Buăl đei pơm kơdranh gah Kră Yang layơ? Rŏ lăng ‘noh jơ̆ kơplah đei proh hơmet hơđăl, hăm mĭnh ‘bai hơmet lê̆ bơih ‘bĕnh tơdrong pơdrơ̆ng iŏk? Thoi noh dah Kră Yang blư thar ba mĭnh jơ năr mă buăl ưh tim mă tam hơmet lê̆ lei thoi yơ? Lei buăl hăm pơ̆n nuih păng pơ̆n ră roi gah tơdrong chang hơmĕng đơ̆ng kơdih ưh? Kră Yang krao lu bơ̆n kral kơchăng, tơ’blŏk khan dôm kơ plei nuih đei rơhing tơdrong chang hơmĕng tơpă, păng lu bơ̆n đei krao wơ̆n jing bơngai chĕp ba hơdah ŭnh tơdrong tơpăt truh tơ bơngai nai, mă khan lăm anih hiôk ‘lơ̆ng dah anih pơmat tat.

Năr ‘nâu, ‘năr 14/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih kơ̆l ‘bai YAK NĂM HLOI BƠTHO TƠDRONG ‘NAO ‘LƠ̆NG.

“Tơdrong ‘nao ‘lơ̆ng Yêsu Krist kăl tơpă na inh bơtho đe ưh kơ mơlâu.” (Rôm 1:16-17)

Minh gơsơ̆ Năr Tơpơh hơđơ̆ng ei, kơplah inh oei dơ̆ng pơrĕng lăm anih tĕch tơmam tih, đei minh ‘nu bơngai drŏnglo năm jê̆. Kơplah ‘noh inh ưh kơ đei hiơ̆k ôh, nŏng kơ ăn jơhngơ̆m mơ̆ng kiơ̆ kơ re brŏ reh so đơ̆ng chăl 90 oei re tơ lăm loa. Blư sư thar hrĕch lê̆ tơdrong tơchĕng inh hăm mĭnh nơ̆r jet hlĭch tơpă:

“Tơdrong kiơ ba truh kơ ih tơdrong arih păng đei kăl tơm lăm chăl arih?”

Sư pơma nhen thoi măr nhi jơ̆ ‘bar ‘nu buăl juăt đunh năr hơoei huch kaphê pơma dơnuh, ưh kơ trŏ ‘bar ‘nu bơngai ưh kơ juăt băl ala ŭnh tơ anih tĕch tơmam tih pơchrang mơnhal păng re kơmăy jô̆ jên hrơ̆ng hreng.

Inh mơmrơ̆ng tŏ sĕt. Inh pơma arăk dôm nơ̆r. Inh tơchĕng kơdih đei pơma tơdrong kiơ ‘noh gah đon lui anih ‘Bok Dŏng Pơklaih Yang Yêsu Krist. Mă lei kơplah jơ ‘noh mơlŏu tơpă, hăt hot. ‘Bok ‘noh hiĕk păng tơl khan sư ưh tim mă đei kơtơ̆ng gah Kră Yang Yêsu, na roi tơ’bôh mĭnh tơdrong kơdih wă rŏ lăng nhen thoi đei hơmet lê̆ bơih, ayơ jơ̆ tơdrong pran đơ̆ng teh đak, ayơ khan jơ̆ arih ‘lơ̆ng.
Lei na tơdrong pơma dơnuh tôch.

Mă lei tơdrong ưh kơ hiôk lei hoi kơ đei.

Wă truh jĭt sơnăm hlôi, inh oei ngăl ‘blŏk dơ̆ng jơ phŭt ‘noh. Sư oei pơm kơ jơhngơ̆m inh ‘blŏk chhưu. Inh ‘blŏk kơ muh măt, ‘blŏk kơ nơ̆r sư pơma, păng jet kơdih: Lei dôm tơdrong gô thoi yơ, dah kơplah ‘noh inh pơ̆n tơpă pơih jơhngơ̆m ră roi tơdrong chang hơmĕng đơ̆ng kơdih?

Nơ̆r ‘bok Pôl lăm Rôm 1:16-17 re jơwa tơ’blŏk kơ inh:

“Tơdrong ‘nao ‘lơ̆ng Yêsu Krist kăl tơpă na inh bơtho đe ưh kơ mơlâu. Tơdrong noh tơbăt ăn kơ bơ̆n ‘Bok Kei-Dei mơsêh mơyang tơpă pơklaih bơ̆n đơ̆ng tơdrong yoch na ăn kơ bơ̆n oei hiôk hăm Sư. Thoi noh dôm lu bơngai lui kơ tơdrong noh ‘Bok Kei-Dei pơklaih ngăl. Lu bơngai Juđê lui hơdrol, đơ̆ng noh lu bơngai nai lui. Yua kơ bơ̆n lui kơ tơdrong ‘nao ‘lơ̆ng Yêsu Krist, na ‘Bok Kei-Dei jô̆ bơ̆n jing bơngai ‘lơ̆ng hăm Sư. Sư jô̆ bơ̆n thoi noh yua kơ minh tơdrong bơ̆n lui kơ Kon Sư đĕch. ‘Noh kư̆m thoi đe roi lăm sơ̆p hla bơar Sư sơ̆ thoi âu: “Bơngai bu lui kơ ‘Bok Kei-Dei, ‘Bok Kei-Dei jô̆ sư bơngai ‘lơ̆ng tơpăt ăn kơ sư arih ling-lang.”
Tơdrong ‘Nao ‘Lơ̆ng ưh kơ sĭ jơ̆ mĭnh tơdrong lui kơdih kâu; ‘noh trŏ jơ̆ tơdrong mơsêh mơyang đơ̆ng ‘Bok Kei-Dei ba truh tơdrong dŏng pơklaih. ‘Noh ưh kơ sĭ jơ̆ mĭnh tơdrong tơm khŭl lui, mă jơ̆ tơdrong dŏng pơklaih kơ kon bơngai. ‘Noh ưh kơ sĭ jơ̆ tơdrong pơlung kơdih kơ rim ‘nu bơngai, mă jơ̆ tơdrong chang hơmĕng lăp mĭnh ‘nâu đĕch oei đei kơ đĭ đăng teh đak ‘nâu.

Dah ‘blŏk đêl jơ ‘noh, inh ưh pă ‘bôh mơlŏu dơ̆ng bơih, na ‘bĕnh blai mĭnh tơdrong pơdrơ̆ng đon lui ‘nao, pơtrŭt inh yak năm pran kơtang hloh. Kơplah jơ ‘noh tơ’bôh mĭnh tơdrong jrŭ să: inh ‘maih wă kơ đĭ đăng bơngai băt gah ‘Bok Dŏng Pơklaih Yang Yêsu, ưh kơ trŏ yua “inh kăl kơ đei pơma”, mă yua kơ đơ̆ng trŏ kơ Sư jơ̆ đĭ đăng tôm tơdrong. Sư jơ̆ tơdrong arih, jơ̆ tơdrong ‘mêm mơnat, jơ̆ tơdrong hiôk hian. Inh wă kơ bơngai nai kŭm gơh băt tơdrong inh băt- khan Kră Yang Yêsu gơh dŏng pơklaih dôm kơ chăl arih pơchah, pơm rơngơp dôm kơ jơhngơ̆m ưh kơ hơđơ̆ng, păng ‘măn ăn tơdrong arih ling lang.

Lăm II Timôthê 4:2, Nơ̆r ‘Bok Kei-Dei athei lu bơ̆n athei “bơtho tơdrong Sư ling-lang; mă đe mơ̆ng mă đe ưh, ih kư̆ bơtho đĕch.” Kơplah jơ lăm anih mơdro tơmam tih năr ‘noh ưh kơ đei tơproh ‘lơ̆ng, kŭm ưh kơ đei hơmet lê̆ adrol, mă lei tă kơ đei tơm kăl tơpă. Rŏ lăng buăl kŭm đơ̆ng đei mĭnh jơ năr thoi noh- minh tơdrong ‘blŏk oei druh kiơ̆ buăl ling lang. Ưh kơ trŏ wă pơm kơ buăl hli tơtăm, mă wă pơtrŭt buăl, tơ’blŏk kơ buăl ‘blŏk khan teh đak ‘nâu kăl kơ ‘Bok Dŏng Pơklaih Yang Yêsu truh dang yơ, păng jơhngơ̆m buăl rơhing kơ đĭ đăng bơngai kŭm gơh tơ ‘bơ̆p Sư thoi yơ.

Mă ưh kơ gơh wơ̆t lăi tơ rŏng dơ̆ng, mă lei lu bơ̆n gơh yak tơ anăp lăm tơdrong pơm hloi, jơhngơ̆m hiôk păng ưh kơ đei mơlŏu!

Hơpơi kơ lu bơ̆n jơ̆ dôm lu bơngai roi tơbăt anăn ‘Bok Dŏng Pơklaih Yang Yêsu hăm tơdrong pơ̆n nuih, ‘bĕnh đon lui păng tơdrong ‘mêm mơnat. Kơplah ră roi Tơdrong ‘Nao ‘Lơ̆ng, lu bơ̆n ưh kơ sĭ “pơm keh tơdrong jang.” mă lei tơpă lu bơ̆n oei chông ba mĭnh ‘nu bơngai năm hăm tơdrong pơgơ̆p gĭt kăl hloh lăm đĭ chăl arih lu sư. Păng băt kiơ, lăp mĭnh nơ̆r ră roi đĭ jơhngơ̆m đơ̆ng lu bơ̆n năr ‘nâu gô pơih đĭ trong yak năm tơplih khŏm khŏm kơ bơngai ‘noh.

Apĭnh đĭ đăng krao khan hơdai: Kơkuh kơ Kră Yang Yêsu, apĭnh huay kơ jô̆ yo kơ kon yua kơ dôm kơplah kon thĕng hreh, ưh kơ ră roi anăn Ih. Apĭnh dan lê̆ lăm jơhngơ̆m kon tơdrong ‘mêm mơnat tơtŏ kơ dôm lu bơngai ưh tim mă băt kơ Ih. Apinh ăn kơ kon jơhngơ̆m pơ̆n nuih, ưh kơ sĭ wă roi tơ băt đon lui đĕch ôh, mă kŭm wă ră roi gah anăn gĭt đơ̆ng Ih lăm tơdrong ‘mêm mơnat. Apinh tơgŭm kon ră roi Tơdrong ‘Nao ‘Lơ̆ng păng tơdrong hiôk chơt păng tơdrong pơ̆n nuih, ling lang wă pơm kơdranh hloi gah Kră Yang mă ‘bơ̆t anih ayơ kon năm. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, athei yak hlôi đơ̆ng tơdrong hli tơ rơ, achăng dôm tơdrong kiơ pơm kơ buăl kơdŭn tơrŏng lăm thĕng hreh. Rim năr jơ̆ mĭnh jơ năr wă rei adrĕch tơdrong chang hơmĕng, wă pơjao ăn tơdrong arih păng tơdrong ‘mêm mơnat mă ‘Bok Dŏng Pơklaih Yang Yêsu đei ‘măn ăn kơ kon bơngai. Dah lu bơ̆n pơ̆n nuih pơma gah Sư, lei tơdrong chang hơmĕng, tơdrong hiôk hian păng dŏng pơklaih gô đei pơchrang thoi noh, hăm tơdrong mơsêh mơyang tơplih đĭ chăl arih bơngai nai hăm kơdih lu bơ̆n. Hơpơi khan ŭnh hơdah Tơdrong ‘Nao ‘Lơ̆ng ưh kơ đei ôn hlơp lăm jơhngơ̆m lu bơ̆n, na gô pơchrang rang hơdah jơ̆p kơ anih lu bơ̆n đei yak truh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.