Gơs ală ngai bọ̆l he cơnoà lọ̀t mơ ya nùs nhơm kơnjơ̆-kơnjùt, ò git pal lơh mbe lơi nàng rgơi ntào di đap ală bơta ò kơ̆-cê bơh ngai tơnơ̆. Bơta pràn kơldang neh roh, bơta lơh nền kŭng ò gam pràn tài. Bọ̆l he lùp is he rgơi ai pràn tiah lơi nàng rgơi cơnoà lòt pơnjat tài taih? Yàng git bơta lơbơn-lơñọ bọ̆l he dê, Kơnràñ git lah bal mơ bơta pràn kơldang òsọ kòn mơnùs dê ò rgơi nàng yò-đo bọ̆l he ntào kơ̆. Behơ̆ gen tom ryàs bơta pràn kơldang ngan bọ̆l he dê tus bơh lơi? Tom ryàs bơta pràn kơldang bol he dê tus bơh Yàng, Bơtau sùm lọ̀t bal mơ yò-tơngguh oh mi mơ añ jơl jơh gùng lòt.

Ngai do, ngai 29/01/2026, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnòm di bơta dọ̆ng kơl Terry Meeuwsen bơh tơnggume TOM RYÀS BƠTA PRÀN KƠLDANG AÑ JÊ.

“Mơ ya cau lơi gơn kơnòm di Yàng Jehôwa gen rơp geh pràn pa. Bọ̆l khai rơp pò pơnđăr păr jơnhoa hơđăng kŭng be klàng-bŭng; bọ̀l khai rơp ntoat mơ ò bọ̀l glăr, bọ̀l khai rơp lọ̀t mơ ò lơgah-lơgăñ.” (Esai 40:31)

Sră “Tiah King-Crŭ” yal bơh gùng lọ̀t bềng bơta jê-sồt mơ ya kŭng niam ngan Corrie ten Boom dê. Coorie mơ hiu nhă mò neh ơn bơta dòn tom Yàng Dọ̆ng-Klàs Jesu. Bulah la cau Hà Lan, bọ̆l khai neh sền gàr ală cau Juđa tom hiu tòm he dê dô bă ndơp ndơr digùl pah rài mơ bơta iơh bơsak ngan cau Đức dê. Gen tom dô ngai, bọ̆l khai gơkòl cau joi git mơ gơkòl kup ơm tom hiu jam tài bơh neh dong kơl ceng ală cau Juđa tus hơ tiah lơngap-lơngai. Jơh ală cau tom hiu nhă, mìng gơs dô nă Coorie gam kis mơ rê wơl.

Tom tŭ kơlôi tus ală bơta gơlik gơs tom dunnia ngai do: ală sơnoa rnoàs nùs nhơm niam cau dê ò gam tai, bơta iơh bơsak mơ tồi-glài sơlo ngai sơlo gơbơtơl, mơ rài kis kòn mơnùs gơkòl sền òsơp- añ kơlôi rngòt ngan dà lơgar he in, mơ sơlo kơlôi rcang bơh ngai tơnơ̆ ală kọn añ jê. Tom dunnia mơ cau dơñọ-tơnhial ală sơnoa rnoàs mơ jòng-ro bơta cồng nha ìs rlau mơ ală bơta kwơ màng ndai, lơh mbe lơi añ bơto kọn in git lah gam gơs ală bơta di pal nàng phi bơta kis taih? Ală bơta yal yau kung be rài kis Coorie dê dọ̆ng añ pơnjat ntào kơ̆ hơđăng gùng lọ̀t bơta dòn să tòm añ jê, kung pơndòm-pơniàng ală kọn añ jê.

Oă sơnam lài, tom tŭ añ 22 năm, dô nă cau bơyô neh dô nùs bal kòñ añ rgơi mut tom bơta pơrlòng cau ur hàng mơnĕ dờng rlau jơh tom lơgar. Añ kơp kòñ geh bơtê đah ‘nghệ thuật biểu diễn’ tom dô nơm klơng gơs pơnro, mơ geh jền ai gòi bơh di bơta pơrlòng hơ̆ tơl nàng lơh bơta kơp kòñ añ jê gơlik gơs ngan.

Mơ ya nàng geh tus ting hơ̆, añ pal lọ̀t găn dô gùng lọ̀t jòng ngan. Lài ngan la pơrlòng tom ƀòn tom. Dilah geh pha, añ rơp cơnoà mut pơrlòng tom kơnhwal, mơ tus lơgar dê. Ò git nđò bơta pràn kơldang mơ ală bơta geh tuh gùng lọ̀t hơ̆ in! Kờp jơ, kờp ngai, kờp kơnhai pal bơklơn ìs să he mơ kong ơt. Bè bơtê ho lùp, bơtê lơh lai, bơtê pràn să-jan. Bơtê mbe lòt rê, sàc rwah phan soh, bơka să, sap đơs. Mơ bơtê, bơtê, bơtê ò tŭ lơi ơm bơdơh.

Lồi dut, añ neh geh bơta jòng ro rih ñưk mơ dòp geh oă tŭ lơmpah kŭng be bơta lơngai bơh tŭ hơ̆. Mơ ya gơwèt mơ jơh ală bơta hơ̆, añ neh pơnđơl pràn bơh dô nơm sơgơn mơ lồi dut kŭng rơp rọ jruh. Behơ̆ gen añ ò pal pơnđơl pràn rlau tai tài bơh sơgơn gơklŏ sùm sùm ơ?

Cau gơnoar bơto dờng ồng Pol neh đơs bơh bơta do be tơnơ̆ do: “Oh mi ò git lah ală cau ntoat pơrlòng tòm tiah pơrlòng, gen jơh tơl nă ntoat bal, mơya mìng gơs dô nă dòp geh phan ƀàn ơ? Behơ̆, oh mi pal ntoat mbe lơi sồng geh phan ƀàn. Jơh ală cau pơrlòng pràn tòm bơta pơrlòng, bơtê git kơrmap bơta boh lam kràñ cê tòm jơh ală bơta. Bol khai lơh behơ̆ mìng dòp sơgơn ồm lề, mơya bol he lơh behơ̆ nàng dòp sơgơn ò ồm lề.”

Sră Goh yal wơl oă ngan bơta yal yau bơh ală cau klau mơ cau ur sùm kong ơ̆t, kơ̆ nùs. Bọ̆l khai geh Yàng Tom Trồ ngui dô bă gơnap-gơnoar, bulah ntào di đap ală bơta kơlôi lah ò rgơi lòt gan. Añ jê-glọh tơhir gơlik gơs cau ur mơ Yàng Tom Trồ niam nùs ngui. Mơ ya gơs tŭ, tom tŭ ntào di đap bơta lơbơn-lơñọ he dê mơ ală bơta gơrwàng gut dar, añ ò rgơi ntào kơ̆. Sền di ală kọn añ jê mơ kơlôi tus ală bơta gơlòng bọ̆l-glar di đap, añ kung rngòt-rngơt. Mơ ya kờp dơ̆ tơnggơr măt Bèp đăng trồ, añ geh tơngkah lah Kơnràñ la Bơtau bềng gơnap-gơnoar, pràn kơldăng.

Tom “Tiah King-crŭ”, Coorie neh yal tơlik bơta rngòt-rngơt bal mơ bèp he. Me lŏ lùp ồng dilah dô ngai lơi bọ̆l khai gơkòl kup, lơh mbe lơi nàng me lọ̆ khin cha nàng kis wĭl tơl tom bơta dòn he dê. Bèp melọ̆ lơbơn niam ho wơl: “Coorie, tom tŭ bọ̆l he lòt ơhò, kọn dòp geh sră mut tom ơhò tom tŭ lơi taih?” Coorie ho: “Tom tŭ ơhò mor sơtòm lòt.” Ồng ñọ̆ mơ đơs: “Gơwèt mơ Yàng Tom Trồ kung behơ̆ sơl. Gơnoar broă bọ̆l he dê la prap gàr nùs nhơm sọ̆ng ngan. Ai bơta pràn kơldang mơ nùs kong ơ̆t, Kơnràñ rơp ai bọ̆l he in di di tơngai.

Ơi bèp, bọ̆l he ò pal cang añ ơnòng ìs jơh ală bơta. Yàng Tom Trồ git loh kờp bơta gơlòng di đap bol he, mơ Kơnràñ rơp ai pràn di di tŭ bọ̆l he pal cang. Bơta bọ̆l he pal cang lơh hơ̆ mìng la cơnoà lọ̀t mơ nùs dòn kơnòm. Pơnah gam wơl, Kơnràñ rơp rcang, tài bơh Kơnràñ la tơm ryàs bơta pràn kơldăng bọ̆l he dê.

Dan jà bol he dô nùs bal tòm bơta hòi dan: Khoai Yàng, dan dọ̆ng kơl kọn sùm kis mơ bơta dòn kơ̆-cê, cơnoà lòt jat nùs kòñ Kơnràñ dê mơ rcang sir nàng phi wơl nàng lòt jat Kơnràñ jơl tus lồi dut. Dan ai kọn in nùs nhơm kơ̆ win, ò rùc wơl bulah gơs oă bơta gơlòng bọ̆l glar. Tom tŭ kọn lơbơn-lơñọ, bọ̆l glar hala dơrcùl di đap ngai tơnơ̆ ò kơ̆-nên, dan tơngkah kọn lah să tòm Kơnràñ la tom ryàs bơta pràn kơldăng, la tiah king-crŭ mơ la Bơtau tề lăm kọn kờp cơnoà. Dan dŏng kơl kọn bơtê mbe dòn kơnòm di Yàng sơlo rlau tai, mơ joi jat Kơnràñ tom jơh ală bơta lơh nền kọn dê. Kọn jơh nùs hòi dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, digơlăn ngai do oh mi sền gọ̆ he ò găm gơs pràn nàng cơnoà lòt tai. Mơ ya pal kah tĕ lah Yàng òtŭ lơi kòñ oh mi pal añ ơnòng is. Kơnràñ git loh bơta ò wĭl tơl bọ̆l he dê, gen tang Kơnràñ ai pràn pa kơp ngai. Bulah ală bơta kư tơm pơrgơl mbe lơi, tom ryàs bơta pràn kơldăng Yàng ai ò tŭ lơi tơm pơrgơl. Mìng pal cang oh mi tus rềp mơ Kơnràñ, jao jơh Kơnràñ in bơta kơlôi rcang mơ bơta lơbơn-lơñọ he dê, gen Kơnràñ rơp bơtơl pràn, yò tơngguh mơ tề lăm oh mi lòt gan ală gùng klăm jơngọ rlau jơh. Kơp kòñ oh mi rơp git lam dô bă jrô ndơp, lah pràn kơldăng jơi kọn mơnùs dê rơp siar lơho, mơ ya pràn tus bơh Yàng gen ò tŭ lơi jơh. Mơ tŭ Yàng la tom ryàs bơta pràn kơldăng rài kis oh mi dê, gen ò gơs dô bơta gơlòng lơi rgơi lơh oh mi in gơpừ.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.