Bơngai lui kơ Yang Yêsu đei krao arih mĭnh chăl arih iŏk đon ala păng bơwih bơwăn kơ kon bơngai, hloh ‘noh jơ̆ dôm lu bơngai rơdu tơrăn păng iĕ hloh. Lăm kơplah ‘noh, teh đak dang ei ‘bĕnh kơ tơdrong kơkuh kơ tơdrong pơgơ̆r păng anih tơdrong jang păng akâu jăn kơdih. Kon bơngai ‘bônh dêh kơ pơhlŭ lăm tơdrong arih lăp tơchĕng kơ kơdih kâu, tơplih yua kơ hiơ̆k bơngơ̆t păng dŏng tơgŭm bơngai nai. Tŏk bŏk mĭnh teh đak thoi noh, Kră Yang wă kơ lu bơ̆n sơng iŏk jơhngơ̆m ayơ?

Năr ‘nâu, ‘năr 04/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Paul J. Palma kơ̆l ‘bai JƠHNGƠ̆M BƠNGAI ĐAM.

“Na Inh bơngai mă pơm Pơtao iĕm gô khan kơ iĕm thoi âu: ‘Inh khan kơ iĕm tơpă, yua kơ iĕm băt tơgŭm mơnat kơ lu ‘nhŏng oh Inh âu mă iĕ hloh kơ lu iĕm đe sơ̆, tơdrong iĕm pơm noh dang iĕm tơgŭm Inh mơ̆n.” (Mathiơ 25:40)

Đei layơ buăl đei pơtrŭt wă tơ’bôh jơhngơ̆m ‘mêm mơnat hăm mĭnh ‘nu bơngai oei lăm anih pơngot ol kơ đak, pơmat tat, jĭ jăn, đe ataih, dah đei oei lăm hnam phak ưh? Dôm sơnăm adrol, inh đei năm tơ hnam phak wă năm ngôi tơ mĭnh ‘nu buăl đơ̆ng oei ‘lơ̆p oei phak tơ noh. Buăl inh ưh kơ hlôh yua kơ liơ mĭnh ‘nu bơngai mă sư đei ưh kơ pơma dơnuh lăm đunh sơnăm thar pơdơh năm ngôi tơ sư lăm hnam phak. Sư drơ̆ng kơdih đei tơdrong yoch, păng băt hơđăl yua kơ kiơ sư đei oei lăm anih ‘nâu. Kơplah ‘blŏk đêl tơdrong ‘noh, inh lui kơ Kră Yang đei dan lăm jơhngơ̆m inh jơhngơ̆m đơ̆ng mĭnh ‘nu bơngai đam, wă kơ inh gơh năm hăm bơngai buăl ‘nâu. Tơdrong năm ngôi ‘noh đei tơguăt dơ̆ng buăl juăt đơ̆ng măr nhi păng pơih ăn jơ năr wă kơ inh ră roi gah Kră Yang kơ ‘nhŏng noh.

Yang Yêsu tơ’bôh jơhngơ̆m ‘mêm mơnat păng jơhngơ̆m bơwih bơwăn bơih jơ̆ tơdrong tơ’bôh rơđah hơđăl đơ̆ng mĭnh chăl arih Bơngai Lui. Adrol kơ chu iŏk pơ̆ng tơ ‘long pơglang, Yang Yêsu đei hơdai hăm lu bơngai pơhrăm păng pơma roi kơ lu sư gah tơdrong Sư wă jur dơ̆ng ning mônh. Sư pơma khan: “Na Inh pơm Pơtao pơgơ̆r lu sư, Inh khan kơ lu bơngai mă oei gah ‘ma kơ Inh thoi âu: ‘Bă Inh ăn kơ iĕm hiôk tơpă, năm mơ̆t oei tơ dêh Sư bĕ, Sư hơmet kơ iĕm anih đơ̆ng Sư pơjing plĕnh teh sơ̆ boih. Sơ̆ Inh pơngot, iĕm ‘me Inh; sơ̆ Inh ol kơ đak, iĕm asong nhă; Inh bơngai tơmoi, iĕm sơng iŏk oei tơ hnam iĕm. Inh ưh kơ đei hơbĕn ao, iĕm tơgŭm; Inh jĭ jăn, iĕm ngôi hơpong; đe tah Inh tơ hnam phak, iĕm kư̆m năm ngôi.” (Mathiơ 25:34-36)

Teh đak ngăl lăng bơngai đam jơ̆ lu bơngai iĕ hloh, mă lei Yang Yêsu đei bơtho tơplơ̆ dơ̆ng. Sư pơma khan dôm lu bơngai chĕp jơhngơ̆m bơngai đam trŏ jơ̆ dôm lu bơngai gô sơng iŏk dêh char plei ‘lơ̆ng. Sư hiơ̆k truh kơ tơdrong lu bơ̆n gô pơm tơ’bôh hăm “dôm lu bơngai iĕ hloh” thoi yơ. Bơngai bu ăn kơ bơngai pơngot sa, ăn kơ bơngai ol kơ đak nhă, sơng iŏk tơmoi, pơhrŭk ao kơ bơngai kơhoh, wei rong bơngai jĭ jăn păng năm ngôi tơ bơngai lăm hnam phak kŭm jơ̆ oei bơwih bơwăn kơ kơdih Sư: “Inh khan kơ iĕm tơpă, yua kơ iĕm băt tơgŭm mơnat kơ lu ‘nhŏng oh Inh âu mă iĕ hloh kơ lu iĕm đe sơ̆, tơdrong iĕm pơm noh dang iĕm tơgŭm Inh mơ̆n.” (Mathiơ 25:40)

Kon bơngai ngăl lăp đon kơ ăn tơmam sa, đak nhă, anih oei, hơbăn ao, dah chă trong wei rong păng pơm buăl hăm dôm lu bơngai jang tih wă hơpơi sơng iŏk tơdrong kiơ noh. Mă lei Yang Yêsu đei pơ ư kơ dôm lu bơngai wă bơwih bơwăn kơ dôm lu bơngai rơdu tơrăn păng răm ‘băm hloh.

Yang Yêsu đei arih lăm jơhngơ̆m iŏk đon ala đơ̆ng mĭnh ‘nu bơngai bơngai đam tôm mah. Mă khan jơ̆ Pơtao kơ lu pơtao, mă lei tơdrong jang đơ̆ng Sư ưh kơ gơh jô̆ hăm tơdrong ư-ang dah tơdrong bơngai nai bơwih bơwăn kơ Sư, mă lei đơ̆ng tơdrong Sư kŭp kơ̆l tơ ala păng tơl tơwih tơdrong kăl yua jrŭ să hloh kơ lu sư: “’Kư̆m thoi Inh Kon Bơngai mơ̆n, Inh jur tơ ala teh âu ưh kơ sĭ Inh wă chă pơgŏ pơđep đe awih awăn kơ Inh ôh; Inh wă kơ tơ’ngla Inh kơdih awih awăn kơ đe păng Inh wă kơ tơ’ngla Inh kơdih lôch tang huai iŏk lơ bơngai.” (Mathiơ 20:28). Yang Yêsu đei pŭ iŏk đĭ đăng kơ lu bơ̆n, kŭm đei lôch tơ kơpal ‘long pơglang, păng ‘Bok Kei-Dei đei pôk atŏk Sư tơ kơpal hloh păng ăn kơ Sư tih hloh kơ đĭ đăng (Philip 2:9-11).

Thoi noh, tơdrong bơwih bơwăn mă ‘Bok Kei-Dei lăp đon athei đei đơ̆ng jơhngơ̆m chu pŭ iŏk păng ưh kơ chang hơmĕng tơdrong pơdrâu ăn. ‘Noh jơ̆ dah lu bơ̆n wă pơyơ̆r jơ năr hloi, jơhngơ̆m pran, jên tơmam đơ̆ng kơdih wă bơwih bơwăn kơ dôm lu bơngai iĕ hloh păng rơdu tơrăn hloh, mă khan đei sơng iŏk tơdrong kiơ dah ưh.

Apĭnh đĭ đăng krao khan hơdai: Kơkuh kơ Kră Yang ‘mêm, apĭnh bơtho kơ kon băt hiơ̆k bơngơ̆t truh kơ dôm lu bơngai mă oei lăm pơmat tat, băt iŏk đon ala păng đei jơhngơ̆m wă pơ jao ăn tơdrong mă kon đei hăm jơhngơ̆m hơmrah. Apinh ăn kơ kon ưh kơ sĭ lăp tơchĕng gah kơdih kâu, mă lei ăn kơ kon ‘bar pah măt păng jơhngơ̆m đơ̆ng Ih wă lăng ‘bôh tơdrong kăl yua đơ̆ng dôm lu bơngai jum dăr păng tơ’bôh jơhngơ̆m ‘mêm mơnat hăm lu sư. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, chăl arih Bơngai Lui ưh kơsĭ lăp lăm khŭl bơngai lui, anih Khŭl Lui lu bơ̆n hơdai đĕch ôh, mă lei lu bơ̆n athei dui kơjung wă kơ truh tơ dôm anih păng khŭl bơngai phara lăm teh đak. Athei tơ’bôh tơdrong hiơ̆k bơngơ̆t đơ̆ng buăl truh kơ bơngai nai hăm tơdrong hơdai lăm tơdrong jang đơ̆ng Khŭl Lui, dah dôm lu tơdrong tơdă kơnhăm kơ khŭl tơpôl mă buăl gơh hơdai.

Buăl kŭm gơh klah asong tơmam đơ̆ng kơdih kơ mĭnh ‘nu bơngai pơmat tat ayơ ‘noh mă buăl tơ ‘bơ̆p rok trong, ăn kơ lu sư mĭnh tơdrong kuăr, mĭnh nơ̆r jet, păng nơ̆r krao khan. Kŭm athei năm ngôi hơpong kơ bơngai bu oei lăm kơplah jĭ jăn, rơdu tơrăn đơ̆ng akâu jăn truh tơ lăm bơhngol. Athei ling lang chă jơ wă pơm tơdrong ‘lơ̆ng dih băl, păng ‘blŏk kơ nơ̆r bơtho đơ̆ng Kră Yang Yêsu: “yua kơ iĕm băt tơgŭm mơnat kơ lu ‘nhŏng oh Inh âu mă iĕ hloh kơ lu iĕm đe sơ̆, tơdrong iĕm pơm noh dang iĕm tơgŭm Inh mơ̆n.”

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.