Lăm tơdrong arih, ngăl ‘bôh dôm tơmam ‘lơ̆ng rŏ ưh kơ sĭ đơ̆ng lăm jơhngơ̆m pơm hiôk ‘bônh đĕch, mă tơpă đĭ đăng đơ̆ng hơjơ̆m lăm ŭnh pơlong lăng? Kư̆m đei, tơdrong gĭt kăl dêh Kră Yang ăn kơ lu bơ̆n đei jing đơ̆ng đak măt, dôm kơ sơnăm chang gô, na kư̆m hăm pơchah răm lăng nhen thoi pă gơh pơklep dơ̆ng bơih. Đơ̆ng lăm kơplah chhŭr nuih noh, lu bơ̆n đei pơm hơmet jing ‘lơ̆ng rŏ, gĭt kăl hloh.

Năr ‘nâu, ‘năr 13/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Kim Nanney kơ̆l ‘bai Ư- ANG KƠ KRĂ YANG KƠPLAH PƠLONG LĂNG.

“Kơkuh bơnê kơ Kră Yang ‘Bok Kei-Dei, yua kơ sư ưh kơ đei sơngah kơ nơ̆r inh krao khan. Kŭm ưh kơ đei lê̆ iŏk tơdrong Sư ‘mêm kơ inh.” (Hơriso 66:20)

Kơplah inh sơkơ̆t, đei chơ khiĕn hăm tơmo jơmŏng tơ hơnglâu ti ưh kơ sĭ wă pơm tơ’bôh jơhngơ̆m ‘mêm kơ bơngai tơdăm wă jing klo inh, mă pơm tơ’bôh tơdrong krao khan đei đơ̆ng Kră Yang tơl ăn. Dôm wơ̆t inh tơ’bôh chơ khiĕn- mă khan đơ̆ng lăm rup ăn kơ sâu drŏ kăn inh dah buăl juăt inh – ưh kơ sĭ inh klah song jơhngơ̆m chơt hiôk đĕch. Noh inh oei pơm kơdranh: Năm lăng, bĕ dôm tơdrong jang Kră Yang ‘Bok Kei-Dei: “Tơdrong jang Sư pơm kơ kon bơngai trŏ hli yom tơpă.” (Hơriso 66:5)

Hơriso 66 nhen thoi preh brŏ ‘bai hơri hiôk lăm kơplah năr phĕt sơkơ̆t inh. Na rai đŏk, inh rai đei tơdrong pơlong lăng. Hơriso ‘nâu đei tơplih tơklah trong. Bơngai chih ưh kơ sĭ pơma krao bơngai lăm teh đak ư ang kơ ‘Bok Kei-Dei păng “pơm kơ Kră Yang ư ang jơ̆p anih” (Hơriso 66:8), mă kư̆m lăng ming dôm tơdrong anat anot na pơyơ̆r bơnê ư ang.

“Yua kơ, ơ Kră Yang ‘Bok Kei-Dei Ih pơlong lăng lu nhôn thoi rơ̆ Hu.” (Hơriso 66:10)

Pơm thoi yơ wă kơ inh đei jơhngơ̆m bơnê kơ Kră Yang yua kơ tơdrong pơjuăt chhŭr nuih, mă ưh kơ đei pơm ngôi đĕch? Kơplah tơchĕng pơwao tơdrong noh, inh lăng tơ chơ khiĕn tơ hơnglâu ti – inh juăt kơ pơm thoi noh. Kơplah jơ noh, đei tơdrong kiơ noh tơplih jơhngơ̆m inh. rŏ lăng chơ khiĕn păng hu ‘nâu gô tơgŭm inh rai hlôh hloh.

Inh chơchă wă kơ hlôh kră sơ̆ lu sư rơ̆ jôr hu. Hơdrol hloh hu đei pơlong lăng, na ot pơhĕch, lŭk hăm bơlơ̆k, soh păng ŭnh tŏ, iŏk lê̆ lu ‘bruih ‘brăm kơnê̆, truh tơ sư hơdah lăng ‘bôh ngôi bơngai pơm. Dôm kơ pơm noh ưh kơ sĭ wă tơblang nơ̆r ‘Bok Kei-Dei ‘nâu, mă tơ’bôh đêl hlôi mơn kơ sơkơ̆t đơ̆ng inh. Kơplah hŏk pơrăm gah jôr hu, inh đei mơn ‘Bok Kei-Dei – jơ̆ Bơngai jôr hơjơ̆m tih hloh (Malachi 3:3)- đei jôr jơhngơ̆m inh wă hơmet hơdrol đei ŭnh om ‘lơ̆ng rơgoh. Na noh bơih tơm kơ inh đei jơhngơ̆m ư ang kơ Kră Yang, mă kơplah chăl arih tơtŏ thoi kơ ŭnh.

Hăm đei la yơ buăl krao khan hăm Kră Yang, na oei đei pơ̆k huŏng, ơh sơ’ngon, chhŭr nuih? Inh kư̆m đêl hlôi mơn đei thoi noh. Inh krao khan kơ tơdrong pơgơ̆p hơdai, chă nơ̆r tơl đơ̆ng Nơ̆r Kră Yang. Kơplah inh lui ngeh Kră Yang ăn kơ inh ‘bôh “bơngai noh gô jing klo inh” na ‘nhŏng noh sơlah tơklah đơ̆ng inh. Inh ơh sơ’ngon. Mă lei lăng tơrŏng, inh ‘bôh đơ̆ng chhŭr nuih noh pơm kơ jơhngơ̆m pơchah pơih sơng iŏk tơdrong pơlong lăng, nhen thoi klơ̆m hu tơlăm kơ măi wă pơ hĕch sư na jôr păng ŭnh.

Kră Yang kư̆m đei bơ̆jang lăm inh thoi noh. Inh đei hiơ̆k bơngơ̆t lăng điê̆n thoăi, răp gô gơih kơthơ, hơpơi kơ bơngai noh pơma minh nơ̆r pơlung. Na đei minh năr, inh đei mơn kơdih kăl kơ đei pơlung đơ̆ng lăm điê̆n thoăi hloh kơ đơ̆ng Kră Yang. Noh jơ̆ thoi kơ ‘bruih đơ̆ng: inh pơm kơ jơhngơ̆m hưch wă jing thoi kơ rup yang.

Inh tơbral. Đơ̆ng rim tơdrong kơnê̆, inh dan ăn kơ Yang Bơhngol ‘Lơ̆ng soh ŭnh, soh tơdrong ‘mê̆ ‘mach, wă kơ ‘Bok Kei-Dei wơ̆t bơ̆jang hăm tơdrong ‘mêm thoi kơ đơ̆ng blŭng a lăm inh. Na kơplah tơdrong noh truh, inh đei hưch wă kơ bơngai inh hưch tôm hloh. Kơplah Kră Yang pơgơ̆p nhi thoi kơ blŭng a, inh đei tơ’bôh lơ hloh jơhngơ̆m chơ̆n păng ‘mêm đơ̆ng Kră Yang.

Yua kơ thoi noh, jơhngơ̆m inh tam mă keh đang ôh. Na inh hŏk thim minh tơdrong đơ̆ng jôr hu: sư ling lang kơ rơmuăn, ‘bơ̆ ‘bônh. Na kư̆m gơh rơ̆ ming dơ̆ng, jôr ming dơ̆ng, ‘bơ̆ hơmet ming dơ̆ng. Yua kơ thoi noh, tơdah ŭnh hnam buăl nhen wă pơchah pơchek, jơhngơ̆m hưch wă buăl oei ‘buh soh, dah tơdrong arih oei minh drô̆ đei trăp trĭn, na lăng tơ chơ khiĕn noh tơ’blŏk kơbuăl thoi âu: Bơngai jôr tih hloh noh oei jôr buăl wă tơ’bôh Sư lăm buăl. Na Sư gô pơklaih, ăn kơ buăl đei jơhngơ̆m ‘nao đơ̆ng năr ‘nâu truh tơ năr nai. Athei ư ang kơ Sư kơplah ŭnh oei ngŭr, lui ngeh kơ Sư oei jôr jơhngơ̆m lu bơ̆n wă tơ’bôh tơdrong ‘mêm ‘lơ̆ng rơgoh đơ̆ng Sư.

Yua kơ đơ̆ng đon lui, lu bơ̆n athei roi tơbăt nơ̆r ‘nâu nhen thoi nơ̆r kơdranh kơ tơdrong arih đei tơplih: “Kơkuh bơnê kơ Kră Yang ‘Bok Kei-Dei, yua kơ Sư ưh kơ đei sơngah kơ nơ̆r inh krao khan. Kŭm ưh kơ đei lê̆ iŏk tơdrong Sư ‘mêm kơ inh.” (Hơriso 66:20). A-men.

Apĭnh đĭ đăng krao khan hơdai: Kơkuh kơ Kră Yang, apinh bơtho kon băt lui gơnang kơ Ih lăm kơplah đei ŭnh oei jôr kon. Apinh soh dôm tơdrong ưh kơ gah Ih lăm kon, păng ‘bơ̆ hơmet jơhngơ̆m kon jing rơmuăn, đei jơhngơ̆m ‘mêm mơnat păng arih kiơ̆ kơ Ih. Mă khan lăm hiôk chơt dah đei tơdrong pơlong lăng, kon hơpơi kơ đei pơchrang jơhngơ̆m ‘mêm mơnat ‘lơ̆ng rơgoh đơ̆ng Ih, păng hơri ư ang anăn Ih khŏm khŏm. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơdah buăl oei đei jĭ kơplah ŭnh oei soh jôr, athei ‘blŏk thoi âu: ŭnh truh ưh kơ wă pơrăm, mă wă jôr hơmet chăl arih buăl jing gĭt kăl hloh. Rai jôr hơjơ̆m đơ̆ng pơmat tat pơlong lăng, jơhngơ̆m buăl gô jing ‘lơ̆ng rơgoh wă pơdah tơdrong hơdah đơ̆ng Kră Yang. Na kơplah buăl hoe lăng tơrŏng, gô pă ‘bôh dôm kơ rơka so, ‘bơ̆t anăp buăl jơ̆ jơhngơ̆m ‘nao, rơmuăn hloh, hơdah hơdong hloh, pơdah rơđah hloh gah tơdrong ‘mêm ưh kơ đei layơ tơplih đơ̆ng Kră Yang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.