Puas tau muaj ib zaug uas koj ua xyem xyav rau txoj kev mus raws li Vajtswv lub suab hu, vim pom tias yus tsis muaj txaus peev xwm los ua tej ntawd? Ntau zaug tej haujlwm uas Vajtswv cob cuag li nws nyhav dhau peb lub peev xwm, ua rau peb ua xyem xyav vim ntshai tsam yus ua tsis tiav. Tiamsis qhov tseem ceeb tsis yog saib kom peb muaj zog npaum twg, tiamsis peb puas zoo siab hlo ntseeg Vajtswv thiab cia Vajtswv ua tus pab peb kom ua tiav tes haujlwm ntawd.

Hnub no, yog hnub 16/11/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Brenda Williams dhau ntawm Zaj kawm TXHOB UA POOB QHOV KHOOM PLIG

“Txhob cia raug dag ua poob qhov khoom plig” (Kaulauxais 2:18)

Thaum yim loj hlob hauv Vajtswv, kuv yim pom tias mloog Vajtswv lus yog tus yaum sij. Mloog lus ua rau peb txais tau tej khoom plig loj (2 Kevcai 11:26-28). Kuv ntseeg tias nyob hauv Vajtswv yog qhov chaw uas tso siab thiab kaj siab tshaj, ntawd yog qhov chaw uas peb tau ntis, tau tiv thaiv, thiab nrhiav tau txoj kev txaus siab rau peb tus ntsujplig. Ntawd yog qhov chaw tsis muaj dabtsi piv tau – yog qhov chaw muaj kev txaus siab thiab kaj siab tiag. Kuv xaiv mloog lus tsis yog ntshai, kuj tsis yog suav tias ib qhov haujlwm yuav ua, tiamsis vim kuv hlub Vajtswv thiab tsis xav cia ib yam dabtsi tav kuv hauv txoj kev uas nrog tus Tswv mus, tau so nyob rau ntawm qhov chaw dawbhuv li ntawd puv npo koob hmoov.

Vajtswv twb teeb homphiaj ua ntej rau peb lub neej thaum uas lub ntiajteb no tsis tau pib lawm (Ntawv Nkauj 139:16). Ntau zaug, Vajtswv nqua hu kom peb ua raws li tej uas cuag li nws nyhav tshaj peb tus kheej lub peev xwm. Yog tsis muaj kev pab ntawm Vajtswv, tej zaug qhov dejnum ntawd yuav ua tsis tau. Tiamsis ua Vajtswv tsaug, Vajtswv tsis cia peb ib leeg cim civ tawm tsam. Vajtswv ua haujlwm hauv peb lub siab, pub lub zog thiab lub peevxwm rau peb (Filipis 2:13).

Ntau xyoo dhau los, kuv ua ib zaj npau suav. Nyob hauv zaj npau suav, kuv tus thawj coj yuam kom kuv sau ntau tsab xov xwm thiab yuav muab luam tawm. Thaum pib, kuv kub siab lug thiab zoo siab rau txoj haujlwm no. Tiamsis thaum kuv zaum thiab pib sau, kuv cia li nyob twj ywm. Kuv pom tias kuv tsis muaj ib lub tswvyim twg li, thiab kuv cim civ yws tias: “Kuv yuav ua tsis tau qhov haujlwm no!”

Thaum kuv tham kuv zaj npau suav no qhia rau ib tug phooj ywg, tus phooj ywg ntawd nyob ntsiag to ua rau kuv tag kev cia siab. Tiamsis, tamsim ntawd Vajtswv pub rau kuv muaj kev txhawb zog dhau ntawd nqe Vajluskub: “Txhob cia raug dag ua poob qhov khoom plig” (Kaulauxais 2:18)

Thaum xav txog nqe no, kuv pom muaj ob yam tseem ceeb. Ib, yeebncuab nws yuav tsom ntsoov rau lub homphiaj uas yog rhuav tshem peb lub neej. Nws yuav siv peb tej kev xav tsis zoo thiab ntau zaug siv tej neeg ib ncig ntawm peb los tua kom peb lub siab kug lug tuag mus, dhau ntawd tej lus dag ntxias ua rau peb tag kev cia siab. Ob, kuv txoj kev ntseeg muab tso yuam kev. Pauv qhov uas kuv pheeb rau Vajtswv, kuv cim civ vam khom kuv tus kheej lub peev xwm. Tiamsis qhov tseeb tiag yog “Yexus Khetos yog tus yuamsij uas qhib Vajtswv lub txhab tswvyim thiab kev txawj ntse uas Vajtswv muab zais cia lawm” (Kaulauxais 2:3).

Yog Yexus Khetos nyob hauv kuv, Nws yuav pub rau kuv muaj peev xwm thiab qhib dua lwm txoj kev tshiab, vim “Qhov uas nimno kuv muaj txojsia nyob twb yog vim kuv ntseeg Vajtswv tus Tub, tus uas hlub kuv thiab muab nws txojsia los txhiv kuv” (Kalatias 2:20).

Kuv nco txog cov muaj koob npe hauv Vajluskub – cov neeg uas lawv tsis paub ua cas rau tes haujlwm Vajtswv muab cob rau lawv. Thaum Vajtswv hu Nkide-oos mus cawm cov neeg Yixalayees dim ntawm kev ua cov tub rog Medias qhev, yawg tsis ntseeg yawg tus kheej thiab siv ntau txoj kev los zam kom dhau. Tiamsis, yawg zoo siab hlo mus ua raws li Vajtswv hais, Vajtswv thiaj pub lub zog loj rau yawg (Cov Thawj Tswj 6-8). Ib yam li ntawd, thaum Vajtswv kom Mauxes coj cov neeg Yixalayees los mus rau teb chaws cog lus tseg, yawg kuj hais ncaj nraim rau Vajtswv tias nws hais tsis tau lus zoo, thaum no tseem kom yawg mus ua thawj coj, coj ib pab tib neeg. Tiamsis yawg txoj kev mloog lus thiaj qhib dua ib txoj kev tshiab puv npo Vajtswv lub hwjchim nthuav tawm meej meej (Khiavdim 4:10-17). Thiab thaum Vajtswv xaiv Daviv ua vajntxwv, txawm yog Daviv tsev neeg tsis xav tias yawg yuav yog tus phim los. Los ntawm Daviv lub siab puv npo kev hlub thiab kev mloog Vajtswv lus, yog li Vajtswv thiaj pub yawg muaj lub hwjchim los ua kom tiav txoj haujlwm ntawd (I Xamuyees 13:14).

Peb kuj pom qhov no tau ua dhau los ntawm cov neeg ntaus ntses, cov thwjtim lawv tsis kawm siab, tiamsis tau Tswv Yexus hloov pauv los ua cov neeg muaj Tswv Yexus lub hwjchim. Lawv tsis yog tsuas dhau los ua thwj tim, ua tes haujlwm tsim tsa Pawg Ntseeg thiab coj Pawg Ntseeg, tiamsis tseem ua ntau qhov txujci thiab sau tej phau ntawv nyob hauv Vajluskub Tshiab uas peb tseem niaj hnub kawm nim no. Qhov zoo ntawm lawv yog lawv zoo siab hlob thiab mloog lus, dhau ntawd, Vajtswv thiaj hliv lub hwjchim puv npo rau saum lawv, hloov pauv lawv los ua tej cuab yeej zoo kawg nkaus tshaj tawm Vajtswv Txojmoo Zoo.

Tsis paub koj puas ua xyem xyav rau tus Tswv thiab tsis maj nroos mloog Nws lus? Nyob hauv Kaulauxais 2:15, Paulus ntuas kom peb nco ntsoov tias Yexus Khetos “Saum ntoo khaublig, Yexus Khetos kovyeej ib puas tsav yam uas muaj hwjchim. Nws coj ib puas tsav yam ntawd los rau sawvdaws saib hais tias, nws yog tus uas yeej thiab tej ntawd yog cov uas swb” Txhais tias lub hwjchim no twb swb lawm. Qhov zoo ntawm peb, yog peb tsis tawm tsam ib leeg – tus muaj hwjchim loj kawg nkaus hauv lub ntuj no tab tom nrog peb nyob ua ke. Vajtswv tus muaj hwjchim yuav pub kom peb muaj peev xwm thiab lub zog los ua tiav txhua tes dejnum Vajtswv tau hu peb. Henplais 13:21-22 hais meej meej tias: “Thov Vajtswv tus uas pab nej tau zoo nyob kaj siab lug pub txhua yam zoo uas nej yuav tsum muaj rau nej, nej thiaj ua tau raws li Vajtswv lub siab nyiam. Thiab thov Vajtswv tshoov peb cov uas ntseeg Yexus Khetos lub siab kom peb ua tej uas haum Vajtswv siab. Thov kom Yexus Khetos tau ntsejmuag mus ibtxhis li! Amees.”

Yog li koj puas hnov Vajtswv lub suab hu koj nyob hauv yus lub neej? Cia li zoo siab hlo thiab mloog lus, vim Vajtswv yog tus ncaj ncees yuav pub lub hwjchim rau peb. Nqi zog tab tom tos – ua lub siab tawv mus thiab tuav kom ruaj ruaj cia.

Thov caw nrog kuv peb thov Vajtswv ua ke:
Leej Txiv, ua Koj tsaug vim Koj yog lub hauv paus zog dawbhuv hliv los rau kuv lub neej. Kuv paub tias dhau los ntawm koj txoj kev pab, kuv thiaj ua tau tej yam uas nws nyhav tshaj kuv lub peev xwm. Thov pub lub siab tawv rau kuv, kom kuv mloog lus, txawm yog paub tias muaj ntau zaug kuv yuav hnov qaug zog thiab tsis kaj siab. Thov kom kuv lub neej yuav nco ntsoov tias, dhau ntawm kuv txoj kev qaug zog, Vajtswv lub hwjchim yuav tau nthuav tawm meej meej. Kuv thov hauv Tswv Yexus Khetos lub npe. Amees.

Cov kwv tij txhua tus, thaum uas Vajtswv hu peb los ua ib yam dabtsi twg, ces Vajtswv twb npaj txhij txhua lub hauv paus los pab kom peb ua tiav yam zoo. Yog peb tso peb txoj kev ntseeg rau ntawm Vajtswv, zoo siab hlo mloog nws lus, ces Vajtswv yog tus ncaj ncees yuav pub Nws lub hwjchim thiab pab kom peb mus txais tau tej nqi zog uas Vajtswv tau cog lus tseg. Kav tsij mus rau tom ntej, vim Vajtswv nrog nraim peb thiab nrog Vajtswv ua ke ces yeej tsis muaj ib yam dabtsi uas yuav ua tsis tau!

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau taig kis!

Cov kwv tij, yog koj xav paub ntxiv txog Tswv Yexus lossis koj muaj tej kev khwv twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj.Thiab peb xav kom txuas tau nrog koj.