Gơs ală tŭ oh mi ơn jơh nùs he hôi dă mơ ơn wil tơl bơta dòn tòm Yàng. Oh mi gơs bơta rơndăp jơh rài kis he in sơnđing dê jơnau hôi dăn hơ̆, bơh kư kơlôi lah Kơnrãn rơp dơp jơnau. Oh mi dòn lah bơta kop ji he dê nên cê rơp geh sơmbơi, lah oh mi rơp geh broă lơh jat kơp kỡn hơ̆ , hala oh mi rơp tơnggơs hiu nhă tòm sơnăm dô hal sơnăm ngkơi. Mơya tòm tŭ ală bơta ò gơlik gơs be bơta kơp kỡn, gen bơta gơlơh roh gơn kơnơm sơnrơp rgơi mhăr gơlik gơs bơta srat bơtăng, jê sồt mơ pin wil wơl tòm jrô ndơp hwềng soan.

Ngai do, ngai 04/07/2026, Bơta Hoi Dan Kơp Ngai dăn jà ală ồng mò oh mi kơlôi sơnưng bal Jơnau Yàng kơnơm dê bơta dong kơl Jennifer E. Jones dê bơh tơnggumê ĐAH NGKƠI ALĂ JƠNAU HÔI DĂN Ò GEH JƠNAU HƠ.

“Bơh be ală tap trồ la jơnhoa rlau mơ plai ù kàr lơi, gen ală gùng dà Añ jê la jơnhoa rlau mơ ală gùng dà bol mê dê, mơ ală bơta kơlôi sơnơng Añ jê kung jơnhoa rlau mơ ală bơta kơlôi sơnơng bol mê dê kàr hơ̆ sơl.” (Esai 55:9)

Tŭ sơntơm cih bơta bơtê hôi dăn kơp ngai do, ãn neh lòt găn dô bơta tơmbơhbơr jŏ jong mơ dô nă cau bơyô. Bol he bơyai bơh gùng Yàng Tòm TRồ dơp jơnau hôi dăn…hala tơm toh ngăn la tŭ Kơnrãn ơm mŏ.

Bơta hơ̆ kung ơs gơlik gơs tòm gùng lòt jat Yàng. Sơlơ cơnđòa lòt mơ Bơtau Krist jŏ sơnăm, bol he sơlơ đăl git lah rai kis dô ò bă liă hala jat rup rnoas be ală sră bơtê mơ bol he geh bơtê. Mơ ngăn la, gùng lòt bơta dòn bềng liu ală pah jù bềng gơlong bol glăr. Cau lơi tòm bol he ò hềt gơs dô bơta git lam jê sồt: bol he tuh jơh nùs he, hôi dăn ràc ròc bơta mơ he don nền lah niam nùs Yàng, nàng gen lồi dut ming git sền jơ ntas tiêng liêng nggul mơnăng tòm bơta ơm jŏ rngòt rngơt?

Mơya gơs dô bơta song ngăn bol he pal cang dơp rò. Bồ dơngoh gơs nhal kòn mơnus dê ơs ò rgơi git loh geh nùs nhơm dơng ryũ Yàng Tòm Trồ dê, mơ bol he ò hoan wơng jơh ală bơta kơlôi sơnưng mơ gùng dà Kơnrãn ai rai kis he in. Hơ̆ la jơnau song tòm Sră Goh.

“Bơh be ală tap trồ la jơnhoa rlau mơ plai ù kàr lơi, gen ală gùng dà Añ jê la jơnhoa rlau mơ ală gùng dà bol mê dê, mơ ală bơta kơlôi sơnơng Añ jê kung jơnhoa rlau mơ ală bơta kơlôi sơnơng bol mê dê kàr hơ̆ sơl.” (Esai 55:9)

Rơp gơs ală ngai oh mi wil tơl ò rgơi lơh bơta lơi, ò rgơi wơng Yàng găm lơh bơta lơi. Hơ̆ la bơta song ngăn dềt lúi tòm tũ bol he mut tòm bơta gơtơmklac mơ Bơtau Ò Gơs Nhal – Bơtau găm ăt bồ mơ lơh gơs seng ntàs chờ lam ù tiah. Bol he ò gơs gơnoăr, mơ kung ò tơl pràn nàng hoi lùp Kơnrãn păl yăl kơp pơnah tòm rup wil tơl Kơnrãn dê.

Geh pơndơm pơniang ngăn tòm tũ bol he ò lọt is tòm gùng lòt dô. Ală cau dơng ryũ tòm bơta dòn tiang pơnrơ jơh tòm pah rai Sră Goh kung gơs dơ̆ wơng tis nùs kỡn Kơnrãn. Bol khai kung neh pơyoa sră sơnđăn măt bơta hôi dăn dăn tus hơ “cau tơm Lơgăr Trồ” mơ ming dơp wơl jơnau hơ lah “wă broă”. Bulah cơnđòa lòt dềt mêr mơ Yàng hơđăng hơđăng ù do mbe lơi, bol khai kung wơng lah kòn mơnus ò rgơi wơng jơh ală bơta kơlôi sơnưng Bơtau Git Jơh dê. Rơp gơs ală tũ lơmpah, bơh mhăr ir kơp kỡn, bol he ntoat lai mơ Yàng mơ ơm gơn Kơnrãn tòm dô nơm ơnih tiah mơ Kơnrãn òhêt lơh nền ơn jơng tus.

Behơ̆ ngăn sơl gơs ală jơnau hôi dăn ò tũ lơi geh dơp? Nùs nhơm dòn song mơ ơs iat kơno Yàng Tòm Trồ dê đơs nền bơta sơlơ̆ wơl (dăn sền Jơnau Pơnđik 15:29). Kơnrãn hơ wơl ală jơnau hôi dăn, jat gùng dà ndrơm mơ gùng oh mi hơ wơl mơ kòn he dê: Di, Ò, mơ Ò hềt tus tũ jơ.

Tòm tũ oh mi gơloh be ală jơnau hôi dăn gơduh tòm gùng lồi, Hơ̆ la tũ bol he păl càng ơm bơdơh wơl, ntao diđap Kơnrãn nàng đơs lah: “Khoai Yàng, Kơnrãn găm dơp jơnau kòn jat gùng mơ gơs gar mat đah hwềng kòn dê ò hềt sền gŏ?” hôi lùp tĕ Kơnrãn. Kơnrãn rơp ràng tơlik oh mi in.

“Yàng Jehôwa, Bơtau Dong Tơwài mê, Bơtau Sàng Goh Israel dê, đơs be do: “Añ la Yàng Jehôwa, Yàng Tom Trồ bol mê, la Bơtau bơto bơta lơi la niam rlau jơh bol mê in, la Bơtau neh tề lam bol mê tòm gùng bol mê pal lòt.” (Êsai 48:17)

Dơp geh sèng hơ “Di” bơh Yàng gen crih crai ngăn. Hơ̆ tòm toh la ală bơta bol he kơp kỡn, mơ gơlik gơs tòm toh tũ jơ. Jơh tơl nă bol he ò buôn nàng jong rơ Yàng tòm tũ Kơnãn lơnggơh bồ. Mơya, rai kis ò di tũ lơi kung gơ lờt jat nùs kỡn bol he dê.

Jơnau “Ò” Yàng dê la bơta kălkê dơp rò rlau jơh, mơ sơlơ jê sồt rlau tai tòm tũ dòn jat. Bulah behơ̆, bơta krơi đah nggkơi jơnau hơ “Ò” hơ̆ la: Yàng sùm ai lòt bal mơ jơnau hơ bơh bơta nđàc nàng bol he ntao diđap bơta gơlik gơs ò bơtoah. Kah wơl tĕ Cau Gơnoăr Bơto Dơng Pol tòm tũ ông ràc dăn mơ Yàng dăn Yàng tă jan mŭ yar tòm poac ồng dê. Să tơm tòm bơta gơlik gơs jê sồt hơ̆, sèng Sră Goh neh gơs: “Bơta nđàc Añ jê neh tơl mê in,” (I Kôrintô 12:9). Đơs gùng ndai, bơta nđàc Kơnrãn rơp tơn bềng ală pah pơnah gợi. Hơ̆ la jơnau hơ bơh bơta gơs mat Kơnrãn dê tòm bơta ơm is, gơnoăr pràn Kơnrãn dê tòm tŭ bol he lơbơn, mơ bơta lơngap lơngai tiă rlau mơ ală bơta wơng git tòm tũ bơta kơlôi rcăng gơrwàng gut dar. Bơta nđàc Kơnrãn lohư bơi ală bơta lề làc tòm hwềng soan.

Tòm đah sền lăng niam, ãn dòn lah sèng hơ “Ò hềt tus tũ jơ” tus ơs mơng rlau bol he kơlôi, krơi ngăn la tũ jơnau hôi dăn oh mi dê wil tơl niam nùs Yàng mơ tòm toh jat Jơnau Kơnrãn. Bơta gơlong dơng rlau jơh sèn hơ do dê la bol he pal cang gơs nùs kơ̆ win dòn duh mơ dòn kơnơm wil tơl. Bol he pal kơ̆ nùs dòn lah Yàng Tòm Trồ ò hŭi he – mơ ndrơm be bơta gơtơnggŏ Habakuk dê – tŭ lơh nền Kơnrãn dê nền cê rơp tus (dăn sền Habakuk 2:2-3). Đơs gen buôn rlau mơ lơh, ãn git, mơya hơ̆ la nùs nhơm bơta pơrlong đah hwềng dê mơ bol he pal gơs pơnah.
Gùng lòt mơ Yàng la dô bơta pơrlong bơta kong ơt kơ̆ dơn dê, ò di la dô bơta pơrlong ntoat jak hala công nha đah bơdih. Gơs cau tòm bol he rơp niam nùs hơ mơ Yàng lah: Bulah gơs ală bơta gơlik gơs lơi, tian gơs kòn ò hềt wờng broă Kơnrãn găm lơh, kòn kung lơh nền sàc ntao kơ̆ bơta dòn tòm Kơnrãn?

Dan jà bol he dô nùs bal tòm bơta hòi dan: Khoai Yàng kỡn gơboh kòn dê, kòn dăn tus diđap sơbàn Kơnrãn mơ jơh bơta song ngăn dô nơm nùs nhơm găm jê sồt dê. Ơ Yàng, gơs ală tũ kòn ngăn gơhùc nus, ò rgơi lơh bơta lơi bơh ò rgơi wơng gùng dà Kơnrãn găm at bồ hơđăng rai kis kòn. Dăn Yàng toh glài kon in ală tũ kon gơjal ntoat lai mơ Kơnrãn, mơ bal ală tũ kòn moat jrung gơjrãn, boah yoam Kơnrãn. Kòn dăn Kơnrãn ai bơntơl pràn bơta dòn lơbơn kòn in, dăn dong kòn git lam geh bơta nđàc wil tơl Kơnrãn dê bơh tòm ală tiah klăm jơngo rlau jơh tơn. Kòn dăn sàc bơta dòn song mơ kơ̆ win, lơh nên ò lơi nàng pơnjat lòt tòm gùng do. Kòn jơh nùs hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, Yàng sùm kơp kỡn sền gŏ bol he ntao kơ̆ tòm bơta dòn, bal mơ tòm tũ ală rơndăp sư tòm dê wil tơl gơtup pừ. Tòm tũ ntao diđap mơ bơta ơm mŏ rngòt rngơtm hŏ kung la tũ bơta dòn ngăn geh ràng tơlik găn di nùs kơ̆ dơn ơm gơn. Behơ̆ gen, sèn lùp lơh nền să tòm oh mi in mơ ẵn tũ do la: bol he gơs khin ntoat hơđap mơ nùs dòn song song ngăn, ala mơ ală bơta dơp git tus dô ết? Kơp kỡn lah bơh tòm ală tiah klăm jơngo rlau jơh tòm rai kis dê, oh mi mơ ẵn găm rgơi đơs mơ Kơnrãn mơ jơh ală bơta khin cha: “Khoai yàng, gơs kòn do!”

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.