Jơi kòn mơnùs bol he òs mô dô bơta gơwèt jat òs: kờñ ăt bồ jơh ală bơta gùt dàr he. Bol he kờñ prăp rài kis he gơs rơndăp, niam lơngai, ò gơs bơta lơi lòt rlau mơ bơta rơndap. Bol he pơndơl pràn prăp kơ̆ kờp ală bơta dô bă nĭ nòn, dòn lah dilah he ăt bồ niam, jơh ală bơta rờp ring niam. Mơ gèn gơs ală tŭ bơta gơlik gơs gơlòt klàs bơh di tê, lơh gơ in roh gơnkơnòm, rngòt rngơt. Bol he đăl git lah ò rgơi ăt bồ jơh ală bơta. Behơ̆ gèn mƀe rgơi joi bàn bơta ring lơngai? Tòm tŭ bol he kah prăp lah Yàng sồr cau gơnrơh Kơnràñ dê tơlik mat nàng sìn gàr bol he, mơ jơh ală cau kờn gơboh bol he dê tai sơl.

Ngai do, ngai 31/01/2026, tonggu Hoi Dan Kòp Ngai dăn ja ông mò oh mi kơlôi sơnờng bal jơnau Yàng bal mơ cau cih bơh tơnggu me CAU GƠNRƠH LƠH SÀL GÙT DÀR

“Cau gơnrơh Yang Jehôwa dê ơm kòp gùt dàr ală cau duh rngòt dê Kơnràñ, mơ dŏng tă bol khai.” (Đơs Crih 34: 7)

Hơ̆ la dô bơta yal bơh dô nă cau mè tŭ lơi kùng gơnđơt kơnđu kòn he, ò tŭ lơi lơi tê. Mơya tòm dô ngai nè, bàr nă mè mơ kòn gơs bơta tòm pơndăng băl pràn ngăn. Ală bơta gơlik gơs kơnjơ̆ tian gơs mò roh bình tĩnh mơ mò neh ai khŏ pờng di jơng kòn he dê.

Tòm bơta gơjràñ kơnòm dèt 13 sơnăm lơh nền dô lik bơh hiu. Khai drâm jơng, driau nggà ală jơnau srat rma, ală jơnau lơh nùs cau mè gơrềt jê sồt ngăn. Mò nggui gơn kòp kòn rê wơl, mơya khai gèn kứ cơnđòa sŏng tùs hơ hiu bèp khai- tai bơh bèp mơ mè kònòm do neh ò găm ơm bal tai.

Tòm tŭ kòn klau do neh ò gŏ rê wơl, bơta kơlôi gơguh tòm nùs cau mè dê. Mò neh hoi mơ ală cau gơp boyô kòn klau khai dê, mơ hòi mơ ală cau gơp bơyô he git nàng kơnòm di bol khai hoi dăn ala. Tŭ hơ̆ mò ò git lah Yàng Tom Trồ gam dŏng kơl mò jat gùng dà mơ mò ò rgơi kơlồi tùs.

Tòm gùng lòt tùs tiah kờp rơndeh bus, dô nă cau ông nisơna tùs rềp de kòn klau, pờ tê mơ dòp khai in dô pèt sră dềt. Khai mìng ai lơm,tơnơ̆ gèn prăp tòm kơldung, ò kờñ sền hơ̆ là ñchi.

Tùs tiah kòp rơndeh, khai khin chà lùp dăn jền mơ bàr nă cau krơi ndai. Dô nă cau ràng tơlik nùs sơ-êt sơ-ềl mơ đơs tràl sobìl, mơya cau nè gèn chò hòp dòp khai in dô êt. Bơh hơ̆ gèn khai mùt tòm rơndeh mơ tùs song hơ hiu bèp khai.

Bơta kờñ đơs ting do hơ̆ la kơnòm dêt do ò hềt tŭ lơi lòt hao is rơndèh bus ò!
Do poh lòt găn, bơta gơjràñ di gùl bàr nă mè mờ kòn dơh wơl. Kơnòm dềt do nggui di gah mè, pờ bal Sră Goh mơ sền. Bol khai sền tùs sră Rôma 8: 16, đơs bơh Yàng Hwềng Goh sùm gơs mat mơ Kơnràñ găm lơh broă. Ryan kùn bồ, mơ sơntòm yal wơl ală bơta mơ khai neh lòt găn tòm ngai hơ̆. Khai gìt mè khai dê rngòt rngơt tùs kơnă lơi tŭ kơnò kòn klau lòt gơling gơlàng tòm gùng mơ kờp ís rơndeh bus.

“Mè, sên kòn ngai hơ̆ jàñ ngăn, ñcau lơi gŏ kùng git lah ƀàñ joi jơnau mơ kòn”- Ryan đơs mơ jơnau jòng să. Mè khai ming tơrñềm mat òm.

“Tŭ kòn tùs hơ hiu bềp, nisơna kòn kah tùs pet sră. Kòn tă gơ bơh di kơdung, lơh bơnsŏng gơ tơnơ̆ gèn ñŏ dờng. Bèp kơno kòn ñŏ gèn ntoat tùs mơ, lùp kon: ‘ñchi hơ̆ taih? Gơs ñchi lơi mơ kòn chò hòp be hơ̆ taih?”’

“Kòn yal bèp in kơno. Sră mơ bàp êt hơ̆ dòp kòn in cih lah: ‘Ò gơs Bơtau Krist, kòn ò rgơi lơh bơta lơi ò.”

“Behơ̆ bèp lùp tai: ‘kòn đơs ông hơ̆ là kòn dờn Yàng sơl?’ Krơi ngăn ơ mè, bơh bèp gơlơh be ò tŭ lơi tơngkah tùs di bơta dòn kòn dê.”

Kơnòm dềt hơ̆ dờp geh dô pèt sră hơ̆ tòm toh mơ tŭ mè khai roh gơn kơnòm hòi dăn bal mơ ală cau, sền gơlơh be wil tơl roh bơta pràn. Bơh tòm tŭ hơ̆ mơ mò găm ràc dăn mơ Yàng, dô nă cau ông bă liă ne neh cơnđòa tùs rềp mơ kòn klau mò dê. Mò dờn lah hơ̆ là tŭ dô nă cau gơnrơh tòm rùp să jơi kòn mơnùs. “Jơh ală cau gơnrơh hơ̆ ò di la ală hwềng dùh broă, kŏng sồr lòt nàng dŏng broă ală cau rờp pơrdờn bơta dŏng klàs ò ơ?” (Hebrơ 1: 14)

Mìng dô pèt sră dềt, dơrklồn wơl dô bă băliă, dờp tờm tê bơh dô nă cau krơi ndai, mơ bơh hơ̆ bơtao tơngguh wơl bơta dờn mò hơ̆ dê dô rhiang dơ̆ rlau- mơ bơta dờn kòn klau mò dê tai sơl. Tŭ do, mò wơng loh lah kờp dơ̆ kòn klau mò dê ơm ngai bơh tơwòr tê mè, gèn Yàng Tòm Trồ găm sùm ơm băl mơ sền gàr kòn. Mò wơng bơta hơ̆ ò di mìng bơh dơngoh kơlồi, mơya bơh jơh nùs nhờm.

Bơta rìng lơngai lòt rlau mơ bơta wờng git ò di mìng tùs mơ mò, mơya kùng tùs mơ kon klau mò di tai. Bơta yal yau do tơngkah mò, mơ jơh kòp nă bol he: “Mơ tai, bol he git lah tòm jơh ală bơta, Yàng Tom Trồ lơh tồ gơs kwơ cau lơi in kờñ gơboh di Kơnràñ, hơ̆ la cau neh geh hòi sac jat bơta lơh nền Kơnràñ dê.” (Rôma 8:28)

Dan jà bol he dô nùs bal tòm bơta hòi dan: Khoai Yàng, oă tŭ kòn pơnđơl pràn prăp kơ̆ ală bơta tờm tê he, kơlồi is lah dilah kòn at bồ niam gèn rài kis rờp geh lơngai. Mơya kòn huĭ lah să tòm Kơnràñ ngăn la Bơtau prăp kơ̆ jơh ală bơta. Dan toh glài bơh ală tŭ kòn kơlồi rcăng oă ìr, ală tŭ kòn kơñ lơh is jat pràn is mơ huĭ joi tùs Kơnràñ. Dăn dong kòn bơtê git tơlờ tê, nàng jao phi jơh rài kís kòn Kơnràñ in. dăn dŏng kòn git lah tòm ală tiah kòn ò rgơi geh lòt tùs, tòm ală bơta gơlik gơs mơ kòn ò rgơi at bồ, Kơnràñ găm sùm ơm băl, prăp gàr, tề lăm mơ kờñ gơboh kòn. Kòn jơh nùs hoi dăn ai sơnđăn Yàng Jesu Krist, Amen.

Ơ ală ồng mò oh mi kờñ gơboh, tòm jơh ală bơta gơlơh bè lòt rlau bơh bơta ăt bồ he dê, Yàng găm la Bơtau sơmbă ăt bồ. Kơnràñ ò tŭ lơi săng lời bol he tòm bơta rngòt rngơt, roh pràn he di. Kơnràñ găm sền gàr mơ lơh broă dô bă òm bơh bơta kwờ bol he di, mơ gơnăp gơnoăr lòt rlau mơ bơta kơlồi sơnơng. Tŭ bol he tơlờ tê mơ dơh joi gùng ăt bồ jơh ală bơta, bol he dăl git bơta jrơm gòm krơi is Yàng dê găm gơrwàng tòm jơh ală bơta tòm rài kis he, kùng be tòm jơh ală bơta gơloh be roh gơn kơnòm rlau jơh.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.