Ơ ală ông mò oh mi, gơs tŭ lơi ông mò oh mi gơloh he in bol glar bơh ală “sơnđăn ò kwơ” mơ cau dunnia tơnàñ hơđăng he sơl? Gơs tŭ lơi bơta bơh yau hiu nhă he dê, hala ală bơta tis bơh pah rai lai gơlik gơs dô nơm mƀùr dờng ngăn, jrơm ndơp jơh ală bơta pơnđơl pràn mơ cau ngăn să tòm he di sơl? Ngăn ò ring bal, mơya hơ̆ la bơta golik gơs ngăn mơ oă cau tòm bol he găm pal tòm tip kòp ngai. Behơ̆ gèn, lơh mƀe lơi nàng bol he rgơi lòt găn jơh ală bơta gơjràñ hơ̆ mơ joi wơl bơta kwơ màng ngăn să tòm he di?

Ngai do, ngai 02/7/2026, tơnggu Hoi Dan Kòp Ngai dăn ja ông mò oh mi kơlồi sơnưng bal Jơnau Yàng kơnòm bơta dong kòl Joy Brunson bơh tơnngu mê SƠNĐĂN KRƠI IS NGĂN.

“Mơya oh mi la jơi bơtian geh sac rwah, la cau gơnoăr ơn phan duh khoai cau bơtau dê, la lang bol sang goh, la lang bol is Yàng Tom Trồ dê…” (1Pier 2: 9)

Tŭ añ hơ pơgòn bau, nus añ bềng bơta chò hòp bơh rài kis pa ơm di gah cau bau klau ngai tơnơ̆ di. Dô ngai ne, tòm tŭ sền lướt mạng xã hội, nisơna añ geh sền jơnau tòmpà dô nă cau ùr ne. Cau ùr hơ̆ ràng tơlik dô bơta kơlôi, moàt tòm tŭ mòr păl gocah sră Hộ Khẩu, lik ngai boh hiu nhă mè bèp deh nàng cơnđòa tòm dô nơm hiu nhă pa. Cau ùr hơ̆ rngòt pal săng lòi dô pơnah gơđềt mơ bơta òs mòng să tòm he di. Tŭ hơ̆ mơ, dô bơta kơlồi gơ pờ tòm bồ dơngoh añ: “He ò ndrơm mơ cau ùr hơ̆ dô ềt lơi.”

Gơwèt mơ añ, broă nền cê geh cih sơnđăn tòm dô nơm hiu nhă pa, golik gos “bau ùr” dô nă cau dê, la dô bơta añ kòp gơn rlau jơh tŭ cơnđòa tòm bơta tòm bau. Añ sền bơta gơtus hơ̆ la dô bơta sơntòm pa wil tơl- dô păng sră bò pa, dô sơnđăn pa.

Tai bơh bờh lai, añ neh gơs dô tŭ jŏ jòng añ sền rài kis he kừ gơkòl kơt bơklơn bơh ală bơta să tòm he ò tŭ lơi rgơi ăt bồ. Bùlah cau ò rgơi đơs song mat tòm toh măt, mơya añ rgơi dờp git găn di ală găr mat sền sơwì cau dê, hala jơh ală bơta gơn kơnòm ơn hơđăng să tòm he. Tŭ lơi kùng behơ̆, gơlơh be tòm ryas, ơnih tiah ăñ geh deh sùm la bơta cau ndai in cèng nàng kơr kòp yà, mơ ò gơs cau lơi ơn nus kơlôi sền lah añ găm pơnđơl pràn nàng lơh wil tơl să tòm he kòp ngai mbe lơi. Bulah pơndơl pràn mbe lơi, añ găm ò rgơi lik klas bơh mƀùr dô nơm “tiang pơnrơ iơh” gơ ò di bơh să tòm he lơh gơs. Hơ̆ la bơta àñ kơnjơ̆ nus kơlôi bol glar rlau jơh, tŭ să tòm he pal àñ ơnòng ală bơta jê sồt mơ iơh rmơh bơh di pah rài yau dê.

Nus nhờm añ gơlik gơs dô bă băl krơi is ngăn tòm tŭ añ sên tus bơta yăl yau Jepthe tòm Sră Goh.

“Jepthe cau Galaat la kòn klau dô nă cau ùr dri, khai la dô nă cau ling pràn kơldang ngăn. Bèp khai la dô nă cau Galaat.” (Ală Kwăng Cahrña 11:1)

Hơ̆ la sèng Sră Goh sơnrơp sèng yal yau, mơ kùng la bơta sơnrơp bol he geh git bơh Jepthe. Añ kah dơ̆ sơnrơp sền tus ting do, nus añ ai lơh jê sồt ông in rlau jơh. Ñchi bơh tai dô nă cau pal kong àñ dô sơnđăn sràt bơtăng behơ̆? Sền pơnjat gèn git, ală oh mi dô bèp pha is mè neh bơtrơh ông lik bơh hiu ming bơh bơta lik rai bơh dô nă cau mè. Mơya rai kis ò rgơi kơlôi tus, tŭ ală bơta nisơna gơlik tus, să tòm ală cau oh mi hơ̆ pal lòt joi ông. Ñchi bơh tai? Tai bơh jrô ndơp tòm dơlăm, bol khai git loh gơnoăr pràn ngăn ông dê. Ông la dô nă cau ling pràn kơldang khin chà, mơ kơnòm bơta nđàc bơh Yàng Tom Trô, ông neh bơtao lơh gơs cau kwăng ăt bồ bol khai. Sèng yal yau Jepthe de la dô nơm cơng tang kis ai bơta dong twoai in, ai bơta nđàc krơi is mơ gơnap gơnoăr tòm gơl Yàng dê. Dunnia rgơi lơh nền glài mơ tơnàñ sơnđăn oh mi, mơya Yàng sùm ăt bồ nàng cih wơl rài kis ông mò oh mi dê jat gùng Kơnràñ dê.

Tŭ jơ hơ̆, añ be nrơt nrơl di đap dô jơnau song: sơnđăn bol he dê ò geh lơh nền bơh hiong mhàm geh lòi wơl tòm mhàm jơi bơtian, mơya la bơh Mhàm kas màng Bèlat Kòn dê.

Gơs tŭ lơi ông mò oh mi neh gơdùh tòm bơta gơlik gơs ndrờm behơ̆, sền gơlơh he ndrờm be dô nă “cau glài” bơh bơta gơtòm klac gơđềt ò? Gơlơh be cau ndai sền di ală bơta kong alah, bơta tis cau tòm hiu nhă di nàng cahrña ông mò oh mi, ala bơh dờp git să tòm he dê. Bơh tŭ dờp git ală bơta đal git, añ neh pal kis hơđơm mƀùr bơh dô nơm pơnrơ iơh ò di bơh bơta lơh lòt he di neh lơh, mìng bơh tòm ryas hiu nhă.

Mơya tòm dô ngai ne, Yàng neh sol pơnđang tòm nus nhờm añ găn di jơnau Kơnràñ tòm sră Galati 1:10:

“Ai tŭ do, añ joi bơta nàng lơh niam nùs kòn mơnus hala lơh niam nus Yàng Tom Trồ taih? Añ kờñ lơh niam nus kòn mơnus ơ? Dilah añ gam kờñ lơh niam nus kòn mơnus, gen añ ò di la dĭ gơna Bơtau Krist dê ò.”

Añ dòp git lah cau rai do rgơi kơlôi sơnnưng hala bơyai kòp ală bơta bol khai kờñ, mơya bơta klŏ rlau jơh di la kis dô rai kis niam nus Yàng Tom Trô. Hwềng nus añ geh tơngkah bơh rùp sơñio Yàng Dong Jesu tŭ Kơnràñ kong sền òsơp, tơñiŏ tơnhial hơđăng grôi Gogôtha bulah Bềp Kơnràñ la Bơtau Wil Tơl, Bơtau Git Jơh mơ Bơtau Wil Niam rlau jơh! Hơ̆ la tŭ jơ gơlik tus, ngai mơ añ đăl git loh ngăn sơnđăn tòm he dê: añ gơri mơ Kơnràñ.

“Mơya oh mi la jơi bơtiàn geh sac rwah, la cau gơnoăr ơn phan duh khoai cau bơtau dê, la làng bol sàng goh, la lang bol is Yang Tom Trồ dê,…” (1Pier 2: 9)

Dilah òng mò oh mi ò hềt dòn duh nùs nhờm mơ rai kis he Yàng Jesu in, gèn hơ̆ la jơnau hòi ja ai oh mi in ngai do. Cơnđòa wơl tĕ, ơn wil tơl bơta dòn he tòm Kơnràñ nàng dòp rò dô sơnđăn pa wil tơl.

Tòm tŭ bol he wèt nus tus hơ Bơtau Krist mơ dờp rò bơta nđàc dong klas bơh Kơnràñ, bơh tòm Mhàm kas mang sang goh rờp jùt rào, rao goh jơh ală bơta bơ̆ iơh tồi glài dê, kòp ngai sơmbời ală bơta tềl sồt jrô ndơp tòm hwềng nus. Yàng Jesu ò kong chờt dô bă ò kwơ hơđăng chi pơng. Kơnràñ neh phi să nàng bol he geh hồ bơta àñ kơñjơ̆, cơnđòa tòm dô nơm rai kis gơs gơtha, bềng bơta chờ hòp mơ bơta ang Kơnràñ dê.

“Mơya dilah bol he lòt tom bơta ang kung be Kơnràñ ơm tòm bơta ang, gen bol he gơs gơ tòmklac bal mơ gơp; mơ mhàm Yàng Jesu dê, Kòn Kơnràñ, rào goh jơh ală tồi glài bol he dê.” (1Jang 1:7)

Dan jà bol he dô nùs bal tòm bơta hòi dan: Khoai Yàng Jesu kờñ gơboh kòn dê, ưn ngai Kơnràñ bơh Jơnau Kơnràñ ngai do neh tus nàng sơmbời hwềng soàn jề sồt kòn dê. Ơ Yàng, oă dơ̆ bol kòn bol glăr rlau jơh di đăp ală găr mat sền sơwì, ală jơnau tòm bơyai bal mơ jơh ală bơta kơlôi iơh cau dunnia dê. Mơya ưn ngai Yàng bơh Kơnràñ ò sền kòn be dunnia sền. Kơnràñ sền gŏ nùs nhờm kon, ală bơta pơnđơl pràn mơ ală bơta jề sồt kòn dê. Dăn mhàm sang goh Yàng Dong Jesu pơnjat sơmbời ală tềl sồt, dòp prăp jơh ală bơta àñ kơnjơ̆ tòm nus kòn. Dăn dong kòn sùm kah lah he la kòn klau, kòn ùr Bơtau hơđăng ală bơtau, nàng kòp ngai kòn geh cơnđòa lòt tòm bơta ang mơ lơh gơklŏ sơnđăn Kơnràñ. Kòn jơh nus hoi dăn tòm sơnđăn Yàng Jesu Krist, Amen.

Ơ ală ông mò oh mi kờñ gơboh, bulah cau dunnia gơs bơta sền sơwì, sền ò sơp, hala bơta bơh yau ông mò mi dê gơs mƀe lơi; tŭ ông mò oh mi neh gơri mơ Kơnràñ, ông mò oh mi neh la kòn klau, kòn ùr Bơtau hơđăng bơtau dê, Yàng hơđang ală Yàng. Tòm Bơtau Krist, jơh ală bơta yau neh lòt găn, ông mò oh mi neh gơlik gơs dô nă cau geh crơng gơs pa wil. Ƀañ lòi ală sơnđăn ò kwơ dunnia di lơh nền rai kis ông mò oh mi di tai, tơnggờr tĕ bồ mơ kơ̆ cề cơnđòa lòt tom sơnđăn màng ryŭ mơ Yàng ai pà, oh mi yơ!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.