Kon mơnus geh crơng gơs gar mat nàng sền hơ đap. Bol he gơs tú kung rgơi wơlke đah ngkời, mơya gơwèt mơ săjan gen broă he sền hơđap la buơn rlau mơ he wơlke đah ngkời. Mơya oă dớ tòm tài kis, bol he lời oă tú jơ tơngai nàng sền wơl ală broă neh lơh pal càng sang sơbì, mơ siơu bơta sền lài hơđap mơ broă lơh ală ngai rơp tus he dê.

Ngai do, 28/01/2026, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bơh tơnggume BAÑ SÙM SỀN WƠL!

“Bañ wơlke tơnơ̆ mơ kung” (‭‭Sơnròp Gơlik Gơs‬ ‭19‬:‭17‬)

“Ơ ồng mọ oh mi, rơndap yal tơngit ồs sa neh geh pờ. Ồng mọ oh mi ban rơmsă, sền nền gùt dar mơ lơh jat jơnau tề lăm.” Jơnau yal tơngit broă tus bal mơ ală jơnau ntas dờng lơh an in pal guh bơh cơnờng bic. Tú hơ la bar jơ àng drim.

“Nchi bơtài la măng do taih? Bol hi gam ơm tòm poh thi pơlòng jê bồ ngan!”

“He pal lơh bơta lơi do taih? Cèng phan lơi taih?” phan kas màng dồ nă cau bơtê tiah ngài bè bol hi mìng gơs balo bal mơ sră bơar cơng tàng să jan bal mơ laptop. Cau bơyô lam bồ driau dờng lah:

• “ntoat dô mhar! Ntoat song hơđap!”
• “mơya…an gam laptop an dê?”
• “mhar! Ntoat song hơ tiah cau lời rơndeh, ban cèng phan lơi!”
  Rơmsă, an cù khó, soh ào dờng gen ntoat mhar jat cau lambồ. Bồ tơngoh an rngòt rngơt ngan. An ntoat jat blàng hìu, mơ mhar tìp ală cau noat dô kung bè an tòm bơta rơmsă.

Bol hi roh tòm 10 fuk sùm tus tiah cau lời rơndeh, la tiah neh sồr tus bơh sơnrờp. Tòm dơrlam tiah bol hi ơm, jơnau ntas dờng sùm gam bal mơ jơnau tề lăm ală cau lam bồ dê.

Gơs cau tòm mpồl driau dờng lah: “Chơt rau, sră bơar an dê! Lap top an dê!” Bol hi sền bal mơ gơp, mơ git ală bơta kơlôi rcang do kung ờ krơi bè bol hi.

Bol hi ờ rgơi lơh bơta lơi dê gùl trồ măng hơ. Lồi dut, cau at bồ taih bol hi ơm kung tơlik mat. Khai nhó mơ đơs lah: “ừn ngài ală oh bi neh lơh jat jơnau tề lăm! Ală broă neh gơlik gơs do la tú jơ bơtê pơnah ntoat dô tú gơs ồs sa. dan să mơ oh bi bơh neh lơh oh bi roh bơta bic he dê!”

Kơno bè hớ, gơs dồ êt cau nhìm. Tài bơh rngòt mơ rơmsă. Tài bơh neh lòt gan dồ broă ờ niam mơ ờ git lài.

Cau at bồ đơs tai: “oh bi pal kah bơta do. Kòp tú gơs jơnau ntas yal ồs sa, broă sơnrơp hớ la ntoat lik bơh ơdú. Tơnớ, mhar tus tềng tiah neh geh yal lài. Lòt song! Ban sền wơl. Dilah he sền wơl, nhú mơ ồs rơp lơh he in ờ gó gùng lòt mơ kalke nàng ntoat dô.”

“Mơya ală laptop, sră bơar, phan an dê gen mbè lơi taih?” dồ nă cau đơs.

“Tú ồs sa neh geh tơnchơt mơ ală bơta neh geh ring lơngai, gen oh bi rơp geh rê wơl nàng ai phan he dê. Jơh ală phan ờ gơs phan lơi kas màng rlau bơta kis he dê. Mơya nàng prap bơta kis, he pal kah, ban sền wơl đah ngkời”

Jơnau đơs cau at bồ taih ơm sùm lòt jat an oă poh tơnớ: “ban wơl ngke đah ngkời!” an kah tus bau ùr Lot, dồ nă cau tòm Sră Goh. bau ùr Lot kis tòm bòn Sôdom iơh bơsac. Nàng lơh glài làng bol Sodom, Yàng Tòm Trồ neh lơh nền tơnroh làng bol. Tú Lot Pơrwài ờ kờn lik lòt, bơh nùs niam lơhơn, Yàng neh hoài bàr nă ùr klau Lòt bal mơ 2 nă kon ur ntoat lik bơh bòn lài mơ tú Yàng tơnroh (Sơnrơp 19:16). Cau gơnrơh tơngkah: “Dô tĕ nàng dong klàs bơta kis mê dê, bañ wơlke tơnơ̆ mơ kung bañ ơm tiah lơi tòm ƀlàng, dô tĕ tus tòm mơnơm, rngòt mê gơkòl chu gen hă!” (‭‭Sơnròp Gơlik Gơs‬ ‭19‬:‭17‬)

“Bañ wơlke tơnơ̆”. Mơya bau ùr Lot neh “wơlke sền tơnơ̆ khai, gen gơlik gơs dô nơm rùp boh.” bè ‭‭Sơnròp Gơlik Gơs‬ ‭19‬:‭26‬ cih wơl. Nchi bơtài? Nchi bơtài bau ùr Lot ờ iat jơnau cau gơnrơh đơs taih? Nchi bơtài bau ùr Lot wơlke wơl mơ neh dờp cồng nha dờng ngan? An lùp is lah ngan bau ùr Lot gơs bơta rngòt rngơt sơl, gơs bơta poh bơlai phan lơi sơl? Jơl tus dê măng să tờm an neh lòt tòm măng cau bơtê ntoat dô ồs sa sùm an rgơi git. Tú tìp dồ broă mơp dơl mơ ờ git, bulah neh gơs jơnau tề lăm pal lòt song tus tiah bơrdìh, an sền gó an kung gam pơrwài. Nùs nhơm an dê kung gam wơlke đah ngkời tài bơh … an poh bơlai mơ rngòt. An poh bơlai ală phan an lời đah ngkời mơ rngòt ală broă rơp tus.

Gen an dờp git gùng lòt jat Yàng kung bè hớ. An kung ban wơl ke sùm đah ngkời. An kung ban lah pơrhơng is să tờm an dê tài bơh broă lơh tìs, hala dồ bơta tomklac mơ cau ndai neh ờ gam tai hala poh bơlai bơh ală broă neh ờ gam tai. Ngan an rơp ờ gơlik gơs rup boh bè bau ur Lot dê dilah wơlke đah ngkời, mơya an rơp gơkòl tòm ală broă neh gơlik gơs bulah Yàng gam cih ală rơndap rài kis an dê hơđap.

Rlau mơ dồ năm bơh măng hớ, bol hi dồ dớ tai pal ntoat dô tú kơnơ jơnau ntas yal tơngit ồs sa. tú do la ồs sa ngan, bal mơ nhú, thul, mơ jơnau ntas rơndeh cau cong an dê. Mơya tú do, an ờ pơrwài tai mơ mhar nàng ntoat dô lik bơh hìu nàng tus dê tiah đah bơdìh. An neh sac ờ wơlke wơl. Tú do, an neh sac lah rơp ờ rngòt bơta iơh lơi hala broă lơi rơp tus, tài bơh an dờn nền lah Yàng sùm ơm bal mơ an, gai lòng mơ gai kwềt Yàng dê rơp pơndờm pơniang an tòm jơh ală bơta. (Đơs Crih 23:4)

Dan jà bol he dô nùs bal tòm bơta hòi dan: Khoai Yàng kờn gơboh, kon ừn ngài Yàng tài bơh dê gùl rài kis bềng bơta bòl glar, mơ ală broă nisơna gơlik gơs, Yàng sùm lòt bal mơ kon. Ală tú kon rơmsă bơh broă gơlik gơs, mơ kờn wơlke đah ngkời, dan dong kon sùm gơn kơnờm dê Yàng. dan Yàng tơngkah kon kah lah Yàng sùm là Bơtau lòt bal mơ tề lam kon cơnđoà lòt hơđap. Kon jơh nùs hòi dăn ai sơnđan Yàng Jêsus Krist, Amen.

Ơ ală ồng mọ oh mi kờn gơboh, digơlan cau lơi tòm bol he kung neh lòt gan broă pal dô lik bơh dồ bă tiah, dồ broă gơlik gơs, dồ broă lơh, dồ bơta tomklac mơ cau ndai, dồ broă nàng prap gar bơta kis he dê, hala cau đềt mềr he dê, hala gơs tú nàng dong bơta kis cau ndai dê. Mơya bơta kis đah hwềng bol he gen mbè lơi tiah? Gơs bơta poh bơlai lơi sơl, gơs broă lơi nàng bol he ờ càng wơlke wơl mơya kứ cơn đoà lòt jat bơta tề lăm Yàng dê nàng prap gar bơta kis đah hwềng he dê sơl? Ngai do, dilah he sền gó gam gơkòl tòm bota poh bơlai bơh ală ngai lòt gan, gen ban gơplớ nùs, ban sền wơl. Ntoat té tus mơ Yàng. ngan Yàng rơp tề lam he lòt gan jơh ală bơta.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.