Ngai do, bol he “kìs mhăr” tian gờs oă tŭ ò đăl git he neh săng bơta lơi. Kòp ngai gơ lòt găn be dô nơm cròh dà hòr: broă lơh, hiu nhă, gơnoăr broă, oă bơta păl kơlòi rcăng… bơh hơ̆ kứngơhoài bòl he lòt. Mìng tùs tŭ bơta kălkê gơlik tùs bơklơn bol he pal dơh wơl, sòng he dờp git oă tŭ neh rlau he neh lòt mhăr ngăn mờ ò tŭ lơi git. Gơs tŭ Yàng ngui ală kơlồi gơlơh be là ò gớs ñchi lơi hơ̆ nàng tơngkah bol he kah wơl bơh ală bơta dờng rlau tai, bơh ală bơta nđàc lơngai mơ Kơnràñ òs ai pà mơ bol he neh lơi hŭi.

Ngai do, ngai 30/01/2026, tơnggu Hòi Dăn Kòp Ngai dăn jà ông mò oh mi he kơlồi sơnờng băl Jơnau Yàng kơnòm bơta dong kờl Donna Collins Tinsley bơh tơnggu me ALĂ BƠTA KĂLKÊ DỀT.

“Lồi tơnơ̆, ơ oh mi, dilah bơta lơi song ngăn, bơta lơi màng ryŭ; bơta lơi song ring, bơta lơi sang goh, bơta lơi pal kờñ gơboh, bơta lơi gờs ponrò niam, dilah gờs bơta kơ̆ dơn lơi, dilah gờs bơta lơi pal jòng rơ, gèn oh mi pal kơlồi sơnưg tĕ di ală bơta hơ̆” (Philip 4:8)

“Ơ Yàng Jehôwa, tòm tŭ añ kơlồi sơnơng lah: “Jơng añ gơcồt,” gèn bơta kờñ goboh kơ̆ dơn Kơnràñ dê yò đo añ. Tòm tŭ gờs oă bơta kơlồi rcăng tòm nùs añ jê, gèn bơta pơndòm pơniang Kơnràñ dê loh chò hòp hwềng soàn añ.” Đơs Crih 94: 18 -19.

Gơs tŭ lơi ală broă dềt rhền òs kòp ngai lơh nùs ông mò oh mi gơcồt, ò gơkrơi be broă dờng ơnàng ne? Gớs tŭ lơi ông mò oh mi sền gơlơh rài kis he kờñ cơnđoà lòt mơ tốc độ pơdăr măt: mìng gơs “mhăr, mơ mhăr rlau tai”?

Añ neh lòt găn ală bơta gơlơh behơ̆, tŭ giga ntoat jat rơndăp ală kòn sau dê, ròng siam sau dềt, mơ rơndăp tơl ală bơta kơlôi rcăng kòp ngai.

Sìr gèn, be “tùh bơntơl mơñà tòm ồs”, añ tìp dô bơta gơtup: ƀòng ơn sră kơnjơ̆ nisơna tơrlùp, di di jơng añ.

“Ơ Yàng, ñchi bơh tai bơta dô gơlik tùs mơ kòn?”

Mơya gơs dô bơta añ neh bơtê geh lòt găn ală kơnhai năm jat Yàng: Jòng rò tĕ Kơnràñ tòm jơh ală bơta. Mơ tŭ jơ hơ̆ mò, bơta sơnròp añ neh driau hơ̆ la: “Ưn ngai Yàng bơh gơ ò dùh di ală kòn jơng kon!” dilah gơ dùh di ală kòn jơng, bơta jê sồt rơp kơnjơ̆ oă rlau!

Bơh sơnrơp añ ơm wìr ò lòt swì, mơya jơl tùs di tŭ jơh mpàng jơh añ gơtuh ŭr mơ às gơgùh dờng, añ ò băt ñyà tai. Rùp X-quang ai tơnggŏ chè sơnoan kòl tach, tềl ŭr kơnjơ̆ mơ nting kùng às. Cau gơnoăr sơnơm đờs tŭ tơngai rơmàl pơndrờm mơ pă nting. Bol khai pùt añ in mơ dô nơm mơng lơbơñ nàng dong jơng añ mhăr bời.

Tòm ală poh tơnơ̆ hơ̆, tòm tŭ păl tơrjik kờp cơnđòa nàng lòt, añ rgơi gŏ kàs màng ò git nđò rài kis “be òs” bơh laì. Añ kah gơlồi tŭ ƀrồ jơng tòm khŏ mơ cơnđòa ò jề sồt. Bơta gơtùp dềt hơ̆ neh bơ klơn añ păl dơh wơl, jat gơtha jù.

“Ơ Yàng, Kơnràñ kòñ bơtô kòn bota lơi?”

Ngăn Kơnràñ kờñ tơngkah kon: “ơm dơh wơl tĕ mơ sền sơwì gut dăr dô bă nĭ nòn”? Ãn đăl git lah ãn neh ntoat tòm rài kis dô bă mhằr ìr, neh tùs di tŭ añ păl ntoat ơlĕ ơdàr wơl.

Bơh hơ̆, añ sơntòm kơlồi sơnờng oă rlau tai bơh ală cau gam tòm tìp mơ ală bơta ngăn dờng rlau. Añ bơtê kòp yà ală bơta lơngai Yàng neh ai, ala bơh mìng ơn măt tùs ală bơta ò dê nùs. Tòm tŭ lòt yơng roat phăn, añ pơnđơl pràn sền ală cau mơ he tơm tìp bơh nùs nhờm kờñ goboh rlau. Dô dơ̆, tŭ añ găm păl grăp mơ mơng, añ tìp mơ dô nă ông krà cơnơng gai jrà. Tŭ gŏ añ lòt kờlthờt, ồng nhọ̆ mò còp lùp. Añ hơ wơl: Poh do kon đỡ rau, poh lai kon kùng neh ngùi gai jrà be ông sơl!
Mơ añ sền nề nơn dô bơta bă liă: mìng nhŏ oă rlau, gằr măt oă cau rờp ò găm dơh wơl jŏ jòng hơđăng mơng grăp hala khŏ jă iơh mơ añ găm jă. Bơta nhọ̆ hơ̆ rgơi lơh bol khai in chờ hòp dô êt, hala gơs tŭ lơh bol khai in kờñ jòi lùp ò git añ chờ hòp bơh bơta lơi. Mơya bulah mbe lơi, ală tŭ lơmpah digùl bol hi kùng gơlik nggòc rlau.

Gơs dơ̆ añ gọ̆ dô nă cau ùr ntao di đăp añ tùh xăng. Mò lòt is dô nă. Añ sền gŏ mò pờ mpông rơndeh tơrồs, tơnơ̆ gèn mò pơrlă kong rơndeh mò lòt is găn dê do nơm mpan guh hơđăng mơ mò tùh xăng be òs. Bơta lơh ăñ in sền swì wơl ò di la broă lơh hơ̆ mơya là tòm bơta mò…ò găm tai jơng nàng lòt ri. Bulah behơ̆ bơta hơ̆ ò lơh nùs nhờm mò gơhùc dô êt lơi. Mò tòm tip mơ dô bơta păl càng gơlơh be dờng, mơya nùs nhờm gơlơh nggờc be hơ̆ la dô nơm broă dềt.

Ò gớs dô nơm têl bơta yoam pơrhiat hala bassil lơi. Sơlơŭ wơl, mò ràng tơlik wơl nùs nhờm pràn kơl dăng lơh añ in păl ki ngam. Rùp hơ̆ be la dô bơta bơtê kis, tơngkah wơl añ in păl sền ală bơta jat gùng niam rlau.

Kòp ngai añ sùm bơtê nùs nhờm: ală bơta kălkê dèt tòm rài kis ò păl càng lơh gơ in gơlik dờng, tom tŭ bol he git ơm dơh wơl nàng kòp yà jơh ală bơta lơngai mơ he găm gơs.

Dan jà bol he dô nùs bal tòm bơta hòi dan: Khoai Yang, dăn dong kòn prăp gàr bồ dơngoh he wèt hơ jơnau song mơ Kơnràñ bơtô kòn. Dăn dong kòn ơn nùs tòm “bơta lơi song ngăn, bơta lơi màng ryŭ; bơta lơi song ring, bơta lơi sang goh, bơta lơi pal kờñ gơboh, bơta lơi gờs ponrò niam, dilah gờs bơta kơ̆ dơn lơi, dilah gờs bơta lơi pal jòng rơ”. Dăn nùs nhờm kòn kứ kơlồi sơnờng ală bơta hơ̆ kờp ngai. Mơ kòn dờn kơnờm di jơnau hơ Kơnràñ dê, lah tŭ kòn wèt nùs hơ jơnau song, gèn Yang Tom Trồ bơta lơngăp lơngai dê rơp ơm bal mơ kòn. Kòn jơh nùs hòi dăn, tòm sơnđăn Yàng Jesu Krist, Amen.

Ơ ală ông mò oh mi kờñ gơboh, sền wơl ală bơta neh lòt găn, bol he rờp dal git lah Yàng găm bơtô òm he găn di ală bơta gơntùs dềt. Kơnràñ tơngkah bol he păl dơh wơl nàng git kah nđàc, cơnđòa tĕ ơlĕ ơdàr nàng sền gŏ loh làng rlau ală bơta lơngai gùt dàr he, mơ lơbờñ rlau nàng sền cau ndai mơ gàr mat dô nùs mơ kờñ gơboh. Ală bơta kălkê dềt tòm rài kis rờp ò lơh bol he in yoam pơrhiat tai, tŭ bol he sac rwah ơn nùs tòm ală bơta lơngai tơngkah tơngkañ Kơnràñ ai. Dăn Yàng dong bol he sùm cơnđòa lòt tom bơta lơngai hơ̆, bơh dô nơm nùs git kòp yà ală bơta lơngai Knơràñ dê, mơ joi ban bơta chò hòp tom jơh ală bơta gơlik gơs.
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.