Dơ̆ng ‘bơ̆t anăp dôm kơ tơmam tih să. nhen thoi kơ kông tih kơ jung dah đak dơsĭ ‘blưch ‘bleng jrŭ să. lu bơ̆n ‘bôh kon bơngai iĕ đĕch. Dôm kơ jơ năr ‘noh pơm kơ lu bơ̆n ‘bôh dôm kơ tơdrong hloh kơ hlôh băt păng jơhngơ̆m pran đơ̆ng kon bơngai. Mă lei dah dôm kơ tơmam lăng thoi kơ hmă đĕch mă pơm kơ kon bơngai pă gơh tơdrŏ tơdrĕnh thoi noh, na Tơ’ngla pơjing plĕnh teh ‘nâu tih hloh kơ noh dơ̆ng!

Năr ‘nâu, ‘năr 16/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Joy Brunson kơ̆l ‘bai TƠ’NGLA PƠM DƠNĂ KÔNG GROI.

“Inh gô năm adrol kơ ih, Inh gô pơm kơ lu kông groi dơnă, teh pơchah lê̆ lu ‘măng Jang kong, gơ̆ lê̆ chơkăl bơsei.” ( Êsai 45:2)

Kơplah hŏk kâ̆p pêng, inh jơ̆ bơngai pơm pơchơt, soang, tap ti păng pơgơ̆r khŭl tơpôl- ưh kơ đei hơtŭt ‘bơm tơdrong ‘ban klơ̆m bơlŏng tơ kơpal bai hloi. Mă lei kơplah bôl buăl inh bu kŭm chih hiă anăn lăm khŭl bơlŏng, inh tơchĕng: “Pơlong lăng liơ!” Inh nhen thoi ưh kơ băt kơ tơdrong hơgăt pơngôi, lei na tă kơ đei iŏk. Nhen thoi tơpă lu sư lăp kăl kơ thim mĭnh ‘nu bơngai hơoei giơng răp gô wă kơ tôm khŭl.

Lăm ‘ban blŭng a, inh blư thar rôp ‘bơm ‘bơlŏng, hơwơ̆l hơwang, na kơdâu tơklă gah… bai khŭl gah noh. Lăm kơplah wă hơmet klơ̆m ‘bơlŏng, bơngai pơtho ôr pơret: “Ưh kơ trŏ bơih!” Mơlŏu dêh, inh mơ̆ng brơ̆t dơ̆ng mĭnh ‘bôt. Đơ̆ng ‘bơ̆t dei, rim wơ̆t ‘ban ‘bơlŏng hăm inh đei ‘bĕnh tơdrong hiơ̆k tơtăm.

Đei mĭnh wơ̆t lu nhôn đei pơjei hăm mĭnh khŭl đe ang pran dêh. Lăng đơ̆ng ataih, inh pơlung kơdih: “Lăng lu sư kŭm ưh kơ mah hli dêh.” Mă lei na mĭnh ‘nu lăm khŭl sư iung dơ̆ng- nhen thoi roi kơjung hloh, kơjung dĭng mah truh kơ ŭnh tơ kơpal hlơp đơ̆ng rŏng kơ kơ̆l sư. Inh hreh lăm tơdrong hlĭch tơpă, hlĭch dêh păng… hli tơrơ. Ưh kơ đei hlĭch kiơ kơplah năr ‘noh lu nhôn ưh kơ kĕjei.

Tơdrong pơm kơ jơ ‘noh ‘blŏk răk jrŭ lăm đon tơchĕng inh ưh kơ sĭ lăp jơ̆ ưh kơ kĕjei, mă yua kơ inh hui dêh kơ mơn lăm jơhngơ̆m đei tơdrong ‘nâu: mơn ‘bôh kơdih iĕ ioch tơpă ‘bơ̆t anăp mĭnh tơdrong kiơ ‘noh tih hloh dơ̆ng.

Rŏ lăng đơ̆ng đunh dêh bơih, lu bơ̆n đei ưh pă mơn kơ đei tơdrong ‘noh kơplah tơchĕng gah ‘Bok Kei-Dei.

Đei bơngai đơ̆ng ‘lơ̆p lăp kơtơ̆ng roi gah mĭnh ‘Bok Dŏng Pơklaih Yang Yêsu iơ̆m dim, gơh găt. Đei bơngai kŭm juăt hăm rup mĭnh ‘Bok Kei-Dei tơpăt, ataih. Păng thoi noh na, đei lơ wơ̆t lu bơ̆n pơrơ̆ng pơ̆ng gơwar Sư lăm mĭnh anih rup iĕ ayơ noh, na hiơt khan Sư jơ̆ Tơ’ngla Mơsêh mơyang. Sư ưh kơ sĭ lăp đei tơdrong mơsêh, na kŭm hloh kơ đĭ đăng tôm tơdrong.

‘Bok Kei-Dei dŏng pơklaih lu bơ̆n kŭm trŏ jơ̆ Tơ’ngla yua nơ̆r akhan ăn kơ đĭ đăng teh đak gơh jing. Tơ’ngla pơlung lu bơ̆n kŭm trŏ jơ̆ Tơ’ngla khan athei kơ đĭ đăng tôm tơmam kơpal plĕnh.

“Inh gô năm adrol kơ ih, Inh gô pơm kơ lu kông groi dơnă, teh pơchah lê̆ lu ‘măng Jang kong, gơ̆ lê̆ chơkăl bơsei.” (Êsai 45:2)

“Inh bơih Tơ’ngla pơjing teh đak…. Đơ̆ng ti Inh kơdih pơm, bơlang lu plĕnh păng pơjing lu sơnglŏng.” (Êsai 45:12)

Hli yom kơ Kră Yang wă khan ưh kơ jơ̆ tơtơ̆ hli tơrơ ‘bơ̆t anăp Sư, na jơ̆ hlĭch tơpă, kơkuh ‘bơ̆t tơdrong Sư pơgơ̆r. ‘Noh jơ̆ jơhngơ̆m kơkuh yom tơ lăm jrŭ ‘măn ăn kơ Pơtao kơ lu pơtao.

“Sư mơnat kơ đĭ-đăng bơngai mă lui yom kơ Sư, mă đơ̆ng sơ̆ khơ̆ ning-mônh.” (Luka 1:50)

Đei kơplah jơ inh krao khan na thar mơn ‘bĕnh lăm jơhngơ̆m- ưh kơ trŏ yua kơ tơdrong kơdih oei apĭnh, mă yua kơ đơ̆ng kơdih đei Tơ’ngla inh oei pơma dơnuh. Tơ’ngla rôp đĭ đak dơsĭ lăm tơpang ti na mơ̆ng kơtơ̆ng nơ̆r inh. Tơ’ngla gơh pơm dơnă kông groi na băt hơđăl anăn inh.

Rŏ lăng dang ei lu bơ̆n ưh pă đei ‘bôh ŭnh sa jơ ‘bôt ‘nhĕt dah kơtôch ŭnh chông trong thoi lăm Sơ̆p Hla Bơar Nơ̆r ‘Bok Kei-Dei, mă lei lu bơ̆n oei oei kơkuh trŏ ‘Bok Kei-Dei ‘noh. Tơ’ngla đei blah ‘bar pah Đak Dơsĭ ‘Brê, Tơ’ngla đei kĕjei tơdrong lôch, păng Sư oei bơ̆jang tơ’bôh lăm năr ‘nâu.

“Gah Yêsu Krist sư oei hơnơ̆ng ling-lang, mă đơ̆ng sơ̆ khơ̆ dang ei truh tơ ning-mônh.” (Hêbrơ 13:8)

Lei na thoi noh, kơplah buăl krao khan, athei pơ̆n nuih pơyơ̆r kơ Kră Yang dôm lu tơdrong buăl oei kăl, mă lei ‘nĕ kơ pơdơh ‘bơ̆t doh. Athei tơ’blŏk kơ jơhngơ̆m kơdih ‘blŏk truh Tơ’ngla mă buăl oei krao apĭnh. Athei pơih nơ̆r ‘Bok Kei-Dei, đŏk nơ̆r Sư, đŏk hơđăl jing re nơ̆r. Athei ăn tơdrong tơpăt gah tơdrong tih hloh đơ̆ng Ih tơplih tơdrong buăl lăng tôm tơdrong.

Kông kơjung tih oei găn ‘bơ̆t anăp buăl ah? Lăp mĭnh wơ̆t dui jơhngơ̆m đơ̆ng Sư kŭm tôm wă pơm dơnă kông ‘noh.

“Inh gô năm adrol kơ ih, Inh gô pơm kơ lu kông groi dơnă.” (Êsai 45:2)

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih yua kơ Ih jơ̆ Tơ’ngla pơjing đĭ đăng plĕnh teh jrŭ să ‘nâu, thoi noh na oei mơ̆ng kơtơ̆ng nơ̆r kon. Apĭnh tơ’blŏk kơ kon ling lang chĕp răk anăn tih hloh, gĭt kăl đơ̆ng Ih. Apĭnh ăn kơ kon mĭnh jơhngơ̆m băt hli yom păng tơtơ̆ lăm tơdrong hlĭch hlăch ‘bơ̆t anăp mơsêh mơyang tih tin Ih ưh kơ đei kiơ gơh pơtŏ pơting, păng lui kơjăp khan ưh kơ đei kông groi ayơ Ih ưh kơ gơh pơm dơnă. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lu bơ̆n ngăl ưh kơ băt wă pơm liơ ‘bơ̆t anăp dôm kơ tơdrong pơmat tat pơlong lăng, nhen thoi kơdih đei pŭ iŏk tôm tơdrong. Mă lei athei ngơk lăng tơ kơpal păng ‘blŏk khan: lu bơ̆n gah mĭnh ‘Bok Kei-Dei tih hloh, Sư tih hloh kơ dôm tơdrong hli tơrơ, dôm tơdrong pơlong lăng lăm chăl arih lu bơ̆n. Păng dah jơhngơ̆m buăl tơtơ̆ hli, athei ăn tơdrong tih hloh đơ̆ng Sư dŏng tơgŭm đon lui buăl, ăn kơ buăl pơ̆n nuih năm hăm mĭnh jơhngơ̆m ‘bĕnh blai hli yom păng lui ngeh anih Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.