Lăng tơ kơdih akâu, kư̆m đei lu bơ̆n lăng ‘bôh dôm kơ tơdrong ưh kơ gan ‘lơ̆ng: “Inh rơdu tơrăn dêh”, “Inh ưh kơ đei ‘net ‘biơ̆”, dah truh tơ, “Rŏ lăng Kră Yang ưh kơ đei yua iŏk inh ôh.” Mă lei buăl hăm băt ưh, dôm kơ lu bơngai lăng nhen thoi kơ hmă đĕch jơ̆ minh tơdrong Kră Yang rơih iŏk wă chih tơdrong hơ’mon tih hloh đơ̆ng Sư. Nhen minh ‘nu bơngai gơh hơgei pơm kơ nôt ‘bai hơri ưh kơ tơproh jing ‘bai preh brŏ mơ̆ng hiôk hơ iă, ‘Bok Kei-Dei kư̆m yua iŏk tơdrong arih rim năr lăng nhen thoi hmă đĕch đơ̆ng buăl wă pơm dôm tơdrong hơri hiôk hơ iă ư-ang kơ Sư.

Năr ‘nâu, ‘năr 05/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Shadia Hrichi kơ̆l ‘bai LEI KRĂ YANG HĂM WĂ YUA INH ƯH?

“Kơplah ‘Bok Kei-Dei pơjing plĕnh teh sơ̆ Sư khan kơ măng mu athei đei hơdah na đei hloi. Na Sư kư̆m pơchrang tơdrong hơdah Sư tơ jơhngơ̆m đon nhôn, tơ muh măt Yêsu Krist, wă tơbăt kơ nhôn Sư Kră Yang ‘Bok Kei-Dei mơsêh tơpă.” (II Kôrintô 4:6)

“Kră Yang ưh kơ đei yua iŏk inh!” buăl tam đei layơ tơchĕng thoi noh ưh? Inh ră roi tơpă dôm kơ năr blŭng a lui kơ Kră Yang, kư̆m đei inh tơchĕng thoi noh. Na inh đei hŏk iŏk thoi âu, tơdrong thoi noh ưh kơ sĭ glăi đĕch ôh, mă kư̆m truh tơ tơdrong yoch. Glăi noh yua kơ ‘Bok Kei-Dei jơ̆ Tơ’ngla pơgơ̆r tôm tơdrong. Sư yua tôm tơdrong kiơ noh, dah rim ‘nu bu bu noh, wă pơkeh tôm tơdrong đơ̆ng sư dan ăn đơ̆ng Sư. Truh tơ, Sư gô pơm mă ưh kơ iŏk lê̆ dôm tơdrong rơngei đơ̆ng kon bơngai. Kră Yang gơh pơm tôm tơdrong thoi noh!

Tơchĕng thoi noh kư̆m jô̆ khan tơdrong yoch, yua kơ dan “kơdih” kơpal hloh kơ ‘Bok Kei-Dei. “Inh gô pơm tơdrong âu, inh ưh kơ pơm tơdrong to noh.” Kơplah lu bơ̆n kơnhăm kơ nơ̆r jet: “Thoi yơ inh gơh bơ̆jang kơ Kră Yang?”, na kơplah noh lu bơ̆n ataih đơ̆ng tơdrong ‘lơ̆ng tơpăt đei chih tơ ‘blŏk: ‘Bok Kei-Dei jơ̆ – anăn tih hloh, tơdrong ‘mêm jrŭ să ăn kơ lu bơ̆n, păng tôm tơdrong ‘lơ̆ng rơgoh Sư đei pơm ăn kơ lu bơ̆n. Mơ̆ng nhen phara ‘biơ̆ tŏ sĕt, mă tơpă ataih băl dêh tơpă.

Mă lei tơdrong hiôk chơ̆t jơ̆ thoi âu: oei đei hơmĕng ăn kơ lu jơhngơ̆m tơchĕng khan “Kră Yang ưh kơ wă yua inh.” Kơplah lu bơ̆n ưh pă lăng tơ dôm tơdrong ưh kơ kĕ wă pơm dah kơnê̆ kơdih, păng lăng tơ Kră Yang hăm tơdrong ‘mêm Sư ăn kơ lu bơ̆n, na tơdrong pơgơ̆p Sư hăm bơ̆n gô ‘net ‘net wơ̆ ‘lŏ. Na Sư gô pơih măt lu bơ̆n gô ‘bôh Sư đei bơ̆jang lăm chăl arih lu bơ̆n đunh bơih. Na kơplah trŏ kơ khei ‘năr truh, Sư gô krao iŏk lu bơ̆n bơ̆jang tơdrong ‘lơ̆ng rơgoh hơdai hăm Sư.

Kră Yang đei tơ’blŏk kơ inh tơdrong tơpă tơpăt gĭt kăl ‘nâu, kơplah inh đei ‘bôh roi tơbăt lăm điê̆n thoăi đơ̆ng buăl. Đơ̆ng ‘bar sơnăm đei hlôi, buăl noh đei pơma dơnuh hăm pêng ‘nu bơngai adruh mơlôh tơ teh đak Êyiptơ ataih atŏ. Rim giĕng, lu sư tơ’bơ̆p tơ lăm điê̆n thoăi pơjuăt pơma nơ̆r English. Tơdrong juăt lu sư rai đunh rai wơ̆ ‘lŏ, na lu sư pơtơm blŭng a klah song đon lui kơdih lu sư. kơplah buăl inh đei ră roi dôm kơ tơdrong mă mŏ âu đei hŏk iŏk đơng lăm hơ’mon kơ Hagar păng Ismael lăm sơ̆p hla bơar ‘Bok Kei-Dei, lu sư hưch wă ‘maih mơ̆ng dơ̆ng. Lu sư kơnhăm yua kơ Haga kư̆m bơngai Êyiptơ, thoi kơ lu sư! Na phara kơ sơ̆p hla bơar Quran, ưh kơ đei ră roi gah Hagar, na sơ̆p hla bơar ‘Bok Kei-Dei ră roi lơ gah bơngai drŏ kăn ‘nâu, na tơdrong ‘mêm mơnat tih đơ̆ng ‘Bok Kei-Dei ăn kơ yă âu.
Lăng thoi nhen kơ hmă đĕch, buăl inh kăl kơ arih ‘lơ̆ng tơpăt hăm dôm tơdrong Kră Yang ăn. Na ‘net ‘net, Kră Yang yua tơdrong jang lăng nhen thoi kơ hmă đĕch noh pơih tơnang ‘măng ră roi tơdrong ‘Nao ‘Lơ̆ng. Na truh tơ trŏ kơ khei ‘năr, buăl inh đei klah song đon lui sư kơ Yang Yêsu hăm lu buăl bơngai Êyiptơ noh. Ư ang kơ anăn Kră Yang tơpă! Tơdrong ‘mêm đơ̆ng Sư tuh ăn kơ rim ‘nu kon bơngai! Tơdrong ‘nâu wă ba ăn kơ teh đak oei rơ hing.

“Ưh kơ đei tơdrong pơdê bơngai Isơrael păng bơngai Juđê, yua kơ minh Kră Yang đĕch jơ̆ Kră Yang kơ đĭ đang kon bơngai? Tơ’ngla tuh ăn kơ rim ‘nu bơngai krao apinh Sư. “Yua kơ bơngai bu lui, pơma krao anăn Yang Yêsu gô đei pơklaih.” Na lu sư tam mă lui kơ Kră Yang wă krao apinh liơ? Tam mă kơ tơ̆ng ră roi gah Kră Yang lei liơ lu sư lui? Ưh kơ đei bơngai ră roi na thoi yơ wă mơ̆ng?” (Rôm 10:12-14).

Hơpơi kơ Kră Yang gô pơih jơhngơ̆m bơngai drŏ kăn noh, wă kơ lu sư sơng iŏk tơdrong tơpă Kră Yang: thoi kơ Kră Yang ‘mêm kơ Haga păng Ismeal, Sư kư̆m hoe lăng păng ‘mêm mơnat kơ rim ‘nu kon bơngai đơ̆ng Sư pơjing. Hơpơi kơ rim ‘nu lu bơ̆n đei jơhngơ̆m tơpăt wă kơ “hơdah …pơchrang đơ̆ng lăm măng mu” (II Kôrintô 4:6).

Gah buăl thoi yơ? Kră Yang oei bơ̆jang tơdrong ‘lơ̆ng ayơ lăm chăl arih buăl?

Apĭnh đĭ đăng krao khan hơdai: Kơkuh kơ Kră Yang ‘mă ‘mêm, apinh Ih pơih jơhngơ̆m păng đon tơchĕng kon, wă kơ kon ‘bôh Ih oei bơ̆jang lăm chăl arih kon păng hăm dôm lu bơngai jum dăr kơ kon. Apinh ăn kơ kon jơhngơ̆m pơ̆n nuih wă roi tơbăt tơdrong tơpă lăm tơdrong ‘mêm, yua kơ minh ‘nu Ih đĕch băt lăm jơhngơ̆m rim ‘nu kon bơngai, đei đơ̆ng Ih pơjing, Ih pơjing phara kơ tôm tơmam wă ư-ang anăn Ih. Amen. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơdah buăl oei jet kơdih: “Lei Kră Yang hăm wă đei yua bơngai thoi inh ưh?” na nơ̆r tơl khan: Đei! Sư oei hoe lăng buăl, ‘mêm kơ buăl păng dan hơmet tơdrong jang ư-ang ăn kơ chăl arih buăl bơih. Tơdrong Kră Yang oei chang gô ưh kơ đon gơh hơgei hloh dah đei pơm lơ tơdrong đei đe ư-ang, mă jơ̆ jơhngơ̆m yak năm hloi kiơ̆ kơ nơ̆r Kră Yang krao. Kơplah buăl pơ̆n yak năm hăm đon lui, buăl gô ‘bôh hlĭch Kră Yang gô yua dôm tơdrong lăng nhen thoi kơ hmă đĕch lăm chăl arih buăl wă kơ chih tơdrong hơ’mon tih hloh, hơdah hơdong ư-ang kơ Kră Yang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.