Rim năr đei hlôi, bu lăm lu bơ̆n đei rơih iŏk lơ tơdrong pha ra băl. Đei rơih iŏk tơdrong iĕ đĕch, rŏ kơ wă răm, mă lei chông a-nhăk tơdrong arih lu bơ̆n rim năr. Kư̆m đei dôm kơ rơih iŏk đơ̆ng lu bơ̆n kăl dêh tơpă, đei rơih iŏk kơnhăm trŏ kơ chăl arih. Tŏk bŏk đei lơ trong tơklah noh, lu bơ̆n athei pơm thoi yơ wă rơih iŏk tơdrong gơh hơgei păng ‘Bok Kei-Dei lăp đon?

Năr ‘nâu, ‘năr 07/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Michael Plemmons kơ̆l ‘bai RƠIH IŎK TƠDRONG ARIH WĂ KƠ GƠH ARIH

“Năr ‘nâu, inh krao plĕnh păng teh pơm kơdranh ăn kơ inh, inh dan tơ’bôh ‘bơ̆t anăp iĕm rơih iŏk tơdrong arih păng tơdrong lôch, tơdrong pŭn hiôk păng tơdrong hiap pơtê̆. Thoi noh, rơih bĕ tơdrong arih, wă kơ iĕm păng lu kon sâu iĕm gơh arih.” (Bơtho Khôi Juăt 30:19)

Lăm tơdrong arih rim năr, rim năr lu bơ̆n đei tơ’bơ̆p dôm kơ tơdrong rơih iŏk păng drơ̆ng iŏk phara băl. Tơdrong arih lu bơ̆n mă tơpă đei noh đơ̆ng lu bơ̆n drơ̆ng iŏk. Na đei minh tơdrong rơđah tơpă, noh jơ̆ rim ‘nu đei rơih iŏk: dah yak năm lăm tơdrong arih, dah yak năm lăm tơdrong lôch. Kon bơngai lu bơ̆n jing đei thoi yơ, noh đơ̆ng dôm tơdrong rơih iŏk.

Rơbâu sơnăm hơdrol sơ̆, yua kơ rơih iŏk ưh kơ trŏ, ‘bok Ađam păng yă Ewơ pơ̆k huŏng. Đơ̆ng noh, kon bơngai lăm teh đak ‘nâu ‘bơm tơdrong hơkăm tơdrong lôch gah bơhngol. Tơdrong yoch pơm kơ kon bơngai, đêl đei pơjing wă yak năm lăm tơdrong ư ang kơ Tơ’ngla pơjing, jing lu bơngai gah măng ‘mu. Mă lei tôm tơdrong đei tơplih kơplah tơpŭ kơ ‘Bok dŏng pơklaih Yang Yêsu. Sư pŭ iŏk jơhngơ̆m ‘mêm mơnat, bơtho gah tơdrong ‘mêm mơnat păng dŏng pơklaih. Yang Yêsu ưh kơ adrô̆ bơtho hăm nơ̆r pơma đĕch, mă hăm tơdrong pơm tơ’bôh tơdrong ‘mêm mơnat, wă kơ hơtŭt ‘bơm lu bơngai jum dăr.

‘Bok Kei-Dei jơ̆ ‘lơ̆ng tơpăt, na tôm tơdrong yoch gô sek tơlang. Na yua đơ̆ng ‘mêm mơnat, Sư wơh Kon pôm Sư pŭ iŏk tơdrong phak yua kơ đơ̆ng lu bơ̆n. Yua kơ đơ̆ng thoi noh, lu bơ̆n gơh năm jê̆ ‘Bok Kei-Dei, oei lăm tơdrong pơgơ̆p păng rơih iŏk tơdrong arih ‘nao đơ̆ng Sư. Yua kơ thoi noh, kơplah lui sơng iŏk Yang Yêsu, đơ̆ng lăm tôm tơdrong arih, lu bơ̆n athei hŏk pơhrăm pơm liơ wă kơ trŏ ‘blep hăm bơngai đei tơdrong arih tơplih.

Tơplơ̆ dơ̆ng, bơngai bu ưh kơ rơih iŏk tơdrong arih mă Yang Yêsu pŭ iŏk tơdrong lôch wă ăn đĕch kơ lu bơ̆n tơdrong arih, noh jơ̆ lu sư rơih iŏk tơdrong lăm măng mu tơplih kơ tơdrong hơdah. Jơhngơ̆m păng tơdrong bơ̆jang lu sư đei hơdai hăm klai gar. Tơdrong yoch rei lăm jơhngơ̆m kon bơngai dôm kơ tơdrong ‘maih wă pơm kơnê̆ noh jơ̆ tơm đơ̆ng tơdrong yoch. Lu bơ̆n ‘bôh tơdrong lei lăi băl kơ đe bu rơih iŏk tơdrong lôch tơplih kơ tơdrong arih: chăl arih sư nhen thoi kơ măi kơdâu, yua kơ ling lang kơkuăl kiơ̆ kơ hưch wă kiơ̆ kơ kơdih.

Tơdrong tơplih ‘nâu tơ’bôh phara băl: Đei bơngai ‘maih wă kơ tơdrong jang pơm yŏng păng wă kơ đei ư ang, đei bơngai hưch wă kơ tơdrong arih hiôk jơnap. Mă khan kiơ̆ kơ tơdrong thoi yơ, tuch luch tơm sư noh jơ̆ hưch wă kiơ̆ kơ kơdih, na pơtôch lăm tơdrong lôch khŏm khŏm lăm dơnâu ŭnh. Chăl arih lu sư ưh pă đei kơnhăm tơdrong kiơ nai ‘ngoaih kơ rim năr arih ăn kơ kơdih akâu.

Mă lei, đei lơ bơngai rơih iŏk trong yak năm nai. Lu sư rơhing wă kơ đei rơngei đơ̆ng tơdrong chô̆ pơkơ̆ng gah tơdrong lôch gah bơhngol, na lu sư rơih iŏk tơdrong arih. Yang Yêsu ăn kơ rim ‘nu rơngei rơih iŏk kơdih: sơng iŏk Sư jơ̆ Yang pơgơ̆r lăm chăl arih, dah kiơ̆ kơ trong yak năm kơdih. Dôm kơ lu bơngai rơih iŏk tơdrong arih chu yom kơ Yang Yêsu gô đei Sư tơplih đơ̆ng gah lăm truh tơ gah ‘ngoaih.

Dôm kơ lu bơngai rơih iŏk kiơ̆ Yang Yêsu gô đei arih kơnhăm kơ tơdrong arih phara hăm lu bơngai kơpal teh đak ‘nâu, sư huay kơ pơ ‘lŏ hăm dôm tơdrong oei chhŭr nuih hăm bơngai jum dăr, yua kơ lu sư đei jơhngơ̆m ‘Bok Krist. Tơdrong arih lu sư huay kơ druh kiơ̆ tơdrong pơgơ̆r, mă druh kiơ̆ dôm tơdrong ‘lơ̆ng hloh. Dôm kơ đe bu rơih iŏk tơdrong arih gô đei tơplih kơplah oei lăm pơgơ̆p ‘lơ̆ng rơgoh hăm Kră Yang.

Rim ‘nu kơ lu bơ̆n oei dơ̆ng ‘bơ̆t anăp wă rơih iŏk rơđah tơpă: rơih iŏk tơdrong arih dah tơdrong lôch. Đĭ đăng lu bơ̆n gô yak năm tơ trong chông ba truh tơ pơlei ‘lơ̆ng, dah oei yak năm tơ trong ba truh tơ dơnâu ŭnh, na ưh kơ đei tơnat ăn kơ lu bơ̆n mơn ‘bôh kơdih oei yak năm trong ayơ, yua kơ rim kơ tơdrong arih rim năr, đơ̆ng nơ̆r pơma, pel pơm, păng rơih iŏk, noh tơ’bôh lu bơ̆n noh bu na gah bu. ‘Bok Kei-Dei pơma khan kơ Môis khan kơ kon pơlei Isơrael kơplah lu sư wă mơ̆t tơ lăm teh đei pơkă ăn: “Năr ‘nâu, inh krao plĕnh păng teh pơm kơdranh ăn kơ inh, inh dan tơ’bôh ‘bơ̆t anăp iĕm rơih iŏk tơdrong arih păng tơdrong lôch, tơdrong pŭn hiôk păng tơdrong hiap pơtê̆. Thoi noh, rơih bĕ tơdrong arih, wă kơ iĕm păng lu kon sâu iĕm gơh arih.” (Bơtho Khôi Juăt 30:19)

Kon pơlei Isơrael rơih iŏk ‘bar tơdrong: ‘lơ̆ng tơpăt ‘bơ̆t anăp ‘Bok Kei-Dei wă kơ đei pŭn hiôk, dah tơwih rŏng pŭ iŏk tơdrong hiap pơtê̆. Tơdrong bơtho noh oei bơtho tơ’bôh ăn kơ lu bơ̆n hrei âu. ‘Bok Kei-Dei dan ‘bơ̆t anăp lu bơ̆n dôm kơ wă rơih iŏk, na Sư krao lu bơ̆n “athei rơih iŏk tơdrong arih”

Yang Yêsu pơma khan Sư jơ̆ “ trong yak năm, ‘lơ̆ng tơpăt păng đei tơdrong arih” (Yôhan 14:6). Thoi noh, rơih iŏk sơng iŏk Yang Yêsu wă khan rơih iŏk tơdrong arih. Lăp minh tơdrong arih pơgơ̆p hăm ‘Bok dŏng pơklaih, lu bơ̆n gô rơih iŏk tơdrong arih Kră Yang lăp đon, dôm kơ rơih iŏk ba truh tơ tơdrong arih, ‘lơ̆ng rơgoh, păng đei pŭn hiôk khŏm khŏm.

Apĭnh đĭ đăng krao khan hơdai: Kơkuh kơ Kră Yang Tơ’ngla dan kon ‘bơ̆t anăp tơdrong arih hăm tơdrong lôch, păng oei ling lang krao kon athei rơih iŏk tơdrong arih. Kon băt kơ chăl arih kon lơ wơ̆t rơih iŏk tơdrong ưh kơ trŏ, pơm kơ kon hmach na weh ataih đơ̆ng Ih. Apinh tơgŭm kon bơwei kơjăp lăm tơdrong pơgơ̆p hăm Ih, na kơplah dơ̆ng ‘bơ̆t anăp lơ tơdrong rơih iŏk lăm tơdrong arih rim năr, kon hlôh wao gơh hơgei rơih iŏk tơdrong Ih lăp đon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, hăm đei layơ buăl đei hmach yua kơ rơih iŏk tơdrong ưh kơ trŏ lăm chăl arih buăl ưh? Na pŭ iŏk đơ̆ng tơdrong rơih iŏk ưh kơ hlôh wao, lu bơ̆n mơn ‘bôh tơdrong gĭt kăl kơ tơdrong rơih iŏk ‘blep trŏ. Yua kơ thoi noh, hơdrol kơ wă drơ̆ng iŏk tơdrong kiơ, tơdrong kăl hloh athei krao khan apinh Kră Yang bơtho tơ’bôh. Na kư̆m, athei lăng ming dôm tơdrong rơih iŏk đơ̆ng buăl kiơ̆ kơ nơ̆r Kră Yang wă kơ băt hơđăl tơdrong rơih iŏk hăm trŏ kơ Kră Yang lăp đon. Mă hloh kơ noh, lu bơ̆n kăl kơ bơwei kơdih lăm tơdrong pơgơ̆p hăm Kră Yang Yêsu, jơ̆ “ trong yak năm, ‘lơ̆ng tơpăt păng đei tơdrong arih” kơ lu bơ̆n, na đơ̆ng noh lu bơ̆n gô rơih iŏk tơdrong gơh hơgei, Kră Yang lăp đon.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.