Hauv lub neej, feem ntau tej yam uas zoo nkauj tshaj tsis yog thaum twg twb tau ua los ntawm tej kev zoo siab yooj yim, tiamsis feem ntau puav leej yog tau ua dhau los ntawm tej qhov cub sim siab? Ntau zaug, yam muaj nqis tshaj uas Vajtswv pub rau peb ho tau ua dhau los ntawm tej kua muag, tej xyoo peb tos, thiab tag nrho tej kev puas ntsoog cuag li txuas tsis tau ntawd. Nyob rau tej ntu txomnyem ntawd, peb tau cob kom dhau los zoo dua, muaj nqis dua tshaj txhua yam.

Hnub no, yog hnub 13/11/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kim Nanney dhau ntawm Zaj kawm QHUAS VAJTSWV NYOB HAUV TEJ KEV SIM SIAB.

“Kuv qhuas Vajtswv, rau qhov nws tsis tau muab kuv tej lus thov tso tseg, thiab tsis tau rho nws txojkev hlub uas tsis paub kawg ntawm kuv mus.” (Ntawv Nkauj 66:20).

Thaum kuv sib yuav, lub nplaib nyiaj ntawm kuv txhais tes tsis yog tsuas yog lub cim rau kuv tus txijnkawm wb txoj kev hlub xwb, tiamsis tseem yog qhov pov thawj rau cov lus thov Vajtswv tau Vajtswv teb. Txhua zaug kuv muab lub nplhaib ntawd qhuas – txawm yog tsuas yog ib daim duab xa rau kuv tus ntxhais xeeb lossis rau kuv tus phooj ywg xwb – kuv tsis yog tsuas faib txoj kev zoo siab xwb.

Kuv tab tom ua tim khawv tias: “Nej cia li saib tej uas Vajtswv twb ua tas los lawm, nws ua tej haujlwm uas zoo kawg nkaus rau sawvdaws porn” (Ntawv Nkauj 66:5).

Ntawv Nkauj 66 zoo li ib zaj nkauj nrov voob nkaus kuv rooj tshoob. Tiamsis yim nyeem, kuv yim raug sim siab. Tshooj Ntawv Nkauj no cia li coj kuv tig mus rau lwm seem. Tus sau tsis yog nqua hu kom tag nrho lub ntiajteb qhuas Vajtswv thiab “ua rau kom lub suab qhuas Vajtswv ntawd nrov mus rau txhua qhov” (Ntawv Nkauj 66:8). Tiamsis tseem tig rov qab mus saib tej kev txomnyem ntawd zoo li qhov uas peb qhuas Vajtswv.

“Vajtswv, koj tau sim peb siab; yog li ntawd, koj thiaj sim peb ib yam li nchuav nyiaj hauv qhovcub.” (Ntawv Nkauj 66:10).

Yuav ua li cas kuv thiaj yuav ua Vajtswv tsaug tag siab vim txoj kev xyaum no mob heev, yeej tsis muaj ib qhov cuav twg? Thaum xav txog qhov no, kuv rov qab tig saib lub nplhaib nawm tes – tus cwjpwm uas kuv ib txwm nyiam ua. Nyob rau lub sijhawm ntawd, muaj ib yam ab tsi twg tau hloov pauv kuv lub siab. Tej zaug yog lub nplhaib nyiaj no pab kuv nkag siab ntxiv.

Kuv pib mus nrhiav txoj kev uas thaum ub lawv hlawv nyiaj dawb los. Nyiaj dawb ua ntej yuav tau muab los sim, tas muab zom mos mos, tov xyaw thee, muab rauv kom kub, cais cov tsis huv, txog rau thaum uas ci pom tus kws nchuav. Qhov no tsis yog tsuas txhais rau nqe Vajluskub no, tiamsis tseem nthuav tawm tej uas kuv ntsib dhau hauv lub neej txij nkawm. Thaum kawm txog nyiaj txiag, kuv pom txog Vajtswv – yog ib tug kws nchuav kub zoo (Malakis 3:3) – tau nchuav kuv lub siab npaj rau kuv lub neej txij nkawm kom dawbhuv. Thiab ntawd yog qhov uas kuv tas siab qhuas Vajtswv, txawm yog thaum lub neej kub lug ib yam li hluav taws.

Puas tau muaj zaum twg koj taij thov Vajtswv, tiamsis yeej raug muab tsuj, tsis paub ua cas, mob? Kuv ntsib dhau zoo li ntawd. Kuv thov Vajtswv rau kuv txoj kev sib raug zoo, nrhiav Vajtswv lub siab nyiam dhau ntawm Vajtswv tej lus. Thaum kuv ntseeg tias Vajtswv twb ua rau kuv “pom tus ntawd ib feem lawm” ces nws yuav tso tus ntawd tseg. kuv puas tshuaj. Tiamsis tig rov qab mus saib, kuv txoj kev mob ntawd ua rau kuv lub siab puas ntsoog no cia nws nkag los rau txoj kev sim, zoo li cov nyiaj dawb raug muab zom mos mos ua ntej yuav coj mus hlawv.

Tus kws nchuav kub thaum ub nws yuav nchuav mus txog thaum tej yam tsis huv tshwm tuaj, tas raug muab cais tawm. Cov nyiaj dawbhuv no muab hlawv mus txog thaum uas siv los ntsia pom tus kws nchuav.

Vajtswv kuj ua ib yam li ntawd hauv kuv lub siab. Kuv pheej saib xov tooj, tos xa xov, tos tus neeg ntawd hais ib lo lus txhawb kuv zog. tas muaj ib hnub, kuv pom tias kuv nrhiav kev txhawb zog ntawm xov tooj ntau dua li ntawm Vajtswv. Qhov no zoo li tej tsis huv thaum hlawv nyiaj nws tshwm tuaj: kuv muab txoj kev hlub txijnkawm pauv los ua ib tug mlom.

Kuv lees txim. Ib qhov zuj zus, kuv cia Vaj Ntsujplig hlawv kuv, kub tej kev phem kev qias, cia Vajtswv dhau los ua kev hlub hauv kuv. Thaum qhov no tshwm tuaj, kuv thiaj yuav hlub tau tus neeg uas yus hlub tiag tiag. Thaum Vajtswv coj wb rov qab los ua ke, lub siab thiaj nthuav tawm tus cwjpwm ua siab ntev thiab siab zoo ntawm tus Tswv tsim ib puas tsav yam.

Paub tias, kuv lub siab yeej tseem tsis tau zoo. Tiamsis kuv kawm ntxiv ib qhov los ntawm txoj kev nchuav nyiaj: nws mos muag, yooj yim ntswj. Nws kuj muaj cuab kav coj rov qab mus hlawv dua, ua dua raws li yam yus nyiam. Yog li, yog tias koj lub neej txijnkawm tab tom puas tshuaj, koj txoj kev hlub tab tom raug muab hlawv, lossis koj lub neej nyob ib leeg nws tws kev heev, ces cia lub nplhaib ntawd ntuas koj tias: Tus kws nchuav nyiaj zoo tab tom hlawv koj kom ci Vajtswv tus yamntxwv. Thiab Vajtswv muaj cuab kav kho koj dua tshiab, ua rau koj muaj lub siab tshiab zaum no mus rau lwm zaus. Cia li qhuas Vajtswv nyob hauv cov taws cig kub, ntseeg tias Vajtswv tab tom ntxuav peb lub siab kom nthuav tawm Vajtswv txoj kev hlub dawbhuv.

Los ntawm txoj kev ntseeg, peb yuav tau hais tawm nqe no zoo li ib lo lus pov thawj ntawm ib lub neej tau hloov pauv: “Kuv qhuas Vajtswv, rau qhov nws tsis tau muab kuv tej lus thov tso tseg, thiab tsis tau rho nws txojkev hlub uas tsis paub kawg ntawm kuv mus.” (Ntawv Nkauj 66:20). Amees!

Thov caw nrog kuv peb thov Vajtswv ua ke: Tus Tswv, thov qhia kom kuv paub ntseeg koj nyob hauv tus nplaim taws sim ntawd. Thov hlawv kom cig tej yam uas tsis yog koj li hauv kuv, thiab hloov kuv lub siab kom dhau los mos muag, zoo siab hlo hlub thiab ua lub neej raws li Vajtswv lub siab nyiam. Txawm yog nyob hauv kev zoo siab lossis sim siab, kuv cia siab tias yuav tau nthuav tawm Vajtswv txoj kev hlub dawbhuv thiab qhuas Vajtswv lub npe mus li. Kuv thov hauv Tswv Yexus Khetos lub npe. Amees.

Cov kwv tij txhua tus, yog koj tab tom tsis paub ua dabtsi ntawm tus nplaim taws tab tom cig, nco ntsoov tias: taws tsis yog los nrhuav tshem, tiamsis tseg los cob peb lub neej kom dhau los muaj nqis dua. Yim raug cob dhau ntawm tej kev sim siab, koj lub siab yuav yim dhau los dawbhuv nthuav tawm tus tsim ib puas tsav yam qhov pom kev. Thiab thaum koj tig rov qab mus saib, koj yuav tsis cia qhov ntawd ua lub qhov txhab qub, tiamsis ntawm koj lub qhov muag yog ib lub siab tshiab, mos muag dua, ci dua, nthuav tawm meej meej Vajtswv txoj kev hlub uas tsis hloov pauv.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.