Nyob rau lub caijnyoog hloov pauv, peb puas pom tias txhua daim nplooj zeeg ntawm tsob ntoo mus tsis yog tsuas yog lub cim ntawm txoj kev pob puas xwb, tiamsis tseem yog cov lus ntuas txog ib qhov pib dua tshiab puv npo kev cia siab. Lub sijhawm lub caijnyoog hloov pauv ntuas peb tias kev hloov pauv yog yam uas cheem tsum hauv lub nej. Twb txog lub sijhawm peb xaus ib tshooj qub thiab qhib tshiab ntau yam tshiab. Los ntawm lub siab nco tshav ntuj ncaj ncees fij lo lus ua Vajtswv tsaug hauv lub caijnyoog, ib lub qhov rooj tshiab yuav qhib nrog rau ntau txoj koob hmoov zoo tab tom tos nyob tom ntej.

Hnub no, yog hnub 6/11/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia dhau ntawm Zaj kawm LUB CAIJ NTAWM TEJ KEV HLOOV PAUV.

“Cia li mus hauv nws lub Tuamtsev thiab ua nws tsaug; cia li mus rau hauv tej chav tsev thiab qhuas nws. Cia li ua nws tsaug thiab qhuas nws lub npe” (Ntawv Nkauj 100:4).

Lub caij nplooj ntoo zeeg yog lub caij kuv nyiam tshaj hauv xyoo. Kuv nyiam txhua hom xim, tej nplooj qhuav nrov xiv xuav ntawm taw, nrog rau tus pa tsw qab ntxiag uas cua ntsawj tuaj. Tej fuab cua txias zias, laj ntxiag, ua rau tib neeg hnov cuag li tau tso dim tom qab lub caij ntuj kub sov so.

Ntawm kuv, nplooj ntoo zeeg ua rau kuv nco txog cov lus cog tseg ntawm txoj kev hloov pauv. Tej kev txomnyem rau nag hmo yuav poob mus zoo li tej nplooj ntoo daj tab tom zeeg, thiab peb tab tom tos ib lub caij tshiab yuav los. Ntawd kuj yog lub sijhawm peb tig lub siab mus rau ntawm lub caij ua tsaug, nco txog tej haujlwm zoo uas Vajtswv tau ua thiab tos ntsoov tej yam uas Vajtswv yuav ua rau lub xyoo tshiab.

Vajtswv tej lus qhia peb yuav tau nco Vajtswv tshav ntuj. Ntawv Nkauj tshooj 100 ntuas peb tias: “Cia li mus hauv nws lub Tuamtsev thiab ua nws tsaug; cia li mus rau hauv tej chav tsev thiab qhuas nws. Cia li ua nws tsaug thiab qhuas nws lub npe” (nqe 4). Tej yam uas Vajtswv hais tsis yog tsuas hais txog lub caij sau qoob loo lossis ib hnub tshiab xwb. Kuv ntseeg tias Vajtswv xav kom peb nkag siab txog ib qhov tseeb tob dua.

Vajtswv caw peb los cuag Vajtswv los ntawm lub siab pehawm thiab lub siab nco tshav ntuj. Lub siab nco tshav ntuj tseem ceeb heev, txog qhov uas fij lo lus ua tsaug yuav tsum yog thawj yam uas peb ua thaum peb los nyob ze Vajtswv.

Vajtswv twb npaj tseg ua ntej ua Vajtswv lub tuam tsev puv npo cov neeg tuaj pehawm Vajtswv. Thiab thaum Tswv Yexus qhia cov thwjtim thov Vajtswv, Nws kuj pib los ntawm lo lus ua Vajtswv tsaug thiab qhuas Vajtswv. Vajtswv tsis yog tsuas xav kom peb muaj lub siab nco tshav ntuj xwb, Nws tseem xav kom peb nthuav tawm lub siab nco tshav ntuj ntawd pub rau Vajtswv.

Tiamsis hais tiag mas, muaj tej lub sijhawm lub siab nco tshav ntuj tsis yog thawj yam uas kuv xav txog thaum thov Vajtswv. Kuv maj nroos hla dhau lossis tso tseg nkag ncaj nraim rau tej feem uas kuv suav tias tseem ceeb. Tiamsis, qhov ntawd ho mus tsis raws li tej uas Vajtswv qhia.

Paulus sau nyob hauv 1 Thexalaunikes 5:18 tias: “Txawm yog nej raug kev txomnyem thiab tau zoo los nej yuav tsum ua Vajtswv tsaug. Vajtswv xav kom nej txhua tus uas nrog Yexus Khetos koom ib txojsia lawm ua tej no.” Qhov no nyuaj ua heev, tshwj xeeb yog thaum peb tab tom ntsib kev sim siab, tshwj xeeb yog thaum peb tab tom ntsib kev sim siab, lub nra nyhav, raug lwm tus tsis lees txais, lwm tus ntxub, lossis peb xav kom yus lub caijnyoog hloov pauv. Tiamsis, ntawd yog Vajtswv lub siab nyiam: peb los cuag Vajtswv los ntawm lub siab nco Vajtswv tshav ntuj, txawm yog thaum peb raug quab yuam txhua yam.

Vim li cas? vim Vajtswv coj los rau peb muaj “lub caij hloov pauv” dhau ntawm kev ua tsaug. Thaum peb nthuav tawm lub siab nco tshav ntuj txog tej yam uas Vajtswv tau ua lawm, ntawd kuj yog lub sijhawm uas lub qhov rooj yuav qhib rau Vajtswv ua haujlwm hauv peb lub siab. Thaum pib los ntawm txoj kev ua Vajtswv tsaug, Vajtswv yuav ua ib yam txawv: Nws hloov peb qhov kev ntsia. Nws ntuas kom peb nco txog Nws lub npe. Thiab yam peb yuav tau ua yog ntseeg Vajtswv txhua lub caijnyoog.

Phau Ntawv Nkauj muaj cov lus taij thov thaum ntsib kev tuag, tiamsis kuj puv npo cov lus ua tsaug thiab qhuas Vajtswv. Ob qhov no yeej muaj nyob- thiab tseeb tiag, tag nrho yuam kom yuav tau nyob ruaj nreeg yog peb xav nkag mus rau ntu tshiab uas Vajtswv twb npaj rau yus lawm. Nyob rau ntawm ntau lub caijnyoog, peb yeej muaj cuab kav ua Vajtswv tsaug thiab qhuas Vajtswv. Thiab nyob rau lub sijhawm uas peb qhuas Vajtswv, Vajtswv yuav tav lub caijnyoog thiab coj peb tiv kom dhau. Ntawd yog txoj kev ntseeg uas tau tshoov kom Daviv tsa suab tias:

“Txawm yog ib pab tubrog tuaj vij hlo kuv los kuv yuav tsis ntshai, txawm yog yeebncuab tuaj tawmtsam kuv los kuv tseem cia siab rau Vajtswv… Thaum kuv raug kev ntxhov siab nws yog kuv qhov chaw vamkhom nws yuav tsomkwm kuv hauv nws lub Tuamtsev, thiab nws ua lub chaw khov kho saum lub roob tsuas siab rau kuv nyob” (Ntawv Nkauj 27:3,5).

Daviv ntseeg tias Vajtswv yuav coj thiab cawm yawg dim teeb meem. Ntawd kuj yog txoj kev ntseeg uas kuv xav tau txhua zaug ntsib kev txomnyem.

Yog li, txawm yog koj yuav ntsib yam dabtsi nyob rau tej hnub dhau los, nco ntsoov ua Vajtswv tsaug. Ib lub caij tshiab tab tom los txog zuj zus. Vajtswv tab tom ua ib yam tshiab hauv peb lub neej. Tsuas yog peb saib ntsoov rau ntawm Nws xwb.

Thov caw nrog kuv peb thov Vajtswv ua ke: Tus Tswv, thov pub kom kuv muaj lub siab paub tso tej yam qub tseg txais yuav ib tshooj tshiab uas Koj npaj tseg tos rau kuv. Thov qhia kom kuv paub txais yuav Koj tej koob hmoov txawm yog nyob rau tej hnub uas muaj kev txomnyem, kom kuv tsis raug khi nrog txoj kev tag kev cia siab, tiamsis tsa suab hlo ua Vajtswv tsaug thiab qhuas Vajtswv. Thov hloov pauv kuv lub siab los ntawm lub siab nco Vajtswv tshav ntuj txawm yog yuav nyob rau lub caijnyoog twg os, kuv yeej ntseeg rau Vajtswv ua tus coj kev. Thov pub kom kuv nrog koj mus nyob rau hauv lub caij tshiab ntawm lub neej, los ntawm lub siab ntseeg thiab nco tshav ntuj. Kuv thov hauv Tswv Yexus Khetos lub npe. Amees.

Cov kwv tij txhua tus, tej zaug koj tab tom nyob rau ntu neej uas puv npo kev sim siab, nrog rau ntau qhov kev mob ua rau koj lub siab qaug. Tiamsis nco ntsoov: lub siab nco tshav ntuj yog lub qhov rooj rau peb nkag rau ib ntu tshiab puv npo koob hmoov uas Vajtswv twb npaj tseg rau koj lawm. thaum peb tsa suab ua Vajtswv tsaug Vajtswv tsis yog tsuas hloov pauv lub caijnyoog xwb, tiamsis ua ntej, Nws yuav hloov pauv koj lub siab. Yog li, txhob tsuas suav tej kev txhawj xwb, tiamsis xyaum suav tej koob hmoov Vajtswv pub. Koj yuav pom tias, txawm yog nyob rau txoj kev txomnyem los, Vajtswv twb ua twjywm coj koj nkag los rau hauv ib lub caij tshiab puv npo koob hmoov nplua mias lawm.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj