Gơs tŭ lơi oh mi lúp is bơta lơi gơs pràn nàng tơmgơl đô bơta gơlik gơs ò niam nàng gơlik gơs niam? Tòm rài kis oă broă, ò siơ̆u tŭ lơm pah lơh he in bươn lúi gơhao gơjràñ, roh bơta kơ̆dơn, hala gơloh ò geh bơta song rưng. Mơ ya digùl ală bơta gơlong hơ̆, gơs dô bơta mơ Sră Goh sùm đơs pràn “hơđang jơh” – hơ̆ la bơta kòñ gơboh. Tòm tŭ soh bơta kòñ gơboh kơp ngai, bol he rgơi prăp gar bơta dô bă bal mơ cèng wơl bơta lơngap lơngai ngăn.

Ngai do, ngai 17/11/2024, Bơta Hòi Dan Kơp Ngai dan jà ală ồng mò oh mi bơtê bal jơnau Yàng kơnòm dê bơta dong kơl ồng Charmain Hibberd bơh tơnggumê DÔ BĂ BAL TÒM BƠTA KÒÑ GƠBOH.

“Hơđang jơh ală bơta hơ̆, soh tĕ nùs kòñ gơboh, la che tơrbŏ bơta wil tơl dê.” (Kôlôse 3:14)

“Hơđang jơh ală bơta hơ̆, soh tĕ nùs kòñ gơboh, la che tơrbŏ bơta wil tơl dê.” (Kôlôse 3:14)

Sèng Sră Goh do ơm tòm dô pơnah sèng đơs bơh rài kis cau dòn Krist. Añ dòn lah ò gơs jơnau lơi nisơna gơs mat tòm Sră Goh. Behơ̆ gèn, tòm tŭ gŏ Kôlôse 3:14 ngui jơnau “Hơđang jơh”, añ ơm bơdơh tơn nàng kơlôi.

Bơta “Hơđang jơh” mơ bol he geh hôi sac hơ̆ la soh tĕ nùs kòñ gơboh, be soh să tòm he in ôi ao kơp ngai. Dilah kơlôi jrô rlau, oh mi rơp gŏ lah pơnah dơng ală bơta tòm pơndang bal mơ ò dô nùs bal tòm rài kis ngăn gen sơntơm bơh broă siơ̆u bơta kòñ gơboh.

Pơnyơu, tŭ dô nơm rơndeh nisơna lòt găn hơđap lơh bol he in păl bơdơh mhăr – gen he rơi gơs nùs dơng ơnang mơ toh glài mơ ràng tơlik bơta kòñ gơboh gơwet mơ cau at rơndeh hơ̆ hala ò?

Hala tòm tŭ bơta gơhào gơjràñ lơh cau lơi hơ̆ in đơs ală jơnau srat bơtăng, gen he rgơi sac bơta kòñ gơboh mơ wơng bal, ala mơ lơi ală jơnau hơ̆ lơh jê sồt he hala ò?

Dilah kơp ngai bol he ơn bơta kòñ gơboh lơh pơnah tơm, gen ală bơta gơlik gơs gơlơh be ò niam kung rgơi gơlik gơs ală công nha niam.

Bol he rgơi sac kơ̆dơn tŭ cau lơi hơ̆ lòt găn gùng hơđap he. Mơ ala bơh ngui jơnau kràñ cê, he rgơi ala mơ ală jơnau nggờc nggơr, lơbơn niam rlau nàng pleh bơta tơm pơndang bal.

Bulah lơh bơta lơi, bol he kung bañ lơh roh bơta kòñ gơboh. Bañ roh bơta at bồ să tòm he mơ lơi bơta gơhào gơjràñ ăt bồ. He pal sac bơta kờñ gơboh nàng prăp gar bơta dô bă bal mơ oh mi he, kung be prăp bơta ring lơngai mơ ală cau nac crih sơl.

Bơta boh lăm dơng rlau jơh ai kòn mơnus in sơntơm bơh bơta kòñ gơboh (Mathiơ 22:37-38). Dô ò di ming la dô jơnau chôl bơtrôt hala jơnau hòi jà, mơ la dô gơnoăr sôr. Bơta kòñ gơboh gơs kas mang rlau jơh tòm lơgar Yàng Tòm Trồ dê.

Tŭ añ sơlơ ngai sơlơ dơng mơ kơp kòñ geh têh dơng tòm bơta dòn, añ đăl git lah să tòm ală bơta dềt rhền tòm rài kis la ală bơta pal càng wet tus rlau – be gùng bol he ntao diđap mơ gơwet mơ ală bơta tơm pơndang kơp ngai. Tai bơh tŭ gơwet tòm toh jat nùs Yàng tòm ală bơta gơlik gơs gơlơh be dềt, bol he rơp toes ală phăn ban dờng tòm lơgar Kơnràñ dê.

Sac tĕ bơta kòñ gơboh. Gơwet niam mơ ală cau. Sền dơng mang bơta gơtơmsor. Tŭ hơ̆, jơh tơl nă bol he rơp kis bal tòm bơta dô bă bal, mơ Sră Goh sơnđăn la “hơđang jơh”.

Dilah ngai dô ồng mò oh mi gơlơh kalkê nàng ràng tơlik bơta kòñ gơboh gơwet mơ dô nă cau lơi, hala tian gơs gơwet mơ să tòm he, dan Yàng ai ồng mò oh mi in bơta pràn kơldang bơh Yàng Hwềng Kơnràñ, nàng oh mi rgơi kòñ gơboh be Kơnràñ neh kòñ gơboh bol he.

Dan jà bol he dô nùs bal tòm bơta hòi dan:
Khoai Bèp, gơs dơ̆ kòn gơlơh kalkê ngăn nang soh bơta kòñ gơboh. Dan toh glài kòn bơh gơs tŭ kòn sac lọt jat bơta gơlơh ò niam ala bơh kòñ gơboh. Dan dong kòn kòñ gơboh cau ndai be kòñ gơboh sătòm he, mơ kòñ gơboh Kơnràñ jơh nùs. Ngai do, kòn dan sac bơta kòñ gơboh, bơh kòn git hơ̆ la gùng màng ryŭ rlau jơh tòm lơgar Kơnràñ. Dan Yàng Hwềng Kơnràñ tề lam kòn kis kòñ gơboh wil tơl ngăn. Kòn jơh nùs hòi dan, ai sơnđăn Yàng Jêsus Krist, Amen.

Ơ ală ồng mò oh mi kòñ gơboh, tŭ sac kis kòñ gơboh, bol he găm sac bơta niam rlau jơh tòm lơgar Yàng. Bơta kòñ gơboh ò di ming prăp gar bơta gơtơmklac niam digul bol he mơ Kơnràñ mơ cau, mơ la gùng nàng bơta nđac hơđăng jong Kơnràñ dê hor lik. Gơs tŭ, ming cang dô bơta lơh lòt kòñ gơboh dềt kung tơl nang tơmgơl jơh rài kis dô nă cau. Behơ̆ gen, kah tĕ lah, kơp dơ̆ ồng mò oh mi sac bơta kòñ gơboh ala mơ gơhao gơjràñ hala ò hưh nùs, ồng mò neh rsih dô nơm gả sơntil bơta rin lơngai mơ lơngap lơngai jŏ jong in.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.