Gơs tŭ lơi ồng mò oh mi ò-bat ñă cơnđoà lòt jat jơ nau hòi jà Yàng dê, bơh kơlôi lah he ò tơl pràn nang lơh ală bơta hơ̆ sơl? Gơs dơ̆, ală gơnoăr broă mơ Yàng jao he in gơ lơh be dờng rlau mơ pràn he di, lơh bol he in bat ñă bơh rngòt ò geh cồng nha. Mơya bơta dờng mang ò di la bol he pràn mƀe lơi, mơ la bol he os rcang nus dòn tòm Yàng mơ lơi Kơnràñ dong bol he lơh sir gonoar sôr hala ò.

Ngai do, ngai 16/11/2024, tơnggu hòi dan kop ngai dan ja ong mo oh mi kơñ gơboh kơ-lôi sơ-nờng bal jơnau Yàng bơh cau cih Brenda Williams gan tơng gu BAÑ LƠI ROH PHĂN ɃÀN

“Ƀàñ lơi cau lơi kòl pơrlồm mơ lơi roh phan ƀan he dê” (Kô-lô-se 2:18)

Tòm tŭ sơlo dờng tòm Yàng, añ dờp git lah dòn bơr kai mpồng. Bơta dòn bơr cèng tùs ală phan ƀàn dờng ngan (Yal wơl bơta boh lam 11:26-28). Àñ dòn nên lah ơm tòm Kơnràñ ngan la tiah lơngai mơ ring lơngai rlau jơh,, tiah bol he geh jơm gòm, sìn gar, mơ joi bàn bơta hừh nùs wiltơl hwềng soan in. Hơ̆ la tiah ò rgơi geh pơn-drơm – la tiah gơs bơta hừh nùs mơ ring- lơngai. Añ sac rwah dòn bơr ò di bơh rngòt, kung ò di bơh añ sền hơ̆ la gơnoăr broă, mơ la bơh añ kơñ gơboh Yàng mơ ò kờñ lơi ală bơta lơi kơr-yăn añ tom bơta cơđoà lòt bal mơ Kơnràñ, rlô tòm tiah sàng goh mơ bềng bơta lơngai hơ̆.

Yàng neh rcang sìr tơnggu broă rai kis bol he bơh di tŭ plài ù ò hềt sơntơm (Đơs-crih139:16). Gơs tŭ, Kơnràñ hòi ja bol he lơh ală bơta gơlơh be dờng rlau mơ gơnoăr pràn să tòm he dê. Dilah ò gơs bơta dong kơl bơh Kơnràñ, digơlăn gơnoăr broă hơ̆ ngan la ò gơs kwơ. Mơya ưn ngai Yàng, Kơnràñ ò lơi bol he tòm lơh is dô nă. Kơnràñ lơh broă tòm nus nhơm bol he dê, ai bol he in bơta pràn mơ gơnoăr pràn mơ să tòm bol he ò rgơi lơh gơs (Philip 2:13).

Oă năm lài, añ gơs dô bơta mpau. Tòm bota mpau, cau tòm ai dô gơnoăr sôr añ cih oă sră yăl nàng tơlik oă cau in git. Sơnrờp, añ nggòc nggòr mơ hòn chò ngăn bơh gơnoăr broă do. Mơya tòm tŭ nggùi mơ sơntòm cih, nisơna gơlơh be kòl dơh wơl. Gơlơh ò gam dô êt pràn lơi tai, mơ añ đơs is lah: “He ò rgơi lơh broă do!”

Tòm tŭ añ tòm pà bơta mpau hơ̆ mơ dồ nă cau bơyô, khai ơm mŏ mŏ lơh añ in roh jơh bota gơn kơnòm. Mơya tơnơ̆ wơl, Yàng ai añ in bơta chồl bơ-trồt gan dê dô sềng sră goh: “Ƀàñ lơi cau lơi kòl pơrlồm mơ lơi roh phan ƀan he dê” (Kô-lô-se 2:18)

Tŭ kơlồi sơnờng bơh sèng do, añ dòp geh bàr bơta dờng mang: Sơnrờp, cau sò tơm sùm tơnggờr sền tùs tơnggu la sòr tơr-lah bol he. Gơ rờp ngui ală bơta kơlồi sơnờng iơh bol he dê mơ kùng ngui ală cau gùt dar he nang đờp chơt nùs dùh hồl bol he dê, gan dê ală jơnau blac pơrrlồm sih bơta roh gơn kơnòm. Dơ̆ bàr, añ ơn bơta dòn tis. Ala bơh sơnđing dê Yàng, añ sơndìng wơl di gơnoăr pràn să tòm he dê. Mơya bơta tòm toh ngăn la “ tòm Kơnràñ prăp lời jơh ală bơta kàs màng bơta jak-chài dê mơ bơta git wă” (Kolôse2: 3). Dilah Bơtau Krist òm tòm añ, Kơnràñ nền cề rờp ai añ in ală bơta git jak pal càng mơ pò tơlik kòp tŭ lơmpah, bơh “…bulah añ kis, ò di la añ kis tai, mơya Bơtau Krist kis tòn añ” (Galati 2: 20).

Añ kah wơl ală cau pràn tòm sră goh- ală cau gơlơh be ò pran di đăp gơnoar broă Yàng jao. Tòm tŭ Yang hòi sac Ghê-đê-ôn dŏng tă lang bol Israel lik bơh bơta rồn bơklơn mpôl ling Madian di, ồng neh pìn wil-wơl bơh pràn he dê mơ ai tơl ală tơnggu nang dô pleh. Mơya, bơh ồng rcang sìr cơnđoà lòt jat jơnau Yàng dê hòi sac, gèn Kơnràñ neh ai ồng in bơta pràn (Kwang Cahrña 6-8). Kung behơ̆, tòm tŭ Yàng jao Môi-sê in gơnoar sồr tề lăm lang bol Israel tus hơ tiah Hơ Ai, ồng neh đơs song mơ Yàng lah he găm ò rgơi đơs tơm-bơh loh lang, mbe rgơi ăt bồ jơh dô lang bol. Mơya bơta dòn bơr ồng dê neh pờ gùng ai gơpăp gơnoar Yàng dê ràng tơlik loh lang (Lik Ejiptơ 4: 10-17). Mơ tŭ Yàng sac Dabit lơh gơs bơtau, gèn jơh ală cau tòm hiu nhă ồng kung ò kơlôi ồng la cau di pal. Mơya, nùs nhơm ồng dê sùm bềng liu bơta Kơn gơboh mơ nùs nhờm dòn duh Yang, mơ bơh hơ̆, Yàng ai ồng ìn gơnăp gơnoar dờng rlau nàng lơh will-tơl gơnoar sồr (1Samuên 13:14).

Bol he kung sên gŏ bơta do gan dê ală cau lơh ka bă liă, ală cau bơtê ò geh bơtê jrồ ơnang, mơya neh geh Yàng tom gơl gơlik gơs ală cau bềng gơnăp gơnoar Kơnràñ dê. Bol khai ò di ming gơlik gơs cau gơnoar bơtô, lơh gơnoar sồr bơtao gơs mơ tề lăm Hiu Jum Goh, gơs lơh oă bơta krơi tềl is mơ cih gơs sră hơ băl pa mơ bol he găm kơlồi sơnơng ngai do. Bơta krơi gơ òm tòm bơta bol khai neh rcang sir mơ dòn duh, găn tìng hơ̆, Yàng tuh bềng gơnăp gơnoar hơđăng bol khai, lơh bol khai gơlik gơs la phăn ngui niam rlau jơh nàng bơto yăl Jơnau song Kơnràñ dê.

Di gơlăn ồng mò oh mi òbăt ñă tòm bơta dòn bơr Yàng tài bơh wil wơl dê pràn he, hala ò dòp geh bơta chồl bơtrồt mơ he kơp gơn? Tòm Kolôse 2:15, ồng Pol tơngkah bol he lah Bơtau Krist “sang ală gơnoar ăt bồ mơ ală gơnoar,”, gơtha la ală gơnoar ăt bồ do neh wil tơl kol tơnroh jơh. Bota krơi is rlau la bol he ò tòm lơh is dô nă- Bơtau gơnăp gơnoar dờng hơđăng rlau jơh plai ù di gam ờm bal mơ bol. Yàng Tòm Trồ gơnăp gonoar rơp ai bol he in gơnoar pràn mơ pràn kơl dăng nang lơh sìr jơh ală gơnoar sồr lơi mơ Kơnràñ neh hoi sac. Hebrơ 13: 20-21 đơs nền lah: “Yàng Tòm Trồ la Bơtau lơngap lơngai…lơh oh mi in wil tơl tòm jơh ală broă niam nàng lơh jat nùs kờñ Kơnràñ dê, mơ kơnòm dê Yàng Jesu Krist mơ lơh gơs bơta niam nus Kơnràñ tòm oh mi. Dan bơta gơklŏ gơ rề hơ Kơnràñ jơl tùs sùm sùm ò lồi! Amen.”

Behơ̆, ồng mo oh mi geh kơnô bơta hòi ja Yàng dê tòm rai kis he di sơl? Jơh nus tĕ mơ dòn duh, bơh Yàng la dòn sŏng rơp ai gơnap goar bol he in. Phan ƀàn gam kờp gơn- khin chà tĕ cơnđoà tus hơ đăp mơ sơm băt gơ!

Dan jà bol he dô nùs bal tòm bơta hòi dan:
Khoai Bèp kờñ gơboh, ưn ngai Bèp bơh Kơnràñ la tòm ryàs pràn goh tuh tòm rài kìs kòn. Kòn git lah kơnòm bơta dong kờl Kơnràñ dê, kòn rgơi lơh ală bơta lòt rlau mơ pràn he dê. Dan ai kòn in nùs khin chà nàng dòn bơr, bơh git lah gơs oă tŭ kòn rơp gơlơh be lơbờñ lơñô mơ roh ring lơngai. Dan kòn sùm cih kah lah, gan bơta lơbơñ lơñô kòn dê, gơnăp gơnoar Yàng dê geh ràng tơlik loh làng rlau jơh. Kòn jơh nùs hòi dan tòm sơnđăn Yàng Jesu Krist, Amen.

Ơ ală ồng mo oh mi kơñ gơboh, tŭ Yàng hoi sac bol he lơh bơta lơi, Kơnràñ rơp rcăng sìr gơnoăr pràn nàng bol he lơh niam wil tơl ală bơta hơ̆. Dilah bol he ơn bơta dòn tơm Yàng, rcăng sìr dòn bơr, gèn Kơnràñ dòn sŏng ai gơnăp gơnoar mơ tề lăm tùs hơ phăn ƀàn mơ Kơnràñ neh hơ. Behơ̆ khin chà cơnđoà tùs tĕ, bơh Yàng sùm lòt bal mơ bol he, mơ bal mơ Kơnràñ, ò gơs ñchi lơi là ò rgơi!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.