Sơnăm ‘lŏ kră ngăl đei hơdai hăm tơdrong hiơ̆ hyĭn, rơdu tơrăn, păng dôm tơdrong ưh kơ đei jơhngơ̆m pran, ưh kơ đei jơhngơ̆m. Mă lei dah sơnăm kră ưh kơ trŏ jơ̆ anih truh tuch luch, mă jơ̆ ‘măng pơih să mĭnh tơdrong yak năm ‘nao plơ̆ng lei thoi yơ? ‘Noh jơ̆ trong yak năm ‘lơ̆ng rŏ ăn kơ lu bơ̆n arih hăm tơdrong jrŭ să hloh, pran kơtang hloh, păng sơng iŏk đĭ dôm tơdrong kiơ Kră Yang ‘măn ăn. Buăl hăm wă mơ̆t lăm sơnăm ‘lŏ kră hloi hăm mĭnh pah lăng đĭ đăng ‘nao plơ̆ng păng tơplih ‘nao plơ̆ng ưh?

Năr ‘nâu, ‘năr 10/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm ‘bai ƯH KƠHLI SƠNĂM KRĂ.

“Ơ! Apinh Ih ăn kơ lu nhôn rim pơgê hrăp jơhngơ̆m kơ tơdrong Ih ‘mêm. Wă kơ đĭ lăm chăl arih lu nhôn chơt hiôk hơri bơnê.” (Hơriso 90:14)

Kon bơngai ngăl pơma pơlung băl athei tơchĕng tơ’nguaih tơdrong hơmet lê̆ ưh kơ trŏ layơ kŭm yak kiơ̆ trong gơlong. Păng inh ‘maih yua iŏk tơdrong tơchĕng ‘noh lăm sơnăm kră kơ kơdih wă arih mĭnh chăl arih ưh kơ kiơ̆ trong gơlong sơnăm mă lei ‘bĕnh blai tơdrong mơsêh mơyang, đei jơhngơ̆m păng jơhngơ̆m pran.

Bơngai chih Hơriso pơma hăm Kră Yang:

“Apinh Ih ăn kơ lu nhôn rim pơgê hrăp jơhngơ̆m kơ tơdrong Ih ‘mêm. Wă kơ đĭ lăm chăl arih lu nhôn chơt hiôk hơri bơnê.” (Hơriso 90:14)

Đơ̆ng rŏng kơ sơnăm 50, lơ bơngai lăm lu bơ̆n oei chơ chă tơdrong arih “ưh kơ đei sơnăm” păng tu tơdrong pran ưh kơ tôch. Lu sư ưh kơ đei pơgăn lăm tơdrong so, kŭm ưh kơ iŏk lê̆ đơ̆ng ning mônh. Dôm lu bơngai ưh kơ hli kơ sơnăm kră băt kơ sơng iŏk rim kơ jơ năr thoi mĭnh jơ năr wă hŏk iŏk, wơ̆ ‘lŏ, păng rim năr rai arih trŏ hăm tơdrong kơ nhăm mă Kră Yang đei pơjing lu sư.

Tăp dăr lu bơ̆n đei dôm lu bơngai oei “ rai ‘lŏ kră” kiơ̆ kơ khei sơnăm mă lei chăl arih oei ‘bĕnh blai tơdrong mơsêh mơyang. Tơdrong mơsêh mơyang truh đơ̆ng tơdrong arih lăm Nơ̆r ‘Bok Kei-Dei, arih kiơ̆ trŏ tơdrong kơnhăm mă Kră Yang pơjing. Inh hơ pơi dah mơ̆t lăm sơnăm kră, lu bơ̆n kŭm gơh wơ̆ ‘lŏ lăm tơdrong wơ̆ pran lăm bơhngol păng sơng iŏk tôm mah chăl arih rơkah rơkai Kră Yang ăn.
Lu bơ̆n kŭm đei tơdrong mơsêh mơyang lăm pham đơ̆ng ‘Bok Dŏng Pơklaih Yang Yêsu. Inh ‘blŏk truh kơ ‘bok inh, sư dang ei oei oei hăm Kră Yang păng yak năm rok trong “lơ̆k hăm maih”. Sư hơ iă dêh kơ ‘bai hơri lăm Hla Bơar Hơri “Đei Pham Kăp Tuh”, păng kơplah hơri lei sư ưh pă pơma hơrăk bơih. Kơplah inh ‘nao jĭt sơnăm, sư chơ inh năm lăng khŭl hơri sư tơ Hnam Hơkŭm. Inh oei ‘blŏk hơđăl muh măt đum đĭ yua kơ đĭ jơhngơ̆m kơplah sư tơlĕch nơ̆r hơri: “MƠSÊH LĂM PHAM KON TRIU ‘LƠ̆NG RƠGOH!” ‘Bai hơri ‘noh păng rup ‘bok inh đei răk jrŭ lăm jơhngơ̆m inh mĭnh tơdrong tơpăt: tơdrong mơsêh mơyang lăm pham ‘Bok Dŏng Pơklaih Yang Yêsu kơjung hloh kơ dôm tơdrong mơsêh mơyang pha nai.

Tơdrong mơsêh mơyang kŭm đei tơ’bôh lăm kơdih trong yak năm đơ̆ng sơnăm kră. Lơ bơngai sơnăm ‘lŏ ưh pă đei bơngơ̆t gah jên tơmam, hloh kơ ‘noh jơ̆ kơplah kon hơ’lơ̆p đei wơ̆ ‘lŏ. Lu sư đei lơ jơnăr kơ akâu jăn kơdih, wă druh kiơ̆ tơdrong hưch wă, dah pơtơm mĭnh tơdrong ‘maih wă ‘nao.

Kră Yang kŭm dan ăn lăm rim ‘nu bơngai mĭnh “akâu jăn” hơ iă. Kơplah sơnăm ‘lŏ, lu bơ̆n ‘net mơ̆t lăm tơdrong juăt arih mă Sư đei proh hơmet ăn bơih kơ bơ̆n. Hăm inh, ‘noh jơ̆ tơdrong hưch wă ‘măn ăn kơ Kră Yang, kơ hnam dơnŏ, teh đak, chih hla ar, bơtho păng năm tơ ou tơ to. Inh mơn ‘bôh hơđăl khan đĭ đăng dôm kơ khei sơnăm đei hlôi lăp jơ̆ yak hơmet lê̆, na dang ei inh gơh hơdai hăm đak glung ro mă bơhngol kơdih đei hơpơi wă. Inh ‘nă hal hăm akâu jăn sơnăm kră mă Kră Yang ‘măn ăn kơ inh. Buăl kŭm gô đei mĭnh akâu jăn arih phara mă Kră Yang ‘măn ăn kơ buăl.

“Bơngai noh nhen thoi tơm ‘long chăt cheng đak glung, Đei plei kiơ̆ kơ bơyan, Hla sư ưh kơ đei layơ jô kro, Rim tơdrong jang sư pơm jing ngăl.” (Hơriso 1:3)

Lu bơ̆n kŭm đei ‘măn ăn kơ jơhngơ̆m pran. Kiơ̆ kơ tơdrong tơm, jơhngơ̆m pran đei tơm jơ̆: jơhngơ̆m pran wă arih păng wơ̆ pran, tơdrong gơh pơtrơp tơdrong lui kơjăp păng đei yua, jơhngơ̆m pran gah akâu jăn păng jơhngơ̆m.

Sơ̆p Hla Bơar Nơ̆r ‘Bok Kei-Dei: “Môis lôch, kơplah sư đei minh-hrĕng ‘bar-jĭt sơnăm; măt sư oei hơdah ‘lơ̆ng, jơhngơ̆m sư oei pran.” (Bơtho Khôi Juăt 34:7) ‘Lơ̆ng rŏ tơpă! Môis oei ‘bĕnh blai jơhngơ̆m pran mă khan kơplah sơnăm đĭ kră.
Dang ei, jơhnơr tơpŭ lăm jơhnơr kon pơlei rai lơ oei năm truh tơ mĭnh sơnăm kră ‘bĕnh blai jơhngơ̆m pran. Lăm trong yak năm chơ chă “tu glung sơnăm ‘lơ̆p”, lu sư đei tơplih tơdrong lu bơ̆n lăng sơng iŏk gah sơnăm kră. Lu sư băt kơnăl khan pơtơ̆p pơpơ̆ akâu jăn bơih jơ̆ tơdrong tơgŭm pơm pơhiơ̆ tơdrong gah akâu jăn rai kră. Pơtơ̆p pơpơ̆ akâu jăn tơgŭm gah plei nuih, trong pham, kơting păng đĭ chăl arih đei jơhngơ̆m. Tơdrong pơtơ̆p gah akâu jăn dơhlu gŏl ŭnh tơdrong arih lăm rim ‘nu lu bơ̆n.

Rai kră ưh kơ sĭ jơ̆ achăng đĭ, mă lei jơ̆ arih hăm tơdrong lui tơpă, băt ‘mêm kơ akâu jăn păng bơwei kơ chăl arih tơproh ‘lơ̆ng, chơt hiôk.

Dĭng truh kơ tuch luch jơhnơr ‘nâu, khŭl bơngai hloh kơ 50 sơnăm gô lơ hloh kơ khŭl bơngai ala 50. Yua kơ thoi noh, lu bơ̆n rai kăl kơ pơhrăm iŏk tơdrong arih ‘bĕnh blai jơhngơ̆m mă khan lăm sơnăm kră wă hlôi mơn đei tơdrong mơsêh mơyang Kră Yang păng đei yua rai hloh kơ tơdrong jang Sư.

Apĭnh đĭ đăng krao khan hơdai: Bơnê kơ Kră Yang yua kơ tơdrong ‘mêm păng tơdrong mơsêh mơyang đơ̆ng Ih, sơnăm ưh kơ gơh wă pơgăn kon, mă tă kơ jing jơnăr wă kon arih hiôk chơt lăm Ih. Apinh ăn kơ kon jơhngơ̆m pran, akâu jăn păng tơdrong arih ‘bĕnh blai truh đơ̆ng anih Ih, wă mă oei lăm sơnăm ayơ, kon oei arih tôm ‘lơ̆ng, chơt hiôk păng pơm hơdah anăn Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, sơnăm tơpă ưh kơ sĭ jơ̆ lăp kơ sô̆, mă lei tơdrong mă lu bơ̆n rơih iŏk arih thoi yơ ‘noh jơ̆ tơdrong pơdrơ̆ng đĭ đăng. Kră Yang bơih jơ̆ tu tơdrong arih ưh kơ layơ hrơ̆, mă khan lu bơ̆n oei oei lăm jơnăr ayơ kơ chăl arih kơdih. Dah ăn kơ Sư dơhlu kial ‘nao lăm jơhngơ̆m bơ̆n, lu bơ̆n gô hlôi mơn đei tu jơhngơ̆m pran ‘nao ‘bĕnh blai, wă kơ rim năr lu bơ̆n đei arih tôm mah, chơt hiôk păng rang hơdah lăm Sư. ‘Noh bơih trŏ jơ̆ sơnăm kră trŏ kơ hơpơi wă, mĭnh sơnăm kră pơm ư-ang anăn Kră Yang păng ăn mŭk tơmam tơdrong pŭn hiôk kơ jơhnơr đơ̆ng rŏng.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.