Ih mă ‘mêm, hăm đei layơ ih mơn ‘bôh gleh lap yua kơ dôm kơ “hla ar pơklep anăn” mă kon bơngai đei dan ăn kơ ih ưh? Đei layơ tơdrong so đơ̆ng hnam dơnŏ, dah dôm kơ yoch glăi đơ̆ng jơhnơr yak hơdrol đei jing bôl tih dêh, pĕng klơ̆p lê̆ dôm tơdrong adrin păng kon bơngai tơpă đơ̆ng ih? Ưh kơ tơpăt tơpă, mă lei ‘noh jơ̆ hmă tơpă dang ei mă lơ bơngai lăm lu bơ̆n oei đei tơ’bơ̆p rim năr. Thoi noh na, pơm thoi yơ wă kơ lu bơ̆n gơh hlôi kơ dôm tơdrong ưh kơ lăp đon ‘noh păng chă dơ̆ng tơdrong gĭt tơpă đơ̆ng akâu jăn?

Năr ‘nâu, năr 02/07/2026, tơdrong tơdă Amăn Jơ Krao Khan Rim Năr krao wơ̆n bơngai mơ̆ng wŏng tơchĕng hơdai nơ̆r Kră Yang hăm bơngai chih Joy Brunson kơ̆l ‘bai ANĂN IH ĐEI LĂM YANG YÊSU KRIST BƠIH

“Mă-lei gah bơ̆n, Sư rơih iŏk bơ̆n wă kơ bơ̆n jing adrĕch adrung Sư, bơ̆n kư̆m thoi lu bơngai soi kơ ‘Bok Kei-Dei Pơtao bơ̆n, bơ̆n dang pơlei pơla Sư, teh đak Sư boih…” (I Pêtrôs 2:9)

Kơplah inh hơkơ̆t, jơhngơ̆m inh ‘bĕnh blai tơdrong ‘nă hal gah tơdrong arih ‘nao hăm klo tơ anăp. Minh năr ei, oei lăm kơplah lăng điê̆n thoăi, inh đei ‘bôh đŏk đơ̆ng minh ‘nu duch adruh ră roi. Duch ei tơ’bôh tơdrong hiơ̆k bơngơ̆t, đei ‘blŏk đêl kơplah wă jê̆ kăt lê̆ anăn lăm hla ar hnam dơnŏ, ataih đơ̆ng hnam dơnŏ mĕ ‘bă wă pơjing hnam dơnŏ ‘nao. Sư hli kơ đei mơn lăm jơhngơ̆m athei achăng minh pah tơdrong đei hơdai hăm tơdrong juăt trŏ kơ đei đơ̆ng kơdih kâu. Kơplah noh hloi, minh tơdrong tơchĕng đei lăm kơ̆l inh: “Inh hoi kơ đei ‘bôh lĕi lăi thoi duch noh tŏ sĕt hloi.”

Hăm inh, tơdrong gơh jing chih anăn lăm minh pôm hnam dơnŏ ‘nao, jing “akăn” kơ minh ‘nu bơngai, tă kơ jơ̆ tơdrong inh chang gô hloh kơplah yak lăm iŏk klo kăn. Inh lăng tơdrong yak ‘noh thoi minh tơdrong pơtơm ‘nao tơpă- minh hlak ‘nao ‘lơ̆ng rơgoh, minh anăn ‘nao.

Yua kơ adrol ki, đei minh jơ năr đunh inh ling lang mơn ‘bôh tơdrong arih kơdih nŏng kơ đei chô̆ pơkơ̆ng yua kơ đơ̆ng dôm tơdrong kơdih kâu ưh kơ gơh kĕ wă pơgơ̆r. Mă bơngai nai ưh kơ đei pơma hơđăl, mă lei inh oei mơn sơng iŏk đơ̆ng dôm kơ măt sek tơlang, dah hăm dôm tơdrong chang hơmĕng ‘măn ăn kơdih kâu. Tơdah layơ kŭm thoi noh, nhen thoi tơm rơh, anih inh tơpŭ ling lang jơ̆ tơdrong bơngai nai tơlĕch kŏng pơtŏ pơting, ưh kơ đei bu hiơ̆k tơtăm kơ inh oei adrin hơmet akâu jăn kơdih rim năr thoi yơ. Mă adrin thoi yơ, inh oei ưh kơ gơh hlôi rơngei kơ rup đơ̆ng minh “nơ̆r kơnê̆” trŏ ưh kơ đơ̆ng kơdih pơm. ‘Noh jơ̆ minh tơdrong pŭ trăp đon tơchĕng gleh lap tơpă, kơplah akâu jăn nŏng kơ đei pŭ iŏk dôm tơdrong ơh sơ’ngon păng hơtŭt ‘bơm đơ̆ng jơhnơr adrol.

Jơhngơ̆m inh thar jing hơdai hlĭch tơpă kơplah inh đŏk truh kơ hơ’mon kơ Jeptha lăm Sơ̆p Hla Bơar Nơ̆r ‘Bok Kei-Dei.

“Jeptha, bơngai Gileat, sư bơngai nuih kơtang. Sư kon drŏ-nglo bơngai drŏ-kăn đi; ‘bă sư bơngai Gileat.” (Lu ‘Bok Sek Tơlang 11:1)

‘Noh jơ̆ trong Nơ̆r ‘Bok Kei-Dei lăm blŭng a hơ’mon, păng kŭm jơ̆ tơdrong blŭng a lu bơ̆n gơh băt gah Jeptha. Inh ‘blŏk blŭng a đŏk truh ‘bơ̆t dâu, jơhngơ̆m ‘bôh mơnat kơ sư dêh. Yua kơ liơ minh ‘nu bơngai đei pŭ iŏk tơdrong pơklep ăn ơh sơ’ngon thoi noh? Đŏk pơtrơp na băt, lu ‘nhŏng oh hơdai ‘bă mĕ pha đei puh tơweh sư lĕch đơ̆ng hnam lăp yua kơ tơdrong đơ̆ng mĕ pha. Mă lei tơdrong arih ưh kơ băt adrol, tơdah tơdrong kơnê̆ thar truh, trŏ kơ dôm bơngai ‘nhŏng oh noh đei athei năm chă sư. Yua kơ liơ? Yua kơ jrŭ tơ lăm, lu sư băt hơđăl tơdrong gơh hơgei tơpă đơ̆ng sư. Sư jơ̆ minh ‘nu bơngai linh pran nuih, păng yua kơ đơ̆ng ‘Bok Kei-Dei mơnat ăn, sư đei gơh pơm bơngai pơgơ̆r lu sư. Hơ’mon đơ̆ng Jeptha trŏ jơ̆ minh tơdrong tơ’bôh arih kơ tơdrong dŏng pơklaih, kơ tơdrong mơnat ăn hlĭch chrơp păng mơsêh mơyang tơplih đơ̆ng Kră Yang. Teh đak gơh sek tơlang păng jô̆ jou ih, mă lei Kră Yang ling lang pơgơ̆r wă chih hơmet chăl arih ih kiơ̆ kơ Sư.
Lăm jơ ‘noh, inh nhen thoi ‘brĕng hơdơ̆r ‘bơ̆t anăp minh tơdrong tơpă: anih anăn lu bơ̆n ưh kơ đei dan lê̆ yua kơ pham đơ̆ng lăm adrĕch adrŭng, mă jơ̆ Pham kăp đơ̆ng Kon Triu.

Hăm đei layơ ih huŏng lăm tơdrong arih thoi noh, mơn ‘bôh kơdih lĕi lăi thoi mĭnh “bơngai yoch” yua kơ tơdrong đơ̆ng hơdai ưh? Lei lăi Thoi bơngai nai nŏng kơ lăng lăm dôm tơdrong ưh kơ đei kĕjei, yoch glăi đơ̆ng hnam dơnŏ wă jô̆ khan kơ ih, tơplih yua kơ lăng đơ̆ng kơdih kon bơngai ih tơpă. Đơ̆ng kơplah đei hlôh băt, inh đei arih lăm bôl đơ̆ng minh nơ̆r kơnê̆ ưh kơ trŏ đơ̆ng kơdih pơm, lăp hmă đĕch yua kơ tơm adrĕch adrŭng hnam dơnŏ.

Mă lei lăm minh năr, Kră Yang đei pơchrang hơdai lăm jơhngơ̆m inh đơ̆ng nơ̆r Sư lăm sơ̆p Galati 1:10:

“Inh pơma thoi noh kon bơngai ưh kơ lăp đon ôh. Mă-lei inh wă kơ ‘Bok Kei-Dei lăp đon kơ tơdrong jang inh. Dah inh wă kơ kon bơngai lăp đon kơ inh đĕch lei ưh kơ sĭ inh jang tơdrong Yêsu Krist ôh.”

Inh ‘bôh băt khan kon bơngai gơh tơchĕng pơwao dah pơma roi ‘bơm dôm tơdrong kiơ lu sư wă, mă lei mĭnh tơdrong tơm đĕch jơ̆ arih minh chăl arih ‘Bok Kei-Dei lăp đon. Bơhngol inh đei tơ’blŏk gah rup ‘Bok Dŏng Pơklaih Yang Yêsu kơplah Sư pŭ iŏk đe pơjăm, che bơle tơ kông Gôlgôtha- mă ‘Bă Sư jơ̆ Tơ’ngla ‘Lơ̆ng Rơgoh, Mơsêh Tăp Pang Mơyang Tăp Dăr! ‘Noh trŏ jơ̆ jơ đei tơplih, năr mă inh hlôh băt tơpă anih anăn tơpă đơ̆ng kơdih: inh gah Sư.

“Mă-lei gah bơ̆n, Sư rơih iŏk bơ̆n wă kơ bơ̆n jing adrĕch adrung Sư, bơ̆n kư̆m thoi lu bơngai soi kơ ‘Bok Kei-Dei Pơtao bơ̆n, bơ̆n dang pơlei pơla Sư, teh đak Sư boih. ….” (I Pêtrôs 2:9)

Dah ih ưh tim mă đei ăn jơhngơ̆m chu yom păng chăl arih kơdih kơ ‘Bok Dŏng Pơklaih Yang Yêsu, lei ‘nâu trŏ jơ̆ nơ̆r krao ‘măn ăn kơ ih năr ‘nâu. Athei yak wih dơ̆ng, ăn đĭ đon lui anih Sư wă sơng iŏk minh anăn ‘nao plơ̆ng tơpă.

Dah lu bơ̆n ăn jơhngơ̆m gah ‘Bok Krist păng sơng iŏk tơdrong mơnat ăn dŏng pơklaih đơ̆ng Sư, trŏ Pham kăp ‘lơ̆ng rơgoh gô pik sŭt, rơgoh dôm kơ ‘mê̆ ‘mach đơ̆ng tơdrong yoch, rim năr pơklaih dôm kơ ơh sơ’ngon lăm jrŭ anih bơhngol. ‘Bok Dŏng Pơklaih Yang Yêsu ưh kơ pŭ iŏk tơdrong lôch hăm tơdrong ưh kơ đei yua tơ kơpal ‘long pơglang. Sư đei lôch tang wă kơ lu bơ̆n gơh achăng gleh lap, yak lăm minh chăl arih đei yua, ‘bĕnh blai tơdrong hiôk chơt păng hơdah đơ̆ng Sư.

“Dah bơ̆n oei lăm hơdah Sư, kư̆m thoi Sư oei lăm hơdah, lei ‘bơ̆r đon bơ̆n hiôk hơiă dih băl tơpă. Na pham Kon Sư Yêsu Krist ‘nhao rơgoh bơ̆n tôm tơdrong yoch.” (I Yôhan 1:7)

Apĭnh đĭ đăng krao khan hơdai: Kơkuh kơ Yang Yêsu mă ‘mêm kơ kon, bơnê kơ Ih yua kơ Nơ̆r Ih năr ‘nâu đei truh wă pơklaih kơ bơhngol ơh sơ’ngon đơ̆ng kon. Kră Yang ơi, lơ wơ̆t lu kon gleh lap dêh ‘bơ̆t anăp dôm kơ măt lăng sek tơlang, dôm nơ̆r bâu roi păng hăm dôm tơdrong ưh kơlăp đơ̆ng kon bơngai. Mă lei bơnê kơ Kră Yang yua kơ Ih ưh kơ lăng kon thoi kon bơngai lăm teh đak lăng. Ih lăng ‘bôh jơhngơ̆m kon, dôm kơ tơdrong adrin păng hăm dôm tơdrong ơh sơ’ngon đơ̆ng kon. Apinh pham kăp ‘lơ̆ng rơgoh đơ̆ng Yang Yêsu pơtrơp pơklaih dôm kơ rơka, iŏk lê̆ dôm tơdrong gleh trăp mơlŏu lăm jơhngơ̆m kon. Apinh tơgŭm kon ling lang ‘blŏk khan kơdih jơ̆ kon tơdăm, kon adruh kơ Pơtao kơ rim pơtao, wă kơ rim năr kon gơh yak năm lăm tơdrong hơdah păng pơ ư-ang anăn Ih.
Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, mă kon bơngai lăm teh đak đei roi pơma ‘bơm, ưh kơ lăp đon, dah tơdrong so ih đei thoi yơ hĭ; tơdah ih đei gah Sư, ih đei jơ̆ kon tơdăm, kon adruh Pơtao kơ rim pơtao, Yang kơ rim yang. Lăm ‘Bok Krist, dôm tơdrong so đei hlôi, ih đei jing minh ‘nu bơngai jing ‘nao tơpă. ‘Nĕ kơ ăn kơ dôm hla ar pơklep anăn đơ̆ng teh đak hơgăt ăn kơ ih bơih, athei ngơk kơ̆l kơjung păng kơjăp yak năm lăm anih gĭt hloh mă Kră Yang ‘măn ăn, ih hŏ!
Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.