Rim ‘nu lu bơ̆n đei ‘blŏk kơ minh ‘bar nu bơngai pơm phara ‘biơ̆ lăm trong yak năm rai tơ wơ̆ ‘lŏ bơ̆n. Hlĭch dêh tơdrong gĭt lu sư pơm ưh kơ tôch ‘bơ̆t doh, dôm tơdrong ‘lơ̆ng lu sư rei lăm chăl arih lu bơ̆n oei ră roi ăn kơ bơngai nai. Nhen thoi gơmơ̆k gơwang hơbŏl lar kơpal đak đơ̆ng rŏng kơ minh pôm tơmo iĕ huŏng, minh tơdrong pơtrŭt, minh tơdrong bơtho tơpă, dah minh tơdrong arih pơm kơmĭl…gơh hơtŭt pơm tôm tơdrong hloh kơ bơ̆n ‘bôh.

Năr ‘nâu, năr 01/07/2026, tơdrong tơdă Amăn Jơ Krao Khan Rim Năr krao wơ̆n bơngai mơ̆ng wŏng tơchĕng hơdai nơ̆r ‘Bok Kei Dei kơ̆l ‘bai ĐEI HƠMET ADROL WĂ NĂM HƠMET ĂN

“Na iĕm pơm kiơ̆ inh, thoi inh pơm kiơ̆ Yêsu Krist.” (I Kôrintô 11:1)

“Đơ̆ng rŏng kơ ‘noh Pôl năm đơ̆ng Pơlei Aten truh tơ Pơlei Kôrintô. Tơ ei sư tơ’bơ̆p minh ‘nu bơngai Juđê anăn sư Akila. Bơngai ei mĕ sư tơpŭ sư tơ dêh char Pôntơ. Sư păng akăn sư, anăn sư Prisil, ‘nao jăk đơ̆ng dêh char Itali yua kơ pơtao Klôt athei đĭ-đăng bơngai Juđê jăk đơ̆ng lăm Pơlei Rôm. Bre sư bơ̆jang tơdrong pơm hnam tua-la-tăng na Pôl năm oei hloi tơ hnam bre sư, jang hơdai păng sư yua kơ Pôl juăt kơ jang tơdrong noh mơ̆n. Pôl kư̆m bơtho rah tơdrong ‘Bok Kei-Dei.” (Tơdrong Jang 18:1-3)

Oh lăng tơ inh, măt sư đum, chro ti kơkach kơ̆l, “oh ‘maih pơhrăm nơ̆r ‘Bok Kei-Dei hăm lu ‘nhŏng lu mŏ”

Noh bơih mŏ păng oh tơ’bơ̆p băl blŭng a. Dôm tơdrong mơlâu blŭng a tŭk lê̆ đơ̆ng lăm jơ akŭm kơkuh, pơpôi băl lăm năr prăng rŏ tŏ ‘lơ̆ng păng lăm năr tơngiĕt ‘bĕnh kơ prĕl gom, ‘nhŏng mŏ oh lu nhôn ngôi jum dăr kơ gŏ pai ‘nhĕm ‘nhot oei tŏ. Hơ’mon hơiă kơ tơdrong arih Khoa jê̆ wă roi rơđah. Arăk kơ pơma nơ̆r yuăn wă hiơt hiong bơih, Khoa hrĕnh tĕnh iŏk nơ̆r inh pơ ‘lơ̆ng yua kơplah tơchĕng pơwao nơ̆r Kră Yang.

Khoa tơ’bơ̆p Kră Yang Yêsu hơđăl tơpă đơ̆ng akăn sư bơngai Philipin, sư ‘mêm kơ Kră Yang lơ păng lui ngeh kơ Sư, mălei tơdrong arih ngôi ngơ̆r, thông mang mơ̆t lăm hnam phak kisơ̆, Khoa pơm kơ hnam dơnŏ sư ngil ngŭl, ưh kơ ‘maih mơ̆ng dôm nơ̆r Khoa pơm kơdranh tơpă.

Weh năm, oei tơgah yanơ̆m tơ char Mi lăm kơplah 13 sơnăm, Khoa nhen thoi sem lĕch đơ̆ng adrŭng, tơchĕng khan kơdih rơngei yak năm lăm anih să sap, ưh kơ băt kơdih oei đom lăm hơdrong tơdrong măng mu, ‘bĕnh kơ tơdrong tơtông klĕ, păng pơrăm tơdrong arih kon bơngai. Tơdrong juăt bơngai yuăn păng tơdrong pơdrơ̆ng lăm hnam dơnŏ hrĕnh tĕnh hiong đĭ nhen thoi gơmơ̆k ‘bŏng, Khoa mơ̆t khŭl lu bơngai kơchu, hiơt kơ nơ̆r pơma kơdih, juăt kơ nơ̆r pơma plơ̆ng păng hlĭch, hrĕnh tĕnh juăt kơ tơdrong arih ‘bĕnh kơ tơdrong yoch.

Ưh kơ hăl, Khoa ră roi “oh ‘maih mơ̆ng mŏ roi tơdrong Kră Yang, yua kơ oh ‘maih pơm kơdranh păng tơblang tơdrong Kră Yang oh kơ ‘bă, păng duch ma lăm hnam dơnŏ. Nơ̆r yuăn oh ưh kơ tôm mah na oh khŏm pơhrăm.”

Lăng lăi jơ năr tơnăp bơwei khul pơhrăm nơ̆r ‘Bok Kei Dei, chơ̆n jơhngơ̆m hăm lu oh noh ‘bĕnh kơ tơdrong sơ’ngon, inh đei pơlung hăm tơdrong hơ’mon đơ̆ng tơdrong arih Prisil păng Akila. Dơ̆ng ‘bơ̆t anăp Khoa ră roi, inh tep măt hăm đak măt ro, kŭp kơ̆l ‘bơ̆t anăp ‘Bok Kei Dei tơ’ngla ‘mêm mơmat, apinh Sư chông anhăk. Kră Yang ba inh yak năm lăm chăl adrol sơ̆, brŏk tơhnam ‘bĕnh kơ re jơwa ‘bŏk pơm ‘long, jơwa jrŭm sĭt tua-la-tăng, păng ‘bĕnh kơ tơdrong hơ’mon kơ Kră Yang Yêsu tơ pơlei Kôrintô.

Yă Prisil păng klo Akila, sư bơngai Juđê, sư tơ dêh Pôntơ, ‘nao jăk đơ̆ng dêh char Itali” yua kơ pơtao Klôt athei đĭ-đăng bơngai Juđê jăk đơ̆ng lăm Pơlei Rôm. ‘Bok Pôl năm ngôi tơ sư” (Tơdrong jang 18:2).

Inh tơchĕng ‘Bok Pôl hăm jrŭm sĭt tua-la-tăng lăm hơnglâu ti hơbĕch hơbal, oei hiôk chơt ră roi kơ Prisil păng Akila dôm tơdrong hơpo păng tơdrong Yang Bơhngol ‘Lơ̆ng tơ’bôh kơ sư, đĭ jơhngơ̆m tơblang dôm tơdrong lui hlĭch chrơp. Đơ̆ng năr arih minh pôm hnam dơnŏ, pơnam kơ jang wei rong kơdih kâu, truh tơ năr yak hlôi đơ̆ng đak dơsĭ, ră roi tơdrong ‘Bok Kei Dei dŏng pơklaih, Prisil păng Akila pơm kiơ̆ Pôl, nhen thoi ‘bok Pôl pơm kiơ̆ Kră Yang Yêsu.

“Na iĕm pơm kiơ̆ inh, thoi inh pơm kiơ̆ Yêsu Krist.” (1 Kôrinhtô 11:1)
Tơdrong Jang 18:8 ba lu bơ̆n lăm chăl yak năm ‘Bok Pôl. Sư hao thŏng nan hăm Akila păng Prisil truh tơ dêh Siri, đơ̆ng noh truh tơ pơlei Êphêsô.

Pôl “năm tơ hnam akŭm pơjah hăm bơngai Juđê”, Prisil păng Akila ‘bôh bơngai Juđê anăn Apôlê, pơlei pơla Alĕksandrê kŭm ‘nao truh pơlei Êphêsô. “Sư pơhrăm tơdrong Kră Yang Yêsu boih păng jơhngơ̆m sư wă tơpă gah bơtho tơdrong Yêsu. Sư bơtho tơdrong Yêsu kư̆m trŏ mơ̆n mă-lei sư băt ưh tam mă tôm ôh. Sư bơtho tơdrong ‘batem, sư bơtho kiơ̆ kơ Yôhan đĕch; sư tam mă băt tơdrong ‘batem hăm anăn Kră Yang Yêsu Krist. Apôlê năm tơ Pơlei Êphêsô bơtho tơ hnam akŭm bơngai Juđê. Sư bơtho kư̆m nuih tơpă mơ̆n. Lăp Prisil păng Akila mơ̆ng sư bơtho bre sư anhăk ba sư truh tơ hnam bre sư. Bre sư bơtho ăn kơ Apôlê tơdrong ‘Bok Kei-Dei wă kơ sư hlôh băt tôm ‘biơ̆” (Tơdrong Jang 18: 25-26).

Apôlê gơh gah pơma dơnuh păng hlôh băt nơ̆r ‘Bok Kei Dei đei đơ̆ng Prisil păng Akila thĕng hreh pơhrăm truh tơ “Apôlê kư̆m wă năm tơ dêh char Grĕk mơ̆n. Na lu bơngai lui tơ Pơlei Êphêsô tơgŭm sư chih kơ sư kơthơ wă chĕp ba ăn kơ lu buăl lui tơ dêh char Grĕk, apinh lu bơngai lui ei sơng iŏk sư. Lăp Apôlê truh tơ char Grĕk boih, Apôlê bơtho tơgŭm tơpă kơ lu bơngai ‘Bok Kei-Dei mơnat ăn lui kơ Yêsu boih. Sư pơjah hơgei tơpă păng lu bơngai Juđê, jei sư ngăl. Sư yua sơ̆p hla bơar ‘Bok Kei-Dei tơbăt ăn kơ lu bơngai Juđê Yêsu boih ‘Bok Krist mă ‘Bok Kei-Dei ăn wă kơ pơgơ̆r bơ̆n.” (Tơdrong Jang 18: 27-28)

Lăm jơ pơhrăm nơ̆r ‘Bok Kei Dei, Khoa ‘net ‘net băt kơ tơchĕng pơwao păng ră roi hăm nơ̆r adrĕch adrŭng kơdih. Khoa sư oei đei mơlâu mălei ‘bĕnh kơ tơdrong hiôk hơiă tơpă” hơkăn inh jing linh krao khan gơh hơgei hơ mŏ”. Kŭp măt sa hơte oei tŏ, inh kep iŏk ‘nhot hla ‘bay ‘lơ̆ng, jrâu tơ đak măm ĕnh kơ tơdrong hiĕk, inh hiĕk hơdar khan kơ Khoa “Mŏ ‘bôh oh pŭn dêh, yua kơ đei akăn oh jing linh krao khan đunh bơih”.

‘Nao wă chro ti iŏk kơ chŏk đak prel rơngơp, Khoa lăng inh păng hiĕk “hă ơi, trŏ bơih mŏ, yua kơ đơ̆ng akăn oh, oh đei năr thoi âu. Akăn oh chih anăn oh rim kơ phŏng, păng krao khan prăt măng, krao anăn oh ling lang. Trŏ nhen thoi linh krao khan. Pơma rơ̆n nơ̆r sư ‘nao pơhrăm iŏk. Khoa hiĕk hiôk chơt hăm muh măt hiôk rơhăo.

Đunh bơih hiơt hiong kơ nơ̆r yuăn, Khoa pơhrăm lơ hloh dơ̆ng păng ‘bônh kơ răk lơ hloh dơ̆ng. Khoa pơ̆n nuih tơ’bơ̆p lơ bơngai yuăn, đei tơdrong arih pơ̆k huŏng lăm tơdrong et sik soai thoi noh, sư đĭ jơhngơ̆m tơgŭm păng pơm kơdranh gah tơdrong tơplih mơsêh mơyang đơ̆ng Kră Yang.

Đơ̆ng rŏng kơ phĕt ‘blŏk kơ tơpŭ kơ Yang Yêsu, Khoa nhơ̆m roi kơ khŭl lu nhôn mơ̆ng jơ năr sư đei pơm kơdranh, roi kơ tơdrong mơsêh mơyang Yang Yêsu lăm chăl arih sư lăm kơplah jơ pơgơ̆p adrĕch adrŭng.

Inh tơ oei tơ kơpal tang dŏ sôpha tơ mum, jơhngơ̆m inh ‘bĕnh kơ tơdrong bơnê kơ Kră Yang, lăng Khoa yơ̆r ti hiôk chơt: ” Sư mơ̆ng lu oh adrĕch adrŭng sư pơma yuăn chơt ưh kơ gơh wă roi, mŏ ah”. Lu nhôn hiôk hiĕk rơ̆n, hiôk chơt hơri bơnê kơ Kră Yang. Nơ̆r jơwa brŏ reh păng dôm ‘bai hơri ‘lơ̆ng rơgoh hiôk chơt đei răk lăm inh, lăm Khoa, păng inh kŭm lui ngeh kơ Kră Yang kŭm oei hiôk chơt kơ minh tơdrong arih đei tơplih thoi Khoa.

Apĭnh đĭ đăng krao khan hơdai: Kơkuh kơ ‘Bok Kei Dei, Tơ’ngla pơjing plĕnh teh! Bơnê kơ Ih tơgŭm lu nhôn băt yua tơdrong tơchĕng păng nơ̆r pơma wă kơ ư-ang, hơri bơnê anăn Ih. Apinh Ih kŭm oei bơtho, pre hơmet kơ lu nhôn đei pơhrăm dih băl, yua ‘bơ̆r păng tơdrong tơchĕng lu nhôn ră roi tơdrong dŏng pơklaih păng tơdrong ‘mêm Ih ăn kơ lơ bơngai. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, mă ih oei arih lăm tơdrong thoi yơ, athei jê̆ khul bơngai lui păng lu bơngai hli yom kơ Kră Yang. Athei hơmet wă kơ đei pơhrăm, pre ăn kơ kơdih akâu, păng tơgŭm bơngai nai hlôh nơ̆r ‘Bok Kei Dei păng đei hlôh wao kơ ră roi. Tơnăp arih hăm tơdrong noh kơplah pơhrăm nơ̆r ‘Bok Kei Dei hơdai, păng tơ anih ưh kơ đei bu băt noh jơ̆ pran kơtang wă kơ ih yak năm hăm tơdrong Yang Yêsu đei dan ăn bơih. Minh tơdrong arih đei tơplih, păng pơtrơp tơplih bơngai nai.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.