Bu lăm lu bơ̆n ưh tim mă hlôi đei tơ’bơ̆p ơh sơ’ngon, jĭ pơmat tat? Đei kơ dôm rơka đơ̆ng adrol sơ̆ nhen kơ thoi tơlei chô̆ ưh kơ ‘bôh păng măt lăng, nŏng kơ chô̆ gơhret lu bơ̆n tơ ala, pơm kơ ‘bar pah jơ̆ng ưh kơ gơh wă iung yak năm tơ anăp dơ̆ng. Lu bơ̆n adrin hiơt kơ dôm tơdrong so đei ‘blŏk dơ̆ng, lu bơ̆n ‘maih wă pran kơtang mă lei tơdrong hli tơrơ păng tơdrong ngĭl ngŭl oei dui bơwei. Trŏ kơ đơ̆ng dôm tơdrong ơh sơ’ngon ‘noh pơm kơ lơ bơngai drơ̆ng iŏk pơdơh, oei lăm tơdrong gleh lap păng ơh sơ’ngon đĭ chăl arih. Mă lei Kră Yang ưh kơ wă lu bơ̆n ling lang oei chĭt lăm tơdrong so. Sư truh wă gơ̆ hrĕch lê̆ dôm tơlei glang, wă pơklaih păng ăn kơ lu bơ̆n mĭnh tơdrong pơtơm ‘nao blŭng a.

Năr ‘nâu, ‘năr 08/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Wally Odum kơ̆l ‘bai ƠH SƠ‘NGON DĬNG TRUH DANG YƠ?

“ Kră Yang khan kơ Samuel: Ih oei sơ’ngon kơ Sôl dĭng truh dang yơ? ” (I Samuel 16:1)

Bu kŭm hơpơi chăl arih kư̆ kơ hiôk ‘lơ̆ng, dôm tơdrong tơproh ‘lơ̆ng thoi kơdih hơpơi wă. Mă lei tơpă đei phara: đei dôm kơplah pơmat tat thar truh pơm kơ lu bơ̆n pơ̆k huŏng, ưh pă đei jơhngơ̆m wă yak tơ anăp. Tơdah nŏng kơ ăn dôm tơdrong ơh sơ’ngon ‘noh dui, lu bơ̆n gô chĭt lu bơ̆n lăm tơdrong so păng pơgăn lu bơ̆n yak tơ anăp.

‘Bok khan lê̆ adrol Samuel jơ̆ bơngai tuh đak rơmă kơ ‘bok Sôl jing ‘bok pơtao blŭng a kơ kon pơlei Isơrael. Sư ‘mêm kơ Sôl, dan tơdrong chang hơmĕng păng lui khan Sôl gô jơ̆ nơ̆r tơl tơwih đơ̆ng Kră Yang ăn kơ kon pơlei. Mă lei Sôl ưh kơ wei nơ̆r pơkă, păng Kră Yang đei rơih Đawit tơplih. Tơdrong ơh ‘noh pơm kơ Samuel ơh sơ’ngon ưh kơ ngach, dĭng mah sư nhen thoi pơ̆k huŏng, ưh pă băt wă yak tơ anăp thoi yơ. Lăp kơplah Kră Yang tơlĕch nơ̆r, na sư ‘nao wă ‘brĕng hơdơ̆r- păng trŏ đơ̆ng nơ̆r tơ’blŏk ‘noh jing ‘bai hŏk gĭt kăl kơ đĭ đăng lu bơ̆n kơplah đei tơ’bơ̆p hăm dôm tơdrong rơka lăm jơhngơ̆m.

“Kră Yang khan kơ Samuel: Ih oei sơ’ngon kơ Sôl dĭng truh dang yơ? Inh achăng lê̆ sư boih, ưh pă ăn sư pơm pơtao bơngai Isơrael dơ̆ng. Tuh bĕ đak rơmă ‘bĕnh kơ trôm hơke na ih năm; Inh wơh ih năm tơ’bơ̆p ‘bok Jese Betlehem; yua lăm lu kon sư, Inh đei rơih iŏk minh ‘nu wă pơm pơtao.” (I Samuel 16:1)

Nơ̆r jet đơ̆ng Kră Yang: “Ih oei sơ’ngon dĭng truh dang yơ?” ưh kơ sĭ khan jơ̆ Sư khă lu bơ̆n tơ’bôh đơ̆ng jơhngơ̆m. Mă lei jơ̆ mĭnh nơ̆r tơ’blŏk khan Kră Yang ưh kơ wă lu bơ̆n oei lăm tơdrong ơh sơ’ngon ưh kơ tôch. Samuel ơh sơ’ngon thoi noh jơ̆ yua kơ sư ‘mêm tơpă kơ Sôl. Păng mă khan hơ’mon Sôl pơ tôch lăm sơ’ngon, lu bơ̆n ‘nĕ kơ hiơt khan kơplah pơtơm blŭng a sư đơ̆ng đei chu iŏk đon ala. Kơdih Samuel đei tơ’blŏk kơ Sôl khan:

“Samuel roi khan: Ih adrĕch iĕ ưh kơ hơnhŏ pơm kơ̆l kơ adrĕch adrung bơngai Isơrael dah kiơ? Kră Yang tuh đak rơmă ăn kơ ih pơm pơtao lu bơngai Isơrael.” (I Samuel 15:17).

Kơplah đei ơh sơ’ngon yua kơ đơ̆ng kơdih bơngai bơ̆n ‘mêm, lei na tơdrong ơh sơ’ngon rai hloh dơ̆ng. Jơhngơ̆m ‘mêm mă ‘bok Samuel ‘măn ăn kơ ‘bok Sôl pơm kơ sư rai ơh sơ’ngon, păng đơ̆ng dôm nơ̆r Kră Yang khan, lu bơ̆n ‘bôh sư sơ’ngon tơpă yua kơ đơ̆ng tơdrong truh noh.

Mă lei Kră Yang wă kơ Samuel- kŭm thoi kơdih lu bơ̆n- băt kơnăl mĭnh tơdrong: tơdrong proh hơmet đơ̆ng Sư ưh kơ layơ đei pơrăm yua kơ lăp đơ̆ng tơdrong pơdrơ̆ng glăi đơ̆ng mĭnh ‘nu bơngai. Nơ̆r khan đơ̆ng Sư năr ei oei re kơ tơ̆ng dĭng truh tơ dang ei: “Athei chhŭt đak măt hloi, păng yak năm tơ anăp.”

‘Bok Bơtho G. Campbell Morgan đei pơma mĭnh nơ̆r gĭt dêh: kơplah tơ‘bơ̆p hăm tơdrong truh, tơdrong tơ’bôh đơ̆ng lu bơ̆n gô yua kơ đơ̆ng lăm tơdrong lu bơ̆n rơih lăng tơdrong anat lăm tơdrong pơchrang hơdah đơ̆ng ‘Bok Kei-Dei, dah lăp lăng ‘bôh Sư ưh kơ hơđăl ala bôl đơ̆ng tơdrong anat. Mă khan lu bơ̆n đei tơ’bơ̆p ơh sơ’ngon thoi yơ hĭ, lei tơdrong tơpăt oei ưh kơ layơ tơplih: ‘Bok Kei-Dei oei jơ̆ ‘Bok Kei-Dei, păng Sư ling lang đei tơdrong mơsêh ba lu bơ̆n truh tơ anih kĕ jei.
Tơdah nŏng kơ đom lăm tơdrong so sơ̆, lu bơ̆n gô ‘net ‘net tơ hiong lê̆ tơdrong lăng gah tơ ning mônh. Dôm tơdrong truh ơh sơ’ngon gơh pơm kơdŭn tơrŏng păng pơgăn tơdrong tơdă Kră Yang đei ‘măn ăn kơ chăl arih bơ̆n. Lei na thoi noh, tơdrong kăl jơ̆ athei pơ̆n nuih yak tơ anăp. Bu lăm lu bơ̆n ưh tim mă đei ơh sơ’ngon? Đĭ đăng đêl đei hlôi tơ’bơ̆p dôm kơ đak măt ơh sơ’ngon. Mă lei Kră Yang ưh kơ wă lu bơ̆n dơ̆ng pơdơh ‘bơ̆t anih ơh sơ’ngon ‘noh. Sư krao lu bơ̆n chhŭt hrĕng đak măt, iung hloi păng yak năm tơ anăp.

Mă khan lăm kơplah ơh sơ’ngon, tơdrong ‘nâu mơ̆ng nhen thoi anat kơ sơng iŏk, mă lei rŏ lăng nơ̆r khan bơtho gĭt kăl hloh ‘noh jơ̆: “Ih oei sơ’ngon dĭng truh dang yơ? Athei iung hloi păng yak tơnăp.” Lu bơ̆n gô ưh kơ gơh pơm thoi yơ wă yak tơ anăp tơdah nŏng kơ ăn tơdrong so wei rôp bơ̆n kơjăp. Mă lei ‘Bok Kei-Dei đei mĭnh tơdrong proh hơmet kơ ning mônh, păng Sư hơpơi kơ lu bơ̆n rôp iŏk ti Sư wă mơ̆t tơ ning mônh ‘noh.

Apĭnh đĭ đăng krao khan hơdai: Kơkuh kơ Kră Yang ‘mêm kơ kon! Bơnê kơ Kră Yang yua kơ Ih ling lang oei hơdai, mă khan lăm dôm jơ kon mơn ‘bôh rơdu tơrăn, pơ̆k huŏng. Kon pơdrơ̆ng khan lơ wơ̆t kon oei đei bơwei tơdrong so, dôm rơka păng hiong răm nŏng kơ dui kon rơdu tơ ala. Apinh Ih hrĕch kơ tĕch dôm tơlei glang lăm jơhngơ̆m kon, pel rơngơp dôm tơdrong ơh sơ’ngon oei đei, păng ăn kơ kon jơhngơ̆m pran wă iung yak tơ anăp. Apĭnh tơgŭm kon đĭ jơhngơ̆m lui gơnang, bơwei jơhngơ̆m chang hơmĕng anih Kră Yang păng pơ̆n nuih yak kiơ̆ tơdrong tơdă ‘lơ̆ng rŏ Ih ‘măn kơdih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng buăl kŭm oei adrin yak hlôi kơ tơdrong ơh sơ’ngon đơ̆ng tơdrong so, dôm tơdrong ơh klai chô̆ kơjăp ưh kơ ăn buăl yak tơ anăp. Mă lei ‘nĕ kơ hiơt, hơ’mon đơ̆ng buăl ưh tim mă tôch ‘bơ̆t dâu. Oei đei dôm kơ hlak ‘nao mă Kră Yang wă chih hơmet, dôm kơ trong ‘nao Sư wă kơ buăl yak năm. Păng dah năr ‘nâu buăl mơn ‘bôh rơdu tơrăn, athei kư̆ kơ dan ti kơdih lăm ti Sư. Apĭnh ‘nĕ kơ ăn tơdrong so ‘bĕnh tơdrong ơh sơ’ngon pơdrơ̆ng tơdrong tơ anăp kơ buăl, yua kơ ning mônh tơpă gah dôm tơdrong ‘lơ̆ng rŏ mă Kră Yang ‘măn ăn bơih kơ buăl.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.