Kơplah tơ’bơ̆p hăm tơdrong pơmat tat, tơdrong juăt hmă tơ’bôh đơ̆ng kon bơngai jơ̆ hiơ̆k bơngơ̆t păng pơma jŏk. Mă lei, Nơ̆r ‘Bok Kei-Dei ‘noh krao lu bơ̆n athei chơ chă păng bơnê ư-ang kơ ‘Bok Kei-Dei lăm tơdrong pơlong lăng. Yua kơ kiơ tơdrong bơnê ư-ang đei gĭt kăl mă khan lăm kơplah pơmat tat? Đơ̆ng tơdrong bơnê ư-ang, lei ‘Bok Kei-Dei hăm ba truh tơdrong pơklaih păng tơplih chăl arih lu bơ̆n ưh?

Năr ‘nâu, ‘năr 18/11/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Dayna Lovelady kơ̆l ‘bai BƠNÊ Ư-ANG KƠ KRĂ YANG KƠPLAH ƠH SƠ‘NGON.

“Bơnê ư-ang bĕ kơ Kră Yang! Trŏ ‘lơ̆ng tơpă. Hiôk hơri bơnê kơ Kră Yang ‘Bok Kei-Dei lu bơ̆n; Hiôk dêh tơpă trŏ hơri bơnê kơ Sư.” (Hơriso 147:1)

Lăm tơdrong arih, dah dôm tơdrong đei truh tơproh ‘lơ̆ng, tơdrong bơnê ư-ang kơ ‘Bok Kei-Dei nhen thoi ‘bônh đĕch. Lu bơ̆n ‘bônh kơ tơlĕch nơ̆r bơnê kơ Kră Yang dah đei tơdrong jang rai tŏk, dah bơngai lăm hnam dơnŏ đei pơklaih, dah kơplah dôm tơdrong kiơ̆ thoi chang hơmĕng. Mă lei dah lu bơ̆n pơchah, jơhngơ̆m ơh sơ‘ngon lei thoi yơ? Lei lu bơ̆n oei gơh tơlĕch nơ̆r bơnê ư-ang lăm kơplah dôm kơplah ơh sơ‘ngon, hiong răm, ưh kơ hơđơ̆ng păng phŏ kŭm hăm kơplah đei bơngai nai pơm glăi ưh?

Ưh kơ đunh đơ̆ng rŏng kơplah lăm hnam dơnŏ inh lôch, inh đei wơ̆t dơ̆ng hăm jơnăr krao khan. mă lei hăm jơhngơ̆m ‘bĕnh kơ gleh lap. Mă lei kơplah pơih Sơ̆p Hla Bơar Nơ̆r ‘Bok Kei-Dei păng đŏk Hơriso 147, inh lăng ‘bôh chăl ‘nâu đei pơtơm blŭng a păng pơtôch hơdai hăm mĭnh tơdrong athei: “Bơnê ư-ang bĕ kơ Kră Yang!”. Bơngai chih pơma khan: “Trŏ ‘lơ̆ng tơpă. Hiôk hơri bơnê kơ Kră Yang ‘Bok Kei-Dei lu bơ̆n; Hiôk dêh tơpă trŏ hơri bơnê kơ Sư!” (Hơriso 147:1). Sư pơkăm khan bơnê ư-ang kơ ‘Bok Kei-Dei jơ̆ mĭnh tơdrong ‘lơ̆ng lăm jơhngơ̆m păng trŏ hăm Sư, mă khan lăm anih ayơ. Tơdrong bơnê ư-ang ưh kơ lăp jơ̆ pơm tơ’bôh gah ‘ngoaih, mă kŭm jơ̆ tơ’bôh đơ̆ng lăm jơhngơ̆m lăng tơ gah ‘Bok Kei-Dei mă lu bơ̆n bơ̆jang.

Kơplah đŏk pơtrơp gah Hơriso ‘nâu, trong 3 ăn kơ lu bơ̆n mĭnh tơdrong wă kơ pran kơtang wă kơ bơnê ư-ang kơ ‘Bok Kei-Dei, yua kơ bơngai chih băt Sư jơ̆ Tơ’ngla “Ming pơklaih lu bơngai đei jĭ jơhngơ̆m. Păng pơ̆n rơka lu sư.” (Hơriso 147:3). Tơdrong ‘nâu ăn kơ inh ‘bôh mĭnh pôm rup ‘lơ̆ng tơpă gah ‘Bok Kei-Dei- Tơ’ngla pơklaih ‘bĕnh ‘mêm mơnat păng hiơ̆k bơngơ̆t. Sư ưh kơ lăng hmă đĕch ‘bơ̆t anăp tơdrong ơh sơ’ngon đơ̆ng lu bơ̆n, mă lei Sư mơ̆t wă pơklaih. Kră Yang ‘bôh hlôh đĭ tôm tơdrong ơh sơ’ngon đơ̆ng lu bơ̆n păng kŭm ba truh tơdrong pơklaih kơ lu bơ̆n.

Inh hơiă kơ tơdrong mă bơngai chih Hơriso đei ‘blŏk hiơ̆k kơ dôm tơdrong ơh sơ’ngon mă kon bơngai đei tơ’bơ̆p. Mă lei tŏk bŏk dôm tơdrong ơh sơ’ngon, sư kơnhăm truh tơdrong mơsêh mơyang pơklaih truh đơ̆ng ‘Bok Kei-Dei, păng tơdrong pơklaih ‘noh gơh truh đơ̆ng tơdrong bơnê ư-ang. Kơdih ‘Bok Kei-Dei, Tơ’ngla “hơgăt kơ dôm yơ tŏ lu sơnglŏng” păng “dan ăn hơnăn kơ đĭ đăng lu sơnglŏng” kŭm jơ̆ Tơ’ngla hiơ̆k bơngơ̆t truh kơ jơhngơ̆m pơchah đơ̆ng lu bơ̆n (Hơriso 147:4). Sư jơ̆ ‘Bok kei-Dei ‘bĕnh tơdrong mơsêh mơyang, păng kŭm yua tơdrong mơsêh mơyang ‘noh wă pơklaih dôm kơ jơhngơ̆m pơchah păng pơ̆n hơmet dôm kơ rơka lu bơ̆n.

Mưh lăp, mĭnh ‘bai hơri ư-ang đei tơgŭm kơ jơhngơ̆m lu bơ̆n hơtŭt ‘bơm truh tơdrong pơklaih đơ̆ng Kră Yang. Dah lu bơ̆n rơih tơdrong bơnê ư-ang mă khan lăm tơdrong sơ’ngon ơh, lu bơ̆n oei roi tơbăt khan tơdrong mơsêh mơyang đơ̆ng Sư tih hloh dôm tơdrong pơmat tat bơ̆n, păng tơdrong ‘mêm mơnat đơ̆ng Sư jrŭ să hloh tơdrong ơh sơ’ngon lu bơ̆n. ‘Bok Kei-Dei bơ̆jang jơ̆ kơplah buăl pơma khan: “Inh đei lơ tơdrong pơchah, mă lei inh băt Tơ’ngla Pơklaih kơ inh oei ‘bơ̆t dâu.”

Yua kơ thoi noh, mă khan năr ‘nâu buăl tơ’bơ̆p hăm tơdrong thoi yơ, pơmat tat truh dang yơ, lei kŭm athei ‘blŏk Kră Yang krao wơ̆n buăl truh hăm tơdrong bơnê ư-ang:

“Hơri bơnê bĕ kơ Kră Yang. Reh brŏ Dung bơnê kơ Kră Yang ‘Bok Kei-Dei lu bơ̆n.” (Hơriso 147:7)

Athei ăn kơ tơdrong bơnê ư-ang năm hơdai buăl lăm trong yak năm pơklaih đơ̆ng Kră Yang, păng hơpơi kơ buăl gô hlôi mơn đei tơdrong pơklaih ‘noh hloi lăm jơ bơnê ư-ang kơ Sư, thoi kơdih inh đêl đei. Dah jơhngơ̆m lu bơ̆n pơchah, Kră Yang gô truh wă pơklep păng pơm ‘nao dơ̆ng dôm tơdrong lăm chăl arih lu bơ̆n.

Apĭnh đĭ đăng krao khan hơdai: Bơnê kơ Kră Yang yua kơ Ih ưh kơ achăng kon lăm tơdrong ơh sơ’ngon, mă lei Ih băt păng ‘bôh hơđăl dôm tơdrong kon oei tơ’bơ̆p. Kơplah kon đei tơ’bơ̆p hăm pơmat tat păng tơdrong pơlong lăng, apĭnh tơ’blŏk kơ kon băt wih brŏk hăm tơdrong kơkuh păng bơnê ư-ang, wă kơ kon đei Ih tơplih păng pơthim jơhngơ̆m pran. Kon lui ngeh khan Kră Yang oei bơ̆jang lăm tôm tơdrong kơ kon wă tơgŭm kon wơ̆ ‘lŏ rai hloh lăm Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Nơ̆r Kră Yang năr ‘nâu tơ’blŏk kơ lu bơ̆n khan tơdrong bơnê ư-ang ưh kơ yua kơ đơ̆ng lăm anih, mă jơ̆ tơl tơwih đơ̆ng jơhngơ̆m ‘măn kơ mĭnh ‘Bok Kei-Dei ‘bĕnh tơdrong mơsêh mơyang păng ‘mêm mơnat.

Ma khan lăm jơ ơh sơ’ngon, pơchah dah gleh lap. Sư oei trŏ kơ đei bơnê ư-ang, yua kơ trŏ kơ Sư bơih jơ̆ Tơ’ngla pơklaih păng pơklaih praih lu bơ̆n. Yua kơ thoi noh, lăm năr ‘nâu, mă buăl oei lăm anih thoi yơ, kŭm athei bơnê ư-ang kơ Kră Yang, mă lăp jơ̆ mĭnh ‘bai hơri, mĭnh nơ̆r krao khan, dah mĭnh trong Nơ̆r ‘Bok Kei-Dei wă bơnê ư-ang kơ Sư. Dah buăl rơih bơnê ư-ang kơ Kră Yang lăm anih pơmat tat wă khan jơ̆ buăl oei lui gơnang lăm tơdrong ‘lơ̆ng tơpăt đơ̆ng Kră Yang, păng băt khan Sư oei bơ̆jang yua kơ tơdrong đei yua kơ buăl.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.