Gơs dô bơta gơplơ̆ be do: bol he dòn nin la Yang gơs gơnap gơ noar nàng dong tă hwềng soàn he lik klas bơh brong ồs brah ting sum sum, mơya ò khin dòn Yang tơl rgơi at bồ hơđăng ală bơta kơlôi rcang bơh khà jền priă, bơta ròng siam oh kòn hala ală bơta kơnjơ̆ ngai hìng dê. Ñchi bơtài bol he yal tơlik bol he geh khat gơ boh tòm Bơtau Krist, mơya bồ dơngoh sum gơ kòl jàm tòm ală bơta ò ring lơ ngai, dơrcul taih? Digơlan do la sèng ho wơl: bol he niam nùs wă rò Yang mut tòm rài kis nàng dòp rò bơta dong klas, mơya ò rcang sir nàng Yang lơh gơs Bơtau at bồ kòp ngai. Bol he yal tơlik Yang la Bơtau Dong Klas, mơya ò tŭ lơi yò tơngguh Yang lơh gơs la Cau tòm at bồ rài kis he dê.

Ngai do, ngai 27/06/2026, Bơta Hòi Dan Kòp Ngai dăn jà ală ồng mò oh mi bơtê bal jơnau Yàng dê kơnòm dê bơta dong kòl mò Mariel Davenport bơh tơnggume: ÑCAU AT BỒ RÀI KIS HE TAIH?

“Lòi tĕ bơta lơngap lơngai Bơtau Krist dê at bồ tòm nùs oh mi…” (Kôlôse 3:15)

Lòi tĕ bơta lơngap lơngai Bơtau Krist dê at bồ tòm nùs oh mi, la bơta lơngap lơngai mơ oh mi neh geh hòi tus tòm dô nơm să jan; kung gơs tĕ nùs ưnngài. Ai tĕ jơh ală bơta jak chài nàng jơnau Bơtau Krist dê ơm bềng lìu tòm oh mi; ngui bơta đơs crih, bơta đơs chò, mơ sèng đơs chò đah hwềng mơ bơto tơngkah bal mơ gơp, mơ tòm nùs đơs chò Yàng Tom Trồ in dô bă gơs bơta nđàc. Dilah oh mi lơh bơta lơi, bulah jơnau đơs hala broă lơh, ai tĕ sơnđan Yàng Jesu mơ lơh jơh ală bơta, kơnòm di Kơnràñ mơ ưnngài Yàng Tom Trồ la Bèp. (Kôlôse 3:15-17)

Geh tìp Yang Jesu bơh kơ nòm sa, añ đal git loh làng să tòm pal càng Yang ò git nđò. Tòm ngai Yang geh jòi bàn añ, añ gam gơkram, ò jai nhìm tòm bơta tồi glai kung be bơta iơh rmơh să tòm dê. Gen behơ̆ , añ đal git tơn lah hwềng soan añ roh bơta ring lơ ngai mơ ji gloh tơrhir bơta dong klas Yang dê ò git nđò.

Mơya pa do, tŭ bơ tê pơsrăm Sră Goh, añ git dô jơ nau song mơ añ neh git rau, mơya añ ò tŭ lơi sền nền nền mơ kơ lôi sơ nơng jrô ndơp behơ̆ .

Tòm Broă 2:36 cih: ‘Behơ̆, jơh hìu Israel git tĕ nền lah Jesu do, la Bơtau ală oh mi neh pơng di chi pơng, gen Yàng Tom Trồ neh bơtào lơh gơs Yàng mơ Bơtau Krist.’
Sèng Sră Goh do ràng tơlik dô jơ nau song kwơ màng ngan: Yang tus ò dê mìng dong tă bol he lik bơh bơta chơt roh tồi glai dê – bulah bơta hơ̆ la dô bơta nđàc dờng ngan ò git nđò. Yang la Bơtau Krist, Bơtau Messia geh bong mơña nàng dong tă bol he lik bơta hàm kòñ poac să jrô ndơp tòm dơlam. Mơya Yang tus tài bơh dô nơm tơnggu jrô ndơp rlau mơ hơ̆… Yang tus nàng lơh gơsYang bol he dê.
Tòm jơnau Hy Lạp, kyrios gơs gơtha la Yang, la Cau At bồ. Bơtau Crơng gơs ò dê mìng sor Kòn Yang tus nàng rwat wol ala phan crong gơs neh roh, mơ gam lơh pa wol bơta at bồ hơ đang phan hơ. Yang tus nang lơh Cau tòm mơ lơh gơs Yang tòm ala bă tiah jro ndop rlau jơh tòm rài kis bol he.

Sèng lùp kòp nă bol he in lah: Bol he niam nus jào jơh ala pơnah tòm rài kis he dê Yang in sơl?

Gơs ală pơnah añ niam nus mơ git ưnngai tŭ lòi Yang Dong Klas Jesu lơh gơs Cau tòm. Be tòm bơta bơto sôr oh kòn, añ khun bồ nàng Yang at bồ. Añ git loh să tòm ò rgơi lơh dilah siơ̆u Yang. Gơs tŭ, añ tus di đap jơng Yang nang tòm bơh bơr, tơng kah să tòm lah Yang neh hòi sac añ lơh gơlik gơs la cau mè. Añ hòi dan Yang ai pà bơta nđàc nang ròng siam oh kòn jat gùng dà Yang dê, tài bơh añ git să tòm òs mòng gơ tup tìs. Git Yang lơh cau tòm pơnah hơ̆, nus añ gơlik gơs ring lơ ngai mơ ưn ngai Yang ò git nđò.

Mơ đơs dô bă nền cê, gam gơs ală pơnah añ òs prap is să tòm in, ò kòñ dòp gơ noar Yang in at bồ. Añ pơnđơl sơm bat “gơ noar at bồ” să tòm dê. Ală bơta pồn ndơp do òs pồn ndơp tòm bồ dơngoh añ jê. Ò gơs dô nă cau lơi git añ pơndang jòo phi Yang in, mìng Yang git lơm. Mơya, Yang git loh jơh!

Gơs ală bă tiah jrô ndơp tòm hwềng nus mơ aŏ rngòt pal jào Yang in. Bồ dơngoh poac să añ jê sum rngòt: Digơlan Yang rơp dan bơta lơi tềng añ sơl? Yang rơp ai gơ noar lơh nền is añ jê sơl?

Mơya, pa do Yang neh tơngkah añ dô jơ nau song lơ ngồt ngan: Bă tiah lơi Yang at bồ, bă tiah hơ gơs bơta ring lơ ngai.

Be jơnau Yang cih tòm Kôlôse 3:15 “Lòi tĕ bơta lơngap lơngai Bơtau Krist dê at bồ tòm nùs oh mi…”

Gơnoar at bồ Yang dê sùm cèng tus bơta ring lơ ngai ngan. Yang rơp pò mat añ gŏ dô bơta nền ngan lah: dilah gơs pơnah lơi tòm bồ dơngoh hala rài kis añ siơ̆u bơta ring lơ ngai, gen bă tiah hơ̆ añ òhềt bơtào Yang la Yang.

Ală pơnah gơ lơh añ pal pơndang tòm bơta ò ring lơngai, dơrcul tŭ ai bơta lơh nền hala tòm bồ dơngoh, la bă tiah añ pal khun bồ lòi Yang at bồ tơn. Tŭ kư̆ pơnđơl at bồ, rơndap mơ rcang is rài kis he dê, bol he rơp roh bơta ring lơ ngai ngăn.

Bơta gơlòng pal tus, mơ bơta moat jrung la bơta ò rgơi pleh klas tòm rài do. Mơya gơs dô bơta ring lơ ngai rlau mơ ală bơta git wa kòn mơ nus dê. Hơ̆ la bơta ring lơ ngai añ mơ ồng mò oh mi rgơi git làm nàng tòm ală pơnah tòm rài kis – bơh broă rong siam oh kòn, tòm hiu nha, tòm tiah lơh broă, đah bơh dìh gùng dà tus ală bơta tòm klac gùt dar he.

Tŭ añ at bồ tòm bơta kơlôi sơ nơng, lòi gơ pơrdô jat ală bơta kơlôi sơ nơng iơh, gen bơta cah is mơ bơta pơndang rơp at bồ. Mơya tŭ bồ dơngoh gơ wèt dê Yang, gen bơta ring lơ ngai Yang dê rơp at bồ bulah bơta gơlik gơs kal ke rlau jơh.

Dan jà bol he dô nùs bal tòm bơta hòi dan: Khoai Yang kòñ gơboh, Bơtau Dong Klas mơ la Bơtau at bồ rài kis kòn dê! Kòn ưnngai Yang tài bơh Kơnràñ neh bàn kòn tòm ală nam kơnhai gơkram tòm bơta tồi glai. Mơ khoai Yang, dan toh glai kòn in, tài bơh oă ngai neh rlau kòn gam roh ring lơ ngai tài bơh bơta hàm kòñ is gen pơnđơl sơm bat gơnoar at bồ. Kòn pồn ndơp ală bơta kơ lôi sơ nơng, ò khun bồ tòm ală pơnah nàng lòi Yang at bồ. Ngai do, kòn pơndềt să, jào phi mơ jào jơh gơnoar at bồ jơh rài kis kòn tòm tê Yang. Dan bơta ring lơ ngai jòng rlau mơ bơta git wa Yang dê at bồ jơh nus nhơm kòn, bulah tòm bơta kalke jê sồt mơ kơnjơ̆ kơn jut rlau jơh. Kòn ai sơnđan Yàng Jesu Krist, hòi dan mơ Yàng Bèp. Amen.

Ơ ală ồng mò oh mi kòñ gơboh, digơlan tŭ jơ do, bơta gơlik gơs gùt dar ồng mò oh mi bềng bơta jê sồt, bơta kơn jơ̆ kơn jut mơ bơta gơ lòng oă ngan. Mơya dan kah lah Yang Tòm Trồ neh ai Kòn Dul Yang dê la Yang Jesu tus, nàng lơh gơs la Bơtau Dong Klas mơ bơtau at bồ tom kòp gùng lòt bol he dê. Tòm ngai do tơn, kơp kòñ añ mơ ồng mò oh mi jào gơ noar at bồ rài kis he dê Yang in, nàng git làm bơta ring lơ ngai hơđang trồ krơi is mơ Yang neh ho pơ gon.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.