“Yua kơ kiơ?”- nơ̆r jet ‘noh mă khan hmă đĕch mă lei tă kơ gĭt dêh đei tơdrong trăp lăm rim kơ chăl tơdrong arih lu bơ̆n. Đơ̆ng kơplah oei hơ’lơ̆p iĕ, lu bơ̆n đei ưh kơ pơdơh jet bơngai ‘lŏ khan: “Yua kơ kiơ?” Păng rŏ lăng truh dang ei, kơplah tơ’bơ̆p hăm dôm tơdrong ơh sơ’ngon, ưh pă hơmĕng, dah kơplah tôm tơdrong ưh kơ đei truh thoi kơdih wă, nơ̆r jet ‘noh oei đei thar ‘blŏk lăm jơhngơ̆m lu bơ̆n: “Kră Yang ơi, yua kơ kiơ?” Rŏ lăng bu lăm lu bơ̆n kŭm đơ̆ng đêl hlôi tơ’bơ̆p dôm jơ năr thoi noh: ưh kơ hlôh, hiơ̆k tơtăm, păng rơhing mĭnh nơ̆r tơl tơwih đơ̆ng kơdih ‘Bok Kei-Dei.

Năr ‘nâu, ‘năr 12/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Joy Brunson kơ̆l ‘bai YUA KƠ KIƠ, KRĂ YANG ƠI?

“Kră Yang Tơ’ngla ‘lơ̆ng rơgoh đe Isơrael Tơ’ngla Pơjing khan thoi âu: “Yua kơ lu iĕm jet Inh, gah tơdrong gô truh kơ kon pơlei Inh, gah tơdrong jang đơ̆ng ti Inh. Inh bơih Tơ’ngla pơjing teh đak păng pơjing kon bơngai oei kơpal teh. Đơ̆ng ti Inh kơdih pơm, bơlang lu plĕnh păng pơjing lu sơnglŏng.” (Êsai 45:11-12)

“Yua kơ kiơ?”

Lu bơ̆n dan nơ̆r jet ‘noh kơplah ‘nao pơjuăt yak nơnăm- păng rŏ lăng ‘noh kŭm jơ̆ nơ̆r jet lu bơ̆n ưh kơ layơ pơdơh tơlĕch lăm đĭ chăl arih bơ̆n. Inh ‘blŏk đei kơplah inh ngôi pơchơt hăm mĭnh ‘nu hơ’lơ̆p pơjuăt pơma, mă khan tơdrong kiơ truh lei ‘bơ̆r sư kŭm ling lang pơlơ̆k dơ̆ng mĭnh nơ̆r: “Yua kơ kiơ?” Dôm nơ̆r athei pơkă, dôm tơdrong pơm tơ’bôh đei tơl tơwih hăm tơdrong apĭnh păng ưh kơ drơ̆ng tŏ sĕt đơ̆ng sư. “Ưh kơ pơm thoi noh.” “Yua kơ kiơ?”

“Truh kơ jơ hơmet bơih.” “Yua kơ kiơ?”

Đơ̆ng rŏng kơ noh, inh mơn đei ‘bôh ưh kơ hiôk yua kơ đei tơl hơnơ̆ng, nhen thoi hil blĕk. Trŏ kơ jơ ‘noh, inh mơn đei Nơ̆r Kră Yang pơ’lơ̆ng tơ’blŏk lăm jơhngơ̆m: “Kon ‘mêm, noh trŏ jơ̆ kon ‘noh.” Mơn lăm jơhngơ̆m ‘noh pơm kơ inh thĕng hreh.
Sơ̆p Hla Bơar Nơ̆r ‘Bok Kei-Dei chih: “Kră Yang Tơ’ngla ‘lơ̆ng rơgoh đe Isơrael Tơ’ngla Pơjing khan thoi âu: “Yua kơ lu iĕm jet Inh, gah tơdrong gô truh kơ kon pơlei Inh, gah tơdrong jang đơ̆ng ti Inh. Inh bơih Tơ’ngla pơjing teh đak păng pơjing kon bơngai oei kơpal teh. Đơ̆ng ti Inh kơdih pơm, bơlang lu plĕnh păng pơjing lu sơnglŏng.” (Êsai 45:11-12).

Đei layơ buăl tơ’bơ̆p lăm anih pơmat tat, dĭng mah truh đei pơma ôr: “Kră Yang ơi, yua kơ kiơ?” Inh lei đei lơ wơ̆t thoi noh. Phŏ kơplah inh đei pơma khan kơdih băt tơdrong kiơ jơ̆ ‘lơ̆ng hloh, trong ayơ trŏ kơ năm, păng trong ayơ gô đei yua. Inh kŭm đei pơlung kơdih akâu khan kơdih oei bơ̆jang kiơ̆ kơ Kră Yang wă, lăm kơplah mă tơpă inh oei adrin tơgar tơdrong pơgơ̆r chăl arih kơdih.

Kơplah oei hŏk đăi hŏk, inh đơ̆ng đêl đei pơtơm mĭnh tơdrong pơgơ̆p mă khan lăm đon tơchĕng inh băt hơđăl khan Kră Yang ưh kơ lăp đon. Mă lei thoi tơdrong juăt, inh tơchĕng kơdih băt hơđăl hloh dơ̆ng. Inh tơblah hăm Kră Yang, hơlĕnh kơdih akâu khan ‘nâu tơpă trŏ jơ̆ tơdrong Sư wă. Bơnê kơ Kră Yang yua kơ Ih ưh kơ ăn kơ inh yak kiơ̆ tơdrong gơh hơgei kơ’bah đơ̆ng kơdih akâu. Inh ưh kơ đei roi hơđăl, mă lei Kră Yang đei dŏng pơklaih inh hlôi đơ̆ng tơdrong pơgơ̆p ‘noh adrol kơ ưh pă tam. Lei na lơ khei hlôi, inh oei ling lang jet: “Kră Yang ơi, yua kơ kiơ? Yua kơ kiơ Ih đei iŏk lê̆ tơdrong ‘nâu đơ̆ng kon?

Mă lei dang ei lăng đêl, inh ‘bôh hơđăl tơpă: ‘noh trŏ jơ̆ tơpang ti bơwei păng ‘mêm mơnat đơ̆ng Kră Yang. Dah inh nŏng kơ wă dơ̆ng ‘bơ̆t doh, tơpă inh đei achăng chăl arih ‘lơ̆ng rŏ mă Sư đei ‘măn ăn bơih kơ inh.

Kŭm ‘bônh kơ hlôh đĕch dah lu bơ̆n ‘maih dan nơ̆r jet gah dôm tơdrong kiơ kơdih ưh kơ hlôh. Dah ưh kơ lăng ‘bôh đĭ rup, lu bơ̆n ngăl hiơt kơ ‘Bok Kei-Dei tih hloh păng mơsêh mơyang thoi yơ. Mă lei Sư jơ̆ ‘Bă ‘lơ̆ng tơpăt, păng Sư gô ưh kơ layơ pơm pơrăm lu bơ̆n ôh.

Inh hơ iă nơ̆r ‘Bok Kei-Dei lăm Êsai 45:15, “Sĭt tơpă Ih Kră Yang ‘Bok Kei-Dei ôn akâu Ih, Ơ Kră Yang ‘Bok Kei-Dei Ih, jơ̆ Kră Yang dŏng pơklaih đe Isơrael.”

Buăl ơi, Kră Yang ling lang lăng ‘bôh buăl. Sư băt hơđăl kơ buăl, băt hơđăl rim kơ anih buăl oei yak hlôi. Năr ‘nâu, inh ‘maih pơlung buăl athei lăng đêl chăl arih kơdih, ‘blŏk đêl dôm wơ̆t nhen thoi ưh pă hơmĕng, dĭng truh kơ buăl ưh kơ gơh găn kơdih pơma khan: “Yua kơ kiơ Kră Yang ơi?” Na athei tơ’blŏk kơ jơhngơ̆m kơdih khan Kră Yang đei dŏng pơklaih buăl thoi yơ păng yua dôm tơdrong ‘noh pơm pơ yua kơ buăl thoi yơ. Tŏk bŏk lăm tơdrong pơlong lăng, lu bơ̆n ‘bônh dêh ngĭl ngŭl tơdrong bơ̆jang đơ̆ng Kră Yang, jet kơdih Sư oei ‘bơ̆t yơ tŏk bŏk lơ tơdrong truh jum dăr ‘nâu. Mă lei trŏ kơ jơ ‘noh, athei tơ’blŏk kơdih akâu jăn gah dôm tơdrong ‘lơ̆ng mă Sư đei pơm lăm chăl arih buăl.

Ưh kơ đei mĭnh jơ phŭt ayơ mă Kră Yang ưh kơ ‘lơ̆ng rŏ hloi. Păng buăl ơi, gô ưh kơ layơ đei tơdrong ‘noh truh. Năr ‘nâu, hơpơi kơ rim ‘nu lu bơ̆n kơjăp lăm rim kơ tơdrong tơpă ‘noh.

“Ơ Kră Yang, ‘Bok Kei-Dei Tih Hloh, apinh Ih tơiung lu nhôn dơ̆ng. Păng pơdah bĕ muh măt Ih wă kơ lu nhôn gơh klaih.” (Hơriso 80:19)

Apĭnh đĭ đăng krao khan hơdai: Kơkuh kơ ‘Bă gơh găt, lơ wơ̆t kon ưh kơ hlôh yua kơ kiơ dôm tơdrong anat anot tă kơ đei truh lăm chăl arih kon. Kon ngăl đei nơ̆r jet, ‘bônh dêh kơ jô̆ jŏk, păng lơ wơ̆t kơplah kon nŏng kơ wă yak kiơ̆ kơdih kon. Mă lei năr ‘nâu, kon rơih lui gơnang anih Ih. Apinh tơ’blŏk kơ kon khan ‘Bă ling lang ‘lơ̆ng tơpăt păng ‘Bă pơm tôm tơdrong ‘noh yua kơ ‘mêm mơnat păng wă bơwei kon. Apinh ăn kơ kon jơhngơ̆m kơjăp rôp ti Ih, mă khan kơplah kon ưh tim mă ‘bôh hơđăl dôm tơdrong. Bơnê kơ ‘Bă yua kơ ưh tim mă đei năr ayơ Ih ataih dah weh achăng kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng năr ‘nâu buăl oei hơwŏl chă ưh tim mă ‘bôh nơ̆r tơl. Mă lei buăl ơi, mă khan lu bơ̆n ưh tim mă hlôh, lei oei đei mĭnh tơdrong tơpă: ‘Bok kei-Dei jơ̆ ‘Bă iơ̆m dim kơ lu bơ̆n, tơdrong ‘lơ̆ng tơpăt đơ̆ng Sư ưh kơ đei layơ tơplih, păng Sư ling lang ‘mêm mơnat kơ lu bơ̆n dĭng truh tơ ning mônh. Lăm kơplah dang ei, buăl gơh pơdơh, dui jơhngơ̆m mă jrŭ păng lui tơpă khan ‘Bă kơpal plĕnh oei rôp kơjăp ti buăl. Athei ăn tơdrong lui ngeh ‘noh chông buăl yak pơtrơp, dĭng truh năr buăl gơh lăng đêl păng hiĕk pơma khan: “A, tă kơ kon ưh kơ kăl kơ hlôh “Yua kơ kiơ”. Yua kơ ‘Bă mă ‘mêm kơ kon trŏ kơ đei chĕp bơwei tôm nơ̆r tơl bơih!”

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.