Lăm tơdrong arih, rŏ lăng lăm lu bơ̆n kư̆m hlôi mơn đei ơh sơ’ngon đơ̆ng bơngai nai pơm ăn. Dôm kơ ơh sơ’ngon nhen thoi kơdŭng tơmam rơkah lu bơ̆n chĕp ba lăm trong yak năm lăm tơdrong arih. Nơ̆r Kră Yang bơtho khan huay pă jô̆ yo gô ăn kơ lu bơ̆n rơngei, hiôk hian păng pŭn hiôk ăn kơ bơhngol lu bơ̆n. Năr ‘nâu, buăl hăm lui ngeh yua kơ đơ̆ng pran kơtang Kră Yang, rŏ lăng buăl kư̆m gơh huay pă jô̆ yo kơ bơngai nai ưh?

Năr ‘nâu, ‘năr 17/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Paul J. Palma kơ̆l ‘bai HUAY KƠ JÔ̆ YO THOI KƠ KRĂ YANG HUAY KƠ JÔ̆ YO

“Iĕm athei pơm băl mă ‘lơ̆ng, băt ‘mêm mơnat kơ bôl buăl, ‘nĕ kơ jô̆ yo dih băl thoi ‘Bok Kei-Dei huay kơ jô̆ yo kơ bơ̆n yua kơ Kon Sư Yêsu Krist lôch tang bơ̆n.” (Êphêsô 4:32)

Rim kơ bơyan hngach truh, hnam dơnŏ lu nhôn ngăl năm ngôi tơ mĕ ‘bă, yă ‘bok. Rim wơ̆t yak năm, lu nhôn tah tơmam hơdrom tơ lăm gre păng pơma pơkă kơ kon hơ’lơ̆p thoi âu: “ ‘Blŏk chĕp tơmam tôm mah lăm ‘bar giĕng đĕch hơ!”

Đơ̆ng năr klo akăn nhi pơtơm kơ năm ngôi ‘nâu, nhi chă đon proh hơmet tơmam pơm liơ wă kơ bơngai hăm tơmam lăp tôm mah, rơhơi hiôk lăm gre. Nhi đei tơpêng ‘nu kon hơ’lơ̆p, na tơmam chĕp ba kư̆m rai lơ hloh. Blŭng a, tơplih đơ̆ng gre tơpuăn ‘nu hao na năm tơ gre chơ tơmam đei tơgŭm lu nhôn rơhơi ‘biơ̆ tŏ sĕt. Truh tơ lu hơ’lơ̆p nhi wơ̆ ‘lŏ, na kơdŭng tơmam lu nhôn “rai lơ”! dôm wơ̆t hnam dơnŏ chĕp ba tơmam wă tah tơ gre, inh proh hơmet pơ’lơ̆ng đơ̆ng rim kơ tơmam wă kơ lăp ‘blep, mă oei đei anih kơ bơngai wơ̆r gre gơh lăng tơ gah rŏng.
Lăm trong yak năm sơnăm ‘nâu, đơ̆ng adrin pơlŭl đĭ tơmam lăm gre, na inh tang tơnang măng gre mă ưh pă gơh. Đơ̆ng rim wơ̆t ưh kơ đei gơh, inh pơlong tơchĕng lăng hăm đei tơmam ayơ wă ming lê̆ ưh. Kơplah noh, inh kơnhăm kơ kơdŭng tơmam sa. Lăm kơdŭng đei kơdŭng nilon tah bum păng ‘bĕng kĕo, na lu nhôn pơdrơ̆ng ưh kơ kăl kơ chĕp ba, mă loi băt kơ ‘bok yă đei hơmet bơih tơmam sa ‘lơ̆ng tơ noh. Kon drŏ kăn inh ưh kơ wă ming lê̆ mă kuăr chĕp tơmam tơ sư. Na tuch luch, sư kư̆m drơ̆ng ming lê̆. Na kơplah ‘nâu tơnang ‘măng gre tang gơh bơih!

Blŭng a, tơdrong ming lê̆ dôm tơmam nhen thoi tơnat dêh, mă đơ̆ng rŏng kơ noh mơn phyơl hiôk tơpă. Huay pă jô̆ yo kơ minh ‘nu bơngai bu noh kư̆m nhen thoi noh. Mă tơpă, đơ̆ng “huay pă jô̆ yo” wă khan “ tŭk lê̆” dah “hiơt hiong”. Kơplah lu nhôn ming lê̆ tơ’ngoaih dôm tơmam ưh kơ kăl yua đơ̆ng lăm gre, na dôm tơmam ‘blep lăp hloi. Lei lăi thoi noh, kơplah đei bơngai bu noh pơm kơ lu bơ̆n sơ’ngon, tơdah oei bơwei dôm kơ jơhngơ̆m blĕk păng kơnam, na jơhngơ̆m lu bơ̆n gô trăp trĭn. Mă lei tơdah băt kơ tŭk lê̆ păng hiơt hiong hloi, na Kră Yang gô ‘bŭ tơ‘bĕnh jơhngơ̆m lu bơ̆n hăm tơdrong ‘mêm mơnat păng hiôk hian Sư. Tơdrong arih gô phyơl hơnhơl păng hiôk hloh kơplah lu bơ̆n huay pă jô̆ yo.

‘Bok Pôl athei khŭl bơngai lui tơ pơlei Kôrintô athei ‘nĕ pă jô̆ yo: “Iĕm huay kơ jô̆ yo kơ bôl pơm yoch, inh kư̆m huay kơ jô̆ yo mơ̆n; tơdrong inh huay kơ jô̆ yo kơ đe, noh yua kơ Yêsu Krist, Sư wă kơ inh jang tơgŭm iĕm tang Sư, thoi noh na inh ưh kơ đei kơ jô̆ yo kơ bu bu ôh. Na dang ei đĭ-đăng kơ bơ̆n ‘nĕ pă jô̆ yo kơ bơngai mă yoch noh, hli kơ sư hiong lăm tơdrong yang Satan, yua kơ bơ̆n băt kơ yang Satan sư pơhlŭ hơgei dêh.” (II Kôrintô 2:10-11)

‘Bok Pôl băt kơ huay pă jô̆ yo gô ba ăn tơdrong gơh klaih păng pŭn hiôk ăn kơ bơngai Kôrintô. Yang kơnê̆ wă kơ lu bơ̆n ling lang kơ ‘blŏk dôm kơ ơh sơ’ngon đei bơngai nai pơm ăn kơ lu bơ̆n. Na rai blĕk, lu bơ̆n gô rai trăp trĭn. Ưh kơ phara kiơ kơ dôm kơdŭng tơmam rơkah. Na kơplah lu bơ̆n băt kơ hŏk iŏk tŭk lê̆ dôm kơ ‘maih wă pơm kơnê̆, jơhngơ̆m lu bơ̆n gô phyơl hiôk na tơdrong arih rai ‘lơ̆ng hloh. Huay pă jô̆ pơm kơ đon lui lu bơ̆n rai pran hloh.

Minh tơdrong lu bơ̆n kăl kơ huay pă jô̆ yo kơ bơngai nai noh jơ̆ yua kơ lu bơ̆n đei huay pă jô̆ yo bơih. Sơ̆p hla bơar ‘Bok Kei-Dei bơtho lu bơ̆n: “Iĕm athei pơm băl mă ‘lơ̆ng, băt ‘mêm mơnat kơ bôl buăl, ‘nĕ kơ jô̆ yo dih băl thoi ‘Bok Kei-Dei huay kơ jô̆ yo kơ bơ̆n yua kơ Kon Sư Yêsu Krist lôch tang bơ̆n.” (Êphêsô 4:32). Kơplah lu bơ̆n tŭk lê̆ dôm kơ ơh sơ’ngon đêl đe pơm ăn, noh jơ̆ kơplah lu bơ̆n tơ’bôh tơdrong ‘mêm mơnat đơ̆ng Kră Yang. Đĭ đăng lu bơ̆n pơm yoch hăm ‘Bok Kei-Dei ngăl, mă lei Sư huay pă jô̆ yo kơ lu bơ̆n bơih. ‘Bok Kei-Dei dŏng iŏk bơ̆n đơ̆ng tơdrong noh hăm kon Sư – ‘Bok dŏng pơklaih Yang Yêsu. Na kơlah lu bơ̆n ưh pă jô̆ yo bơih, lu bơ̆n jing bơngai bơtho tơdrong ‘nao ‘lơ̆ng kơ đe nai wih lui kơ Sư (II Kôrintô 5:19)

Apĭnh đĭ đăng krao khan hơdai: Kơ kuh kơ Kră Yang, apinh bơtho kon băt kơ huay pă jô̆ yo kơ lu đe bu pơm kơ kon ơh sơ’ngon. Mă khan kon băt kơ huay pă jô̆ yo noh ưh kơ ‘bônh, mă lei kon lui ngeh Kră Yang gô tơgŭm kon hŏk pơhrăm gah huay pă jô̆ yo păng ‘mêm mơnat kơplah kon băt lui gơnang kơ Ih. Hơpơi kơ tơdrong arih kon ling lang đei ‘mêm mơnat păng tơ’bôh tơdrong ‘mêm mơnat hăm lu bơngai jum dăr kơ kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, ‘mêm mơnat hăm huay pă jô̆ yo noh tơdrong ưh kơ ‘bônh, mă loi lăm lu bơ̆n oei đei rơka jrŭ lăm jơhngơ̆m. Kơlih kơ lu bơ̆n ưh kơ đei jơhngơ̆m wă huay pă jô̆ yo na lu bơ̆n kăl kơ gơnang kơ Kră Yang wă kơ gơh huay pă jô̆ yo. Lăp kơplah jơhngơ̆m lu bơ̆n ‘bĕnh kơ ‘mêm mơnat đơ̆ng Kră Yang, lu bơ̆n gơh pơma nơ̆r huay pă jô̆ yo tơpă.

Năr ‘nâu, Kră Yang wă kơ buăl pơma nơ̆r huay pă jô̆ yo hăm bơngai mă pơm kơ buăl ơh sơ’ngon păng athei krao khan tơgŭm lu sư. Tơdah buăl tam mă pơ̆n tơ’bơ̆p pơma dơnuh, athei chih anăn lu bơngai noh păng pơyơ̆r kơ Kră Yang hăm nơ̆r krao khan, dah buăl pơm tơ’bôh tơdrong ‘mêm hăm nơ̆r pơma pơtruh, minh tơdrong tơ’bôh jơhngơ̆m hiơ̆k bơngơ̆t kơ huay pă jô̆ yo noh. Kră Yang gô yak năm hơdai păng tuh ăn jơhngơ̆m pran ăn kơ buăl kơplah buăl chu mơ̆ng nơ̆r Sư na wă kơ huay pă jô̆ yo.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.