Ih tam đei layơ tơchĕng, pơm liơ wă kơ bơngai jum dăr kư̆m đei băt kơ Kră Yang đơ̆ng lăm tơdrong arih hrăt hrot hiơ̆k bơngơ̆t bơ̆n? Lu bơ̆n ngăl chă ‘Bok Kei-Dei oei hơdai lăm dôm tơdrong mơsêh tih dah dôm kơ hlôi mơn gah bơhngol hlĭch chrơp, mălei hiơt lê̆ kơ Kră Yang oei ling lang bơ̆jang đơ̆ng lăm tơdrong iĕ hloh lăm tơdrong arih rim năr.

Năr ‘nâu, lu bơ̆n hơdai chơchă tơdrong ‘lơ̆ng păng hlôh wao đơ̆ng Kră Yang đei tơ’bôh đơ̆ng dôm lu tơdrong lăng nhen thoi hmă đĕch.

Năr ‘nâu, ‘năr 05/07/2026, tơdrong tơdă Amăn Jơ Krao Khan Rim Năr apinh wơ̆n lu bơ̆n wang mơ̆ng pơwao hơdai Nơ̆r Kră Yang hăm bơngai chih Martha Noebel kơ̆l ‘bai TƠDRONG GƠH HƠGEI ĐƠ̆NG ‘BOK KEI-DEI LĂM TƠDRONG ARIH RIM NĂR

“Wă khan lu bơ̆n boih kon Sư, na Sư wă tơgŭm bơ̆n tôm tơdrong, tôm kơ khŭl kon bơngai jơ̆p kơ teh đak. Tơdrong Sư tơgŭm bơ̆n noh thoi yơ, wă khan thoi âu: Sư ăn Yêsu Krist oei lăm bơ̆n, na bơ̆n gơh băt kơ ning-mônh bơ̆n gô oei arih hiôk jơnap hăm Sư.”  (Kôlôssê 1:27)

“Lăp yă pơtao dêh char Sêba ‘bôh dôm tơdrong gơh hơgei Sôlômôn păng hnam pơtao sư đei pơm, tơmam sŏng sa kơpal gơ’bang, tang-dŏ lu bơngai jang sư hơ-oei, tơdrong jang lu đĭch đam sư, hơbĕn ao lu sư hrŭk, lu bơngai năm ba kơchŏk đak nhă pơtao păng dôm tơmam soi pơyơ̆r lăm Hnam kơkuh kơ Kră Yang, yă pơtao ưh pă gơh pơma kiơ.” (I Lu Pơtao 10:4-5)

Đei layơ ih jet kơdih yua kơ kiơ ‘Bok Kei-Dei ‘maih wă kơ răk đơ̆ng dôm lu tơdrong lăng nhen thoi hmă đĕch lăm tơdrong arih rim năr lăm Sơ̆p Hla Bơar Nơ̆r ‘Bok Kei-Dei ‘nâu? Lu bơ̆n ‘bônh kơ hlôh yua kơ kiơ minh ‘nu bơngai drŏkăn thoi kơ Sêba sư ‘bôh hlĭch kơ pơtao Sôlômôn đei đon gơh hơgei, mơdrŏng mălei chu yom Kră Yang. Kơlih kơ thoi noh, Sôlômôn đei tơdrong kiơ đơ̆ng sư dan tơmam sa mă pơm kơ Sêba lăp đon păng pơyom? Rŏlăng anih sŏng sa noh ‘lơ̆ng rŏ dêh, na hơbĕn ao lu đam sư đei sĭt đơ̆ng brai kăp jên. Mălei, anih tơ oei lơ bơngai noh phara kiơ? Păng yua kơ kiơ sư ‘bôh hlich đơ̆ng dan proh hơmet lu tơdrô? Tơdrong ‘nâu pơtrŭt inh lăng ming tơdrong arih gah bơhngol. Inh lui ngeh ‘Bok Kei-Dei ling lang wă pơm kơ tơdrong arih lu bơ̆n, wă kơ đơ̆ng tơdrong iĕ păng lăng hmă đĕch, bơngai nai ‘bôh tơdrong hơdah Kră Yang. Lơ wơ̆t lu bơ̆n bơwei tơdrong arih gah ‘nguaih ‘bôh kư̆m ‘lơ̆ng, pơdah jơhngơ̆m đon đơ̆ng ‘Bok Kei-Dei pơjing. Đơ̆ng ‘bôh tơdrong noh, yă pơtao Sêba pơma khan:

“Kơkuh bơnê kơ Kră Yang ‘Bok Kei-Dei ih, yua kơ Sư lăp đon kơ ih ăn kơ ih hơ-oei kơpal tang-dŏ pơtao lu bơngai Isơrael! Yua kơ Kră Yang ‘mêm kơ Isơrael ling-lang, thoi noh na Sư ăn kơ ih pơm pơtao wei-lăng wă kơ ih pơm tơdrong trŏ păng ‘lơ̆ng tơpăt.” (I Lu Pơtao 10:9)

Minh ‘bar ‘nu lăm hnam dơnŏ nhôn đei pơsĭt tơ’bôh tơdrong ‘nâu. Hnam lu sư ling lang rơgoh ‘lơ̆ng păng hiôk hian. Tơdrong lu sư hiôk noh đơ̆ng lu sư chu yom ăn kơ Kră Yang pơjing tơdrong arih băt kơ pơm kiơ̆. Lu sư yak năm lăm tơdrong gơh hơgei đơ̆ng ‘Bok Kei-Dei, tơ’bôh tơdrong ‘mêm đơ̆ng Yang Yêsu, đơ̆ng đei jơhngơ̆m ră roi tơdrong ‘nao ‘lơ̆ng, păng đơ̆ng tơdrong tơpăt pơgơ̆r tơdrong arih rim năr. Đơ̆ng noh, inh lăng ‘bôh tơpang ti mơsêh Kră Yang bơ̆jang pran tơpă, nhen thoi dôm lu tơdrong jang Yang Bơhngol ‘Lơ̆ng bơ̆jang lăm lu sư.

Inh lui ngeh ‘Bok Kei-Dei lăp đon dêh tơ’bôh tơdrong gơh hơgei Sư ăn kơ rim ‘nu lu bơ̆n (Yakơ 1:5). Kơplah ‘Bok Kei-Dei tuh ăn tơdrong gơh hơgei rim năr, kư̆m đei dôm tơdrong bơtho tơ’bôh noh tuh ro truh tơ lu bơ̆n tơchĕng noh tơdrong tơchĕng kơdih. Tơdrong mơn băt kơ tơdrong pơwao noh đei đơ̆ng Yang Bơhngol ‘Lơ̆ng gô hơmet ming đon lui lu bơ̆n, pơsĭt rơđah ăn kơ tơdrong mơsêh kơ “Yang Yêsu Krist oei lăm bơ̆n” (Kôlôssê 1:27). Tơdrong hrĕp mơsêh đơ̆ng Kră Yang đei pơjing đơ̆ng dôm tơdrong tih hloh truh tơ dôm lăm mum hlơp lăm tơdrong arih, tơm kơ ba ăn tơdrong hơdah chông ba bơngai nai năm tơ anih hli yom kơ tơdrong gơh hơgei đơ̆ng Kră Yang.

Kơdih akâu inh đei hlôi mơn kơ tơdrong noh lơ wơ̆t bơih. Brei mơ sơ̆ ‘nâu kơplah năm jang, inh mơn “đei tơdrong tơchĕng” ‘maih wă hơdai pơgơ̆p pơđâu mă đơ̆ng blŭng a inh ưh kơ đei wă năm. Na tă kơ noh jơ̆ trŏ tơpă, yua kơ lu tơdrong đei pơma tơ’bôh lăm pơgơ̆p pơđâu noh tơgŭm inh wer weh đơ̆ng dôm lu tơdrong jang ưh kơ kăl. Inh hiôk tơpă yua kơ đei pơtrŭt gơh hơgei đơ̆ng Kră Yang. Inh gĭt dêh đơ̆ng dôm lu tơdrong Yang Bơhngol ‘Lơ̆ng pơchrang hơdah păng chông ba, mă khan tơdrong jang tih dah iĕ.

Sơ’ngon tơpă, đei lơ wơ̆t inh ưh kơ pơm kiơ̆ nơ̆r krao hrĕp hreh noh. Pơtih gia kơplah pơdơh lăm bơyan pơdơh kơ pơhrăm tơ hnam trưng, kơplah brŏk ngôi tơ mĕ ‘bă, inh pơdrơ̆ng lê̆ tơmam tơ kơpal gre. Inh lê̆ tơmam lơ tơ kơpal gre thoi noh đĭ kơ bơyan pơdơh yua kơ hơlah păng ưh kơ ‘maih proh hơmet tơmam truh tơ bơyan wă pơhrăm. Ih tơchĕng lăng inh lơ wơ̆t achăng lê̆ tơdrong tơ ‘blŏk lăm jơhngơ̆m dơ̆ng, athei inh ‘nĕ pă pơm thoi noh. Na gô đei lơ tơdrong inh achăng lê̆ dôm tơdrong tơgŭm ăn kơ lơ bơngai, yua ưh kơ ăn kơ bơngai nai tŏk tơ gre inh.

Na ih thoi yơ? Năr ‘nâu, inh pơtrŭt inh athei apinh ‘Bok Kei-Dei ăn dôm lu tơdrong pơwao wă kơ hơmet ming tơproh ‘lơ̆ng lăm tơdrong arih kơdih rim năr. Đơ̆ng rŏng kơ noh, athei ‘măn jơ hrĕp mơ̆ng nơ̆r Kră Yang. Rŏlăng, ih gô ‘bôh hlĭch đei lơ tơdrong pơm đơ̆ng tih truh tơ iĕ mă Kră Yang oei hơmet wă bơ̆jang tơplih tơdrong arih ih.

Apĭnh đĭ đăng krao khan hơdai: Kơkuh kơ ‘Bă tơ kơpal plĕnh ti, kon bơnê kơ Ih yua kơ tơdrong gơh hơgei păng hrĕp đơ̆ng tơdrong hlĭch đơ̆ng Ih ling lang pơjing lăm tơdrong arih kon. Apinh Ih mơnat ăn kơ kon kơplah hăt hot, achăng lê̆ dah pơm ưh kơbăt tơdrong tơ’blŏk đơ̆ng Yang Bơhngol ‘Lơ̆ng. Apinh ăn kơ bơhngol tĕnh kơ hlôh wao wă kơ mơn băt tơdrong dui ba đơ̆ng Ih đơ̆ng lăm tơdrong iĕ rim năr. Apinh Ih pơm yŏng tơ’ngla jơhngơ̆m đon kon, tơgŭm kon băt kơ bơwei jơ năr, tơdrong jang păng pơjuăt tơdrong arih kơdih pơm liơ wă kơ anăn Yang Yêsu đei ư-ang. Hơpơi kơ tơdrong ‘mêm păng tơdrong pơchrang hơdah Tơdrong ‘Nao ‘Lơ̆ng đei pơchrang đơ̆ng chăl arih kon, wă kơ bu đei tơ’bơ̆p kon đei ‘bôh Ih oei hơdai kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tơpă, tơdrong arih gah bơhngol ưh kơ pơtŏ hăm tơdrong ‘lơ̆ng tôm dah tơnăp gah ‘nguaih, mălei kơplah jơhngơ̆m lu bơ̆n chu yom Kră Yang, tơdrong gơh hơgei Sư gô hơtŭt ‘bơm tơdrong pơgơ̆r lu tơdrong pơm lu bơ̆n rim năr. Minh tơdrong bơ̆jang tơnăp djrep, tơdrong arih băt kơ bơwei dah tĕnh hlôh kơ chu yom tơdrong pơtrŭt rơngơp đơ̆ng Yang Bơhngol ‘Lơ̆ng – tôm tơdrong noh gô jing ‘bai hơri hiôk ư-ang kơ Kră Yang. Năr ‘nâu, ih hăm inh athei apinh ‘Bok Kei-Dei Sư gô pơjing ming tơdrong kiơ lăm yak năm hrăt hrot lu bơ̆n. Yua kơ tơm đơ̆ng lu bơ̆n lăp đon ăn kơ Kră Yang jing tơ’ngla đơ̆ng dôm lu tơdrong iĕ hloh, tơdrong arih lu bơ̆n gô jing nơ̆r kơdranh pran kơ Kră Yang ăn kơ lu bơngai jum dăr.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Bơngai mơ̆ng mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ ih. Tơdrong tơdă hơmĕng kơ gơh tơ ‘bưh hăm ih.