Đei kơ dôm kơplah ih tuh đĭ jơhngơ̆m kơdih krao khan păng dan đĭ tơdrong lui ngeh anih Kră Yang. Ih proh hơmet kơ đĭ tơdrong arih kơdih gơnang lăm nơ̆r krao apinh noh, yua kơ lui tơpă khan Sư gô mơ̆ng nơ̆r. Ih lui khan tơdrong jĭ đơ̆ng kơdih tơpă gô gơh pơklaih, khan ih gô sơng iŏk tơdrong jang hơpơi wă ‘noh, dah ih gô iŏk hnam dơnŏ lăm sơnăm ‘nâu dah sơnăm đơ̆ng rŏng. Mă lei tơdah tôm tơdrong ưh kơ đei truh thoi chang hơmĕng, lei mơn lăm jơhngơ̆m ưh pă đei hơmĕng blŭng a rŏ lăng hrĕnh tĕnh jing tơdrong chhŭr nuih, ơh sơ’ngon păng ngĭl ngŭl lăm jrŭ anih bơhngol.

Năr ‘nâu, ‘năr 04/07/2026, tơdrong tơdă Amăn Jơ Krao Khan Rim Năr apinh wơ̆n lu bơ̆n wang mơ̆ng pơwao hơdai Nơ̆r Kră Yang hăm bơngai chih Jennifer E. Jones kơ̆l ‘bai DÔM LU NƠ̆R KRAO KHAN ƯH KƠ ĐEI TƠL TƠWIH GÔ BRŎK TƠYƠ

“Plĕnh kơjung hloh kơ teh dang yơ, na trong Inh kơjung hloh kơ trong lu iĕm, păng đon tơchĕng Inh kơjung hloh kơ đon tơchĕng lu iĕm kư̆m dang noh.” (Êsai 55:9)

Kơplah pơtơm chih hơmet ‘bai Amăn jơ krao khan ‘nâu, inh ‘nao tơ‘bơ̆p minh tơdrong pơma dơnuh đunh jơ năr hăm minh ‘nu bơngai buăl. Lu nhôn pơđâu gah tơdrong ‘Bok Kei-Dei mơ̆ng nơ̆r krao khan… dah trŏ hloh jơ̆ kơplah Sư oei thĕng hreh.

Tơdrong ‘noh đei ngăl truh lăm trong yak năm kiơ̆ Kră Yang. Rai yak năm hăm ‘Bok Krist đunh sơnăm, lu bơ̆n rai ‘bôh băt khan tơdrong arih ‘nâu ưh kơ đei ‘bônh dah pơm kiơ̆ thoi kơ dôm ‘bai chih hơmet lê̆ mă lu bơ̆n đei hŏk pơhrăm. Tơpă, trong yak năm đon lui ‘bĕnh blai dôm kơ anih ưh kơ rơđah hơđăl ‘bĕnh tơdrong pơlong lăng. Bu lăm lu bơ̆n ưh tim mă đei minh tơdrong đơ̆ng đei hlôi tơ’bơ̆p ơh sơ’ngon: lu bơ̆n ăn đĭ jơhngơ̆m, krao khan apinh đĭ jơhngơ̆m kơ tơdrong mă bơ̆n lui tơpă khan kŭm trŏ thoi Kră Yang wă, na gô tuch luch lăp băt lăng tơ jơ oei dăr re teng neng tŏk bŏk măng lăm tơdrong thĕng hreh trŏ kơ hli?
Mă lei đei minh tơdrong tơpă lu bơ̆n kăl kơ sơng iŏk. Đon tơchĕng đei hơgăt đơ̆ng kon bơngai trŏ ưh kơ gơh ‘bôh băt kơ tơdrong tih hloh đơ̆ng ‘Bok Kei-Dei, păng lu bơ̆n tă kơ rai ưh kơ hlôh băt đĭ dôm tơdrong tơchĕng hăm tơdrong tơdă Sư ‘măn kơ chăl arih bơ̆n. ‘Noh trŏ jơ̆ tơdrong tơpă lăm Nơ̆r ‘Bok Kei-Dei.

“Plĕnh kơjung hloh kơ teh dang yơ, na trong Inh kơjung hloh kơ trong lu iĕm, păng đon tơchĕng Inh kơjung hloh kơ đon tơchĕng lu iĕm kư̆m dang noh.” (Êsai 55:9)

Gô đei dôm kơ năr ih ưh kơ băt pơm thoi yơ, ưh kơ gơh hlôh kơ Kră Yang oei pơm kiơ. ‘Noh jơ̆ tơdrong đei tơpă tơdah lu bơ̆n yak lăm tơdrong pơgơ̆p hăm Tơ’ngla ưh kơ đei hơgăt- Tơ’ngla oei pơgơ̆r păng đei jing ‘bai hơri đơ̆ng đĭ kơ teh đak. Lu bơ̆n ưh kơ gơh đei tơdrong pơgơ̆r, păng ưh kơ đei gơh hơgei wă athei Sư tơ’bôh tơbăt hơđăl đơ̆ng rim kơ tơdrong lăm đĭ kơ rup đơ̆ng Sư.

Đei pơlung tơpă kơplah băt khan lu bơ̆n ưh kơ đei minh drô̆ lăm trong yak năm ‘nâu. Dôm kơ bơngai gơh hơgei đon lui pran kơtang hloh lăm chăl Sơ̆p Hla Bơar Nơ̆r ‘Bok Kei-Dei sơ̆ kŭm đơ̆ng đei kơplah hlôh ưh kơ trŏ tơdrong đơ̆ng Sư wă. Lu sư kŭm đơ̆ng gưih ăn tơdrong chih hơmet krao apinh tơ “tơdrong tơ’bưh hăm Plei ‘Lơ̆ng”. Mă khan yak năm hơdai hăm Kră Yang kơpal teh đak ‘nâu truh tơ yơ, lu sư oei hlôh khan tôm tơdrong tơchĕng đơ̆ng Tơ’ngla Mơsêh mơyang. Gô đei dôm kơplah, yua kơ hăt hot dêh, lu bơ̆n kơdŏu hloh adrol kơ Kră Yang păng dơ̆ng gô Sư tơ minh anih mă Sư ưh tim mă wă yak truh.

Thoi noh, hăm trŏ đei kơ dôm nơ̆r krao khan ưh kơ đei layơ đei tơl tơwih? Tơdrong tơpăt trŏ thoi noh păng dah mơ̆ng kơ tơ̆ng đơ̆ng ‘Bok Kei-Dei pơkă tơdrong tơplơ̆ dơ̆ng (apinh lăng Tơdrong Pơđơ̆k 15:29). Sư tơl tơwih dôm nơ̆r krao khan, kiơ̆ trong lei lăi hăm trong ih tơl tơwih kon hơ’lơ̆p ih: Gơh, Ưh, păng Ưh tim mă trŏ jơ.

Tơdah ih mơn lăm jơhngơ̆m thoi kơ dôm nơ̆r krao apinh đei huŏng lăm trong tôch, ‘noh jơ̆ kơplah lu bơ̆n kăl kơ pơdơh, tơ’bơ̆p hăm Sư wă apinh khan: “Kơkuh kơ Kră Yang, Ih oei tơl tơwih nơ̆r kiơ̆ kơ trong ayơ mă măt bơhngol đơ̆ng kon ưh tim mă lăng ‘bôh?” Athei apinh jet Sư. Sư gô tơ’bôh ăn kơ ih.

“Kră Yang Tơ’ngla dŏng pơklaih iĕm Tơ’ngla ‘Lơ̆ng Rơgoh Isơrael khan: “Inh bơih Kră Yang, ‘Bok Kei-Dei iĕm, Tơ’ngla bơtho iĕm mă đei tơdrong ‘lơ̆ng kơ iĕm păng dui ba iĕm lăm trong iĕm gô năm.” (Êsai 48:17)

Sơng iŏk nơ̆r tơl tơwih “Gơh” đơ̆ng Kră Yang lei ‘lơ̆ng rŏ tơpă. ‘Noh trŏ jơ̆ hăm dôm tơdrong kiơ lu bơ̆n chang gô, na kŭm đei truh trŏ kơ jơnăr. Đĭ đăng lu bơ̆n đei ‘bônh kơ hơri ư-ang kơ Kră Yang tơdah Sư drơ̆ng. Mă lei, tơdrong arih ưh kơ trŏ layơ kŭm đei truh kiơ̆ thoi lu bơ̆n wă.

Nơ̆r “Ưh” đơ̆ng Kră Yang jơ̆ tơdrong anat kơ sơng iŏk hloh, păng rai ơh sơ’ngon hloh kơplah athei chu kiơ̆. Mă thoi noh, tơdrong hlĭch chrơp đơ̆ng rŏng kơ nơ̆r “Ưh” ‘noh jơ̆: Kră Yang ling lang ăn thim nơ̆r pơkă gah minh tơdrong mơnat ăn đĕch ăn kơ lu bơ̆n tơ’bơ̆p hăm tơdrong kơnê̆ truh. Athei ‘blŏk đơ̆ng ‘bok Pôl kơplah sư đĭ jơhngơ̆m apinh Kră Yang iŏk lê̆ hrơ̆k đơ̆ng akâu jăn. Trŏ lăm tơdrong arih ơh sơ’ngon ‘noh, chăl Sơ̆p Hla Bơar Nơ̆r ‘Bok Kei-Dei đei chih khan: “Huay ôh, ih kư̆ kơ jang tơdrong Inh mă tơpă đĕch, tơdrong ih jang ưh kơ kĕ ưh kơ pran noh lê̆ kơ Inh tơgŭm ih” (II Kôrintô 12:9) Pơma trong pha, tơdrong mơnat đơ̆ng Sư gô tuh tơ’bĕnh dôm anih oei rơhông. ‘Noh jơ̆ nơ̆r pơkă gah tơdrong oei hơdai đơ̆ng Sư kơplah lu bơ̆n rơdu, păng tơdrong hiôk hian hloh kơ tôm tơdrong hlôh băt kơplah tơdrong hiơ̆k bơngơ̆t jum dăr. Tơdrong mơnat ăn đơ̆ng Sư pơklaih dôm tơdrong pơchah anih bơhngol.

‘Bơ̆t minh anih lăng ‘bôh ‘lơ̆ng tơpăt, inh lui khan nơ̆r tơl tơwil “Ưh tim mă trŏ jơ” gô truh hơnơ̆ng hloh kơ lu bơ̆n tơchĕng, gĭt hloh jơ̆ kơplah nơ̆r krao khan đơ̆ng ih trŏ tơpă Kră Yang lăp đon păng trŏ kiơ̆ Nơ̆r Sư. Tơdrong pơlong lăng tih hloh đơ̆ng nơ̆r tơl tơwih ‘nâu jơ̆ lu bơ̆n kăl kơ đei jơhngơ̆m adrin chu yom păng lui gơnang đĭ jơhngơ̆m. Lu bơ̆n athei lui kơjăp khan ‘Bok Kei-Dei ưh kơ hiơt hiong kơ bơ̆n- păng lĕi lăi thoi tơdrong đei ‘bôh đơ̆ng Habakuk- Yua kơ tơdrong tơ’bôh gô ‘blep trŏ lăm năr pơkă (lăng lăm Habakuk 2:2-3). Pơma lei ling lang ‘bônh hloh kơ pơm, inh băt, mă lei ‘noh jơ̆ trŏ thoi noh đơ̆ng tơdrong kơdâu pơjei bơhngol mă lu bơ̆n athei hơdai.

Trong yak năm hăm Kră Yang jơ̆ minh tơdrong kơdâu pơjei đơ̆ng tơdrong pŭ iŏk kơjăp, ưh kơ trŏ jơ̆ tơdrong kơdŏu pơjei gah hrĕnh tĕnh dah kĕ jei gah ‘nguaih. Lei bu lăm lu bơ̆n gô đei pơma hloi hăm Kră Yang khan: Mă đei dôm tơdrong kiơ truh, mă khan kơplah kon ưh tim mă hlôh tơdrong Ih oei bơ̆jang, kon oei pơdrơ̆ng rơih lui kơjăp anih Ih?

Apĭnh đĭ đăng krao khan hơdai: Kơkuh kơ Kră Yang mă ‘mêm kơ kon, kon apinh năm ‘bơ̆t anăp anih Ih hăm đĭ đăng tơdrong đĭ jơhngơ̆m đơ̆ng minh jơhngơ̆m oei ơh sơ’ngon. Kră Yang ơi, đei kơplah kon bơ̆l hăl tơpă, ưh kơ băt pơm thoi yơ yua kơ ưh kơ gơh hlôh băt trong yak Ih oei pơgơ̆r lăm chăl arih kon. Apinh Kră Yang huay kơ jô̆ yo kơ dôm kơplah kon hăt hot kơdŏu hloh adrol kơ Ih, păng hăm dôm kơplah kon blĕk ơh, jô̆ jŏk kơ Ih. Kon krao apinh Ih ‘măn ăn jơhngơ̆m pran kơ đon lui rơdu đơ̆ng kon, apinh tơgŭm kon hlôi mơn đei tơdrong mơnat ăn đĕch tôm mah đơ̆ng Ih lăm kơplah dôm kơ anih dăr măng mu hloh. Kon drơ̆ng rơih iŏk tơdrong tơnăp păng anih pơdơh, adrin ưh kơ achăng wă yak pơtrơp yak năm trong yak năm ‘nâu. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Kră Yang ling lang hơpơi wă lăng ‘bôh lu bơ̆n dơ̆ng kơjăp lăm đon lui, mă khan kơplah dôm tơdrong proh hơmet đơ̆ng akâu jăn pơ̆k huŏng tơpă. Kơplah tơ’bơ̆p hăm tơdrong thĕng hreh hli tơpă, ‘noh kŭm jơ̆ kơplah đon lui tơpă gơh tơ’bôh đơ̆ng jơhngơ̆m adrin chang gô, tơplih yua kơ achăng lăm jô̆ jŏk. Yua kơ thoi noh, nơ̆r jet pơdrơ̆ng kơ kơdih ih păng inh kơplah ‘nâu jơ̆: Lu bơ̆n hăm pơ̆n yak tơ anăp hăm jơhngơ̆m tơnăp tơpă, tơplih yua kơ dôm mơn lăm jơhngơ̆m dang ei đĕch? Hơpơi khan kơplah lăm dôm mum măng mu hloh đơ̆ng tơdrong arih, ih păng inh oei gơh apinh hăm Sư hăm đĭ đăng tơdrong pơ̆n nuih: “Kơkuh kơ Kră Yang, đei inh âu!”

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.