Thaum ntsib tej kev txomnyem, tib neeg tus cwjpwm yog txhawj thiab nroo. Tiamsis, Vajluskub ho caw kom peb yuav tau nrhiav Vajtswv lub tebchaws thiab qhuas Vajtswv nyob hauv tej kev sim siab. Vim li cas qhuas Vajtswv ho tseem ceeb txawm yog nyob hauv tej teeb meem? Dhau ntawm tej kev qhuas, tsis paub Vajtswv puas coj txoj kev kho zoo los thiab hloov pauv peb lub neej?

Hnub no, yog hnub 18/11/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dayna Lovelady dhau ntawm Zaj kawm QHUAS VAJTSWV NYOB HAUV TEJ KEV TXOMNYEM.

“Cia li qhuas tus Tswv qhov uas hu nkauj qhuas peb tus Vajtswv yog ib qho uas zoo heev, yeej tsimnyog sawvdaws txaus siab thiab qhuas nws kawg li” (Ntawv Nkauj 147:1).

Nyob hauv lub neej, thaum txhua yam tsis muaj teeb meem, txoj kev qhuas Vajtswv cuag li yooj yim. Peb yooj yim tsa suab ua Vajtswv tsaug thaum tau nce haujlwm siab, thaum tej neeg txheeb ze tau kho zoo, lossis thaum txhua yam nws tshwm los zoo li txoj kev npaj tos. Tiamsis thaum peb puas tsuaj, lub siab lub zog pob puas tas ne zoo li cas? Tsis paub peb puas yuav tsa tau suab qhuas Vajtswv nyob rau hauv tej kev txomnyem, puas tsuaj, tag kev cia siab, tsis tso siab thiab ntau zaug tseem raug ntxeev siab?

Tsis ntev tom qab kuv tus neeg txheeb ze tag sim neej, kuv rov qab los rau lub sijhawm thov Vajtswv, tiamsis lub siab nyhav heev. Tiamsis thaum kuv nthuav Vajluskub los thiab nyeem ntawm Ntawv Nkauj 147, kuv pom ntu Vajluskub no pib thiab xaus ntawm ib lo lus samhwm tseg: “Cia li qhuas tus Tswv qhov uas hu nkauj qhuas peb tus Vajtswv yog ib qho uas zoo heev, yeej tsimnyog sawvdaws txaus siab thiab qhuas nws kawg li” (Ntawv Nkauj 147:1). Yawg hais tias qhuas Vajtswv yog ib yam haum Vajtswv siab thiab phim rau Vajtswv, txawm yog lub sijhawm yuav zoo li cas. Qhuas tsis yog qhov haujlwm nthuav tawm sab nraud xwb, tiamsis tseem yog tus cwjpwm nyob hauv lub siab tig mus rau ntawm tus Vajtswv uas peb ua haujlwm.

Thaum nyeem txog feem Ntawv Nkauj no, nqe 3 qhia rau peb pom txog ib yam uas yuav tau qhuas Vajtswv, tshwj xeeb yog thaum peb ntsib ntau txoj kev tu siab, vim tau sau paub tias Vajtswv yog “Nws kho cov neeg uas siab ntsws puas tas thiab qhwv lawv tej qhov txhab.” (Ntawv Nkauj 147:3). Qhov no ua rau kuv pom txog ib daim duab zoo txog Vajtswv – tus kho zoo puv npo kev hlub tshua. Nws tsis lam ua tug tsis paub peb tej kev mob, tiamsis Nws nkag los thiab kho zoo. Vajtswv nkag siab txog peb tej kev mob thiab kuj coj peb mus txais tau kev kho zoo.

Kuv nyiam qhov uas tus sau Ntawv Nkauj tsis tso dhau tej kev tu siab uas tib neeg ntsib dhau. Tiamsis tej kev tu siab ntawd, yawg hais txog Vajtswv lub hwjchim kho zoo, thiab txoj kev kho zoo ntawd yog los ntawm lo lus qhuas. Vajtswv yog tus uas “ Nws yeej kom tseg saib pub muaj pestsawg lub hnubqub, thiab nws tis npe rau txhua lubhnubqub nyias muaj nyias npe” Kuj yog tus uas tshua txog peb lub siab puas ntsoog (Ntawv Nkauj 147:4). Nws yog tus Vajtswv uas puv npo hwjchim, thiab kuj siv lub hwjchim ntawd los kho zoo cov neeg uas muaj lub siab puas ntsoog thiab qhwv peb tej qhov txhab.

Ntau zaug, ib zaj nkauj qhuas Vajtswv ho pab rau kom peb lub siab tau Vajtswv kho zoo. Thaum peb xaiv qhuas Vajtswv nyob hauv tej kev tu siab, peb tab tom nthuav tawm tias Vajtswv lub hwjchim loj dua peb tej teeb meem, thiab Vajtswv txoj kev hlub tob dua peb tej kev nyuaj siab. Kev ntseeg ua haujlwm yog thaum uas koj hais tias: “Kuv paub hais tias kuv muaj ntau txoj kev puas tshuaj tiamsis tus uas kho zoo kuv tab tom nyob ntawm no”

Yog li, txawm yog hnub no koj yauv ntsib lub caijnyoog zoo li cas, txomnyem npaum twg, los kuj nco ntsoov tias Vajtswv tab tom caw koj los rau hauv txoj kev qhuas:

“Cia li hu nkauj qhua tus Tswv, cia li ntaus nkauj nogncas qhuas Vajtswv” (Ntawv Nkauj 147:7).

Cia txoj kev qhuas Vajtswv nrog koj ua ke nyob hauv Vajtswv txoj kev kho zoo, thiab cia siab tias koj yuav saj tau txoj kev kho zoo ntawd thaum uas koj qhuas Nws, ib yam li kuv tau saj dhau. Thaum peb lub siab puas ntsoog, Vajtswv yuav los txuas thiab ua rau kom txhua yam tshiab nyob hauv peb lub neej.

Thov caw nrog kuv peb thov Vajtswv ua ke: Ua Vajtswv tsaug vim Koj tsis tso kuv tseg hauv txoj kev mob, tiamsis Koj paub thiab nkag siab zoo txhua yam uas kuv ntsib dhau. Thaum kuv ntsib tej kev txomnyem thiab sim siab, thov ntuas kom kuv paub tig rov qab los rau txoj kev pehawm thiab qhuas Vajtswv, kom kuv tau Vajtswv hloov dua tshiab thiab ntxiv zog. kuv ntseeg tias Vajtswv yeej tseem tab tom ua haujlwm nyob rau hauv kuv lub sijhawm pab kom kuv loj hlob hauv Vajtswv. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv txojlus hnub no ntuas peb tias kev qhuas Vajtswv tsis yog nyob ntawm lub caijnyoog tiamsis yog txais yuav Vajtswv lub siab uas puv npo hwjchim thiab kev hlub.

Nyob rau lub sijhawm muaj kev nyuaj siab, puas tshuaj lossis qaug zog, Vajtswv yeej tsimnyog tau qhuas, vim Nws yog tus kho zoo thiab pab peb. Yog li, hnub no, txawm koj tab tom nyob rau lub caijnyoog twg, los kuj cia li qhuas Vajtswv, txawm yog tsuas yog ib zaj nkauj xwb, ib lo lus thov Vajtswv lossis ib nqe Vajluskub qhuas Nws. thaum koj xaiv qhuas Vajtswv nyob rau lub caijnyoog txomnyem, txhais tias koj yeej tseem ntseeg Vajtswv yog tus zoo, thiab paub tias Vajtswv tab tom ua haujlwm kom muaj nqis rau peb.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.