Thaum hnub nyoog yim laus, tsis muaj zog lawm ces cuag li peb pom yus ua tsis tau ntau yam rau Vajtswv lawm. Tiamsis tseeb tiag peb lub hnub nyoog thiab kev ntseeg yuav tsum mus ib thooj, txhais tau tias hnub nyoog nrog Vajtswv mus yim ntau ces kev ntseeg yim loj. Yog li, txawm yog peb lub hnub nyoog yog peg tsawg los peb tseem tuav lub siab ncaj ncees rau Vajtswv, kom txais tau lo lus uas Mauxes foom koob hmoov rau Aseles: koj lub neej ntev npaum twg, koj yuav muaj zog npaum ntawd.”

Hnub no yog hnub 09/11/2025, Kev Thov Vajtswv txhua hnub thov caw sawvdaws nrog kawm Vajtswv txojlus ua ke dhau zaj kawm: KEV NTSEEG TSIS TSUAG LAWV LUB HNUB NYOOG.

“Tiamsis txij thaum tus TSWV hais rau Mauxes los txog nimno twb tau plaub caug tsib xyoos lawm. Thaum ntawd cov Yixalayees tseem taug kev los hla tiaj suabpuam, thiab tus TSWV tseem pub kuv muaj sia nyob los txog niaj hnub no raws li nws tau coglus tseg lawm. Koj sim saib saib! Nimno kuv twb muaj yim caum tsib xyoos lawm.” (Yausuas 14:10)

Hauv Vajluskub yog hais txog cov neeg laus ces peb yeej nco txog Aplahaas lossis Mauxes, rau qhov lawv lub neej tau sau ntau. Tiamsis muaj ib tug uas nws lub neej tsis tau sau ntau thiab cuag li tsis nto npe, tiamsis nws lub neej ntseeg tsim nyog rau peb kawm: Ntawd yog Kalej uas yog Yefunes tus tub, tug uas nrog Mauxes thiab Yausuas ua haujlwm uake.

Txawm yawg tsis tau xaiv los ua thawjcoj hloov Mauxes chaw los Kalej yog tus uas qhia tawm nws kev ntseeg puag thaum ntxov. Thaum cov tub rog mus soj nruam tebchaws Canaas los, lawv hais lus ua rau cov pejxeem ntshai thiab lawv tig los yws rau Mauxes. Tiamsis kiag lub sijhawm ntawd, Kalej yog tus sawv los hais tias: “Peb cia li nce moog txeeb tebchaws taamsim no, rau qhov peb yeej muaj peevxwm kov yeej tau.” Teev Npe 13:30. Kalej ua siab tawv hais li ntawd twb yog vim yawg ntseeg tias thaj chaw uas Vajtswv twb cog tseg muab pub rau lawv lawm ces yuav tsis muaj ib yam dabtsi lossis ib tug neeg twg tav tau lawv kev.

Kalej kev ntseeg tsis yog tsuas qhia tawm ntawm lo lus hais tseem qhia tawm ntawm tes haujlwm, thaum Mauxes coj cov pejxeem mus txeeb Canaas, Kalej yeej nrog nraim lawv. Yawg hais rau nws tus thawjcoj: Cov pejxeem tuav hauv yuav muab pobzeb ntaus kom nkawd tuag, tiamsis tamsim ntawd tus TSWV lub tshwjchim txawm ci ntsa iab tshwm plaws saum tus TSWV lub Tsevntaub sib ntsib rau cov Yixalayees pom. Teev Npe 14:10. Yawg thov tau thaj chaw ntawm Henploos uas muaj cov neeg muaj zog Anakees tiamsis Kalej ntseeg siab rau Vajtswv yog li yawg yuav kov yeej xwb.

Txawm hnub nyoog laus lawm los, Kalej yeej muaj kev ntseeg khov kho rau Tus Tswv uas nws cia siab. Lub sijhawm uas nyob tom taj suab puam pab rau yawg ntseeg ruaj rau ntawm Vajtswv tsis zoo li cov uas ntxeev siab tawm tsam Vajtswv. Txawm yog Kalej tsis taijthov los Vajtswv yeej pub ib yam zoo rau yawg. Kalej yog tug thawjcoj loj nto npe ntawm xeem Yudas, xeem neeg yug tau vaj ntxwv Daviv. Daviv kuj sawv los ua huabtais rau ntawm nroog Henploos yog thaj chaw tau muab pub rau Kalej thaum ub. Tswv Yexus kuj tau yug los dhau ntawm xeem Yudas, yog los coj cov neeg txhaum mus cuag tau txoj sia ntev ib txhis.

Niaj hnub nim no, peb tsis ntsib ntau yam zoo nkaus ib Kalej, tiamsis peb ntsib ntau yam uas nyob rau tiam kawg no. Muaj ntau kev txhaum thiab tsis ntseeg, yog qhov nyuaj rau peb tuav yus li kev ntseeg kom khov kho thiab nyuaj rau peb muab yus txoj kev ntseeg ntawd cob rau tiam txuas ntxiv. Hnub nyoog thiab lub zog yog ib qho teeb meem, tiamsis tej ntawd tsis yog qhov uas ua rau peb tsis ua Vajtswv haujlwm ntxiv. Tej thaum peb ua tsis tau tej haujlwm loj lossis tej haujlwm yuav siv dag zog li cov hluas, tiamsis peb tuajyeem ua tau tej haujlwm me, tej haujlwm haum peb lub zog kom peb ua ntxiv Vajtswv tes haujlwm mus.

Muab ua lwm lo lus hais, peb kev ntseeg yuav tsum kho kho dua cov hluas, vim tej uas peb tau ntsib dhau nrog Vajtswv. Txhua zaug uas peb ntog lossis qaug zog yeej tseg rau peb ua ib zaj kawm zoo. Nco ntsoov Vajtswv txojlus: Ua neej nyob ntev yog nqi zog ntawm txojkev ncaj ncees. Ua neej laus plaubhau dawb yog lub mom yeebkoob. Pajlug 16:31.

Peb tsis yog ua neej rau peb xwb tiamsis tseem ua qauv rau tiam hluas. No kuj yog peb tes haujlwm, qhia tawm peb lub siab ncaj ncees rau Vajtswv. Txawm koj yog leejtwg, koj yeej muaj tub xeeb, txheeb ze, cov hluas hauv pawgntseeg tabtom ntsia saib koj lub neej. Peb yuav yog tug qauv zoo kom lawv tig saib thiab lawv caum Tus Tswv qab mus rau hauv Tus Tswv lub tebchaws.

Thov caw nrog kuv peb thov Vajtswv ua ke: Tus Tswvv, kuv ua koj tsaug rau qhov Koj tau pab kuv paub tseeb Koj thiab Txais Koj ua kuv tus Tswv, pub kuv tau koob hmoov ua Koj haujlwm. Txhua lub sijhawm Koj yeej nrog nraim kuv coj kuv kev, txhawb kuv thaum kuv qaug zog lossis ua tsis tiav. Thov Koj siv kuv ntxiv rau koj tes dej tes num, txawm kuv lub hnub nyoog laus zuj zug lawm los, kuv tseem ntsia pom tej lub sijhawm zoo uas kuv tau muaj feem los koom tes rau hauv Koj tes haujlwm. Kuv taij thov los ntawm Tswv Yexus Khetos lub npe, Amees.

Ib tsoom phoojywg sawvdaws, lub hnub nyoog yuav tsis yog teebmeem yog tias peb tsis tsav deb ntawm Vajtswv kev hlub, rau qhov Vajtswv yuav pab kom peb pom tias: “Kuv ua tiav txhua yam yog Tus Tswv ntxiv zog rau kuv.” Yog tsis muaj Vajtswv, ces txhua yam uas peb ua yuav tsis muaj qab hau. Yog li tsis txhob yws yws tias: “Kuv tsis txaus dag zog”…”Kuv ua tsis tau”… tiamsis cia li hais tias, “Tus Tswv, muaj kuv nyob no.”

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.