaj los hlub nej . Rau qhov tus Tswv yog Vajtswv tus uas ncaj ncees; cov neeg uas tos nws yuav tau txais koob hmoov” (Yaxayas 30:18).

Kuv pom tias kuv yeej tseem tshuav ntau yam ua tsis tau nyob hauv tej haujlwm Vajtswv muab cob rau kuv. Pauv qhov uas thov Vajtswv pab thaum pib, feem ntau kuv cim civ ua cuag li yog 90% haujlwm, tom qab kuv mam thov Vajtswv ua tiav feem txuas ntxiv. Kuv lub hlwb tsis ntseeg siab rau Vajtswv tias Vajtswv muaj cuab kav ua tau kuv tej haujlwm, yog li kuv thiaj cim civ ua tas yog Vajtswv tsis pab, los kuv kuj cim civ ua tau.

Muaj ib zaug, kuv xav tau ib lub tsheb tshiab vim kuv lub tsheb qub pib puas lawm. Thaum ntawd kuv tau thov Vajtswv coj kev, tiamsis nyob hauv kuv lub hlwb, kuv xav tau tsheb tamsim. Yog li kuv thiaj pib mus xaiv tsheb thiab sim tsav hauv tej chaw muag tsheb, thiab kuj tsis paub ua li cas vim muaj ntau txoj kev xaiv. Thaum muaj ntau txoj kev xaiv li ntawd kuv yeej tsis tau muaj ib zaum twg nug Vajtswv ib los tias kuv ua li no puas yog. Thaum kawg kuv kuj yuav tau tsheb lawm tiamsis yuav tau them ib qhov nqi ntau tshaj tej nyiaj hli uas kuv txais tau los. Tiamsis nyob rau lub sijhawm muaj kev txomnyem ntawd, Vajtswv yeej nthuav tawm Vajtswv txoj kev ua siab ntev rau kuv. Kuv nrhiav tau ib txoj haujlwm zoo dua, them taus tej nuj nqis ntawd. Thiab kuv kawm paub tias yuav tsum muab Vajtswv tso ua ntej txhua yam hauv kuv lub neej; yuav tsum tau cia nws kav txhua tes haujlwm uas kuv ua.

Vajtswv txojlus nyob hauv Yaxayas 30:18 cog lus rau peb tias Vajtswv yeej tseem tos yuav nthuav tawm txoj kev hlub thiab kev hlub tshua rau peb. Vajtswv yog tus ncaj ncees; Vajtswv lub zog tshiab thiab koob hmoov yuav tau muab pub rau tus twg uas cia siab ntsoov rau Nws. Hnov khuv xim thaum uas nyob hauv kuv txhua txoj haujlwm kuv ho saj tsis tau tag nrho Vajtswv txoj kev hlub thiab kev tshua tsuas yog vim kuv tsis khiav mus cuag Vajtswv thiab vam khom Nws.

Yaxayas 40:31 sau “tiamsis cov neeg uas cia siab ntsoov rau tus Tswv yuav muaj zog,lawv yuav nthuav tis ya ib yam li tus dav. Thaum lawv khiav lawv yuav tsis qaug zog, thaum lawv mus kev lawv yuav tsis tsaug leeg.”

Dhau ntawm Vajtswv tej lus, peb paub tias Vajtswv niaj hnub tos peb yuav nthuav qhia nws txoj kev hlub thiab lub zog pub rau peb. Paub txog qhov tseeb no, tsis paub peb puas yuav xaiv ntseeg Vajtswv kom ntsia pom Vajtswv txoj kev zoo thiab yog lub zog saum ntuj ntawd? Hnub no, cia li maj mam, los cuag Nws, tos Vajtswv txoj kev zoo Vajtswv lub zog yuav los rau hauv koj.

Thov caw nrog kuv peb thov Vajtswv ua ke:
Tus Tswv thov zam txim vim muaj ntau zaug kuv vam khom rau kuv tus kheej lub peev xwm tsis nrhiav lub hauv paus nyob hauv koj, thov Vajtswv pab kuv txhua hnub kom kuv vam khom koj, kom kuv “khiav los tsis nkees, mus los tsis ntog” ib yam li koj tej lus tau cog tseg. Kuv thov hauv Tswv Yexus Khetos lub npe. Amees.

Cov kwv tij, puas tseem tshuav feem twg hauv lub neej uas koj tseem vam khom rau koj lub zog pauv qhov uas koj vam khom Vajtswv cia kom Vajtswv pab koj ua tiav? Hnub no, cia li los cuag Vajtswv los ntawm yus tus kheej tej kev qaug zog, fij txhua tes haujlwm uas koj pub rau Vajtswv thiab vam khom nws txhua feeb kom koj muaj lub zog tshiab tau puv npo hauv koj lub neej.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.