Cau òs đơs lah “hiu la tiah he in rê”. Mơya dilah dô ngai, hiu hớ ò bơta chò hòp tai, gơs dô nơm dơrnang cang king mơ lơh ală cau tòm hiu hớ ò tòm klac bal mơ gơp tai, gen bol he rơp gơn kơnòm tòm bơta lơi taih? Ngan behớ, ò gơs tú lơi mơnàng hiu ntào di đap oă bơta dơrcul lơnggơr mơ rơp tơrlah tơrlơm bè ngai do. Dô hiu nhă mor cah is, ală bơta ò niam sơlo ngai sơlo gơ bơtơl oă tòm mpôl cau mơ dà lơgar. Hiu nhă la tiah mơ tơnggơs nùs nhơm, rai kis dô nă cau dê tòm bơta sên gó mơ git wă. Dilah hiu hớ tơrlah tơrlơm gen hwềng soan he rơp roh rui tòm tiah gơn kơnòm lơngap lơngai.

Ngai do, ngai 28/06/2026, rơndap bơta hòi dăn kòp ngai hòi jà ồng mọ oh kơlôi sơnơng Jơnau Yàng bơh tơnggume HIU NHĂ SÙM NTÀO KỚ TÒM YÀNG

“Behơ̆ bol hi hòi dan mơ Yàng Tom Trồ bol hi dê, mơ bơtào cau sền gàr nàng rcang kơp gàr tòmdră mơ bol khai ngai mơ mang.” (Nehemi 4:9)

“Mơya tòm tŭ Sanbalat, Tôbiah, ală cau Arap, ală cau Ammôn mơ ală cau Asdôt kơno broă bơt wơl dơrñang neh ntoat tơngguh mơ ală tiah tơrlah neh mòr bơt wơl wil tơl, gen bol khai gơhào gơjrañ oă ngan, 8mơ jơh tơl nă bol khai bơtào kai gơrmơ̆i bal nàng lòt tòmlơh tòmdră mơ Jerusalem mơ lơh oă bơta sơlồng sơlàng tềng hơ̆. 9Behơ̆ bol hi hòi dan mơ Yàng Tom Trồ bol hi dê, mơ bơtào cau sền gàr nàng rcang kơp gàr tòmdră mơ bol khai ngai mơ mang.” (Nehemi 4:7-9)

Tòm ală bơta yal yau tòm Sră Goh yau, ẵn rngoh rngac ngan bơh rai kis ồng Nehemi dê mơ tòm bơta bơt mòn wơl dơrnang bòn Jerusalem. Nehemi la dô nă cau gơs rai kis hòi dan pràn kơldang ngan, ồng ò gơs tú lơi lơh broă jat nùs is mơ ò hòi dan mơ Yàng Tòm Trồ lai ngan. Hòi dan ò di la dan Yàng lơh jat nùs kỡn he dê, mơ la bơta pơndềt să nàng he in gơlik gơs dô nùs bal mơ nùs kỡn sang goh Bơtau Gơnap Gơnoar dê. Gơwèt mơ kòp nă cau kung mơ kòp hiu nhă, bol he pal jòi jat bơta sơnio mơ tề lam bơh Kơnràn lài mơ tú bol he sơntòm rơndap tap seng bơta lơi. Bơh di bơta tòm klac đềt mêr hớ, Yàng Tòm Trồ rơp at bồ mơ tề lam bol he.

Kòp mang lài mơ tú ală kon rê bic, ẵn bal mơ bol khai dô nùs bal cun gơltang nàng hòi dan, dan Yàng ơn tòm ală kòn dô têl sơnio loh lang bơh gơtha đah hwềng he dê tòm bơta kỡn gơboh Kơnràn dê. Jơnau hòi dan dơng rlau jơh ẵn dan hớ la dan sơnđan mơ bơta kwơng mang rai kis ală kon dê ò di sơntòm bơh hiu nhă, mè bèp mơya la geh cah is bơh di bơta tòm klac đềt mêr mơ Yàng Dong Jesus Krist mơ geh sơnđan la kon Yàng Tòm Trồ dê. Cau kơnòm să ngai do kal ke ngan tòm bơta lơh cau in git oă bơh sơnđan he. Mơ dilah he geh ơm kớ tòm bơta kỡn gơboh Bơtau Krist de, kon sau bol he dê rơp sền gó gơtha ngan, kớ cê lòt gan tòm ală bơta gơlong bol glar tòm rai kis do.

Dô nùs dô bă bal la bơta pal gơs tòm dô nơm hiu nhă, bulah hớ la hiu is he de hala hiu nhă Yàng Tòm Trồ dê – la ală cau dòn Yàng. Bol he pal tòm klac đềt mêr, kòp nă dô pơnah is he de tòm bơta duh broă bal mơ gơs dô bơta he ò rgơi tòm gơl. Nehemi neh gó mơ git bơta do dô bă loh lang tòm tú sền di dơrnang bòn Jerusalem neh tơrlah tơrlơm tòm oă nam. Hớ la broă lơh kal ke ngan, lài mơ hớ ò gơs cau lơi rgơi kơlôi tus la pal bơt wơl dơrnang do. Mơya Nehemi neh git lah, kỡn bơt wơl dơrnang pal gơs bơta dô nùs mơ duh broă bal ală cau tòm bòn dê.
Ngan behớ, să jan Bơtau Krist dê ming pràn kơldang tú ală pơnah lơh sir broă gơ dê. Nàng hiu nhă kung bè Hiu Jum Goh rgơi kis tòm klac mơ gơlik cồng nha, kòp ală cau pal lơh sir gơnoar broă he dê.

Lài mơ tú ơn pơnai lú sơnròp, ală cau sò tơm neh ai jơnau dơnõ tơnhial, đơs iơh nàng lơh gơplớ nùs lang bol dê. Mơya broă bơt bơtào wơl kừ pơnjat. Kòp pơnai lú do tus pơnai lú ne, kòp hiu nhă dô nùs bal, dơnang sơlo ngai sơlo bơt jơnhoa hơđang.

Kòp hiu nhă pal bơt is dơrnang đah tơnớ hiu he dê. Tú dơrnang jơnhoa hơđang, nùs gơjrẵn cau sò tơm dê sơlo bơtơl oă. Bol khai jòi kai nàng gơrwàng gut dar mơ tòm dră. Ơm di đap ală broă do, lang bol rngòt rngơt mơ kung ò tơl pràn tai bơh ală ngai lơh broă ò gơs rlô. Gen tú hớ, ồng Nehemi neh lơh bơta lơi?
“Behơ̆ bol hi hòi dan mơ Yàng Tom Trồ bol hi dê, mơ bơtào cau sền gàr nàng rcang kơp gàr tòmdră mơ bol khai ngai mơ mang.” (Nehemi 4:9)

Lai ngan ồng hòi dan. Tơnớ hớ, ồng sơntòm lơh broă. Làng bol Yàng dê cih ală pơnah rơndap tap seng nàng sên gar is: dô pơnah gul cau tòm bòn bơt dơrnang, cau gam wơl ceng pềs, tà nàng drơng kơp bơh trồ mang tus di tú mat tơngai lik, phan tòm lơh ò rgơi lòi. La dô nă cau at bồ tòm hiu nhă, bol he bơtê git dô bơta bơtê bơh ồng Nehemi: hòi dan mơ lơh jat la broă pal lơh bal tòm bơta dòn kràn cê. Hòi dan mơ ò lơh jat la bơta dòn chơt, mơya lơh mơ ò hòi dan la bơta jong să he dê.

Kung bè ală hiu nhă cau Israel năm yau or àn ơnong lơh dơrnang tòm hiu he dê, ngai do, bol he kung gơs pơnah bơt bơtào dô rai kis sang goh, dô dơrnang đah hwềng kớ cê tòm hiu nhă he dê. Gơs oă ngan pơnah nàng he rgơi gơs pơnah bal tòm broă dơng mơ kal ke hớ – prap gar tú jơ hòi dan is tòm hiu nhă, hòi dan ala, ơn tê ai lơngai, mơ sum yal wơl ală bơta nđàc kung bơta song ring Yàng Tòm Trồ dê.

Dan jà bol he dô nùs bal tòm bơta hòi dan: Khoai Yàng, ưnngai Kơnràn neh dòp rò kon tòm hiu nhă đah hwềng Kơnràn dê. Dan ai kon in bơta jak chài bơh đang trồ tòm tú kon bơt bơtào mơ sên gar hiu nhă kon dê. Tú kon bol glar hala gơplớ nùs, dan tơngkah hwêng soan kon lah Kơnràn la Bơtau rgơi lơh ală bơta tồn lah ò rgơi tai. Dan Kơnràn hòi jà, chôl bơtrut kon mut tòm bơta hòi dan mơ lơh ală broă mơ bơta dòn. Dan Kơnràn dong bol kon nàng bol kon in tòm klac bal bè dô hiu nhă gam sum sum tòm sơnđan Yàng Jesus Krist. Kon hòi dan, ai sơnđan Yàng Jesus Krist, Amen.

Ơ ală ồng mò oh mi kỡn gơboh, dơrnang sên gar hiu nhă ồng mò oh mi dê ò di bơt tòm dô ngai lơm, kung ò di la dô nă cau lơm rgơi bơt. Mơya dô ngai dô êt, bơh ală jơnau còp să, ală broă lơh kah kơlôi bal mơ gơp, bơh tú hòi dan is tòm hiu nhă,… Yàng rơp ngui kòp nơm lú nàng lir wơl gơlik gơs dô nơm dơrnang kớ cê ồng mò oh mi in. Ồng mò oh mi chò nùs bal mơ cau bau he dê mơ ală kon hòi dan, ơn hiu nhă he Yàng in at bồ mơ sơntòm bơt “dơrnang” mơ Kơnràn jao ồng mò oh mi in sơl? Kơp kỡn Ngai Hiu Nhă nam do dê rơp gơlik gơs gơtha, tú hiu nhă dô nùs bal bơt wơl, bơt bơtào dô hiu nhă kớ cê sum sum tòm tê Bèp Kỡn Gơboh dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.