Gơs dô bơta nền-cê lah tom rài kis kờp nă cau kòn dê, jơnau jòng-ro mơ bơta dòp git cau bèp dê sùm ceng wơl dô nơm pràn kơldang ò git jơh, lơh nền bơta dòn mơ ring-lơngai jrô tom dơlam nùs. Tom tŭ dô nă cau bèp đơs mơ kòn he: “Bèp hừh nùs ngan bơh kòn!” – kòn hơ̆ kung be geh bơtơl tài pràn kơldang dờng ngan bơh tom dơlăm tồ ntào di dap lơgar do. Gơ pơrlơ̆ wơl, bơta siău jơnau dòp git hơ̆ òs lòi wơl dô wah gòi, dô bơta jê-gloh tơhir ò rgơi sền gọ̆ mơ mat lơh bol he in sùm ntoàt jat ală công nha đah bơdih ne nàng yal tơlik bơta kwơ màng să tòm. Mơ ya dan oh mi bàñ mhar roh gơn kơnòm, tài bơh bol he gam gơs Bèp Đăng Trồ. Bèp hơ̆ sùm sùm dòp git oh mi, kòñ gơboh oh mi mơ hòi oh mi la kòn kòñ gơboh Kơnràñ dê-bulah oh mi mơ añ ò di pal mơ bơta kòñ gơboh hơ̆.

Ngai do, ngai 25/06/2026, Bơta Hòi Dan kờp ngai dan jà jơh ală cau iat kơlôi sơnơng Jơnau Yàng kơnòm di bơta dong kơl Louie Giglio bơh tơnggume BƠTA HÒN-CHÒ HỪH HƠH BÈP DÊ.

“Ne, gơs jơnau bơh đang trồ đơs lah: “Do la Kòn kòñ gơboh Añ jê, niam nùs Añ jơh ală bơta.”  (Mathiơ 3:17)

“Dơ̆ neh ƀaptem rau, Yàng Jesu guh mo bơh dà. Ne, ală tap trồ gơ pò, mơ Kơnràñ gŏ Hwềng Yàng Tom Trồ dê be dô nơm sềm ntòp mù rơp hơđang Kơnràñ. Ne, gơs jơnau bơh đang trồ đơs lah: “Do la Kòn kòñ gơboh Añ jê, niam nùs Añ jơh ală bơta.” (Mathiơ 3:16-17)

Tom gùng lòt bal mơ Yàng, bơta bơkah lơngồt mơ jrô ndơp ròng siăm hwềng nùs bol he dê hơ̆ la bơta kòñ gơboh Bèp Đăng Trồ dê. Jơnau Song hơ̆ sơrlèt rlau mơ ală jơnau sọ̆ng ò loh làng, geh lơh cơng dô bă loh làng bơh tŭ Kơnràñ bơtào gơs lơgar hơđang ù. Dùl tom ală pơnah Sră Goh sơnròp cih loh làng wĭl tơl mơ rngoh-rngàc rlau jơh bơh Nùs Nhơm Lơh Bèp Yàng Tom Trồ dê la sră Mathiơ tap 3, tom tŭ Yàng Jesu pơndềt să tus hơ Jang Baptit nàng geh lơh ƀap-tem.

Kơlôi sơnơng tĕ rùp sơnio hơ̆: Jang gam ntào dà ngơr tus di ntơh digùl hiòng Jôđan. Ào sơnò lakđa ồng dê neh sùh tom dà. Ồng lơh ƀáp-tem mpôl oă cau in, bơto sồr ndang, bơto yal mơ wàs gùng Yàng in.

Nisơna, Yàng Jesu lòt tus mơ đơs lah: Lơh tĕ ƀáp-tem Añ in.

Jang nrơt nrơl. Bơta be òs dô nă kòn mơnùs dê ntào di đap Bơtau Sàng-Goh gen guh mo: “Să tòm añ pal dan Kơnràñ lơh ƀaptem añ in sồng di, mơ Kơnràñ tus hơ añ wơl ơ?” Jang sền gọ̆ he ò di pal- dô pah ngài ngan digùl cau glài mơ Bơtau Dọ̆ng-Klàs lơh ồng rùc cơnòa. Mơ ya tơnơ̆ mơ tŭ tombơh bơr, Jang dòn bơr. Ồng tơnkrăm Yàng Jesu tom hiòng Jôdan gen yò Kơnràñ guh. Yàng Jesu geh lơh ƀáp-tem nàng wĭl tơl ntào di tiah cau glài tom bơta rơndap dŏng tơwài, pò dô bơta sơntòm pa mơ sàng-goh kòn mơnùs in, bulah Kơnràñ sàng-goh mơ ò gơs tồi-glài.

Sră Goh cih lah tơnơ̆ mơ tŭ Yàng Jesu guh bơh dà, ală tap trồ gơpò, Yàng Hwềng Goh mù kung be sềm ntòp rơp hơđang Kơnràñ. Gen gơs jơnau bơh đang trồ đơs dờng- dô jơnau yal tơnggit bal mơ bơta ai lơh krơi kung bal mơ bơta gơklŏ ò git jơh. Oh mi git jơnau đơs hơ̆ la ñchi taih?

Jơnau đơs hơ̆ neh sòr tơrlah jơh ală bơta kơlôi sơnơng mơ bơta kơlôi iơh be òs jơh ală cau neh pơjum hơ gah hiòng Jôdan tom ngai hơ̆. Oă cau ntào gùt dar Jang Baptit digơlan neh mòng mơ dô nă ồng pe jơt sơnăm do- Jesu cau Naxaret. Tom dơngoh kơlôi bol khai dê, Kơnràñ mìng la “kòn klau Jôsep dê”, kòn dô nă cau lơh chî rbah lơ-oì. Kơnràñ têh dờng tom dô nơm ƀòn dềt ò ngài bơh hơ̆. Digơlan bol khai gam kah rùp Kơnràñ kơnhơl tom gùng tŭ gam dềt, hala sền gọ̆ Kơnràñ tom tŭ neh têh dờng, lòt rê tom hiu hòi dan mơ tom drà.

Mơ tơnơ̆ mơ tŭ Yàng Jesu geh lơh ƀáp-tem, Yàng Bèp neh rang tơlik loh bal mơ jơnau đơs dờng, crih-crài bơh trồ tom ngai pơjum hơ̆, Kơnràñ neh đơs bơta lơi?
Hơ̆ la dô jơnau lah pơrhơng kràñ-cê, gơchồl kòn mơnùs pal mhar lơh jat ală sơnoa rnoàs gùng duh khoai di ơ? Hala hơ̆ la ală jơnau jak-chài jơnhoa ngan, ngài ngan bơh bơta lơngai ò loh làng plai ù dê? Hala la dô jơnau sồr pal sền Yàng Jesu neh lơh niam nùs Kơnràñ dê tus cơđoà lơi?
Ò di behơ̆.

Yàng Bèp neh đơs: ““Do la Kòn kòñ gơboh Añ jê, niam nùs Añ jơh ală bơta.”

Gơ kung be jơnau yal tơlik mơ jơh dunnia lah: “Añ la Yàng Tom Trồ, mơ do la Kọ̀n Klau Añ jê. Añ kòñ gơboh khai oă ngan. Añ ai lơh hừh nùs bơh Kọ̀n.” Ngan la dô jơnau song dờng ngan!

Dilah Yàng Tom Trồ đơs bơh trồ, bol he òs kơlôi Kơnràñ rơp ai dô bơta bơto jak-chài jrô ndơp, hala lơh bol he in ai lơh krơi bơh bơta git jơh, dipal rngòt Kơnràñ dê. Mơ ya ò. Hơ̆ mìng la jơnau đơs nùs nhơm rang tơlik bơta hòn-chò wĭl tơl dô nă Cau Bèp dê.

Bol he pal cang ai hwềng nùs he tơnkrăm tom jơnau song do. Ơm bơdơh tĕ, kơlôi sơnơng mơ dòp bơta hơ̆. Digah hiòng Jôdan nam hơ̆, Yàng Bèp neh rang tơlik bơta gơtom klac digùl Kơnràñ mơ Yàng Jesu ò di la dô “nơm sră hơ pơgòn ìng” rọ-ràñ, ală pơnah mìng hơđang sră pơàr, hala dô sèng jòng ală rnoàs mơ gơnoar sồr bơklơn pal lơh jat.

Bơta gơtom klac hơ̆ la bơta tom klac mang ryŭ kung be bơta kòñ gơboh tom hiu nhă. Hơ̆ la bơta tom klac kis bơh nùs tus nùs, tom tŭ Bơtau Crơng Gơs jơh trồ tiah yal tơlik Kòn Kơnràñ.

Bulah git lah Yàng Tom Trồ la Bơtau Gơnap-Gơnoar, Sàng-Goh, mơ Sŏng-Ring, mơ bơta gơjràñ dờng sŏng-ring gam gơn ală cau ò bài dòp bơta nđàc Kơnràñ dê. Mơ ya bơta dờng mang Yàng Jesu kòñ rang tơlik loh làng dunnia in: Yàng Tom Trồ la Cau Bèp bềng nùs kòñ gơboh.

Bol he sền gọ̆ loh lang bơta hơ̆ tom tŭ Kơnràñ pò tơlik bơta kòñ gơboh dờng ơnang Kòn Kơnràñ dê. Jrô ndơp ngan, jơnau Niam yal tơlik lah Yàng Tom Trồ kung pò ơnàng bơta gơtom klac hơ̆ oh mi in mơ añ, cèng wơl oh mi in bơta ring-lơngai jrô ngan tom hwềng nùs. Kơnràñ la Bèp, ai bol he la ală kòn klau, kòn ur Kơnràñ dê. Yàng Tom Trồ kòñ gơboh oh mî, dòp oh mi lài mơ tŭ oh mi rgơi pơnđơl lơh dô bơta lơi hơ̆ Kơnràñ in, mơ Kơnràñ hòn-chò hừh nùs rang tơlik lah oh mi gơrê mơ Kơnràñ. Rlô bòl tĕ tom bơta kòñ gơboh Bèp dê ngai do.

Dan jà bol he dô nùs bal tòm bơta hòi dan: Khoai Bèp Đăng Trồ kòñ gơboh kòn dê, ưnngai Yàng tài bơh Kơnràñ la Aba, la Bèp kòñ gơboh kòn dê. Ơ Bèp, oă dơ̆ kòn gơkòl hwài tom kơrwàl broă lơh dê, ală bơta kơnjơ̆ mơ ală bơta kơlôi sơnơng tìs nrah lah kòn pal lơh bơta do, dòp geh bơta ne gen song di pal dòp geh bơta kòñ gơboh Kơnràñ dê. Dan Bèp toh glài bơta ò dòn mơ ală bơta kơlôi rngòt tom nùs kòn. Tŭ do, dan Yàng Hwềng Goh bư tom hwềng nùs kòn, dong kòn wă- wơng mơ git lam bơta kòñ gơboh ò git jơh mơ Bèp neh ai kòn in gan Yàng Dọ̆ng-Klàs Jesu. Dan jơnau đơs bơkah lơngồt Bèp dê yò đo kòn, bơtơl pràn kòn in lòt gan ală bơta gơlòng tom gùng hơđap. Kòn jơh nùs hòi-dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, ală công nha gùng duh khoai hala ală bơta pơnđơl pràn dờng ò dî la rnoàs geh bơta kòñ gơboh. Yàng kòñ oh mi hơ̆ la tài bơh Kơnràñ la dô nă Cau Bèp lơbơn niam, kòñ gơboh. Tom tŭ oh mi niam nùs ơn bơta dòn tom Yàng Jesu, oh mi geh cơnoà mut tom bơta gơtom klac đềt mêr mang ryŭ hơ̆. Oh mi geh Kơnràñ dòp, sền gar mơ yò đo. Digùl rài kis kalkê nggồr-nggàc sùm pơnđơl nàng kơr oh mi gan gơnoar pràn hala sơbàn, kơp kòñ oh mi ơn tĕ nùs he nàng kơno jơnau đơs Bèp di đơs òm: “Do la kòn kòñ gơboh Añ jê, niam nùs Añ tom ală bơta.” Bàñ ntoàt jat bơta dòn dòp dunnia dê, mơ rlô bòl tĕ tom bơta kòñ gơboh ò tŭ lơi tom pơrgơl Bèp Đăng Trồ dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.