Sră Goh sơnđan bol he la ală cau lĭng chi-pơng cơnoà lòt hơđơm phồng Kơnràñ dê. Mơ ya tom bơta tơm lơh đah hwềng hơ̆, gơs ală ngai bol he sền gọ̆ he gơlơh be ò rgơi lơh bơta lơi di đap ală thèng kơ̆-cê cau sò-tom dê. Dơrñăng jơnhoa bơta kòp jê dê, bơta siău siar jên prĭa dê, hala bơta sòr tơrlah bơta kòñ gơboh cau tom hiu nhă gam lòng nùs khĭn cha bol he dê. Bơta òs gơs tom kòn mơnùs sồr bol he pal rùc tĕ hala tomsòr. Mơ ya bơta dòn ngan ò ơm momọ̆, ò lơh broă lơi mơ kong alah bơta gơlòng, mơ ya pơnjat dòn bơr, hòi-dan mơ jòng-ro Yàng- bulah tŭ òhềt sền gŏ dơrñăng tơrlơm lề.

Ngai do, ngai 03/07/2026, Bơta Hòi-dan Kờp Ngai dan jà jơh ală cau iat kơlôi sơnơng Jơnau Yàng kơnom di bơta dong kơl Cathy Irvin dê gan tơnggume BƠTA DÒN GƠS BROĂ LƠH.

“Bơta dòn kung behơ̆ sơl: dilah bơta dòn ò gơs broă lơh gen gơ chơt is gơ dê.” (Jakơ 2:17)

“Mơ tai, ƀòn Jerikô neh til mpồng đah dơlam mơ đah bơdìh tài bơh làng bol Israel, ò gơs cau lơi lik hala mut. Yàng Jehôwa đơs mơ Jôsue lah: “Sền ne, Añ neh jào tòm tê mê ƀòn Jerikô bal mơ cau bơtau mơ jơh mpồl ling gơ dê. Bol mê pal lòt gùt dar ƀòn dô ngai dô dơ̆ bal mơ jơh ală cau ling. Bol mê pal lòt tĕ behơ̆ tòm prau ngai, mơ poh nă cau gơnoar ơn phan duh khoai at poh nơm kơlwòk ngke belàt dam lòt hơđap Đài Bơta Ho Bal. Tòm ngai poh bol mê lòt tĕ gùt dar ƀòn tòm poh dơ̆, mơ ală cau gơnoar ơn phan duh khoai uh kơlwòk. Tòm tŭ bol mê kơno ntas kơlwòk ală cau gơnoar ơn phan duh khoai neh uh sap jòng, gen jơh làng bol pal driau dô sap dờng; mơ dơrñang ƀòn rơp tơrlơm lề jơh, mơ jơh làng bol kòp nă rơp guh song hơđap.” (Jôsuê 6:1-5)

Ngai do, bol he kơno oă ngan bơh bơta dòn. Mơ ya bol he ngan neh wă wơng jrô bơh bơta kơlôi sơnơng mơ kơlôi lah ƀuôn-soh hơ̆ sơl?

Sền wơl bơta yal yau ƀòn dờng Jerikô tơrlah-tơrlơn tom Jôsuê 6. Làng bol dòn bơr Yàng lòt gut dar ƀòn, uh kơlwòc driau dờng. Kơlôi tĕ broă lơi gơlik gơs tơnơ̆ hơ̆? Ală dơrñăng kơ̆-cê, jơnhoa nisơna tơrlơm lề jơh. Gơnap-gơnoar do neh hòrlik bơh di dô bơta dòn wĭl tơl- dô bơta dòn sơmbat kơ̆ di jơnau ho Kơnràñ dê mơ geh lơh cơng bal mơ bơta dòn duh wĭl tơl, sơrlèt rlau ală sơnoa rnoàs be òs dê hala ală bơta tomgơl trồ tiah dê. Tom tŭ bơta lơh nền, bol khai neh driau dờng nggồr lam trồ tiah.

Bơta dòn rơp ò ơm nggui momọ̆ kơp gơn dơrñăng tơrlah-tơrlơm. Bơta dòn driau dờng pha lĭn nàng phà tơrlah dơrñăng hơ̆.

Bơh ală tŭ bol he sền gọ̆ lơbơn-lơñọ rlau jơh, tom tŭ gơlòng mơ ală bơta gơrwàng lơh gơrềt ƀồ dơngoh tiàn gơs ò găm dô ềt pràn lơi tai nàng rgơi jòng-rô mơ rang tơlik bơta pha lĭn. Broă pò bơr jòng-ro digùl bơta gơlòng bol glar neh lơh gơs dô cơnoà bơta lơh nền kràñ-cê, phà tơrlah bơta gơplơ̆ nùs nàng tom sòr wĭl tơl mơ gơnap-gơnoar Kơnràñ dê. Bol he pal sơmbat kơ̆ di Jơnau Yàng Tom Trồ dê, ai sơnđan Yàng Jesu mơ rang tơlik gơnap-gơnoar Kơnràñ hơđăng ală dơrñăng, ală mơnơm kơryan rài kis he nàng sền gơ lề-làc. Jơnau đơs mơ bơta driau dờng yal tơlik hơ̆ la broă lơh loh lang, la bơta ho wơl cơnoà bơh di ală bơta bol he dòn nền jrô ndơp hwềng soàn dê. Bơh do, kài mpồng đah hwềng rơp pò ơnàng mpồng bơta krơi, lơh jơh ală dơrñăng pal tơrlah-tơrlơm.

Yàng neh đơs mơ Jôsuê lah Kơnràñ neh ai ƀòn hơ̆ ơm tom tê ồng, mơ Kơnràñ kung sơniọ loh dô gùng lòt tŭ tơngai loh lang nàng tompìt geh gơ. Sèng lùp ai bol he in la: Ngan sơl bol he òs kong alah mhar ir tom tŭ pal kơp gơn dô bơta geh tơmgơl? Nền-cê, bơta kơp gơn ò di la pah tơngai ò kwơ, mơ la dô bơta lòng-tiar nùs nhơm nàng gơ lòt bal mơ tŭ lơh nền Kơnràñ dê. Pal sùm cih kah tĕ bar jơnau “kơ̆ nùs”. Bulah tom tŭ kơp gơn hala tom tŭ sền gọ̆ bơta dọ̆ng tă, bol he gam rgơi pơnjat jòng-ro Yàng tài bơh bơta dòn-sọ̆ng Kơnràñ dê. Tài bơh tŭ tơngai Kơnràñ dê sùm sùm wĭl tơl.

Bol he la ală cau lĭng chi-pơng, cơnoà jat nha phồng Kơnràñ dê. Tom tŭ đal git sap gơchôl mang ryŭ Hwềng Goh dê tom dô btơa kalkê rlau jơh, bol he sơrbàc-sơrbang uh kơlwòc yal tơnggit. Yàng rơp at-bồ mơ chôl hwềng nùs bol he, ai bol he in gơnap-gơnoar bơta dòn dê nàng đal git lah bơta pha lĭn neh ơm di đap mat. Gen tang, kơp kòñ kờp nă bol he pal prap kơ̆ jơnau lơh cơng bơh bơta dòn, bàñ tŭ lơi loì-roh bơta gơn kơnom.

“Bơta dòn la bơta git nền cê he rơp geh bơta he gơn kơnòm, la cơng tàng bơh bơta he òhềt gŏ.” (Hebrơ 11:1)

Bơta dòn dọ̆ng hwềng nùs đal git be òs ală bơta lơi mơ ală pơnah să-jan poăc să ò rgơi đal git.

Jakơ 2:17 cih: “Bơta dòn kung behơ̆ sơl: Dilah bơta dòn ò gơs broă lơh gen gơ chơt is gơ dê.”

Dơrnăng Jôsuê dê ngai òr la dô bơta geh bơ̆t mơ tê. Mơ ya tom rài kis bol he ngai do, dơrñăng hơ̆ rgơi tơlik să tom ală bơta lơi: hơ̆ la dô bơta kòp-jê tom să-jan, la ơnnòg kơnjơ̆ kơlôi rcang bơh jền prĭa, hala dô bơta gơtom klac neh sòr tơrlah pal cang bơtào wơl. Bol he pal ngui bơta dòn nàng sền loh gan ală dơrnăng hơ̆. Dơrñăng kơlôi lah ò rgơi mùt ne rơp gơkòl tơrlơm lề di đap jơnau driau dờng bơta dòn dê- hơ̆ la broă lơh dòn bơr bơh đah ngkơi bol he. Dòn kơ̆ tĕ lah bơta pha lĭn gơklŏ gam gơn oh mi hơđah ne dơrñăng.

Tom ală tŭ rềp ngan, să tom añ neh gơs tŭ lơmpah git lam bơta do tom tŭ ơn bơta dòn tom broă lơh. Kòn sau ùr dềt pa deh añ jê nisơna kòp hòr muh mơ duh să. Să tom añ tŭ hơ̆ kung kòp jê, mơ ya jrô bơh tom dơlăm nùs, añ gơs dô bơta gơchồl pràn ngan la pal tus nàng hòi-dan khai in. Tơnơ̆ mơ tŭ añ rê hiu mìng dồ êt jơ, bơta duh să kòn sau añ jê gơhùc mơ tus di àng drim hìng nau gen să-jan neh be òs. Hơ̆ la tŭ añ đal git bơta dòn ngan ò rgơi lơh òbăt. Kung be jơnau drĭau dơng sòr tơrlah dơrñăng lài òr, añ cơnoà lòt sơnđing di ală bơta Yàng đơs. Bulah tom tŭ hơ̆, bơta dòn añ jê digơlan òhềt ngan dờng, mơ ya añ git he pal cang dòn bơr mơ jao phi công nha lồi dut tom tê gơnap-gơnoar Kơnràñ dê.

Gen tang, dilah tom rài kis oh mi gam gơs dô dơrñăng kơ̆-cê lơi pal tơrlah-tơrlơm, pal sơntòm yal tơlik mơ driau dờng jòng-ro bơh tŭ do mo, tài bơh bơta dòn sŏng-ngan rơp ò tŭ lơi ơm gơn!

Dan jà bol he dô nùs bal tòm bơta hòi dan: Khoai Bèp la Bơtau at-bồ mơ la tom ryàs bơta dòn kòn dê! Oă dơ̆ ntào di đap ală bơta gơlòng rài kis dê, nùs kòn ƀuôn ngan gơplơ̆ bal mơ rngòt-rngơt mơ bơta ơm momọ̆ òkhĭn cơnoà tùs. Dan Yàng toh glài bơta siău bơta dòn kòn dê. Dan Hwềng Goh Kơnràñ dê geh tơngguh tom nùs kòn dô gơnap-gơnoar pa. Dan ai kòn in nùs khĭn cha nàng pò bơr jòng-ro bulah gơlòng bol glar, mơ dòn duh cơnoà lòt jat bơta tề lăm Kơnràñ dê. Kòn dòn kơnòm mơ jao phi công nha lồi dùt jat nùs kòñ niam wĭl tơl Kơnràñ dê. Kòn jơh nùs hòi-dan tom sơnđan Yàng Jesu Krist, Amen.

Ơ jơh ală ồng mò, oh mi kòñ gơboh, bơta dòn sŏng-ngan sơrlèt rlau hơđăng ală sră pơ-àr rọ ràñ, hơ̆ la jơh gùng lòt gơs bơta kis bơta git làm mơ dòn duh Yàng gan kờp ngai. Tom tŭ ntào bal mơ ală thèng pràn kơldang, wèt tĕ nùs hơ Bơtau sơmbat prap rài kis oh mi dê rlau mơ lơh roh bơta pràn kơldang nàng kơlôi rngòt. Tŭ jơ do mo, dilah gơs dơrñăng lơi gam kơryan bơta gơtom klac oh mi dê gơwèt mơ Yàng, khĭn cha tĕ ntào tom tiah, kơno jơnau đơs Yàng Hwềng dê mơ uh tĕ kơlwòc jòng-ro driău dờng. Dòn kơ̆ tĕ lah gơnap-gơnoar pha lĭn Kơnràñ dê rơp tuh hơđăng ală nùs nhơm git dòn duh mơ dòn kơnòm wĭl tơl.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.