Nơ̆r ‘Bok Kei-Dei khan kơ lu bơ̆n jơ̆ linh ‘long pơglang yak năm ala hla kơ Sư. Mălei lăm anih tơblah gah bơhngol noh, đei năr lu bơ̆n ‘bôh kơdih pă đei gơh tơdrŏ tơdrĕnh ‘bơ̆t anăp dur kơjăp đe ayăt. Dur tơdrong jĭ jăn, ưh kơ tôm mah kơ jên tơmam, dah pơchah răm lăm jơhngơ̆m oei wă pơlong lăng tơdrong kơjăp lu bơ̆n. Jơhngơ̆m kon bơngai athei kơdŭn tơrŏng dah hơdai hăm sư. Mălei đon lui tơpă ưh kơ kơdŭn kơ tơdrong ưh kơ thoi bơ̆n wă noh, mă pơtrơp dơ̆ng kơ tơdrong chu yom, krao khan păng ư-ang kơ Kră Yang – mă kơplah tam mă ‘bôh tơnăr dur păk răm.

Năr ‘nâu, ‘năr 03/07/2026, tơdrong tơdă Amăn Jơ Krao Khan Rim Năr apinh wơ̆n lu bơ̆n wang mơ̆ng pơwao hơdai Nơ̆r Kră Yang hăm bơngai chih Cathy Irvin kơ̆l ‘bai ĐON LUI ƯH KƠ KHAN GÔ ‘MƠ̆I

“Kư̆m thoi noh mơ̆n, bơngai bu khan sư lui boih, mă-lei sư ưh kơ pơm ‘lơ̆ng pơm trŏ, sư lui thoi noh ưh kơ yua kiơ kơ sư.” (Yakơ 2:17)

“Kơplah noh pơlei Jêrikô tang chơkăl đĭ-đăng ‘măng jang boih, yua kơ lu bơngai Isơrael truh ưh pă đei bu mơ̆t dah lĕch. Kră Yang khan kơ Jôsuê: Âu Inh jao boih pơlei Jêrikô, pơtao sư păng lu linh nuih pran sư lăm tơpang ti ih. Lei ih hăm đĭ-đăng lu linh athei yak dăr tăp kơ pơlei âu minh wơ̆t, athei pơm thoi noh lăm tơdrâu năr. Tơpơh ‘nu ‘bok soi năm adrol kơ Hom Pơgơ̆p chĕp tơpơh tŏ tơgiĕp hơke bơbe bram, truh năr mă tơpơh, lu iĕm athei dăr jum dăr kơ pơlei noh tơpơh wơ̆t, hơdai hăm tơpơh ‘nu ‘bok soi hlôm tơgiĕp, Mưh lu ‘bok soi hlôm tơgiĕp re, lu iĕm kơtơ̆ng tơgiĕp hlôm re, đĭ-đăng kon pơlei pơla ‘bơ̆r ôr jreo, na dur gô păk pơchah, kon pơlei gô tŏk hao mơ̆t rok tơklă anăp lu sư.” (Jôsuê 6:1-5)

Hrei ‘nâu, lu bơ̆n đei kơ tơ̆ng lơ gah đon lui. Mălei lu bơ̆n hăm hlôh tơpă gah jrŭ pơma kơ đon lui noh?

Athei lăng ming tơdrong hơ’mon kơ dur pơlei Jêrikô pơchah răm lăm Jôsuê 6. Kon pơlei chu Kră Yang yak năm tăp dăr kơ pơlei noh, hlôm keng păng ôr jreo. Athei tơchĕng lăng tơdrong kiơ gô truh đơ̆ng rŏng kơ noh? Dôm kơ dur kơjăp, na ‘bônh kơ pơchah hơlih păk đĭ. Tơdrong mơsêh ‘nâu đei đơ̆ng đon lui tôm mah – đon lui chô̆ kơjăp ‘bơ̆t anih nơ̆r pơkă đơ̆ng Kră Yang păng đei tơ’bôh hăm tơdrong chu yom tôm tơdrong, hloh kơ tơdrong juăt đei kơdih dah dôm kơ teh ngăl juăt kơ tơdrŏ. Lăm kơplah wă pơtôch bơih, lu sư ôr rơ̆n jơwa jơ̆p kơ plĕnh teh.

Đon lui ưh kơ dơ̆ng minh ‘bôt răp gô dur pơchah păk. Đon lui pơma ôr jreo kĕ jei wă blah dur noh.

Kơplah lu bơ̆n mơn kơ rơdu dêh, kơplah tơdrong pơlong lăng hăm tơdrong arih wăr tăp dăr kơ jơhngơ̆m đon pă đei jơhngơ̆m nơ̆r wă pơma ư ang păng roi tơbăt kĕ jei. Tơdrong ôr tơlĕch nơ̆r hơri kơplah tơdrong arih ưh kơ thoi bơ̆n wă pơm kơ bơ̆n đei jơhngơ̆m đon pran, teh pơchah jơhngơ̆m rơdu wă yak năm hơdai tơdrong mơsêh mơyang Kră Yang. Lu bơ̆n kăl kơ chô̆ kơjăp nơ̆r ‘Bok Kei-Dei, yua anăn Yang Yêsu na roi tơbăt tơdrong mơsêh Sư tơ dôm lu tơnăr, dôm lu kông pơgăn chăl arih bơ̆n na gô lăng ‘bôh sư pơchah hiong răm. Nơ̆r pơma păng ôr krao jơwa roi tơbăt noh jơ̆ tơm kơ tơdrong pơm tơpă, jơ̆ tơdrong tơ’bôh pơsĭt đon lui lu bơ̆n đơ̆ng lăm bơhngol. Đơ̆ng ‘bơ̆t dâu, ‘long pơih khoă bơhngol gô pơih tơnang ‘măng oei tang, pơm kơ dôm kơ tơnăr gô pơchah păk.

Kră Yang pơma khan kơ Jôsuê thoi âu, Sư ăn dur noh lăm tơpang ti Jôsuê, păng Sư kư̆m tơ’bôh ăn jơ năr wă blah iŏk dur noh. Nơ̆r jet ăn kơ lu bơ̆n noh jơ̆: Rŏ lăng lu bơ̆n ngăl ‘bônh kơ achăng kơplah oei răp gô tơdrong tơplih? Mă tơpă, tơdrong chang gô ưh kơ khan ưh kơ đei ôh, mă jơ̆ jơ năr oei hơjơ̆m hơmet jơhngơ̆m wă gô trŏ kơ jơ năr Kră Yang. Athei ling lang chĕp kơjăp ‘bar kơ chư “jơhngơ̆m kơjăp”. Mă khan lăm kơplah chang gô dah lăng ‘bôh tơdrong dŏng pơklaih, lu bơ̆n ling lang ư ang kơ Kră Yang yua kơ tơdrong tơpăt đơ̆ng Sư. Yua kơ trŏ kơ jơ năr Sư ling lang trŏ ‘lơ̆ng.

Lu bơ̆n jơ̆ lu bơngai linh ‘long pơglang, yak năm kiơ̆ kơ hla kơ Kră Yang. Kơplah mơn kơ đei nơ̆r pơtrŭt đơ̆ng Yang Bơhngol ‘Lơ̆ng lăm kơplah tơdrong arih gleh glăn, lu bơ̆n ngăl hlôm keng roi tơbăt hloi. Kră Yang gô pơgơ̆r păng tơ’blŏk ăn kơ bơhngol lu bơ̆n, ăn kơ lu bơ̆n mơsêh mơyang lăm đon lui wă kơ băt tơdrong kĕ jei ‘bơ̆t anăp bơih. Yua kơ thoi noh, hơpơi kơ lu bơ̆n athei chĕp kơjăp đon lui, ‘nĕ kơ tơhiong lê̆ chang hơmĕng.

“Bơngai đon lui, sư băt tơpă kơ sư gô đei. Tơdrong sư ưh kơ gơh ‘bôh sư kư̆m băt kơ đei mơ̆n.” (Hêbrơ 11:1)

Đon lui tơgŭm bơhngol hlôh băt tôm lu tơdrong mă sĕch akar ưh kơ mơn băt.
Yakơ 2: 17 đei chih: “Kư̆m thoi noh mơ̆n, bơngai bu khan sư lui boih, mă-lei sư ưh kơ pơm ‘lơ̆ng pơm trŏ, sư lui thoi noh ưh kơ yua kiơ kơ sư.”

Tơnăr dur Jôsuê sơnăm noh sơ̆ noh jơ̆ tơmam man hăm tơmo chuơh. Mălei lăm tơdrong arih lu bơ̆n hrei âu, tơnăr dur noh bơ̆n ‘bôh hăm lơ tơdrong: Noh jơ̆ tơdrong jĭ jăn lăm akâu jăn, jơ̆ trăp trĭn kơ jên tơmam, dah tơdrong pơgơ̆p pă đei ‘lơ̆ng kăl kơ hơmet. Lu bơ̆n kăl kơ yua iŏk đon lui wă kơ lăng klĕch kơ kơ tơnăr noh. Tơnăr dur noh lăng rŏ ưh pă gơh pơrăm noh gô păk kơplah đei nơ̆r jrĕo ôr đơ̆ng đon lui- tơm đơ̆ng lu bơ̆n chu yom. Athei lui ngeh tơdrong kĕ jei đei ư ang noh oei chang gô ih tơ pah to tơnăr dur noh.

Brei mơsơ̆ âu, kơdih inh đei hlôi mơn tơdrong ‘nâu kơplah dan đon lui lăm tơdrong wă pơm. Sâu drŏkăn inh oei nge đei bơlŏ. Na kơplah noh inh kư̆m oei bơlŏ, mălei lăm jơhngơ̆m, inh mơn kơ đei pơtrŭt dêh athei năm krao khan kơ sâu noh. Đơ̆ng rŏng kơ minh ‘bar jơ brŏk tơhnam, bơlŏ yuh sâu noh rai dă ‘biơ̆ na truh tơ pơge akâu jăn sư praih hloi bơih. Noh jơ̆ kơplah inh mơn kơ đon lui tơpă huay kơ gô pơhiơ̆ ‘mơ̆i. Nhen thoi nơ̆r jreo ôr wă kơ tơnăr dur noh pơchah sơ̆, inh yak năm gơnang kơ dôm Nơ̆r Kră Yang đei pơma khan. Mă khan lăm kơplah noh, inh tam mă đei đon lui tih, mălei inh băt kơ inh kăl kơ chu yom păng pơjao tôm tơdrong lăm tơpang ti mơsêh mơyang Kră Yang.

Yua kơ thoi noh, tơdah lăm chăl arih ih oei đei tơnăr dur kơjăp kăl kơ teh pơchah, athei pơtơm roi tơbăt păng jreo ôr ư ang đơ̆ng dang ei, yua kơ đon lui tơpă ưh kơ đei layơ khan gô ‘mơ̆i!

Apĭnh đĭ đăng krao khan hơdai: Kơkuh kơ Kră Yang Tơ’ngla pơgơ̆r păng tơm rơh đon lui kơ kon! Lơ wơ̆t tơ’bơ̆p tơdrong pơlong lăng lăm tơdrong arih, jơhngơ̆m kon ‘bônh kơ pơ̆k huŏng hăm hli tơrơ păng ưh kơ pơ̆n wă yak năm tơ anăp. Apinh Ih huay kơ jô̆ yo kơ đon lui ưh kơ đei lơ đơ̆ng kon. Apinh Yang Bơhngol ‘Lơ̆ng Ih tơiung ming lăm kon hăm tơdrong mơsêh ‘nao. Apinh ăn kơ kon jơhngơ̆m hơđơ̆ng wă kơ hơri ư ang mă khan tơdrong arih ưh kơ thoi kơdih wă, păng yak năm kiơ̆ kơ Ih chông ba. Kon lui gơnang păng pơjao tôm tơdrong kiơ̆ kơ Ih lăp đon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, đon lui tơpă hloh kơ kon bơngai dan ăn đĕch, noh jơ̆ tôm kơ trong yak năm hơ iă dêh đơ̆ng tơdrong hlôi mơn păng chu yom Kră Yang rim năr. Kơplah tơ’bơ̆p dôm lu kông tih kơjung, tơplih kơ tơhiong jơhngơ̆m hli tơrơ, athei ăn jơhngơ̆m năm tơ Tơ’ngla chĕp tơdrong arih ih. Kơplah jơ phŭt ‘nâu, tơdah đei tơnăr dur ayơ pơgăn tơdrong pơgơ̆p ih hăm Kră Yang, athei pơ̆n nuih dơ̆ng tơ lăm anih noh, mơ̆ng nơ̆r pơma khan đơ̆ng Yang Bơhngol ‘Lơ̆ng păng hlôm keng ư ang re jơwa. Athei lui kơjăp kơ tơdrong mơsêh kĕ jei đơ̆ng Kră Yang gô tuh tơ lăm jơhngơ̆m băt kơ chu yom păng chang gô.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.