Buăl lăng kơdih akâu hăm đei gĭt kăl lăm tơdrong kiơ? Rŏ lăng noh tơdrong bơ̆jang, mơdrŏng, dah ŭnh hnam tôm mah tôm tơdrong? Buăl khan noh jơ̆ tơdrong oei bơwei buăl dơ̆ng kơjăp tơ kơpal teh đak ‘nâu? Na lăp tŏ sĕt đĕch, tôm tơdrong pơchah răm. Lu bơ̆n hơwơ̆l hơwang ưh pă băt wă gơnang kơ kiơ dơ̆ng. Na kơplah lu bơ̆n chhŭr nuih, athei kư̆ kơ ư ang kơ Kră Yang. Yua kơ kơplah đei nơ̆r ư ang, lu bơ̆n dan jơhngơ̆m tơ anih kơjăp huay kơ ngĭl ngŭl: tơdrong ‘mêm păng ‘lơ̆ng tơpăt ‘Bok Kei-Dei. Kơplah băt kơ jơhngơ̆m chă Kră Yang, lu bơ̆n chă ‘bôh anih kơjăp tŏk bŏk teh đak đei lơ tơdrong tơplih.

Năr ‘nâu, ‘năr 11/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm kơ̆l ‘bai MĂ KHAN ƠH SƠ’NGON, ATHEI KƯ̆ KƠ Ư-ANG KƠ KRĂ YANG.

“Chă bĕ Kră Yang păng tơdrong pran kơtang Sư chơchă bĕ muh măt Sư ling-lang.” (Hơriso 105:4)

“Kon adrin đĭ jơhngơ̆m bơih ră. Kon đei hơmet ming tơdrong glăi, kon ‘net ‘net bơih. Mă lei liơ Ih ăn tơdrong ‘nâu truh kơ kon?” Inh nhơ̆m, blĕk hil kơ Kră Yang, đak măt lĕch ro tơ tơ’bŏk.

Na lăp tŏ sĕt đĕch, tơdrong jang mă rong inh đơ̆ng ki sơ̆ pă đei bơih, kư̆m jơ̆ inh dan dôm tơdrong gĭt kăl kơdih tơ lăm noh. Inh blĕk kơ Kră Yang yua kơ sư drơ̆ng ăn tơdrong noh truh, na inh kư̆m blĕk kơ kơdih akâu yua kơ dôm tơdrong pơm glăi tih dêh truh tơ ưh kơ gơh wă hơmet ming. Tơdrong arih inh kơplah noh nhen thoi lơ tơdrong tơsŭl, ưh kơ băt wă gơnang tơyơ.

Na yang kơnê̆ mơmơnh: “Ưh kơ đei bu hlôh ôh, athei ôn mă hlơp, ‘nĕ kơ roi kơ bơngai nai.” Na inh mơ̆ng pơm kiơ̆. Ưh kơ đunh, inh huŏng lăm sơlŭng jrŭ arih ôn kơdih, ưh kơ gơh wă dŏng kơdih.

Buăl juăt, hnam dơnŏ đĭ jơhnghơ̆m tơgŭm, na rai mơ̆ng lu sư yua nơ̆r Kră Yang bơtho tơ’bôh, inh rai blĕk. Lăm kơ̆l inh ngăl tơchĕng: “Tơdah Kră Yang ‘lơ̆ng tơpăt tơpă, liơ Sư ăn tơdrong ‘nâu truh.” Inh ưh kơ lui ngeh kơ Sư đei proh hơmet ‘lơ̆ng ăn kơ inh, yua kơ pơlong lăng jum dăr, dôm kơ tơdrong hiong răm. Na inh chhŭr nuih dêh, yua kơ nơ̆r Kră Yang jơ̆ tơm kơ pơlung na jơ ‘nâu pơm kơ inh blĕk. Inh ưh pă băt pơm thoi yơ.

Buăl hăm đei layơ thoi noh ưh? Rŏ lăng lăm kơplah arih ưh kơ tôm mah, buăl kư̆m đei nơ̆r pơma jet: Kră Yang oei tơyơ lăm tơdrong hơmon chăl arih inh?” Na lăm kơplah noh, inh đei hŏk pơhrăm iŏk minh tơdrong: Kră Yang ling lang ‘lơ̆ng tơpăt păng Sư đei proh hơmet ‘lơ̆ng ăn kơ chăl arih inh. Na Sư kư̆m wă kơ inh pơm kơ kơdih inh. Gah inh pơm noh jơ̆ chă Kră Yang – mă kơplah noh inh ưh kơ đei tam lah pơm.

Jêrêmi 29: 11-13 tơ’bôh Kră Yang đei proh hơmet tih ăn kơ chăl arih lu bơngai lui kơ Sư. Na sơ̆p hla bơar ‘Bok Kei-Dei kư̆m pơma wă yak năm lăm tơdrong proh hơmet noh kơplah lu bơ̆n đĭ jơhngơ̆m chă Sư: “Chă bĕ Kră Yang păng tơdrong pran kơtang Sư, chơchă bĕ muh măt Sư ling-lang.” (Hơriso 105:4).

Tơdrong tơpă ‘nâu kăl tơpă, na rai kăl hloh kơplah lu bơ̆n yak năm lăm năr anat anot. Wă kơ bơwei ling lang chă Kră Yang noh jơ̆: ‘blŏk ming dôm tơdrong Sư đei pơm, păng pơyơ̆r nơ̆r bơnê kơ Sư. Tơdrong noh ưh kơ sĭ buăl tŭk lê̆ tơdrong kơnhăm đơ̆ng kơdih, mă ‘nĕ ăn kơnhăm đơ̆ng kơdih tih hloh kơ Kră Yang.

“Bơnê ư-ang bĕ kơ Kră Yang.Krao apinh pao anăn Sư bĕ.Ră roi bĕ kơ lu kon pơlei pơla dôm tơdrong jang Sư pơm boih. Hơri bĕ kơ Sư, hơri bơnê bĕ kơ Sư. Ră roi bĕ tơdrong jang hlĭch chrơp sư. Ư-ang bĕ kơ lu iĕm kơdih lăm anăn rơgoh Sư, Ăn kơ jơhngơ̆m lu bơngai chơchă Kră Yang đei hiôk chơt.” (Hơriso 105:1-3).

Inh đei hŏk pơhrăm rai jrŭ hloh gah anăn Kră Yang. Inh kư̆m hŏk wă kơ băt chă Kră Yang păng ư ang kơ Sư đĭ jơhngơ̆m. Inh pơih jơhngơ̆m sơng iŏk Kră Yang tơ’bôh kơ inh, inh oei lăm Kră Yang tơpă. Trŏ bơih, đơ̆ng inh pơm glăi pơm kơ inh hiong tơdrong jang, mă lei Kră Yang yua iŏk tơ’bôh kơdih Sư kơ inh, na kư̆m tơbăt ăn kơ inh gĭt kăl lăm Sư. ‘Bai hŏk noh jing tơgŭm inh lăm trong yak năm tơ anăp, tơgŭm inh dơ̆ng kơjăp kơplah đei tơdrong pơlong lăng tih hloh kơ pă đei tơdrong jang.

Inh ưh kơ băt kơ buăl oei dơ̆ng ‘bơ̆t yơ lăm chăl arih buăl. Na inh lui ngeh minh tơdrong: kơplah buăl ‘blŏk dôm tơdrong mă Kră Yang pơm păng ư ang kơ Sư, na buăl gô rai ‘bôh kiơ̆ kơ Kră Yang, tơplih kơ ‘bôh anat anot ‘bơ̆t anăp. Yua kơ thoi noh, athei pơlong lăng ‘măn tơsĕt jơ phŭt tơchĕng lăng năr ‘nâu buăl gô ư ang kơ Kră Yang gah tơdrong kiơ. Na đơ̆ng rŏng kơ noh, athei đĭ jơhngơ̆m ư ang kơ Sư!

“Halêluya! Kơkuh bơnê bĕ kơ Kră Yang, yua kơ Sư ‘lơ̆ng. Tơdrong ‘mêm Sư oei oei ling-lang, Bu gơh roi dôm tơdrong jang mơsêh mơyang Kră Yang, bu kĕ roi dôm nơ̆r hơri bơnê kơ Sư?” (Hơriso 106:1-2).

Apĭnh đĭ đăng krao khan hơdai: Kră Yang ơi, kon băt ưh kơ đei tơdrong kiơ kơpal teh đak ‘nâu pơm kơ kon hơđơ̆ng lăm tôm tơdrong. Đei ‘bôh bơih mă lei oei hiong răm, ŭnh hnam kŭm oei pơchah răm, păng jơhngơ̆m kư̆m rai rơdu. Mă lei lăm tơpang ti ‘mêm mơnat Ih, kon đei jơhngơ̆m hiôk tôm tơdrong. Apinh bơtho tơ’bôh kơ kon băt lui gơnang kơ Ih hloh kơ gơnang kơ dôm tơmam lăm teh đak ‘nâu. Apinh pơklaih dôm tơdrong rơka lăm jơhngơ̆m kon, păng tơ‘blŏk kơ kon, gĭt kăl tơpă ‘noh jơ̆ kon oei lăm Ih – Tơ’ngla tih hloh, dŏng pơklaih kon păng chih tôm tơdrong hơ’mon ‘lơ̆ng ăn kơ chăl arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng buăl kư̆m đêl đei dan jơhngơ̆m kơdih tơ lăm tơdrong kiơ noh – tơdrong jang, ŭnh hnam, mŭk tơmam – na minh năr ayơ noh đei tơdrong blư truh hiong răm đĭ. Na kơplah dôm tơdrong pơchah răm, Kră Yang oei hơdai buăl tơnoh, na Sư krao buăl wă kơ mơn băt kơ tơdrong tơpă, gĭt kăl tơpă noh ưh kơ đơ̆ng lăm dôm tơdrong ‘bônh kơ pơchah răm, mă noh jơ̆ đơ̆ng lăm Kră Yang – Tơ’ngla ưh kơ đei layơ tơplih. Kơplah hnhoi lăng tơ Kră Yang, buăl gô ‘bôh dôm tơdrong ưh kơ đei layơ ngĭl ngŭl, tơgŭm buăl yak năm kơjăp đơ̆ng rim trong anat anot lăm chăl arih. Năr ‘nâu, athei lăng tơ Kră Yang păng ư ang kơ Sư!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.