Hrei âu, hli tơrơ păng tơchĕng hiơ̆k bơngơ̆t jing “buăl yak năm hơdai” pă gơh weh wer đơ̆ng rim ‘nu kơ lu bơ̆n. Roi tơbăt ưh kơ ‘lơ̆ng, tơdrong arih kon pơlei pơla rai kơnê̆, trăp trĭn lăm tơdrong arih … tôm tơdrong pơm kơ jơhngơ̆m kon bơngai hơwơ̆l hơwang, ‘bônh kơ hli na hiong tơdrong hiôk chơt. Kư̆m đei minh tơdrong tơchĕng tŏ sĕt đĕch mă pơm kơ lu bơ̆n pă hiôk prăt năr. Na kơ lih kơ thoi noh hơdrol hloh, lu bơ̆n kăl kơ lăng ming: tơdrong hiôk hian noh tơyơ tơpă ăn kơ bơhngol bơ̆n? Tơyơ anih gơnang kơjăp wă kơ lu bơ̆n arih hiôk, huay kơ đei hli tơrơ bơwang?

Năr ‘nâu, ‘năr 15/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Martha Noebel kơ̆l ‘bai ‘NĔ KƠHLI!

“Ih ‘nĕ kơ hli păng ih ‘nĕ kơ tŭk tơdrong jang ih. Ih kư̆ bơtho ling-lang đĕch.  Yua kơ Inh oei hơdai păng ih ling-lang ưh kơ đei bu gơh pơrăm ih ôh, yua kơ đei lơ bơngai lăm pơlei âu gô lui kơ Inh.” (Tơdrong Jang 18:9-10)

Lăm tơdrong arih kơpal teh đak hrei âu, rŏ lăng tơdrong hli tơrơ oei bơ̆jang đĭ jơhngơ̆m sư. Đei lơ tơdrong pơm ăn kơ lu bơ̆n ‘bônh kơ hiơ̆k bơngơ̆t păng pă hơđơ̆ng bơih. Mă lei sơ̆p hla bơar đei roi tơbăt: jơhngơ̆m hli tơrơ noh ưh kơ đơ̆ng ‘Bok Kei-Dei. Tơdah ăn kơ sư oei pơgŏ, lu bơ̆n gô rơdu păng arih ưh kơ thoi Kră Yang wă.

Yang kơnê̆ layơ kư̆m ‘maih rei tơdrong hli tơrơ lăm jơhngơ̆m lu bơ̆n. Sư wă kơ lu bơ̆n pŭ iŏk trăp trĭn, ding truh tơ pă đei jơhngơ̆m wă bơ̆jang tơdrong jang Kră Yang pơjao.

Mă lei ơ lu ‘nhŏng mŏ oh ơi, athei ‘blŏk: tơdah ‘Bok Kei-Dei oei oei hơdai lu bơ̆n, na đei bu wă ayăt hăm lu bơ̆n? lăm Sư, lu bơ̆n jơ̆ bơngai kĕ jei. Kăl kơ rôp kơjăp ti Kră Yang na yak năm tơ anăp.

Đei brei mơ sơ̆ ‘nâu, pơm kơ jơhngơ̆m inh hiơ̆k bơngơ̆t dêh păng trăp trĭn. Inh rơhing wă kơ mơ̆ng hơđăl đei nơ̆r pơma khan đơ̆ng Kră Yang. Lăm măng noh, inh tơ oei kơ pal tang dŏ minh adrô̆, inh đei apinh Kră Yang, apinh Ih ăn kơ inh minh nơ̆r pơlung. Inh areh dêh kơ đei mơn jơhngơ̆m trăp trĭn noh. Na inh đei pơih sơ̆p hla bơar ‘Bok Kei-Dei, pơih lơ kơ chăl, na tơ’bơ̆p nơ̆r ‘nâu:

“Ih ‘nĕ kơ hli păng ih ‘nĕ kơ tŭk tơdrong jang ih. Ih kư̆ bơtho ling-lang đĕch. Yua kơ Inh oei hơdai păng ih ling-lang ưh kơ đei bu gơh pơrăm ih ôh, yua kơ đei lơ bơngai lăm pơlei âu gô lui kơ Inh.” (Tơdrong Jang 18:9-10)

‘Nao đang kơ đŏk, jơhngơ̆m inh hiôk hian. Hơdrol kơ noh, inh đei mơn ưh kơ hiôk đei tơdrong kơnê̆ wă truh, đunh bơih ưh kơ kĕ hlôi. Mă kơ plah noh, pŭ trăp lăm jơhngơ̆m inh hiong bơih. Inh mơn băt inh oei lăm tơpang ti Kră Yang, na kăl kơ pơtrơp yak năm lăm tơdrong gĭt kăl Kră Yang krao. Inh lui ngeh inh gô huay kơ đei tơdrong pơrăm kiơ, yua kơ đei linh jang ‘lơ̆ng Kră Yang jum dăr bơwei inh. Inh lui ngeh dôm tơdrong gô ‘lơ̆ng ngăl. Bơngai nai tơchĕng thoi yơ kư̆m ưh kơ kăl, tơdrong kăl hloh noh nơ̆r Kră Yang đei pơma khan.

Inh mơn kơ Nơ̆r Kră Yang ưh kơ trŏ kơ adrô̆ inh đĕch, mă kư̆m trŏ hăm dôm kơ jơhngơ̆m oei hli tơrơ lăm tơdrong arih. Lu bơ̆n ưh kơkăl kơ hiơ̆k bơngơ̆t kơ dôm tơ tơdrong “rŏ lăng” gô truh. ‘Bok Kei-Dei gô chông anhăk lu bơ̆n yak hlôi đơ̆ng tôm tơdrong. Sư gô wơh linh jang bơwei lăng lu bơ̆n, păng Sư kư̆m ăn đon lui kơ ‘nhŏng oh lăm khŭl bơngai lui wă pôk tơ iung, pơlung lu bơ̆n. Hloh kơnoh, lu bơ̆n đei Nơ̆r Kră Yang păng hiôk hian đơ̆ng Sư ăn, ling lang oei hơdai lăm 24 jơ rim năr. Mă kơplah tŏk bŏk măng, lơ bơngai tep, na Kră Yang oei hơđơ̆r, oei chang gô lu bơ̆n krao apinh. Sư oei tơ noh. Sư ‘mêm mơnat kơ lu bơ̆n tih tơpă. Yua kơ thoi noh, ‘nĕ kơhli, yua kơ Sư ling lang oei hơdai.

“Jao bĕ trong bơ̆n kơ Kră Yang. Păng gơnang kơ Sư. Na Sư gô pơkeh tơdrong noh, Sư gô pơdah tơdrong tơpăt ih thoi hơdah hơdong. Păng sek tơ’bôh tơdrong trŏ ih thoi ‘năr dơ̆ng. Oei hreh bĕ ‘bơ̆t anăp Kră Yang păng chang gô Sư. ‘Nĕ kơ ơh klai yua kơ lu đe đei pŭn hiôk lăm trong lu sư. Dah yua kơ bơngai noh pơm keh lu tơdrong kơnê̆. Ĕnh bĕ kơ hil păng lê̆ pă blĕk; Lê̆ kơ hiơ̆k tơdrong noh gô truh kơ tơdrong kơnê̆. Yua kơ lu bơngai kơnê̆ gô răm đĭ; Mă-lei gah lu bơngai chang gô Kră Yang gô đei teh jang sa.” (Hơriso 37:5-9).

Apĭnh đĭ đăng krao khan hơdai: Bơnê kơ Kră Yang yua kơ Ih ăn kơ kon tơdrong mơsêh, tơdrong ‘mêm mơnat păng đei jơhngơ̆m đon gơh hơgei kĕ hlôi đơ̆ng dôm tơdrong hli tơrơ lăm tơdrong arih. Apinh tơgŭm kon băt kơ chĕp kơjăp nơ̆r Ih pơkă, huay ăn kơ jơhngơ̆m hiơ̆k bơngơ̆t dah hli tơrơ pơgơ̆r tơdrong arih kon. Apinh tơgŭm kon ling lang ‘blŏk Ih bơih ling lang oei hơdai, linh jang ‘lơ̆ng Ih jum dăr kơ kon, păng Ih ‘mêm kơ kon ưh kơ đei layơ tơplih. Kon rơih iŏk lui gơnang kơ Ih, yak năm lăm tơdrong hiôk hian đơ̆ng Ih ăn. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kon bơngai chơchă tôm tơdrong wă kơ huay kơ hiơ̆k bơngơ̆t, ưh kơ đei kiơ kơjăp thoi kơ hiôk hian đơ̆ng ‘Bok Kei-Dei. Sư băt hơđăl đơ̆ng dôm kơ hli tơrơ đơ̆ng lăm jơhngơ̆m lu bơ̆n, păng adrô̆ Sư đĕch đei tơdrong mơsêh gơh tơplih dôm tơdrong hli tơrơ jing tơdrong hiôk hian kơjăp ưh kơ đei tơplih. Kơplah lu bơ̆n pơ̆n pơjao dôm tơdrong arih ăn kơ Sư, dôm tơdrong hli tơrơ pă đei lăm chăl arih lu bơ̆n bơih, păng bơhngol lu bơ̆n gô pơdơh oei hreh lăm tơdrong ‘mêm mơnat ling lang đơ̆ng Kră Yang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.