Lub ntiajteb tamsim no tej xov xwm cuav. Txawm yog hauv txoj kev ntseeg Vajtswv, kuj muaj ntau txojkev cob qhia nyob hauv Vajluskub, kev ntseeg los tsis yog tias thaum twg twb qhia yog. Nyob hauv txoj kev nrog tus Tswv mus, peb yuav tau muaj ib txoj kev ntseeg ruaj khov thiaj yuav paub cais tias qhov twg yog qhov tseeb, thiab qhov twg yog tej kev ntseeg yuam kev. Thiab tib txoj kev kom tsim muaj txoj kev ntseeg ruaj khov ntawd yog nyob ze Vajtswv thiab Vajtswv tej lus, kom Vaj Ntsujplig coj peb mus rau hauv qhov tseeb.

Hnub no, yog hnub 21/11/2024, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Maria Schleicher dhau ntawm Zaj kawm LUB HAUV PAUS QHOV TSEEB RUAJ KHOV

“Koj yuav tsum ua tib zoo saib, saib koj ua koj lub neej zoo li cas thiab saib tej uas koj qhia koj qhia li cas; koj yuav tsum ua tej ntawd mus, rau qhov tej ntawd yuav pab tau koj thiab pab tau cov neeg uas mloog koj qhia kom nej dim nej lub txim” (1 Timautes 4:16).

Thaum nyuam qhuav ntseeg Vajtswv, kuv txuas phooj ywg ua ke nrog ib tug niam laus nyob hauv Pawg Ntseeg. Tus niam laus no twb ntseeg Vajtswv ntau xyoo lawm. Hauv kuv txoj kev xav, nws yog ib tug qauv zoo ntawm sab ntsujplig uas kuv xav tau.

Wb pheej zaum ua ke, sib tham txog kev ntseeg. Thaum uas kuv nug ntau txog tej kev khuab xeeb, ces nws tham rau kuv mloog txog tej phau ntawv kev ntseeg uas nws tau nyeem dhau. Nws hais txog tej tus sau muaj koob npe lossis tej xibhwb nto npe uas kuv tsis tau hnov dua. Nws cov lus txhawb tob heev, thiab kuv txais yuav txhua yam uas tus niam laus no hais.

Lub sijhawm ntawd, kuv kuj pib mus koom Pawg Ntseeg tej haujlwm thiab koom tes rau tej kev kawm Vajluskub. Ntau zaug kuv tseem koom tes rau Pawg Ntseeg pab xa moo zoo. Dhau ntawm Vaj Ntsujplig ua tus coj, kuv muaj sijhawm loj hlob ntawm sab ntsujplig muaj zog heev.

Lub sijhawm uas kawm Vajtswv txojlus thiab loj hlob hauv txoj kev ntseeg tau pab kuv tsim muaj ib tug cag ruaj khov nyob hauv Vajluskub.

Tiamsis tsis ntev xwb, kuv pom muaj ib yam ntawm kuv tus phooj ywg uas yav dhau los kuv tsis ceev faj txog. Cuag li tus niam laus no nws txoj kev ntseeg tsis loj hlob, nws pheej hais ntau txog cov sau tej phau ntawv uas muag tau nyiaj ntau, pauv qhov uas hais txog Vajtswv tej lus. Tej uas nws qhia tsis yog thaum twg twb yog raws li Vajluskub, tiamsis nws pheej vam rau lwm tus txoj kev ntseeg ntau dua li tej uas Vajtswv txojlus qhia.

Thaum peb kawm Vajtswv txojlus thiab nyob ze Vajtswv dhau ntawm kev thov Vajtswv, peb lub siab yuav cim civ tau tiv thaiv, pab kom peb paub cais meej meej thiab tuav kom ruaj Vajtswv txojlus tseeb. Tej kev ntseeg cuav, tib neeg txoj kev khav theeb, thiab txhua txoj kev sim siab puav leej yuav raug daim phab ntsa thaiv no tav cia, tsis muaj sijhawm yuav loj hlob hauv peb tus ntsujplig.

Nyob hauv 1 Timautes 4:16, Paulus ntuas Timautes yuav tau ceev faj nws txoj kev cob qhia, kom nws tus kheej thiab tej neeg ib ncig tau txais kev cawmdim. Yog ib tug ntseeg Yexus Khetos, Vajtswv txojlus niaj hnub nrog nraim peb, thiab Vaj Ntsujplig nyob hauv peb. Peb muaj feem kawm paub Vajtswv ntawm lwm tus ntseeg, tiamsis tseem ceeb dua yog peb yuav tsum civ civ nrhiav kawm Vajtswv txojlus thiab cia Vaj Ntsujplig qhia peb. Thaum koj nyeem thiab totaub Vajtswv Txojlus, koj lub siab yuav ntseeg ruaj khov kom paub feeb meej tej uas lwm tus qhia. Cia li tuav kom ruaj Vajtswv txojlus thiav nrhiav Vaj Ntsujplig ua tus coj koj.

Cia Vajtswv tus Ntsujplig coj koj dhau ntawm ib nplooj Vajluskub zuj zus. Cia li thov Vajtswv kom Vajtswv qhib koj lub siab, pab koj mloog Vajtswv tej lus thiab pub kev txawj ntse rau koj, kom nkag siab zoo Vajtswv txojlus tseeb. Ib yam li lub npuas dej hiav txwv, nws nqus qhov tseeb, kev hlub thiab lub hwjchim los ntawm Vajtswv txojlus. Raws li Paulus tau ntuas Timautes:

“Koj yuav tsum ua tib zoo saib, saib koj ua koj lub neej zoo li cas thiab saib tej uas koj qhia koj qhia li cas; koj yuav tsum ua tej ntawd mus, rau qhov tej ntawd yuav pab tau koj thiab pab tau cov neeg uas mloog koj qhia kom nej dim nej lub txim” (1 Timautes 4:16).

Thov caw nrog kuv peb thov Vajtswv ua ke:
Ua Vajtswv tsaug rau qhov koj txojlus yog qhov kaj coj kuv lub neej. Thov qhib kuv lub qhov muag kom kuv hnov thiab nkag siab qhov tseeb hauv koj tej lus. Thov pab kom kuv muaj lub siab ntshaw kawm thiab nyob ze koj dhau ntawm lub neej thov Vajtswv. Thov kom Vajtswv tus Ntsujplig coj kuv kev, pab kuv paub cais qhov tseeb thiab tej yam yuam kev hauv ntiajteb. Kuv thov hauv Tswv Yexus Khetos lub npe. Amees.

Cov kwv tij txhua tus, thaum txiav txim siab kawm Vajtswv txojlus, peb tsis yog tsuas tsim kom muaj ib tug cag kev ntseeg ruaj khov rau yus xwb, tiamsis yuav tau loj hlob lub peev xwm paub faib cais qhov tseeb thiab tej kev xav yuam kev. Cia Vaj Ntsujplig coj koj mus rau hauv qhov tseeb thiab tu koj lub siab los ntawm Nws tej lus. Los ntawm txoj kev ntawd, koj yuav ua ib lub neej nthuav tawm Vajtswv txoj kev hlub thiab kev txawj ntse, tib txhij ntawd kuj dhau los ua qhov pom kev rau tej neeg ib ncig, pab kom lawv nrhiav tau qhov tseeb tiag uas Vajtswv tau qhia.

Nyob zoo sawv daws, thov foom kom ib hnub tshiab tau txais koob hmoov zoo thiab mam sib ntsib rau tas kis!

Tus phoojywg, yog koj xav paub ntxiv txog Tswv Yexus lossis koj muaj tej kev khwv, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm, inbox ntawm fanpage hauv Facebook, lossis xa ntawd email rau hauv thaj chaw:[email protected]. Tswv Yexus hlub koj. Thiab peb xav kom txuas tau nrog koj.