Dunnia tŭ do ơm tom bơta bîng-ìr ală jơnau tơnggit. Mơ tom bơta dòn gen kung behơ̆ sơl, gơs oă bơta bơto sồr gơrềng tus Sră Goh, bơta dòn, mơ ya ò di tŭ lơi kung tom-toh. Tom gùng lòt jat Yàng, bol he pal cang dô mơnàng kơ̆-cê nang rgơi cah-ìs bơta lơi la jơnau song, mơ bơta lơi la tìs-nrah. Mơ bơta pal gơs nang rgơi bơt bơtao dô mơnang hơ̆ la sùm ơm rềp mơ Yàng mơ Jơnau Yàng, nang Yang Hwềng Goh tề lăm bol he mơ jơnau song.

Ngai do, ngai 21/11/2024, Bơta Hòi Dan Kờp Ngai dan jà jơh cau ơm iat kơlôi sơnơng Jơnau Yàng kơnòm di bơta dong kơl Maria Schleicher gan tơnggume CAT JƠNAU SONG KƠ̆-CÊ.

“Kơrmap gàr tĕ să-tòm mê mơ bơta bơto sồr mê dê; pal kơ̆-wền tĕ tom ală bơta hơ̆, tai bơh lơh behơ̆ gen rơp dong klàs sa-tom mê bal mơ ală cau iat mê sơl.” (I Timôthe 4:16)

Tom ală ngai sơnròp pa dòn dòp Yàng, añ neh lơh yô mơ dô nă cau bi tom Hiu Jum Goh. Bi ur hơ̆ neh don jat Yàng oă sơnăm. Tom bơta kơlôi sơnơng añ jê, bi hơ̆ la dô nơm rùp sơnio đah hwềng mơ añ koñ gơboh ngan.

Bol he òs nggui bal, yal ală bơta yal yau bơh bơta dòn. Tom tŭ añ ò lŭ lơi bơdơh ai ală seng lùp, bi hơ̆ òs yal añ in kơno bơh ală sră cau dòn mơ bi neh sền. Bi hơ̆ ai tơnggu liah ală cau cih hala ală cau gơnoar bơto tiang pơnro mơ añ ò hềt kơno bơh sơnđăn. Ală jơnau bơto tơngkah bi dê jrô ndơp ngan, mơ añ kung bè dà bông (miếng bọt) dà lềng dê, dòp prap jơh ală bơta bi neh đơs.

Tom tŭ hơ̆, añ kung sơntòm gơs pơnah oă rlau tom ală broă Hiu Jum Goh dê mơ gơs mat tom ală tŭ jơ bơtê Sră Goh. Tian gơs añ kung mùt tom mpôl bơto yal Hiu Jum Goh dê. Kơnòm di Yàng Hwềng Goh tề lăm, añ neh lòt gan dô pah tơngai têh dờng đah hwềng pran kơldang.

Tŭ jơ bơtê Jơnau Yàng mơ git làm bơta têh dờng tòm bơta dòn neh dong añ bơt bơtao dô mơnang kơ̆-cê kơnòm di Sră Goh.

Mơ ya ò jọ̆ tơnơ̆, añ đal git dô bơta mơ laị mơ hơ̆ añ ò hềt tŭ lơi kơlôi tus bơh cau bơyô he dê. Bi ur hơ̆ ò geh têh dờng ngan tom bơta dòn; bi hơ̆ òs bơyai oă rlau bơh cau cih ală sră bơt bơtao đah hwềng geh brọ oă, mơ ò đơs bơh Jơnau Yàng. Ală bơta lơi bi tom-pà ò di tŭ lơi kung tom toh mơ Sră Goh, mơ òs kơnòm di ală bơta kơlôi sơnơng cau ndai dê rlau mơ ală bơta lơi Jơnau Yàng koñ bơto ngan.

Tom tŭ bol he bơtê Jơnau Yàng mơ kis rềp mơ Kơnràñ tom bơta hòi dan, nùs nhơm bol he dê krơi is rơp geh gơrwang bơh dô bơta sền gar, dong bol he rgơi cah is loh lang mơ sơmbat jơnau song Jơnau Yàng dê. Ală jơnau tìs-nrah, ală bơta ham-koñ jòng să kòn mơnùs dê, mơ ală bơta ndai rơp ò geh sền gar mơ kơndơl wơl, ò tŭ lơi gơs tŭ lơmpah sơmbut riàs gơ in tom hwềng nùs bol he.

Tom I Timôthe 4:16, cau gơnoar bơto dờng ông Pol tơngkah Timôthe pal kơrhia tom bơta bơto sồr khai dê, nang să tòm khai mơ ală cau gùt dar kung rơp geh dong-klàs. La cau dòn Yàng, Jơnau Yàng sùm ơm bal mơ bol he, mơ Yàng Hwềng Goh mùt ơm tom nùs bol he dê. Bol he rgơi bơtê bơh ală bơta mơ ală cau dòn Yàng ndai đơs bơh Yàng, mơ ya dờng mang rlau jơh, bol he kung pal cang kơlôi sơnơng ìs Jơnau Kis Yàng dê mơ bơta gơs mat Hwềng Goh Kơnràñ dê. Tom tŭ oh mi sền mơ wă wơng Sră Goh, ao sền gar oh mi bơt-mòn tom nùs rơp dong oh mi cah is ală bơta lơi mơ cau ndai đơs. Hala ngui ao sền gar nùs dê nang lơh goh wơl ală jơnau bơto hơ̆, tom tŭ sùm prap kơ̆ Jơnau song Jơnau Yàng dê mơ joi jat bơta tề lăm bơh Yàng Hwềng.

Lòi tĕ Hwềng Yàng dê tề lăm oh mi gan kờp blah Sră Goh. Hòi dan tĕ mơ Yàng nang Kơnràñ pò nùs oh mi, dong oh mi kơno Jơnau Kơnràñ mơ ai oh mi in bơta jak chai, bơta git wă tò rgơi git loh rlau jơnau song Kơnràñ dê. Pal lơh tĕ bè nsồp ƀông dà-lềng, dòp prap ală jơnau song, bơta koñ gơboh mơ gơnap-gơnoar bơh Jơnau Kơnràñ. Kung bè jơnau cau gơnoar bơto dờng ông Pol neh tơngkah Timôthe:

“Kơrmap gàr tĕ să-tòm mê mơ bơta bơto sồr mê dê; pal kơ̆-wền tĕ tom ală bơta hơ̆, tai bơh lơh behơ̆ gen rơp dong klàs să-tom mê bal mơ ală cau iat mê sơl.” (I Timôthe 4:16)

Dan jà bol he dô nùs bal tòm bơta hòi dan:
Ưnngai Yàng tai bơh Jơnau Kơnràñ la bơta àng tề lăm rài kis kòn. Dan pò nùs kòn nang kòn rgơi kơno mơ git loh jơnau song tom Jơnau Kơnràñ dê. Dan dong kòn sùm ji-gloh tơ-hir bơtê mơ ơm rềp mơ Kơnràñ gan rài kis hòi dan. Dan Hwềng Goh Kơnràñ tề lăm kòn, dong kòn git cah is digul jơnau song mơ ală bơta kơlôi sơnơng tis-nrah dunnia dê. Kòn jơh nùs hòi dan tom sơnđan Yàng Jesu Krist, A-men.

Ơ jơh ală ông mò, oh mi koñ gơboh, tom tŭ lơh nên bơtê mơ git làm Jơnau Yàng dê, bol he ò di ming bơt bơtào he in dô mơnang bơta dòn kơ̆-cê, mơ kung bơt-bơtao bơta git jak rgơi cah is digùl jơnau song mơ ală bơta kơlôi sơnơng tis. Dan tĕ Yàng Hwềng tề lăm oh mi tus mơ Jơnau song mơ ròng-siam nùs nhơm oh mi mơ Jơnau Kơnràñ dê. Kơnòm behơ̆ song oh mi rgơi kis dô rài kis rang tơlik bơta koñ gơboh mơ bơta jak chai Yàng dê, mơ kung gơlik gơs bơta àng ală cau gùt dar, dong bol khai kung joi ban jơnau song ngan mơ Yàng neh ai.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.