Lăm trong yak năm bơ̆jang kơ Kră Yang, lu bơ̆n ngăl dan ăn kơ kơdih đei hơdral: ‘nâu anih inh trŏ kơ wă yak năm, gah anih to ưh kơ đei layơ wă yak truh. Na Yang Yêsu phara. Sư ưh kơ ‘nhrơ̆ hli tơ oei hăm bơngai đe pơjăm, ưh kơ ‘nhrơ̆ hli năm tơ anih mă đe weh wer. Tơ anih “ưh kơ đei bu wă yak năm truh”, tơdrong ‘mêm mơnat păng tuh ăn đĕch Sư hơdah hơdong hloh kơ đĭ đăng. Na năr ‘nâu, Sư kư̆m oei krao buăl lĕch đơ̆ng “anih ‘lơ̆ng kơjăp” kơdih, wă kơ bôh tôm tơdrong proh hơmet tih hloh đơ̆ng Sư.

Năr ‘nâu, ‘năr 03/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Carolyn Fraiser kơ̆l ‘bai PƠJAO ĂN ƯH KƠ ĐEI HƠGĂT

“Dôm tơmam âu ‘Bok Kei-Dei khan ‘lơ̆ng boih, ưh kơ đei giĕng ôh; na ih khan giĕng. Thoi noh ih pơma ưh kơ trŏ păng Sư dơ̆ng.” (Tơdrong Jang 10:15)

Inh jur tơ âu ưh kơ sĭ kơ Inh wơ̆n chă lu bơngai ‘lơ̆ng wă tơbral kơdih tơdrong yoch ôh. Inh jur tơ âu wă wơ̆n chă lu bơngai yoch wă kơ sư tơbral kơdih tơdrong yoch sư.” (Luka 5:32)

Pêtrôs jơ̆ bơngai Isơrael arih pơm kơmĭl ‘lơ̆ng tơpă. Sư adrin pơm kiơ̆ tôm kơ tơdrong khôi juăt păng dôm kơ khôi juăt tơtă athei pơm. Mă lei, kơplah yak năm hơdai hăm Yang Yêsu lăm chăl arih, tơdrong lôch păng iung arih Sư, Pêtrôs oei bơwĭnh tam mă hlôh đĭ tôm tơdrong. Lăm jơhngơ̆m sư, oei lui kơ ‘Bok Mêsi đei wơh jur wă dŏng pơklaih adrô̆ bơngai Isơrael đĕch.

Mă lei ‘Bok Kei-Dei đei pơih ăn kơ sư mĭnh pôm rup chhơ̆ tih hloh dơ̆ng. Tơdrong tơ’bôh gah dôm sem dơrong đei lăng jơ̆ ‘mê̆ ‘mach tơpă pơm kơ sư ưh kơ rơhăo. Sa dôm tơmam mă ‘Bok Kei-Dei khă khan giĕng hăm bơngai Isơrael sa hă? Ưh kơ đei layơ! Sư tơl khan: “Ơ Kră Yang, inh ưh kơ gơh sa ôh, yua kơ inh ưh kơ lah sa lu tơmam âu, kơlih kơ tơdrong juăt nhôn giĕng ưh kơ gơh sa.” (Tơdrong Jang 10:14). Na ‘Bok Kei-Dei khan kơ sư: “Dôm tơmam âu ‘Bok Kei-Dei khan ‘lơ̆ng boih, ưh kơ đei giĕng ôh.” (trong 15)

Inh đei jet kơdih: lu bơ̆n đei hơdôm wơ̆t đei tơ’bơ̆p tơdrong thoi noh? Lu bơ̆n ngăl tơchĕng khan rŏ lăng Kră Yang ưh kơ đei layơ krao athei bơ̆n năm tơ anih ưh kơ rơhăo hiôk, athei ‘măn kơ lu bơngai ưh tam mă đei đon lui. Lei hăm trŏ kơ thoi noh ưh?

Yang Yêsu jơ̆ tơm kơ pơm kơmil hơdah hơđăl hloh. Sư tơ oei sŏng sa hơdai bơngai iŏk jên thuê̆, pơma dơnuh hăm lu bơngai ‘ngoaih kơ kon pơlei Isơrael păng lu bơngai ưh kơ đei pơm kiơ̆ khŭl bơngai lui. Sư kŭm kơnhăm năm lăm dêh Samari wă tơ’bơ̆p bơngai drŏ kăn đe roi sa pơma ‘bơm tơei ‘bơ̆t đak sơlŭng. Lăm Luka 5:31, Na Yêsu khan kơ lu sư: “Lu bơngai mă liĕm akâu ưh kơ kăl kơ ‘bok pơgang ôh. Pôm lu bơngai jĭ jăn đĕch kăl kơ ‘bok pơgang.”

‘Bok Kei-Dei băt kơ jơhngơ̆m Pêtrôs ‘mêm kơ Sư. Sư băt kơ Pêtrôs hli yom kơ Sư. Mă lei Kră Yang wă tơplih jơhngơ̆m ‘maih wă sư. Sư wă kơ Pêtrôs ‘bôh tơdrong proh hơmet tih đơ̆ng Sư, ưh kơ sĭ ăn adrô̆ kon pơlei Isơrael đĕch.

“’Bok Kei-Dei wơh Kon Sư jur tơ ala teh âu wă pơklaih kon bơngai đơ̆ng tơdrong yoch, ưh kơ sĭ wă phak kon bơngai ôh.” (Yôhan 3:17)

Pêtrôs ưh kơ kăl kơ gô đunh wă kơ hlôh Kră Yang wă pơtho sư. Sư tơ’bơp Kôrnei, minh ‘nu bơngai ưh kơ ‘bok thây bơtho, kư̆m ưh kơ bơngai Isơrael, mă jơ yŏng pơgơ̆r linh Rôm- kư̆m lăng nhen thoi ayăt! Mă lei sơ̆p hla bơar ‘Bok Kei-Dei chih thoi âu, Kôrnei jơ̆ bơngai “Sư kư̆m hơlăng kơ đe Juđê tơmam păng krao khan ling-lang kơ ‘Bok Kei-Dei.” (Tơdrong Jang 10:2), sư ling lang krao khan păng tơgŭm lu bơngai kơ‘bah ( tr.4). Na đei minh tơdrong, sư tam mă kơtơ̆ng gah Yang Yêsu. Na ‘Bok Kei-Dei yua Pêtrôs bơngai roi tơbăt kơ sư tơdrong ‘Nao Lơ̆ng.

Lăng ming trong yak năm kiơ̆ Kră Yang kơdih inh, inh đei nơ̆r jet tơnat kơ hlôh: đei layơ inh weh wer kơ anih mă Kră Yang wă kơ inh yak năm truh tơ noh, yua hli kơ lu bơngai jum dăr ‘bôh inh tơnoh? Đei layơ tơ’bơ̆p bơngai inh kăl kơ wă tơgŭm mă lei inh pơm ưh kơ băt? Đei layơ inh pơm ưh kơ băt kơ Yang Bơhngol ‘Lơ̆ng pơtrŭt, athei inh krao wơ̆n bơngai ayơ noh năm akŭm kơkuh, yua kơ lu sư đei tơdrong arih tam mă ‘lơ̆ng?

Mă tơpă, inh oei nhen thoi Pêtrôs lơ tơdrong dêh. Inh đei pơrăm lê̆ bơngai nai, mă Kră Yang wă kơ inh ră roi kơ lu sư tơdrong ‘Nao ‘Lơ̆ng. Inh tơ hiong lê̆ tơdrong hơdah wă ba ăn kơ anih măng mu. Inh ưh kơ ‘bôh jơhngơ̆m gĭt kăl bơngai nai thoi kơ Kră Yang lăng ‘bôh. Dôm kơ tơdrong Kră Yang khan rơgoh, inh khan “ ‘mê̆ ‘mach”.

Năr ‘nâu, Kră Yang oei krao buăl tơ’bôh tơdrong ‘mêm mơnat đơ̆ng Sư ăn kơ bơngai mă buăl ưh kơ đei hơpơi wă? Dah Kră Yang oei pơtrŭt buăl lĕch năm tơ anih hlĭch ayơ noh? Tơdah buăl oei tơtăm, buăl ‘nĕ kơ hli yua kơ buăl huay kơ yak năm minh adrô̆ ôh. Na tơdah buăl drơ̆ng iŏk pơm kiơ̆ nơ̆r krao đơ̆ng Kră Yang, buăl gô ‘bôh tơdrong mơsêh đơ̆ng Kră Yang tơ’bôh ‘lơ̆ng rŏ tơlăm tơdrong arih buăl, păng ba tơdrong hơdah dŏng pơklaih truh tơ lơ bơngai jum dăr.

Apĭnh đĭ đăng krao khan hơdai: Kơkuh kơ Kră Yang, lơ wơ̆t kon ‘maih wă arih lăm anih hiôk chơt kiơ̆ kơ kơdih, wă kơ huay kơ đei đe pơjuăl. Na năr ‘nâu, kon kơ tơ̆ng nơ̆r Ih krao, kon pơ̆n nuih lĕch yak năm. Apinh ăn kơ kon măt lăng ‘bôh thoi kơ Ih lăng ‘bôh, ăn kơ kon jơhngơ̆m băt kơ ‘mêm mơnat thoi kơ Ih ‘mêm, păng ăn kơ kon jơ̆ng yak năm tơ anih kon tam mă đei tơchĕng truh. Mă kon oei hli tơtơ̆, apinh Kră Yang tơ’blŏk kơ kon, kon huay kơ yak năm minh adrô̆. Ih oei Yak năm pơih trong adrol ăn kơ kon, păng Yang Bơhngol ‘Lơ̆ng yak năm hơdai kon. Hơpơi kơ đơ̆ng tơdrong arih kon, lơ bơhngol gô đei tơdrong dŏng pơklaih đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, buăl hăm lui ngeh lăp minh chu yom lăm đon lui đĕch gô đei Kră Yang tơ’bôh tơdrong mơsêh tơplih chăl arih bơngai bu noh ưh? Kơplah buăl chu yom kiơ̆ kơ nơ̆r krao đơ̆ng Kră Yang, ưh kơ sĭ hơdrô̆ chăl arih bơngai nai đei tơplih, na kơdih buăl gô ‘bôh Kră Yang tơ’bôh tơdrong mơsêh mơyang păng tơdrong ‘mêm Sư rơđah hloh lăm chăl arih buăl. Na buăl gô mơn băt: chu yom Kră Yang huay kơ pơm kơ buăl hiong tơdrong kiơ noh ôh mă ăn kơ buăl gô đei pŭn hiôk păng arih tôm mah ăn kơbuăl hăm ăn kơ bơngai nai.
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.