Kơplah jơhngơ̆m rai ‘lŏ kră, jơhngơ̆m rai rơdu, na lu bơ̆n đei mơn pă đei pơthim jơhngơ̆m pơm kiơ noh ăn kơ Kră Yang. Mă tơpă, sơnăm păng đon lui lu bơ̆n đei jô̆ tơplơ̆, wă khan khei ‘năr kiơ̆ Kră Yang rai đunh na đon lui rai pran hloh. Yua kơ thoi noh, mă khan sơnăm lu bơ̆n dôm yơ, lu bơ̆n oei bơwei jơhngơ̆m ‘lơ̆ng tơpăt hăm Kră Yang, wă kơ hlôi mơn thoi đei nơ̆r hơkat pŭn hiôk đơ̆ng Môis ăn kơ Aser: “Chăl arih ih sot dang yơ, jơhngơ̆m pran ih kư̆m thoi noh.”

Năr ‘nâu, ‘năr 09/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm ‘bai ĐON LUI ƯH KƠ JÔ HŎNH KIƠ̆ KƠ SƠNĂM.

“Lăm puăn-jĭt sơnăm kơ ‘nâu, đơ̆ng Kră Yang khan kơ Môis nơ̆r ‘nâu kơplah Isơrael oei năm lăm char glă sơ̆, Kră Yang mă wei-lăng tơdrong arih inh truh tơ dang ei, na ‘nâu inh đĭ đei tơhngam-jĭt pơđăm sơnăm boih.” (Jôsuê 14:10)

Lăm sơ̆p hla bơar ‘Bok Kei-Dei, kơplah tơ’blŏk truh tơ bơngai đei sơnăm ‘lŏ kră, na lu bơ̆n tơchĕng ‘blŏk kơ Abraham dah Môis, yua kơ roi hơ’mon kơ măr sư kơjung tơpă. Mă lei đei minh ‘nu bơngai mă khan ưh kơ đei chih lơ, kư̆m ưh kơ phara lơ, mă lei jơhngơ̆m ‘lơ̆ng tơpăt sư kiơ̆ Kră Yang trŏ kơ lu bơ̆n hŏk iŏk. Noh jơ̆ Kalep, kon drŏ ‘nglo Jêphunê đơ̆ng adrĕch Juđa, bơngai hơdai păng Môis hăm Jôsuê.

Mă khan ưh kơ rơih iŏk wă pơm yŏng pơgơ̆r thoi kơ Jôsuê, na đơ̆ng Kalep jơ̆ tơm kơ tơ’bôh đon lui tih đơ̆ng oei hrôih. Đơ̆ng rŏng kơ lu linh chop dăr lăng wih brŏk roi dôm tơdrong lu sư ‘bôh tơ char Kanaan, lu sư rei tơdrong hli tơrơ ăn kơ bơngai Isơrael pơm kơ lu sư jô̆ jŏk kơ Môis. Kơplah jơ ‘nâu, Kalep pơ̆n nuih pơma khan: “Lu bơ̆n athei năm tŏk blah iŏk oei hloi lăm char noh, gô jei lu bơ̆n.” (Jô̆ Bơngai 13:30) Sư pơ̆n pơma thoi noh yua kơ băt tơpă Kră Yang đei pơkă gô ăn char noh kơ lu sư na ưh kơ đei dur tih kơjăp ayơ dah bơngai tih kơ jung ayơ pơgăn jơ̆ng lu sư yak năm.

Sư ưh kơ tơ’bôh đon lui đơ̆ng nơ̆r pơma mă đơ̆ng sư pơm, na Jôsuê chông anhăk năm blah char Kanaan, Kalep ling lang jơ̆ bơngai hơdai. Sư pơ̆n nuih pơma hăm bơngai yŏng sư: “Lăm puăn-jĭt sơnăm kơ ‘nâu, đơ̆ng Kră Yang khan kơ Môis nơ̆r ‘nâu kơplah Isơrael oei năm lăm char glă sơ̆, Kră Yang mă wei-lăng tơdrong arih inh truh tơ dang ei, na ‘nâu inh đĭ đei tơhngam-jĭt pơđăm sơnăm boih.” (Jôsuê 14:10) Sư apinh asong char kông Hêbrôna, anih mă gô tơ’blah hăm bơngai Anakim tih kơjung, na đei đon lui tih kơ Kră Yang, sư gô kĕ jei.

Mă khan sơnăm ‘lŏ bơih, mă lei Kalep tơ’bôh đon lui sư ling lang oei kơjăp păng wơ̆ ‘lŏ kiơ̆ kơ khei ‘năr yak năm hơdai Kră Yang. Dôm kơ khei ‘năr lăm tơmăn glă tơgŭm sư pơjuăt lui gơnang kơ Kră Yang huay kơ druh kiơ̆ kơ bơngai tơpôl lơ ling lang ayăt hăm Kră Yang. Mă sư ưh kơ đei pơgŏ athei ăn, mă lei sư đei tơmam apah tih. Kalep kư̆m jơ̆ bơngai yŏng pơgơ̆r tih đơ̆ng adrĕch adrŭng gah Juđê, đơ̆ng pah adrĕch ‘nâu đei pơtao đe pôk pơ ư noh jơ̆ Đawit. Đawit kư̆m pơtơm pơm pơtao blŭng a đơ̆ng dêh char Hêbrôna, anih mă đei ăn kơ Kalep. Kư̆m đơ̆ng adrĕch Juđê, đei tơpŭ kơ Yang Yêsu wă chông anhăk bơngai pơm đĭch tơdrong yoch năm truh tơ tơdrong arih ling lang.

Hrei âu, lu bơ̆n huay kơ dan tơdrong pơlong lăng thoi kơ Kalep, mă lu bơ̆n kư̆m tơ’bơ̆p dôm tơdrong kơnê̆ kơplah sơnăm wă tôch. Arih lăm chăl arih đei lơ tơdrong yoch păng ưh kơ lui yom kơ Kră Yang, ưh kơ sĭ adrô̆ anat anot wă bơwei kơdih akâu mă wă kơ đon lui rai wơ̆ ‘lŏ păng bơwei đon lui ăn kơ jơhnơr pơtrơp đơ̆ng rŏng dơ̆ng kăl dêh păng ưh kơ ‘bônh. Sơnăm păng jơhngơ̆m jơ̆ tơdrong pơlong lăng, mă lei ưh kơ đơ̆ng noh pơm kơ bơ̆n dơ̆ng minh ‘bôt, lăm kơplah bơ̆jang kơ Kră Yang. Rŏ lăng lu bơ̆n ưh kơ kĕ wă pŭ iŏk tôm tơdrong, huay kơ kăl pơm dôm tơdrong hơbĕch hơbal thoi kơ sơnăm oei ‘lơ̆p, mă lei tơpăt đơ̆ng lăm tơdrong iĕ, oei đei tơdrong trŏ lăp kơ jơhngơ̆m wă kơ lu bơ̆n pơtrơp bơ̆jang dôm tơdrong đơ̆ng Kră Yang ăn.

Pơma phara ‘biơ̆, đon lui lu bơ̆n pran lơ hloh kơ lu bơngai ‘lơ̆p, yua kơ dôm tơdrong lu bơ̆n đei hlôi mơn yak kiơ̆ Kră Yang đei lơlang lơlap. Dôm kơ đei kĕ jei dah pơ̆k huŏng đei ăn kơ lu bơ̆n ‘bai hŏk gĭt kăl. Athei ling lang ‘blŏk kơ dôm nơ̆r Kră Yang pơma tơ ‘blŏk: “Sŏk ko jing môk ư-ang, ‘Bôh đơ̆ng tơdrong jang sư tơpăt na gơh đei.” (Tơdrong Pơđơ̆k 16:31)

Lu bơ̆n ưh kơ sĭ arih ăn kơ kơdih akâu đĕch, mă kư̆m arih ăn kơ jơhnơr pơtrơp đơ̆ng rŏng dơ̆ng. ‘Nâu kư̆m minh tơdrong pŭ iŏk lăm trong yak năm hăm đon lui ding truh tơ tuch luch lăm tơdrong pơgơ̆p hăm ‘Bok Kei-Dei. Mă buăl noh bu, buăl kư̆m đei kon sâu, bơngai buăl ‘mêm lăm hnam dơnŏ, păng hăm lu bơngai ‘lơ̆p lăm Hnam Akŭm kư̆m oei lăng lăm tơdrong arih rim năr buăl oei pơm. Kơdih lu bơ̆n athei jơ̆ dôm kơmil arih, wă kơ lu sư lăng ‘bôh păng pơtrơp yak năm mơ̆t tơ lăm “dêh đei pơkă ăn” na gô tơ’bơ̆p Kră Yang.

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih, yua ăn kơ kon mơn băt kơ Ih păng lui sơng iŏk Ih lăm chăl arih ‘nâu, păng ăn kơ kon đei yak năm hăm Ih đơ̆ng lăm tơdrong bơ̆jang. Mă khan dôm tơdrong arih thoi yơ Ih kư̆m oei bơwei păng chông anhăk kon, tưk tơ iung kon kơplah kon pơ̆k, pơlung kon kơplah kon kĕ jei. Hơpơi kơ Ih yua kon dơ̆ng lăm tơdrong bơ̆jang kơ Ih, mă khan sơnăm kon rai ‘lŏ kră, jơhngơ̆m pran kon ưh pă thoi ki sơ̆, mă oei ăn kơ kon ‘bôh oei hơdai tơgŭm tơdrong bơ̆jang kơ Ih. Kon kŭp kơ̆l krao khan hăm anăn Yang yêsu Krist, A-men.

Ơ lu bơngai mơ̆ng mă ‘mêm kơ eng, sơnăm rai ‘lŏ kră noh ưh kơ đei pơgăn lu bơ̆n kơplah lu bơ̆n ling lang lăng tơ Kră Yang, yua kơ Sư gô ăn kơ lu bơ̆n hlôi mơn đei “Inh gơh pơm tôm tơdrong yua kơ đei Kră Yang ăn kơ inh đei jơhngơ̆m pran.” Tơdah ưh kơ đơ̆ng Kră Yang, dôm tơdrong jang ưh kơ đei yua kiơ. Yua kơ thoi noh, nĕ kơ tơtok tơtăm “inh ‘lŏ kră bơih”, “inh pă đei jơhngơ̆m pran bơih”, “inh jang ưh kơ kĕ”… mă ling lang pơih jơhngơ̆m păng pơma hăm Kră Yang “Kră Yang ơi, đei kon tơ âu”.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.