Peb leejtwg tsis tau ntsib dhau kev mob siab, txomyem? Muaj tej kev mob siab yav tag los nws zoo li ib txoj hlua muab peb khi ruaj cia, ua rau peb txhais taw mus tsis taug rau tom hauv ntej. Peb siv zog hnov qab tiamsis tej ntawd yeej tshwm los, peb xav kom ua tau lub siab tawv tiamsis tej kev ntshai thiab kev ua ywj fab ywj fwj nqug peb rov qab. Tej kev txomnyem ntawd ua rau ntau tug mus tsis taug ntxiv, qaug rau hauv kev qaug zog zig. Tiamsis tus Tswv yeej tsis xav cia peb raug khi li ntawd mus li, Nws thiaj los kho zoo peb thiab pub rau peb pib dua ib lub neej tshiab.

Hnub no yog hnub 08/11/2025, Kev thov Vajtswv txhua hnub thov caw sawvdaws nrog kawm Vajtswv txojlus ua ke nrog tus qhia Wally Odum dhau zaj kawm: QUAJ TXOG THAUM TWG?

“Tus TSWV hais rau Xamuyees hais tias, “Koj tseem yuav nyuaj siab rau Xa-ules mus txog thaum twg thiab?” (I Xamuyees 16:1)

Leejtwg los yeej ntshaw tau lub neej kaj siab lug, txhua yam mus zoo li yus lub siab xav. Tiamsi lub neej tiag yeej tsis zoo li ntawd: Muaj tej zaug teebmeem tshwm tuaj ua rau peb ntog, tsis muaj zog mus ntxiv rau tom ntej. Yog tseem cia tej kev mob siab ntawd nqug peb, tej ntawd yuav muab peb khi rau hauv peb lub neej yav tag los xwb thiab tej ntawd yuav tav peb txoj kev mus rau tom hauv ntej.
Xamuyees yog tug povthawj tau hliv roj rau Xa-ules ua cov neeg Yixalayees tus huabtais. Yawg hlub Xa-ules heev thiab ntseeg siab tias Xa-ules yog Vajtswv lo lus teb rau yawg haiv neeg. Tiamsis, Xa-ules tau ntxeev siab, thiab Vajtswv thiaj xaiv Daviv los hloov yawg chaw. Qhov ntawd ua rau Xamuyees hnov mob siab txog qib uas yawg cuag li ntog thiab sawv tsis taug lawm. Tsuas yog thaum Vajtswv tawm suab, yawg thiaj tsim dheev – lo lus ntuas ntawd thiaj yog ib zaj kawm rau peb cov uas tau ntsib kev mob siab niaj hnub nim no:

Tus TSWV hais rau Xamuyees hais tias, “Koj tseem yuav nyuaj siab rau Xa-ules mus txog thaum twg thiab? Kuv twb tsis pub nws ua vajntxwv kav cov Yixalayees lawm. Koj cia li nqa ib hwj roj mus rau nram lub nroog Npelehees, thiab mus cuag ib tug txivneej uas hu ua Yexais, rau qhov kuv twb xaiv nws cov tub ib tug ua vajntxwv kav cov Yixalayees lawm.” (I Xamuyees 16:1).

Vajtswv lo lus nug: koj tseem quaj mus txog thaum twg? Tsis yog tias tus Tswv tsis pub peb nyuaj siab, tiamsis yog Vajtswv tsis xav kom peb niaj hnub nyuaj siab ntsuav. Xamuyees mob siab vim yawg yeej hlub Xa-ules heev. Txawm tias Xa-ules lub neej tau xaus tsis zoo los peb kuj nco ntsoov tias thaum pib yawg kuj yog ib tug neeg txo hwjchim heev. Xamuyees tau ntuas Xa-ules li no:

Xamuyees teb hais tias, “Txawm yog koj xav hais tias, koj tsis tseemceeb dabtsi li los koj yog cov Yixalayees tus thawjcoj. Tus TSWV twb muaj roj hliv rau koj taubhau thiab tsa koj ua vajntxwv kav cov Yixalayees. (I xamuyees 15:17)

Vajtswv xav kom Xamuyees – thiab peb txhua tus pom ib qhov tseeb li no: Vajtswv lub haumphiaj yuav tsis puastsuaj vim ib tug tib neeg twg. Vajtswv lub suab hnub ntawd twb tseem nrov nrhe los txog hnub no: “Cia li so kua muag thiab mus ntxiv rau tom hauv ntej.”

Xibfwb G. Campbell Morgan tau hais ib lo lus zoo heev li no: : Thaum ntsib teebmeem, peb yuav tawm tsam li cas yog nyob txij ntawm qhov uas peb saib qhov teebmeem ntawd nyob hauv Vajtswv txhais tes, lossis tsuas pom Tus Tswv zem zuag nyob hauv tej teebmeem ntawd. Txawm peb tau ntsib dhau tej kev mob siab li cas los, qhov tseeb nws yeej tsis hloov pauv: Vajtswv yeej yog Vajtswv thiab Nws yeej muaj hwjchim coj peb kov yeej txhua yam.

Yog peb tsau tsawv rau hauv lub neej yav tag los xwb, peb yuav tsis pom meej lub haumphiaj tom hauv ntej. Tej kev teebmeem txomnyem yuav ua rau peb qaug zog thiab tav lub haumphiaj zoo uas Vajtswv twb npaj tseg rau peb. Yog li, peb yuav tsum ua siab tawv. Peb puas muaj leejtwg tsis tau ntsib dua kev mob siab txomnyem? Leejtwg los yeej muaj ib zaug poob kua muag tu siab. Tiamsis Vajtswv yeej tsis xav cia peb nreg rau ntawm tej kev mob ntawd, Nws hu peb so kua muag thiab mus ntxiv rau tom ntej.

Thaum uas tseem nyuaj siab, hnov lo lus no cuag li tsis yog caij tiamsis lo lus txhawb zog zoo heev yog: “koj tseem quaj mus txog thaum twg? Cia li sawv tseeg thiab mus ntxiv” Peb yuav mus tsis taug yog peb tseem cia lub neej yav tag los khi peb, tiamsis Tus Tswv muaj haumphiaj rau peb thiab Nws xav tuav peb txhais tes mus rau tom hauv ntej.

Thov caw nrog kuv peb thov Vajtswv ua ke: Tus Tswv uas hlub kuv kawg nkaus! Kuv ua Koj tsaug kawg nkaus uas Koj tseem nyob ntawd, txawm yog thaum uas kuv qaug zog. Kuv lees tias muaj ntau zaug kuv raug lub neej yav tag los muab kuv khi cia, muaj tej kev mob siab ua rau kuv xav tig rov qab. Thov Tus Tswv Koj tso kuv dim ntawd tej voj hluas tabtom khi kuv lub siab, pub kuv muaj zog sawv thiab txhais ruam mus ntxiv. Thov pab kom kuv ntseeg ruaj siab rau Koj thiab ua siab tawv mus lawv li koj lub haum phiaj zoo ua tau npaj tseg rau kuv. Kuv taij thov txhua yam los ntawm Tswv Yexus Khetos lub npe, Amees!

Ib tsoom phoojywg sawv daws! Tej zaug koj kuj tabtom siv zog khiav tawm ntawm koj lub neej yav tag los, khiav tawm tej kev mob siab uas tuav koj lub siab. Tiamsis txhov hnov qab tias koj lub neej tsis yog xaus rau ntawm no. Vajtswv tseem xav sau ntxiv rau koj lub neej thiab kom koj mus txiv. Yog tias hnub no koj hnov qaug zog, cia li muab koj txhais tes tso rau hauv Vajtswv. Txhob cia koj lub neej qub khi koj lub neej tom hauv ntej, rau qhov koj lub neej tom hauv ntej mus yog nyob rau hauv Vajtswv lub haumphiaj thiab Nws txhais tes.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.