Lăm dôm jơ năr tơplih khei bơyan, lu bơ̆n hăm băt kơ năl khan rim kơ hla ‘long hơlŭng đơ̆ng tơ‘bla ưh kơ sĭ lăp jơ̆ tơ’bôh đơ̆ng tơdrong hlôi, mă kŭm jơ̆ nơ̆r tơ ‘blŏk gah mĭnh tơdrong pơtơm blŭng a ‘bĕnh tơdrong chang hơmĕng. Jơ năr tơplih khei bơyan tơ ‘blŏk kơ lu bơ̆n khan tơplih jơ̆ tơdrong trŏ thoi noh lăm chăl arih. Đei truh kơ jơ pơdơh mĭnh tơdrong so păng pơih să lơ tơdrong ‘nao plơ̆ng. Trŏ kơ đơ̆ng jơhngơ̆m băt bơnê, đĭ jơhngơ̆m pơyơ̆r nơ̆r bơnê kơ Kră Yang tŏk bŏk tơdrong truh pơmat, mĭnh pôm ‘măng ‘nao gô đei Sư pơih să hăm lơ tơdrong pŭn hiôk gô lu bơ̆n tơ anăp.

Năr ‘nâu, ‘năr 05/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih kơ̆l ‘bai BƠYAN KƠ DÔM TƠDRONG TƠPLIH.

“Athei bơnê na mơ̆t lăm ‘măng jang Sư, bơnê ư-ang bĕ na mơ̆t lăm cham Sư. Bơnê bĕ kơ Sư păng hơri ư-ang kơ anăn Sư.” (Hơriso 100:4)

Bơyan kĕch iŏk jơ̆ bơyan inh hơ iă hloh lăm sơnăm. Inh hơ iă kơ dôm gôh rang rŏ, kơ tơ̆ng re hla kro kreh kroh ala jơ̆ng, păng ‘bâu phu rơngơp brih kiơ̆ kial dơhlu. Kial tơngiet, rơngơp, pơm kơ kon bơngai mơn ‘bôh thoi đei hlôi kơ đơ̆ng tŏ phang đơ̆ng bơyan puih.

Hăm inh, bơyan kĕch iŏk ling lang tơ ‘blŏk kơ mĭnh nơ̆r pơkă gah tơdrong tơplih. Dôm tơdrong pơmat tat đơ̆ng năr brei thoi huŏng hơlŭng kiơ̆ hla kro, păng lu bơ̆n chang gô mĭnh bơyan ‘nao truh. ‘Nâu kŭm jơ̆ jơ năr lu bơ̆n ăn jơhngơ̆m lăng tơ gah Phĕt Bơnê, wă ‘blŏk đêl dôm tơdrong jang ‘lơ̆ng rŏ Kră Yang đei pơm păng chang gô dôm tơdrong Sư gô bơ̆jang lăm sơnăm tơ anăp.

Nơ̆r Kră Yang bơtho lu bơ̆n athei băt bơnê kơ Sư. Hơriso chăl 100 tơ’blŏk kơ inh khan: “Athei bơnê na mơ̆t lăm ‘măng jang Sư, bơnê ư-ang bĕ na mơ̆t lăm cham Sư. Bơnê bĕ kơ Sư păng hơri ư-ang kơ anăn Sư.” (trong 4). Mă lei tơdrong Kră Yang khan ưh kơ sĭ lăp pơma gah bơyan kĕch iŏk dah mĭnh năr phĕt. Inh lui khan Sư wă kơ lu bơ̆n hlôh băt tơdrong tơpăt jrŭ să hloh.

Kră Yang krao lu bơ̆n năm hăm Sư lăm jơhngơ̆m kơkuh păng jơhngơ̆m băt bơnê. Jơhngơ̆m băt bơnê gĭt kăl dêh, dĭng truh pơyơ̆r nơ̆r bơnê ‘noh jơ̆ tơdrong blŭng a lu bơ̆n pơm kơplah năm jê̆ Sư. Kră Yang đei ‘măn hơmet bơih ăn anih akŭm đơ̆ng Sư ‘bĕnh blai dôm lu bơngai kơkuh. Păng kơplah Kră Yang Yêsu bơtho lu bơngai pơhrăm păng Sư krao khan, Sư kŭm pơtơm hăm tơdrong bơnê păng ư-ang. Kră Yang ưh kơ sĭ lăp wă kơ lu bơ̆n đei jơhngơ̆m băt bơnê, mă Sư kŭm hơ pơi kơ lu bơ̆n tơ’bôh jơhngơ̆m băt bơnê ‘noh ‘măn ăn kơ Sư.

Mă lei pơma tơpă, đei jơ jơhngơ̆m băt bơnê ưh kơ trŏ jơ̆ tơdrong blŭng a inh tơchĕng truh kơplah krao khan. Inh ngăl hăt hot lăng hlôi, dah achăng hloi wă năm hloi lăm dôm gah tơdrong kơdih khan jơ̆ gĭt kăl. Mă lei, tơdrong ‘noh tă kơ tơplơ̆ hăm nơ̆r Kră Yang bơtho.

‘Bok Pôl chih lăm I Têsalônik 5:18 khan: “Năr iĕm chơt hiôk, dah năr iĕm đei tơdrong gleh sơ’ngon iĕm kư̆m athei bơnê kơ ‘Bok Kei-Dei mơ̆n, dui jơhngơ̆m mă tai wă kơ huay ơh sơ’ngon. Hăm ‘nĕ hiơt krao khan kơ Sư ling-lang. Thoi noh boih ‘Bok Kei-Dei wă kơ bơ̆n lui kơ Kon Sư Yêsu Krist.” Tơdrong ‘nâu anat kơ pơm dêh, hloh ‘noh jơ̆ kơplah lu bơ̆n oei tơ’bơ̆p hăm tơdrong pơlong lăng, gleh lap, đei bơngai nai ưh kơ sơng iŏk, areh, dah kơplah lu bơ̆n oei rơhing tơdrong đơ̆ng kơdih tơplih. Mă lei, ‘noh trŏ jơ̆ tơdrong đơ̆ng Kră Yang wă: lu bơ̆n năm hăm Sư lăm jơhngơ̆m băt bơnê, mă khan oei lăm tơdrong đei pơgŏ tôm tơdrong.

Yua kơ kiơ? Yua kơ Kră Yang ba ăn kơ lu bơ̆n “bơyan tơplih” đơ̆ng tơdrong bơnê. Dah lu bơ̆n tơ’bôh jơhngơ̆m băt bơnê gah dôm tơdrong Sư đei pơm, ‘noh kŭm jơ̆ kơplah tơnang ‘măng đei pơih ăn kơ Sư bơ̆jang lăm jơhngơ̆m lu bơ̆n. Kơplah pơtơm hăm tơdrong bơnê kơ Kră Yang, Sư gô pơm mĭnh tơdrong hlĭch chrơp: Sư tơ ‘blŏk lu bơ̆n ‘blŏk truh anăn Sư. Păng tơdrong lu bơ̆n kăl kơ pơm ‘noh bơih jơ̆ lui gơnang anih Sư tŏk bŏk dôm anih.

Sơ̆p Hơriso đei dôm lu nơ̆r krao apinh đĭ jơhngơ̆m lăm kơplah lôch arih, mă lei kŭm ‘bĕnh blai dôm nơ̆r bơnê păng ư-ang. ‘Bar tơdrong ‘noh oei gơh đei hơdai- păng tơpă, ‘bar tơdrong ‘nâu kăl kơ yak năm lăm jơnăr ‘nao mă Kră Yang đei hơmet kơ bơ̆n. Tŏk bŏk lơ tơdrong truh, lu bơ̆n oei gơh bơnê păng hơri ư-ang kơ Kră Yang. Păng trŏ kơ lăm kơplah lu bơ̆n ư-ang. Kră Yang gô hơtŭt ‘bơm lăm anih đơ̆ng lu bơ̆n păng chông anhăk lu bơ̆n yak hlôi. ‘Noh jơ̆ đon lui đei pơtrŭt Đawit tơ lĕch nơ̆r khan:

“Mă khan khŭl linh wang tăp kơ inh, Jơhngơ̆m inh ưh kơ hli, Mă khan ayăt iung blah inh, jơhngơ̆m inh oei hơđơ̆ng.

“Yua kơ lăm năr đei tơdrong truh, Kră Yang gô krôp inh lăm bơsŭn Sư, Ôn inh hlơp lăm kơđông Sư; păng pôk hơtŏk inh tơ kơpal tơmo tih.” (Hơriso 27:3,5)
Đawit lui tơpă Kră Yang gô bơtho tơ’bôh păng dŏng pơklaih sư hlôi đơ̆ng tơdrong pơmat tat. ‘Noh kŭm jơ̆ tơdrong lui inh rơhing wă kơ đei rim wơ̆t kơplah tơ ‘bơ̆p hăm pơmat tat.

Thoi noh, mă khan buăl đei tơ’bơ̆p tơdrong kiơ lăm đĭ dôm lu khei năr hlôi, athei ‘blŏk bơnê kơ Kră Yang. Minh bơyan ‘lơ̆ng rŏ oei wă truh. Kră Yang oei pơm mĭnh tơdrong ‘nao chăl arih lu bơ̆n. Lăp kăl kơ lu bơ̆n bơwei măt kơdih kơnhăm lăng tơ Sư.

Apĭnh đĭ đăng krao khan hơdai: Kơkuh kơ Kră Yang, apinh ăn kơ jơhngơ̆m kon băt kơ achăng dôm tơdrong so sơ̆ wă sơng iŏk mĭnh chăl ‘nao mă Ih ‘măn ăn bơih kơ kon. Apinh bơtho kon băt bơnê tơdrong pŭn đơ̆ng Ih bơtho mă khan lăm dôm lu năr pơmat tat, wă kơ kon huei kơ đei chô̆ yua kơ đơ̆ng tơdrong ưh pă hơmĕng, mă lei ling lang tơlĕch nơ̆r bơnê păng ư-ang kơ Ih. Apinh tơplih ‘nao jơhngơ̆m kon hăm mĭnh jơhngơ̆m băt bơnê jrŭ să, wă kơ mă khan oei lăm anih ayơ, kon oei lui gơnang anih tơdrong chông anhăk đơ̆ng Ih. Apinh ăn kơ kon yak năm hăm Ih mơ̆t lăm dôm bơyan ‘nao kơ chăl arih, hăm jơhngơ̆m băt bơnê păng lui gơnang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng buăl oei lăm mĭnh jơ năr ‘bĕnh tơdrong pơlong lăng, hăm lơ tơdrong ơh sơ’ngon pơm kơ jơhngơ̆m rơdu. Mă lei athei ‘blŏk: jơhngơ̆m băt bơnê bơih jơ̆ tơnang ‘măng wă yak mơ̆t lăm mĭnh jơ năr ‘nao ‘bĕnh tơdrong pŭn hiôk mă Kră Yang đei ‘măn hơmet bơih kơ buăl. Kơplah bơ̆n pơyơ̆r nơ̆r bơnê, Sư ưh kơ sĭ lăp tơplih anih, mă adrol hloh, Sư gô tơplih kơdih jơhngơ̆m buăl. Yua kơ thoi noh, ‘nĕ kơ lăp jô̆ dôm tơdrong hiơ̆k bơngơ̆t, athei pơjuăt jô̆ dôm tơdrong pŭn hiôk Kră Yang ăn. Buăl gô băt kơnăl, kơplah lăm tơdrong pơmat tat, Kră Yang oei ling lang chông ba buăl mơ̆t lăm mĭnh bơyan ‘nao ‘bĕnh tơdrong pŭn hiôk tuh

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.