Nyob hauv lub neej, tej zaug peb kuj ntsib dhau tej kev tu siab uas lwm tus ua rau peb. Tej kev tu siab ntawd zoo li tej cuab yeej tshaj uas peb pheej ris nyob rau hauv lub neej. Vajtswv tej lus qhia tias zam txim yuav tso peb dim, yuav tau koob hmoov thiab muaj kev kaj siab rau peb tus ntsujplig. hnub no, koj puas ntseeg tias los ntawm Vajtswv lub zog, koj kuj muaj cuab kav zam txim rau lwm tus thiab?

Hnub no, yog hnub 17/11/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Paul J. Palma dhau ntawm Zaj kawm ZAM TXIM IB YAM LI TUS TSWV ZAM TXIM

“Nej yuav tsum ua siab dawb siab zoo, ib tug hlub ib tug, thiab ib tug zam txim rau ib tug, ib yam li Vajtswv twb zam txim rau nej cov uas ntseeg Yexus Khetos lawm.” (Efexaus 4:32).

Txhua zaug uas lub caij ntuj kub los txog, peb tsev neeg pheej mus saib niam tais yawm txiv, niam pog txiv yawg. Txhua zaug mus, wb muab txhua yam khoom pov saum tsheb thiab hais cov menyuam tias: “Nco ntsoov tsuas nqa khoom txaus siv ob thiv xwb!”

Txij thaum wb ob niam txiv pib mus li no, wb nrhiav kev tso cov khoom kom ib cas kom lub tsheb ntim tag cov khoom thiab tib neeg huvsi. Wb muaj peb tug menyuam, yog li tej khoom siv kuj ntau dua. Thaum ub wb muab lub tsheb 4 chaw zaum pauv mus rau lub tsheb van kom chaw zaum ntau me ntsis. Tiamsis thaum cov menyuam loj tuaj, lawv tej khoom kuj “ntau tuaj”! Txhua zaug uas tsev neeg nqa hnab tawm tom tsheb, kuv yuav tau muab cov hnab tso kom zoo, thiab tseem tshuav chaw rau tus tsav tsheb saib pom tom qab tib si.

Nyob rau hauv txoj kev mus xyoo no, tomqab siv zog muab khoom ntsaws rau hauv tsheb, kuv sim kaw lub pob tw tsheb tiamsis kaw tsis tau. Tomqab ua peb zaug tsis tau, kuv thiaj xav saib puas muaj yam dabtsi muab tshem tawm. Thaum ntawd, kuv thiaj pom hnab khoom noj. Nyob hauv muaj ob peb hnab qos nthee loj thiab thaj, peb thiaj sawv daws sab laj tias tsis nqa cov ntawd nrog, pog yawg nkawd twb npaj ntau yam khoom noj tos lawm. Kuv tus ntxhais nws tsis xav tso tseg nws pheej puag rawv hauv nws tus kheej. Tiamsis thaum kawg, nws kuj kam tso tseg. Thiab zaum no, kaw tau qhov rooj lawm!

Thaum pib, qhov uas muab cov khoom noj tshem tawm yog ib yam nyuaj, tiamsis tomqab ntawd ho pom tias nws kuj yoojyim. Zam txim rau ib tug twg kuj zoo ib yam li ntawd. Tseeb tiag, “zam txim” muaj lub ntsiab tias “tso tseg” lossis “hnov qab”. Thaum uas peb muab tej yam uas tsis cheem tsum tso tseg, ces txhua yam nws yuav tau haum. Kuj ib yam li ntawd, thaum uas muaj leej twg xav ua rau kom peb tu siab, yog peb pheej tuav rawv txoj kev npau taws, kev iab siab, ces peb lub siab yuav nyhav heev. Tiamsis thaum kam muab tso tseg thiab hnov qab, peb lub siab yuav tau Vajtswv txhawm kom puv nkaus los ntawm txoj kev hlub thiab kev kaj siab. Lub neej yuav sib thiab yooj yim dua lawm ntau thaum uas peb paub zam txim.

Paulus ntuas cov ntseeg nyob hauv Kauleethaus kom zam txim: “Thaum nej zam txim rau leejtwg, kuv yeej zam txim ran tus ntawd ib yam nkaus thiab. Yog tsimnyog kuv zam txim rau leejtwg, kuv yeej zam tus ntawd lub txim tabmeeg Yexus Khetos, vim kuv saib rau saum nej sawvdaws. Kuv ua li no kom dab Ntxwgnyoog thiaj ntxias tsis tau peb; rau qhov peb twb paub nws tes haujlwm tas lawm” (2 Kauleethaus 2:10-11).

Paulus paub tias zam txim yuav ua rau muaj txoj kev tau tso dim thiab cov neeg Kauleethaus yuav tau txais koob hmoov. Dab ntxwgnyoog xav kom peb nco ntsoov tej kev tu siab uas lwm tus tau ua rau peb. tiamsis yim npau taws, peb yuav yim ntxiv lub nra nyhav. Nws yeej tsis txawv tej khoom uas nqa tshaj. Tiamsis peb kawm txoj kev tsis txais yuav tej kev xav tsis zoo, peb lub siab yuav dhau los sib thiab lub neej kuj yuav dhau los zoo dua. Zam txim tseem pab kom peb txoj kev ntseeg muaj zog.

Ib qhov uas peb yuav tau zam txim rau lwm tus yog vim peb twb xub tau Vajtswv zam txim lawm. Vajluskub qhia peb tias: “Nej yuav tsum ua siab dawb siab zoo, ib tug hlub ib tug, thiab ib tug zam txim rau ib tug, ib yam li Vajtswv twb zam txim rau nej cov uas ntseeg Yexus Khetos lawm.” (Efexaus 4:32). Thaum peb zoo siab hlo tso tej kev tu siab uas lwm tus ua rau peb, ces ntawd kuj yog lub sijhawm uas peb nthuav tawm Vajtswv txoj kev ua siab ntev. Tag nrho peb puav leej ua txhaum rau Vajtswv, tiamsis Vajtswv yeej zam txim rau peb. Vajtswv twb pub ib txoj kev daws rau kev txhaum dhau ntawm Vajtswv tus tub uas yog Tswv Yexus. Thiab thaum peb zam txim, peb dhau los ua cov neeg coj tej lus ntawd rau lwm tus (2 Kauleethaus 5:19).

Thov caw nrog kuv peb thov Vajtswv ua ke: Tus Tswv, thov qhia rau kuv paub zam txim rau tus uas tau ua rau kuv muaj kev tu siab. Txawm yog kuv paub tias zam txim yeej tsis yooj yim, tiamsis kuv ntseeg tias Vajtswv yuav pab kuv kawm txoj kev zam txim thiab hlub lwm tus thaum uas kuv paub vam khom koj. Thov kom kuv lub neej yuav ua neej nyob rau hauv txoj kev hlub thiab nthuav tawm txoj kev hlub ntawd rau tej neeg ib ncig kuv. Kuv thov hauv Tswv Yexus Khetos lub npe. Amees.

Cov kwv tij txhua tus, hlub thiab zam txim yeej tsis yog yam uas yooj yim ib zaug li, thaum uas hauv peb lub siab muaj ntau lub qhov txhab tob. Twb yog vim peb tsis txaus zog zam txim, peb thiaj yuav tau vam khom rau Vajtswv kom zam txim. Thaum peb lub siab puv npo Vajtswv kev hlub, peb thiaj muaj cuab kav hais tau tej lus zam txim tiag.

Hnub no, Vajtswv xav kom koj kuj hais tej lus zam txim rau tus neeg uas ua rau koj tu siab thiab thov Vajtswv rau lawv. Yog koj npaj tsis tau txhij hais tim ntsej tim muag, muab lawv lub npe sau thiab fij rau Vajtswv hauv txoj kev thov Vajtswv lossis koj yuav nthuav tawm dhau ntawm nug moo, ua ib qhov haujlwm nthuav tawm txoj kev tshua. Vajtswv yuav nrog koj thiab ntxiv zog rau koj thaum koj pib mloog Vajtswv tej lus zam txim.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj