Koj ntaus nqi rau koj tus kheej muaj nqis dhau ntawm yam dabtsi? Puas yog haujlwm zoo, tej haujlwm tau ua tiav zoo, lossis muaj ib lub cuab yig zoo? Koj puas suav tias ntawd yog yam uas ua rau kom koj sawv khov kho nyob rau hauv lub ntiajteb no? Tas ib pliag xwb, txhua yam pob puas. Peb xav tsis thoob, tsis paub pheeb rau qhov twg. Tiamsis txawm yog thaum koj tab tom muaj mob, los kav tsij tsa suab qhuas Vajtswv. Tsuas yog thaum tsa suab qhuas Vajtswv, peb thiaj tig peb lub siab mus rau ntawm tus cag uas tsis yoj yees: kev hlub thiab Vajtswv txoj kev ncaj ncees. Thaum peb tas siab nrhiav Vajtswv, peb yuav nrhiav tau ib qhov chaw sawv khov kho rau tej kev hloov pauv hauv lub neej.

Hnub no, yog hnub 11/11/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia dhau ntawm Zaj kawm TXAWM RAUG MOB, CIA LI QHUAS VAJTSWV.

“Cia li mus cuag tus Tswv thiab thov nws pab, thiab niaj hnub pehawm nws” (Ntawv Nkauj 105:4).

“Kuv twb siv tas kuv lub zog lawm. Kuv twb hloov kuv qhov yuam kev, kuv twb ua tau zoo lawm. Tiamsis vim li cas Vajtswv ho cia tej xwm txheej no tshwmsim los raug rau kuv?” Kuv cia li quaj, npau taws hu Vajtswv, kua muag pheej ntws los.

Tib pliag ntshis xwb, kuv poob txoj haujlwm uas ib txwm khwv nyiaj los pab kuv yav dhau los, kuj yog yam uas kuv muab tag nrho kuv tus kheej tso rau. Kuv npau taws rau Vajtswv vim Vajtswv tau cia qhov ntawd tshwm tuaj, tiamsis kuv kuj npau taws kuv tus kheej vim tej qhov yuam kev ntawd loj heev txog qhov uas kho tsis tau lawm. Kuv lub neej thaum ntawd zoo li ntxhov nyho, tsis paub pheeb rau qhov twg.

Tas dab ntxwgnyoog ntxhi: “Yeej tsis muaj leej twg nkag siab, kav tsij muab zais cia, txhob hais qhia rau leej twg li” thiab kuv kuj ua li ntawd. Tsis ntev xwb, kuv poob rau txoj kev nyob ib leeg, cim civ rub tsis taus yus sawv.

Tej phooj ywg, tsev neeg tag siab txhawb zog, tiamsis yim mloog lawv siv Vajtswv tej lus los txhawb kuv yim npau taws. Nyob hauv kuv lub taub hau tsuas xav tias: “Yog Vajtswv zoo tiag, Vajtswv yeej tsis cia tej no tshwm sim tuaj” kuv yeej tsis ntseeg tias Vajtswv muaj homphiaj zoo rau kuv, vim txhua yam ib ncig, txhua yam puav leej puas tsuaj tas. Thiab kuv npau taws heev, vim Vajtswv txojlus yeej ib txwm txhawb kuv zog thaum no yim ua rau kuv npau taws tshaj. Kuv tsis paub yuav ua li cas.

Koj puas tau muaj zaum twg tau raug zoo li kuv?

Tej zaug nyob rau lub sijhawm txomnyem twg ntawd, koj kuj tau tsa suab nug tias: “Vajtswv koj tab tom nyob qhov twg hauv kuv zaj xwm txheej?” Twb yog nyob rau ntu ntawd, kuv kawm tau ib yam: Vajtswv yeej zoo tshaj plaws, thiab Vajtswv muaj homphiaj zoo rau kuv lub neej. Tiamsis Vajtswv kuj xav kom kuv ua kuv feem. Kuv feem yog nrhiav Vajtswv- yam uas yav dhau los kuv yeej tsis ua.
Yelemis 29:11-13 nthuav tawm tias Vajtswv muaj tej homphiaj loj rau Vajtswv haiv neeg. tiamsis Vajluskub kuj hais tias peb tsuas ntsib tau Vajtswv thiab tau nkag rau hauv lub homphiaj ntawd thaum uas peb nrhiav Vajtswv tas siab: “Cia li mus cuag tus Tswv thiab thov nws pab, thiab niaj hnub pehawm nws” (Ntawv Nkauj 105:4).
Qhov tseeb no thaum twg twb tseem ceeb, tiamsis yim zoo dua thaum uas peb mus dhau tej hnub uas muaj kev txomnyem. Txojkev uas peb yuav ceev tau peb lub siab thaum twg twb nrhiav Vajtswv yog: Nco txog tej uas Vajtswv tau ua lawm, cim ntsoov Vajtswv lub npe, thiab tsa suab qhuas Vajtswv. Qhov no tsis tau txhais tias koj yuav tsis quav ntsej txog tej teeb meem, tiamsis tsis cia qhov teeb meem ntawd dhau los ua qhov loj dua Vajtswv.

“Cia li ua tus Tswv tsaug cia li piav nws lub koob lub npe uas zoo kawg nkaus rau sawvdaws; cia li qhia kom txhua haivneeg paub tus Tswv tej haujlwm uas nws ua. Cia li hu nkauj qhuas tus Tswv; cia li qhia kom txhua tus paub tus Tswv tej txujci tseemceeb uas nws ua. Cia li zoo siab rau qhov peb yog Vajtswv tug; txhua tus uas pehawm nws cia li zoo siab” (Ntawv Nkauj 105:1-3).

Kuv twb kawm paub tob txog Vajtswv lub npe. Kuv kuj kawm paub txoj kev nrhiav Vajtswv thiab qhuas Vajtswv tag nrho lub siab. Kuv yuav tau qhib siab caw Vajtswv los nthuav tawm rau kuv paub txog kuv tus cwjpwm tiag thaum nyob hauv Nws. Yog, twb yog vim kuv tej kev txhaum thiaj ua rau kuv poob haujlwm, tiamsis Vajtswv siv lub sijhawm ntawd los nthuav tawm Vajtswv tus kheej, tib txhij ntawd Vajtswv kuj qhia rau kuv paub txog kuv muaj nqis nyob hauv Vajtswv. Zaj kawm ntawd dhau los ua ib qhov cuab yeej rau kuv tomqab no, pab kom kuv sawv khov kho rau tej kev sim siab tseem loj dua ntau npaug qhov uas yuav poob haujlwm.
Kuv tsis paub zoo koj tab tom nyob rau ntu twg hauv zaj xwm txheej ntawm yus lub neej. Tiamsis kuv ntseeg ib qhov tias: thaum koj nres nco txog tej yam uas Vajtswv tau ua thiab qhuas Vajtswv vim Vajtswv lub npe ces koj yuav maj mam ntsia pom zuj zus raws li qhov uas Vajtswv ntsia pom, pauv qhov uas tsom ntsoov rau tej kev txomnyem ntawm qhov muag. Yog li, sim tseg ob peb feeb los xav saib hnub no koj yuav qhuas Vajtswv txog yam dabtsi. Tas tomqab ntawd, cia li tsa suab qhuas Vajtswv!

“Cia li qhuas tus Tswv, cia li ua tus Tswv tsaug rau qhov nws muaj lub siab dawb siab zoo, nws txojkev hlub nyob mus ibtxhis. Leejtwg thiaj muaj cuabkav piav tau tej txujci tseemceeb uas tus Tswv ua? Leejtwg thiaj txawj qhuas nws tas siab nrho?” (Ntawv Nkauj 106:1-2).

Thov caw nrog kuv peb thov Vajtswv ua ke: Tus Tswv, kuv paub tias yeej tsis muaj ib yam dabtsi nyob rau hauv ntiajteb no yuav tab pov rau kuv txoj kev tso siab zoo kawg nkaus. Tej uas peb ua tau tej zaug yuav puas tsuaj, tsev neeg tej zaum yuav sib nrauj, thiab lub zog tej zaug yuav tsuag mus. tiamsis nyob hauv koj txhais tes, kuv tau txais kev kaj siab lug. Thov qhia rau kom kuv paub ntseeg koj thiab tsis pheeb rau tej uas yooj yim ploj hauv lub ntiajteb no. Thov kho zoo tej qhov txhab hauv kuv lub siab, thiab ntuas kuv tias kuv muaj nqis tiag nyob hauv koj – tus tau cawm kuv thiab sau tau zaj xwm txheej zoo hauv kuv lub neej. Kuv thov hauv Tswv Yexus Khetos lub npe. Amees.

Cov kwv tij txhua tus, tej zaug koj tab tom muab koj lub siab tso rau ib yam dabtsi twg – haujlwm, tsev neeg, qub txeeg qub teg – thiab muaj ib hnub twg txhua yam yuav puas tsuaj. Txawm yog thaum uas txhua yam puas tsuaj tas, Vajtswv yeej tseem nrog koj nyob. Thiab Vajtswv nqua hu koj kom pom txog qhov tseeb no, qhov uas koj muaj nqis tsis nyob ntawm tej uas yooj yim pob puas no, tiamsis nyob hauv Vajtswv – tus uas tsis hloov pauv. Thaum koj tig koj lub qhov muag mus rau ntawm Vajtswv, koj yuav nrhiav tau qhov tseeb tsis muaj hnub yoj yees, pab kom koj sawv khov kho dhau ntawm txhua tus txomnyem hauv lub neej. Hnub no, cia li saib ntsoov Vajtswv thiab tsa suab qhuas Nws!

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj